Moet julle nie in dieselfde juk met ongelowiges verenig nie

“Moenie in [’n ongelyke] juk trek saam met ongelowiges nie, want . . . watter aandeel het die gelowige met die ongelowige?”—2 KORINTHIËRS 6:14, 15, vgl. “NW”.

1. Hoe het dit gekom dat een suster met ’n ongelowige getrou het?

EEN van Jehovah se Getuies in die Midde-Westelike Verenigde State het haar man ’n paar jaar gelede in ’n motorongeluk verloor. “Ek was aanvanklik verpletter”, vertel sy “maar ek was vasbeslote om nie toe te laat dat dit my diens aan Jehovah onderbreek nie. Na ’n paar jaar het ek egter soos ’n vyfde wiel aan die wa begin voel wanneer ek saam met egpare in die gemeente was. Ek en my dogter is nie altyd na gesinsuitstappies genooi nie. Wanneer ek gesien het hoe Christenegpare geneentheid teenoor mekaar toon, het ek selfs meer verworpe gevoel. Dit het gelyk asof niemand agtergekom het dat ek geestelik al hoe swakker word nie. Toe ’n wêreldse man wat ek by die werk leer ken het my gevra het om te gaan uiteet, het ek dus gegaan. Voordat ek dit besef het, was ek verlief op hom. Uiteindelik was ek so swak en het my eensaamheid so sterk geword dat ek ingestem het om met hom te trou.”

2. Waarom is die begeerte om te trou natuurlik, en wat was die doel van die huwelik?

² Ja, die begeerte om die lewe met ’n maat te deel kan baie sterk wees, en dit is ook natuurlik. Soos Jehovah self dit gestel het: “Dit is nie goed dat die mens alleen is nie. Ek sal vir hom ’n hulp maak wat by hom pas [“as sy komplement”, NW]” (Genesis 2:18). Die doel van die huwelik was om ’n intieme, permanente band van eenheid tussen ’n man en ’n vrou te vorm. Dit was nie Adam nie, maar Jehovah wat gesê het: “Die man [sal] sy vader en moeder verlaat en sy vrou aankleef. En hulle sal een vlees wees.” (Genesis 2:22-24; vergelyk Mattheüs 19:4-6.) Dalk hunker jou hart na so ’n persoon wat by jou sal pas.

3, 4. (a) Hoe waarsku die Bybel ons om nie hegte bande met ongelowiges te smee nie? (b) Hoe kan Paulus se raad oor ’n ongelyke juk op die huwelik van toepassing wees? (c) Hoe sou die Korinthiese Christene die woord “ongelowiges” verstaan het? (Kyk die voetnoot.)

³ Die Bybel waarsku ons egter om nie hegte bande met ongelowiges te smee nie. Soos die apostel Paulus dit gestel het: “Moenie in [’n ongelyke] juk trek [“Moet julleself nie in ’n ongelyke span inspan”, The Jerusalem Bible] saam met ongelowiges nie,a want . . . watter aandeel het die gelowige met die ongelowige?”b (2 Korinthiërs 6:14, 15, vgl. NW). Paulus het moontlik die Mosaïese Wet se verbod in gedagte gehad waarvolgens ’n os en ’n esel nie saam gejuk moes word om mee te ploeg nie (Deuteronomium 22:10). Die esel is kleiner en nie so sterk nie en sal gevolglik ly as hy so ongelyk gejuk word. Aangesien die huwelik soos ’n juk is wat man en vrou saambind, sal ’n Christen wat met ’n ongelowige trou hom in ’n ongelyke juk begeef (Mattheüs 19:6, vgl. NW). So ’n juk bring dikwels bykomende druk en spanning in ’n huwelik mee.—Vergelyk 1 Korinthiërs 7:28.

⁴ Maar soos die ondervinding in paragraaf een toon, het party Christene verkies om met ongelowiges te trou. Waarom vind party dit moeilik om “net in die Here” te trou?—1 Korinthiërs 7:39.

