Lesse uit die Skrif: Sagaria 1:1–14:21

Jehovah wakker die gees van sy volk aan

DIE Persiese koning Kores het laat in 538 v.G.J. of vroeg in 537 v.G.J. ’n bevel uitgevaardig dat die Jode van Babilon na Jerusalem moes terugkeer om ‘die huis van Jehovah te herbou’ (Esra 1:3). Teen 520 v.G.J. was die tempel egter nog nie herbou nie. Jehovah het die profeet Sagaria dus verwek om saam met Haggai die gees van die volk aan te wakker.

Sagaria se geïnspireerde woorde het getroue Jode opnuut versterk deur te toon dat Jehovah hulle ondersteun en hulle werk sou seën. Hierdie Bybelboek besiel ons ook omdat dit Messiaanse profesieë bevat, asook ander profesieë wat in ons dag vervul word.a Dit verstrek ook waardevolle lesse aan ons.

Jehovah seën sy volk

Jehovah is besorg oor sy volk. Nadat die Jode erken dat God hulle tereg gedissiplineer het, sien Sagaria drie visioene wat Sy voortdurende besorgdheid oor hulle toon. Hy sien in die eerste visioen perde met engeleruiters. Een engel is bekommerd omdat die nasies wat onheil oor die Jode laat kom het “rustig” is. In die tweede visioen besluit Jehovah om die “vier horings”—die regeringsmagte wat sy volk verstrooi het—neer te werp. En die derde visioen bevat ’n aanskoulike beskrywing van Jehovah se liefdevolle, beskermende sorg vir Jerusalem.—1:1–2:13.

Niemand sal God se getroue knegte kan keer nie. In die vierde visioen word Satan, die vernaamste teenstander van Jehovah se volk, ronduit bestraf. (Vergelyk Openbaring 12:10.) In die vyfde visioen verneem Sagaria dat God se volk Sy wil sal doen ondanks reusagtige struikelblokke. Hoe? “Nie deur krag of deur geweld nie, maar deur my Gees, sê die HERE van die leërskare.”—3:1-4:14.

God se knegte “haat die kwaad” (Psalm 97:10, 11). In die sesde visioen spreek God ’n vloek uit oor kwaaddoeners wat tot dusver ongestraf gebly het. En in die sewende visioen word ’n voorstelling van goddeloosheid na “die land Sinear”, die ligging van valse Babiloniese godsdiens, weggevoer. Die regte plek daarvoor! Boosheid hoort nie onder Jehovah se volk, wat dit haat, nie. Vervolgens sien Sagaria vier strydwaens wat deur perde getrek word—engelemagte wat beveel is om God se knegte op aarde te beskerm.—5:1–6:8.

Profetiese afbeeldinge

Die vervulling van Jehovah se profetiese woord is opwindend en geloofversterkend. Hoe waar is dit tog van Sagaria se profetiese afbeeldinge vir ons dag! Hy moet silwer en goud wat Joodse ballinge geskenk het, gebruik om ’n luisterryke kroon vir die hoëpriester Josua te maak. Daarbenewens sal ‘die wat ver is (in Babilon), kom en aan die tempel van Jehovah bou’, net soos baie Babilon die Grote na 1919 verlaat het om met tempelwerk te help. Verkeerde idees oor vas is reggestel en het aanleiding gegee tot ’n beskrywing van die komende heuglike toestand van Jerusalem. Daar is voorspel dat ‘tien man uit al die nasies’ by geestelike Jode sou aansluit om ware aanbidding te beoefen (Galasiërs 6:16; Openbaring 7:4-10). “Juig, o dogter van Jerusalem”, sê Jehovah. Haar koning kom op ’n esel aangery en sal “aan die nasies vrede verkondig”.—6:9–9:11.

God en die herders

Opsieners het ’n groot verantwoordelikheid en moet met ywer dien. Nadat Jehovah belowe het om sy volk te red, spreek hy sy toorn teenoor ontroue herders uit. “Drie herders” verlei die kudde in so ’n mate dat God sy verbond met sy volk verbreek. Jerusalem sal “’n baie swaar klip” word. Enigeen wat haar aanval, ‘sal hom sekerlik seer maak’. Maar “die stamhoofde van Juda”—diegene wat toesig oor God se uitverkore volk het—moet “soos ’n brandende fakkel” wees, buitengewoon ywerig.—9:12–12:14.

