Die groot wêreldmoondhede van Bybelgeskiedenis ruk op na hulle einde!
KAN jy jou geskiedenis voorstel wat vooruit geskryf is? ‘Onmoontlik’, sê jy? Maar daar is ’n boek wat geskiedenis wel vooruitvertel het—honderde, soms selfs duisende jare voordat die gebeurtenisse plaasgevind het! Daardie boek is die Bybel.
Die Bybel het nie net eertydse gebeure akkuraat aangegee nie, maar dit het ook op ’n verbasende wyse die hooftrekke van wêreldgeskiedenis voorspel soos dit God se volk sou raak, van die tyd van eertydse Babilon, meer as 2 500 jaar gelede, tot en met en selfs ná ons tyd.
Daniël, ’n profeet wat in die sesde eeu voor ons Gewone Jaartelling gelewe het, het vier afsonderlike openbaringe ontvang wat oor die toekoms van wêreldgeskiedenis gehandel het. Waar het hy sy inligting gekry? Daniël het gesê: “Daar is ’n God in die hemel wat geheime openbaar” (Daniël 2:28). Argeoloë wat die ruïnes opgegrawe het wat van eertydse wêreldmoondhede agtergebly het, het verstommende bewys gevind van die betroubaarheid van die geskiedenis sowel as van die profesieë wat in die Bybel gevind word.
Twee van die groot wêreldmoondhede van Bybelgeskiedenis, Egipte en Assirië, het lank voor Daniël se tyd bestaan. In Daniël se tyd het Babilon geheers, en die name van die volgende twee wêreldmoondhede is aan die profeet geopenbaar (Daniël 2:47, 48; 8:20, 21). Twee ander moondhede sou ná hulle kom, wat ons tot in ons tyd bring.
Hoeveel?
Hoeveel van hierdie wêreldmoondhede sou daar volgens die Bybel wees? Die antwoord is aan die bejaarde apostel Johannes gegee en toon waar ons in die tydstroom is. ’n Engel het vir Johannes gesê: “Hulle is sewe konings: vyf het geval en een is; die ander een het nog nie gekom nie.”—Openbaring 17:10.
Watter vyf wêreldmoondhede het reeds teen Johannes se dag gekom en gegaan? Egipte, Assirië, Babilon, Medo-Persië en Griekeland. Watter een het nog bestaan? Rome. En watter moondheid het “nog nie gekom nie”? Die Anglo-Amerikaanse wêreldmoondheid van ons dag. Hierdie is die wêreldmoondhede waarin God se volk, van die hede en die verlede, hoofsaaklik belanggestel het.
En veral hierdie feit is belangrik: Daar sou ’n opeenvolging van net sewe sulke wêreldmoondhede wees! Daar is voorspel dat ’n gelyktydige agtste moondheid, wat oorblyfsels van die sewende sou insluit, vir ’n kort tydjie gedurende die dae van die sewende sou bestaan (Openbaring 17:10, 11). Dit beteken dat ons gedurende die tyd van die laaste van die groot mensbeheerde wêreldmoondhede lewe. Daar sal nie ander wees nie!
Die wêreldmoondhede se tyd sal binnekort verby wees. Daniël het geprofeteer dat hierdie mensestelsels fyngestamp en ‘deur die wind weggeneem’ sal word (Daniël 2:35). Waardeur sal hulle vervang word? Iets veel beters! Daniël vertel: “In die dae van dié konings sal die God van die hemel ’n koninkryk verwek wat in ewigheid nie vernietig sal word nie, . . . dit sal al daardie koninkryke verbrysel en daar ’n einde aan maak, maar self sal dit vir ewig bestaan” (Daniël 2:44). Niks minders nie as God se Koninkryk sal hierdie mensewêreldmoondhede vervang. Wat ’n wonderlike verbetering in wêreldheerskappy!
Jy weet ongetwyfeld iets van die wêreldmoondhede. Maar sal verdere kennis van hulle gewoontes, hul godsdiens en hulle verhouding tot God se volk en Bybelprofesie jou help om, in die lig van die Skrif, meer oor die mensdom se geskiedenis te verstaan?
Ja, inderdaad. Ons is dus bly om ’n reeks van agt artikels wat die wêreldmoondhede bespreek te druk, en die eerste daarvan verskyn in hierdie nommer. Hierdie artikels sal help om jou te oortuig dat die geskiedenis wat in die Bybel verhaal word betroubaar en geloofwaardig is. Hulle sal ook jou geloof versterk in die feit dat die Bybel se profesieë betroubaar en waar is!