Waarom party elders soek

5. Verduidelik waarom party ’n liefdesverhouding met ’n ongelowige aanknoop.

⁵ Dit is nie noodwendig weens ’n deurdagte besluit om God se raad te ignoreer nie. Beskou die situasie van ’n Christensuster wat moontlik graag wil trou. Sy hunker dalk na ’n Christeneggenoot, maar dit lyk nie of daar baie hubare broers in haar kring van gelowige vriende is nie. Sy is bewus van haar ouderdom. Dalk wil sy graag ’n gesin hê. Die vrees dat sy alleen oud sal word en die behoefte aan ’n man wat haar liefhet, kan haar kwetsbaar maak. As ’n wêreldse man dan belangstelling in haar toon, kan dit moeilik wees om dit te weerstaan. Dit lyk dalk asof hy goedhartig en saggeaard is. Moontlik rook of vloek hy nie. Dan kom die rasionalisasie: ‘Hy is dan selfs gawer as baie van die broers wat ek ken!’ ‘Hy stel belang in ’n studie.’ ‘Ek weet van gevalle waar ’n suster met ’n ongelowige getrou het en hy uiteindelik ’n medegelowige geword het.’ ‘Daar is party Christelike huwelike wat misluk!’—Kyk Jeremia 17:9.

6, 7. (a) Hoe het een ongetroude suster haar frustrasie beskryf? (b) Watter vraag moet ons bespreek?

⁶ Ja, dit kan baie frustrerend wees vir ’n ongetroude Christen wat wil trou. Party voel selfs desperaat. “Daar is besonder min hubare broers”, het een ongetroude suster die situasie in haar gebied beskryf. “Maar daar is besonder baie ongetroude susters. Wanneer ’n suster haar jeug sien verbysnel, is haar enigste keuse òf om glad nie te trou nie, òf om te trou sodra sy die eerste geleentheid kry.”

⁷ Die Bybel se raad is nietemin duidelik: ‘Moet julle nie in dieselfde juk met ongelowiges verenig nie’ (2 Korinthiërs 6:14). Is hierdie goddelike waarskuwing ongevoelig of onredelik?

’n Blyk van God se liefdevolle besorgdheid

8. Hoe het Jehovah getoon dat hy ons belange op die hart dra?

⁸ Jehovah is innig besorg oor ons blywende welsyn. Het hy nie, met groot persoonlike opoffering, sy Seun as “’n losprys vir baie” gegee nie? (Mattheüs 20:28). Is hy nie ‘die Een wat ons leer om onsself te bevoordeel nie’? (Jesaja 48:17, NW). Beloof hy nie dat hy ‘nie sal toelaat dat ons bo ons kragte versoek word nie’? (1 Korinthiërs 10:13). Daarom is dit net redelik om te glo dat hy ons belange op die hart dra wanneer hy ons beveel om ons nie in dieselfde juk met ongelowiges te verenig nie! Kyk hoe hierdie waarskuwing ’n blyk van sy liefdevolle besorgdheid oor ons is.

9. (a) Hoe waarsku Paulus dat ’n Christen nie ’n hegte band met ’n ongelowige moet smee nie? (b) Wat is die betekenis van die Griekse woord wat met “ooreenstemming” vertaal word, en hoe lig dit die probleem toe wat ontstaan wanneer ’n Christen hom in dieselfde juk met ’n ongelowige verenig?

⁹ Die Skepper se voorneme met die huwelik was dat dit die intiemste band tussen mense moes vorm, met man en vrou wat “een vlees” word (Genesis 2:24). Is dit verstandig vir ’n Christen om so ’n hegte band met ’n ongelowige te smee? Paulus antwoord deur ’n reeks deurdringende vrae te vra, waarvan elk ’n negatiewe antwoord impliseer: “Want watter deelgenootskap het die geregtigheid met die ongeregtigheid, en watter gemeenskap het die lig met die duisternis? En watter ooreenstemming [Grieks, sym·phoʹne·sis] het Christus met Belial [Satan], of watter aandeel het die gelowige met die ongelowige?” (2 Korinthiërs 6:14, 15). Die Griekse woord sym·phoʹne·sis beteken letterlik “’n sameklank” (van syn, “saam”, en pho·neʹ, “’n klank”). Dit het betrekking op die harmonie wat deur musiekinstrumente voortgebring word. Daar is natuurlik geen harmonie tussen Christus en Satan nie. In ’n ongelyke juk is dit insgelyks baie moeilik vir man en vrou om ‘dieselfde akkoorde te speel’. Hulle is soos twee musiekinstrumente wat nie by mekaar ingestem is nie en wanluidende klanke in plaas van musiek voortbring.

