Moet ek van godsdiens verander?
DIE vlieënier het kort tevore met 101 passasiers aan boord van Okinawa se Naha-lughawe opgestyg. Skielik het hy drie weerverkenningsvliegtuie op ’n botsingskoers op hom sien afpyl. Die vlieënier het onmiddellik skerp na links geswenk en daardeur ’n botsing vermy en sy eie lewe sowel as die lewens van sy passasiers gered. Daardie verslag van ’n amper-botsing, wat in ’n Noord-Japanse koerant verskyn het, lig goed toe hoe ’n drastiese koersverandering soms nodig is om lewens te red.
Baie mense meen egter dat dit ’n heel ander saak is om van godsdiens te verander. Sterk vrese begin ’n rol speel. Daar is die vrees om ’n onbekende weg in te slaan. Mev. Tatsji, wat die Bybel saam met Jehovah se Getuies bestudeer het, het haar soos volg uitgedruk: “Baie van die mense wat ek ken, het bedenkinge oor godsdiens en die klem wat dit op geld lê. Maar die godsdiensfeeste en -gebruike is al wat ons van kleins af ken en sien. Die geestelike betekenis van die hodji [die periodieke Boeddhistegedenkdienste vir ’n afgestorwene] is vir ons nie van veel belang nie. Ons beskou die hodji meer as ’n plesierige tyd om saam met familielede en bure te wees. Die gedagte om dit alles prys te gee, of nog erger, om deur die familie uitgestoot te word, het my banggemaak.” Waarskynlik het talle mense in jou buurt dieselfde beskouing van godsdiens.
Daar is ook ander vrese. Op baie plekke vrees mense die een of ander vorm van godsvergelding as hulle van godsdiens verander. Die familielede van een vrou wat die Bybel in Japan begin bestudeer het, het vir haar gesê dat sy gesondheids- en gesinsprobleme ervaar omdat sy “haar voorouers afgeskeep het” en haar hulle toorn op die hals gehaal het deur ’n “vreemde godsdiens” te bestudeer.
Nog ’n vrees wat mense verhinder om van godsdiens te verander, is die vrees om ’n huweliksmaat of ouers te mishaag. In talle Oosterse lande, waar lojaliteit aan ’n mens se ouers en familie as besonder belangrik beskou word, word daar dikwels van ’n bruid verwag om die godsdiensbeskouing van die gesin waarin sy introu te huldig. Selfs al is die paartjie nie besonder godsdienstig nie, word dit as uiters belangrik beskou om ’n goeie verhouding met die familie te behou sowel as om die godsdienstige status quo te handhaaf. Een jong paartjie het hulle Bybelstudie gestaak nadat hewige druk tydens ’n “familiesamespreking” op hulle uitgeoefen is. “Ons het in werklikheid mensevrees gehad”, verduidelik die man, wat die studie later hervat het. “Ons het gemeen dat ons ons ouers se wense moet gehoorsaam, en ons wou hulle nie seermaak deur van godsdiens te verander nie.”
Dit laat ons aan nog ’n rede dink waarom talle bang is om van godsdiens te verander: die algemene teësinnigheid om as anders beskou te word. Een van die redes waarom die ouers in die voormelde familie wou hê dat die jong paartjie hulle Bybelstudie moes staak, was dat hulle nie wou hê dat hulle kinders as eienaardig beskou of uit gemeenskapsbedrywighede uitgesluit moes word nie.
Daar is dus sterk vrese betrokke by die vraag: Moet ek van godsdiens verander? Talle ontwikkel gevolglik ’n filosofiese siening: Dit maak mos nie regtig saak aan watter godsdiens jy behoort nie, of hoe? Is alle godsdienste nie bloot verskillende paaie wat na die top van dieselfde berg lei nie? Wat godsdiens betref, is hulle soos die drie spreekwoordelike ape en sien hulle geen kwaad, hoor hulle geen kwaad en praat hulle geen kwaad nie.
Maar sommige het wel van godsdiens verander. Waarom? Vir party het dit eenvoudig beteken dat hulle by ’n ander geloof aangesluit het wat oombliklike gesondheid of finansiële voordele beloof het, terwyl hulle terselfdertyd hulle tradisionele godsdiensopvattinge en -gebruike kon behou. Vir ander was daar egter ’n wesenlike en algehele verandering. Maar jy wonder dalk: ‘Is daar werklik genoegsame redes waarom ek my godsdiens moet verander? Waarom was sommige bereid om die verandering te maak? Kan ’n verandering ’n wesenlike uitwerking op my lewe hê?’ Ons nooi jou om die volgende artikel, wat die antwoorde verstrek, te ondersoek.
[Prent op bladsy 3]
Wat beweeg mense om hulle tradisionele godsdiensgebruike aan te kleef?