Jehovah haat namaaksels. Enigeen wat in God se gemeente volhou om ‘leuens te verkondig’, word “deurboor” deur as afvalliges verwerp te word. “Twee-derdes” in die land sal uitgeroei word terwyl die derde deel deur vuur gelouter sal word. In ooreenstemming hiermee is die oorgrote meerderheid wat beweer dat hulle Christene is—diegene van die Christendom—deur Jehovah verwerp. Sedert 1919 roep net ’n klein minderheid getroue, gesalfde Christene Jehovah se naam aan en onderwerp hulle hulle aan sy suiweringsproses.—13:1-9.

Jehovah se volk kan op sy beskerming vertrou. Wanneer vyande probeer om ware aanbidders te vernietig, sal God sy volk beskerm en Satan se horde vernietig. Die Olyfberg wat gesplyt word, veroorsaak ’n simboliese vallei waar gesalfdes beskerming onder Jehovah se universele Koninkryk en sy Seun se Messiaanse regering geniet. Daar sal lig vir God se getroue knegte en duisternis vir die nasies wees. Die mensdom moet kies: Aanbid Jehovah saam met sy volk of ondergaan ewige vernietiging.—14:1-21.

[Voetnoot]

[Venster op bladsy 31]

BYBELTEKSTE ONDERSOEK

o 1:3—Hoewel die Jode in 537 v.G.J. van Babilon teruggekeer het, is hulle ook aangespoor om in hartgrondige gehoorsaamheid en aanbidding na God terug te keer. Hulle sou sigbare bewys van hierdie terugkeer lewer deur aan die herbouingswerk deel te neem tot die tempel voltooi is.

o 2:1-5—Die jongman het Jerusalem moontlik gemeet sodat ’n muur vir beskerming daarom gebou kon word. Maar God se engel het getoon dat die stad se groei nie deur ’n muur beperk moes word nie. Geen mens kon Jerusalem se volgehoue groei verhinder nie. Jehovah sou dit beskerm, net soos hy vandag die gesalfde oorblyfsel beskerm wat deel van die hemelse Jerusalem sal wees.—Openbaring 21:2.

o 6:11-15—Met die hoëpriester Josua se kroning het hy nie ’n priester-koning geword nie omdat hy nie in Dawid se koningslyn was nie. Dit het Josua eerder ’n profetiese afbeelding van die Messias gemaak in wie die profesie oor die “Spruit” ten volle verwesenlik is (Sagaria 3:8; Jeremia 23:5). Josua het gehelp om die tempelherbouingswerk in Jerusalem tot voltooiing te bring. Die hemelse Priester-Koning, Jesus Christus, bring werk aan die geestelike tempel tot voltooiing.

o 11:4-11 (vgl. NW)—Skaapgeaarde mense was die “slagskape”, aangesien hulle deur goewermentele herders uitgebuit is. Met een staf wat “Lieflikheid” genoem is en die ander “Eenheid”, het Sagaria as ’n herder opgetree wat ’n staf dra om die kudde te lei en ’n stok om wilde diere af te weer (Psalm 23:4). Hy het Jesus afgeskadu, wat gestuur is om ’n geestelike herder te wees, maar wat deur die Jode verwerp is. Soos Sagaria die staf Lieflikheid gebreek het, het God opgehou om vriendelik met die Jode te handel en sy verbond met hulle verbreek. En soos Sagaria die staf Eenheid gebreek het, het God se nietigverklaring van die Wetsverbond met Israel die Jode sonder ’n teokratiese eenheidsband gelaat. Hulle godsdiensverdeeldheid het rampspoedige gevolge vir hulle gehad met die Romeine se vernietiging van Jerusalem in 70 G.J.

o 12:11—“Die rouklaag van Hadad-Rimmon” kan op rou oor die dood van koning Josia van Juda dui. Hadad-Rimmon was klaarblyklik in die vallei van Megiddo geleë, waar hy in ’n geveg teen Farao Nego dood is. Josia se dood is beween deur Jeremia in klaagsang en sangers wat die koning in klaagliedere gemeld het.—2 Kronieke 35:20-25.

[Prent op bladsy 31]

Soos Sagaria voorspel het, gaan mense van alle nasies nou met geestelike Israel om