10. Wat is noodsaaklike elemente in ’n gelukkige huwelik, en wat is die voordele wanneer daar ’n gelyke juk is?

¹⁰ Hoe kan ’n geestelike mens dan algehele harmonie met ’n fisiese mens geniet? (1 Korinthiërs 2:14, vgl. NW). Gemeenskaplike beskouings, beginsels en doelwitte is noodsaaklike elemente in ’n gelukkige huwelik. Niks maak ’n huwelik sterker as gemeenskaplike toegewydheid aan die Skepper nie. Wanneer daar ’n gelyke juk is, kan man en vrou mekaar aanmoedig in hul aanbidding. Albei kan op die Skrif staatmaak om hulle verskille op te los. Is dit dan nie duidelik dat Jehovah ons beveel om ons nie in dieselfde juk met ongelowiges te verenig nie omdat hy wil hê dat ons die intiems moontlike band met ons huweliksmaat moet geniet nie?

11. Waarom is huwelike met aanbidders van ander gode verbied in Israel, en watter gedagteprikkelende vraag word nou geopper?

¹¹ As ons ag slaan op die Bybel se waarskuwing spring ons ook die pynlike gevolge vry wat dikwels ontstaan wanneer ’n Christen hom in dieselfde juk met ’n ongelowige verenig. Daar is byvoorbeeld die moontlikheid dat die ongelowige die Christenhuweliksmaat sal wegkeer van Jehovah se diens. Beskou Jehovah se waarskuwing aan eertydse Israel. Huwelike met aanbidders van ander gode is verbied. Waarom? “Want hy sal jou seun van My afvallig maak”, het Jehovah gewaarsku, “sodat hulle ander gode dien” (Deuteronomium 7:3, 4). Wanneer ’n mens teenstand van ’n ongelowige huweliksmaat moet verduur, kan jy geneig wees om geleidelik die weg met die minste weerstand te begin volg. Dit is maklik om te dink: ‘Dit sal nie met my gebeur nie!’ Maar dit het selfs met ’n wyse man soos Salomo gebeur. Kan dieselfde nie met jou gebeur nie?—1 Konings 11:1-6; vergelyk 1 Konings 4:29, 30.

12. Hoe was God se wet wat huwelike met vreemdelinge verbied het ’n beskerming vir die Israeliete? Lig dit toe.

¹² Selfs al val die gelowige nie weg van ware aanbidding nie, is daar steeds die probleme en druk wat dikwels met ’n godsdienstig verdeelde huisgesin gepaard gaan. Beskou weer eens God se wet aan Israel. Veronderstel dat ’n Israelitiese meisie ingestem het om met ’n Kanaänitiese man te trou. As ’n mens die seksgebruike in aanmerking neem wat algemeen was in die land Kanaän, watter respek sou hy vir die wet van haar God gehad het? Sou hy byvoorbeeld gewillig wees om hom gedurende haar menstruasie van geslagsomgang te onthou, soos die Mosaïese Wet vereis het?c (Levitikus 18:19; 20:18; vergelyk Levitikus 18:27.) Of sê nou ’n Israelitiese man het met ’n Kanaänitiese meisie getrou. Hoe ondersteunend sou sy gewees het wanneer hy drie keer per jaar na Jerusalem gereis het om die seisoensfeeste by te woon? (Deuteronomium 16:16). Dit is duidelik dat God se wet wat sulke huwelike verbied het ’n beskerming vir die Israeliete was.

13. (a) Waarom het ’n wêreldling nie ’n Bybelopgeleide, Christelike gewete nie? (b) Met watter druk en probleme het party in godsdienstig verdeelde huisgesinne te kampe?

¹³ Wat van vandag? Die sedelike standaarde van wêreldse mense verskil hemelsbreed van dié van die Bybel. Al lyk party wêreldse persone ook hoe netjies, hulle het nie ’n Bybelopgeleide, Christelike gewete nie. Hulle het nog nie ’n jarelange studie van God se Woord gemaak of ‘hulle gemoed vernuwe’ en ‘die ou persoonlikheid afgelê’ nie (Romeine 12:2; Kolossense 3:9, vgl. NW). Die Christen wat hom in dieselfde juk met ’n ongelowige verenig, stel homself dus dikwels aan baie hartseer en droefheid bloot. Party word herhaaldelik onder druk geplaas om aan verdorwe seksgebruike deel te neem of wêreldse vakansiedae te vier. En party kla selfs oor eensaamheid. Soos een suster geskryf het: “Die eensaamheid wanneer jy met iemand getroud is wat Jehovah nie liefhet nie, is die ergste eensaamheid wat jy jou kan voorstel. Jy sien, jy het niemand met wie jy die waarheid, wat die belangrikste ding in jou lewe is, kan deel nie.”

14. (a) Waarom is dit moeilik om kinders in ’n verdeelde huisgesin in “die tug en vermaning van die Here” op te voed? (b) Watter uitwerking kan ’n verdeelde huisgesin op kinders hê?

¹⁴ In ’n verdeelde huisgesin kan dit baie moeilik wees om kinders op te voed “in die tug en vermaning van die Here” (Efesiërs 6:4). Sal die ongelowige die kinders byvoorbeeld geredelik toelaat om vergaderinge by te woon of aan die veldbediening deel te neem? Dit gebeur dikwels dat die kinders verdeel is in hulle liefde—hulle het albei ouers lief, maar net een ouer het Jehovah lief. Een suster wat met ’n ongelowige getrou het, het gesê: “Ek het baie hartseer in my huwelik van 20 jaar deurgemaak. My seuns het met baie verwarring en emosionele ontwrigting grootgeword en is nou ’n deel van die wêreld. My dogter is dikwels ontsteld omdat sy, weens haar vader se besoekregte, so dikwels van my weg moet wees. Al hierdie probleme is die gevolg van die feit dat ek, toe ek 18 was, gekies het om een van Jehovah se beginsels te ignoreer.” Watter beginsel? Moet julle nie in dieselfde juk met ongelowiges verenig nie!

15. Waarom maan Jehovah ons om ons nie in dieselfde juk met ongelowiges te verenig nie?

¹⁵ Dit is duidelik dat Jehovah wil hê dat ons die lewe ten volle moet geniet. Wat hy van ons vra, met inbegrip van sy raad dat ons ons nie in dieselfde juk met ongelowiges moet verenig nie, is vir ons eie beswil (Deuteronomium 10:12, 13, vgl. NW). As ’n mens met ’n ongelowige trou, ignoreer jy skriftuurlike raad, praktiese wysheid en die dikwels pynlike ondervinding van ander.

Vrae wat dikwels gevra word

16, 17. (a) Hoe kan emosies gesonde denke beïnvloed as ons nie versigtig is nie? (b) Moet God se raad geïgnoreer word vanweë uitsonderlike situasies waar ’n Christen met ’n ongelowige getrou het en hulle albei Jehovah nou dien? Verduidelik.

¹⁶ As ons nie versigtig is nie, kan gesonde denke egter deur emosies beïnvloed word. Ons kan begin dink dat ’n uitsondering in ons geval gemaak kan word. Beskou party van die algemeenste vrae.

¹⁷ Wat van situasies waar ’n broer of ’n suster met ’n ongelowige getrou het en hulle albei Jehovah nou dien? Die feit bly staan dat Jehovah se beginsels geskend is. Heilig die doel die middele? God se beskouing van diegene wat sy raad ignoreer, word toegelig deur die geval van die Jode wat uit Babiloniese gevangenskap teruggekeer het. Toe party van hulle met heidense vroue getrou het, het die Bybelskrywers Esra en Nehemia hulle dade pront-uit veroordeel. Daardie Jode “was ontrou”, het ’n “groot kwaad” begaan en hulle “skuld” op die hals gehaal (Esra 10:10-14; Nehemia 13:27). Nog iets wat in aanmerking geneem moet word: Wanneer ons God se raad ignoreer, kan ons onsself geestelik beseer en ons gewete vol littekens laat. Een suster wie se ongelowige man uiteindelik ’n gelowige geword het, het gesê: ‘Die emosionele littekens pla my nog steeds. Dis onmoontlik om vir jou te beskryf hoe ellendig ek voel wanneer ander na ons wys en sê: “Maar dit het vir hulle gewerk.”’

18. Wat is verstandig as jy aangetrokke voel tot iemand wat nog nie gedoop is nie, en wat sal jy daardeur toon?

¹⁸ Sê nou jy voel aangetrokke tot iemand wat die Bybel bestudeer en vergaderinge bywoon maar wat nog nie gedoop is nie? Ons verheug ons wanneer iemand belangstelling in Bybelwaarheid toon. Die vraag is egter: Moet jy jou geneentheid verder voer? Ronduit gesê, dit is verstandig om te wag tot ’n ruk nadat jou vriend gedoop is en die vrug van God se gees progressief openbaar alvorens julle begin uitgaan (Galasiërs 5:22). Dit sal dalk moeilik wees om sulke raad toe te pas, maar deur dit te doen sal jy toegewydheid aan Bybelbeginsels toon; en dit sal ’n goeie grondslag vir ware huweliksgeluk lê. As jou vriend werklik vir jou omgee en Jehovah waarlik begin liefkry, sal hy (of sy) ongetwyfeld bereid wees om te wag totdat julle albei “in die Here” is—toegewy en gedoop—voordat julle mekaar die hof begin maak. Onthou ook dat ware liefde nie deur die verloop van tyd benadeel word nie.—1 Korinthiërs 7:39; Genesis 29:20.

19. Wat moet jy in gedagte hou as jy dit moeilik vind om ’n huweliksmaat onder medegelowiges te vind?

¹⁹ Sê nou jy vind dit moeilik om ’n geskikte huweliksmaat onder medegelowiges te vind? “Ek is 26 jaar oud, ongetroud en werklik eensaam”, het een suster gesê. Die ongehude staat kan weliswaar vir jou moeilik wees, maar die probleme wat ontstaan wanneer jy ongelyk gejuk is in die huwelik kan selfs moeiliker wees! Gehoorsaamheid aan God se raad verg moontlik geloof, selfbeheersing en geduld, maar wees verseker dat Jehovah weet wat die beste vir jou is en jou belange op die hart dra (1 Petrus 5:6, 7, vgl. NW). Maak dit ’n saak van gebed, en wag dan op Jehovah (Psalm 55:23). In hierdie stelsel van dinge is daar niemand wat ’n volmaak bevredigende lewe het nie. Jou hart hunker dalk na ’n maat. Ander het egter weer húlle probleme, waarvan sommige nie in hierdie stelsel opgelos kan word nie. Slegs in die komende nuwe wêreld sal “die begeerte van al wat leef” ten volle bevredig word.—Psalm 145:16, NW.

20. Hoe het een ongetroude suster haar vasbeslotenheid uitgespreek, en watter bevrediging kan jy smaak as jy vasbeslote is om dieselfde te doen?

²⁰ Wees intussen vasbeslote om jou nie in dieselfde juk met ’n ongelowige te verenig nie. Een 36-jarige ongetroude suster het haar vasbeslotenheid so uitgespreek: “Ek bid Jehovah elke dag om ’n huweliksmaat. Ek het geen begeerte om buite Jehovah se organisasie te soek nie, maar die versoekings is steeds daar. Intussen is dit my voorneme om eienskappe te verfyn wat my ’n beter mens sal maak, sodat ek die soort geestelike vrou sal wees waarna ’n geestelike man soek.” Is jy vasbeslote om dieselfde te doen? Dan kan jy die bevrediging smaak wat spruit uit onwrikbare lojaliteit aan die God van goddelike geregtigheid.—Psalm 37:27, 28.

[Voetnote]

Kan jy verduidelik?

◻ Hoe waarsku die Bybel teen hegte bande met ongelowiges?

◻ Waarom soek party toegewyde Christene buite die gemeente na ’n huweliksmaat?

◻ Hoe is Jehovah se waarskuwing teen ’n ongelyke juk in werklikheid ’n blyk van sy liefdevolle besorgdheid oor ons?

◻ Watter vrae oor die keuse van ’n huweliksmaat word dikwels gevra, en hoe sou jy hulle beantwoord?