Sal jy baat vind by onverdiende goedheid?

“HOE meer ek van God se standaarde in die Bybel geleer het, hoe minder het ek gevoel dat ek sy guns en seën waardig is”, het Frank gesê. Sy belangstelling in die Bybel is gewek terwyl hy weens dwelmoortredings in die tronk was. Hy het ’n eksemplaar van die boek Die waarheid wat lei tot die ewige lewea gelees, was oortuig dat wat dit gesê het die waarheid is en het, nadat hy uit die tronk vrygelaat is, met Jehovah se Getuies in aanraking gekom om meer omtrent die Bybel te leer.

Waarom het sy studie van die Bybel hom onwaardig laat voel? Omdat sy vorige lewenswyse baie van God se beginsels geskend het. Dwelmmisbruik, alkoholmisbruik en verskeie ander vernietigende gebruike het hom so veragter dat ’n polisieman eenkeer vir hom gesê het: “Sal jy asseblief vir my sê wat jou huisadres is? Ek wil net weet waarheen ek jou lyk moet stuur!”

Wat hom later nog onwaardiger laat voel het, is die feit dat hoe hard hy ook al probeer het, hy dit baie moeilik gevind het om hierdie ingewortelde onrein gebruike baas te raak. Die vernietigende houvas van alkoholisme het hom byvoorbeeld amper ondergekry. “Ek het keer op keer hopeloos gefaal en was baie terneergedruk”, het hy gesê. “Ek het amper heeltemal moed opgegee en het gevoel dat daar geen hoop vir my is nie.”

Ander het miskien nie ’n verlede soos dié van Frank gehad nie. Maar hulle kan nogtans diep gevoelens van onvolwaardigheid hê. Dit kan wees omdat hulle onredelik hoë standaarde vir hulleself stel en probeer om te leef volgens wat hulle dink God se vereistes is. Wanneer hulle faal, voel hulle skuldig. “’n Skuldgevoel kan ’n nagmerrie wees”, verduidelik dr. Claire Weekes in haar boek Self-Help for Your Nerves, “veral vir diegene wat ’n hoë standaard vir hulleself probeer stel.” Wat kan ’n Christen doen as hy sulke gevoelens van onwaardigheid ervaar?

Waardeer onverdiende goedheid

“Een ding wat my baie gehelp het”, het Frank gesê, “was waardering vir die Bybel se woorde in Hebreërs 4:15, 16.” Daar herinner die apostel Paulus ons daaraan dat Jesus ’n sorgsame helper is wat “met ons swakhede medelye kan hê” en wat dit vir ons moontlik maak om ‘barmhartigheid te verkry en genade [“onverdiende goedheid”, NW] te vind om op die regte tyd gehelp te word’.

Wil jy graag ’n sleutel hê om gevoelens van onwaardigheid te oorwin? Dit is die sleutel: Onthou dat Jehovah God en Jesus Christus weet dat ons as gevolg van oorgeërfde onvolmaaktheid swak is. Hulle besef dat ons nie volkome aan regverdige standaarde kan voldoen nie (Psalm 51:7; Romeine 3:23; 5:12, 18; Jakobus 3:2). Hulle verwag dus nie meer van ons as wat ons kan gee nie. Hulle soek na ons goeie punte, nie na ons swakhede nie. Die psalmis het gevra: “As U, HERE, die ongeregtighede in gedagtenis hou, Here, wie sal bestaan?” (Psalm 130:3). Jy kan besef dat niemand sou kon bestaan nie. Jehovah kan egter genadiglik deur die losprysoffer van Jesus Christus vir ons ’n rein posisie voor Hom gee ten spyte van ons onvolmaakthede (1 Johannes 2:2; 4:9, 10). Ons kan “vergifnis van ons oortredinge” verkry—en sodoende gehelp word om enige gevoelens van onwaardigheid te bowe te kom—“ooreenkomstig die rykdom van sy onverdiende goedheid”.—Efesiërs 1:7, NW.

Beskou dit só. Kunsliefhebbers sal groot moeite doen om erg geskende skilderye of ander kunswerke te restoureer. Toe iemand byvoorbeeld in die National Gallery in Londen, Engeland, ’n Leonardo da Vinci-spotprent ter waarde van £20 miljoen (ongeveer R84 miljoen) met ’n haelgeweer geskend het, het niemand voorgestel dat die tekening weggegooi moet word omdat dit beskadig is nie. Daar is dadelik begin om die meesterstuk wat 487 jaar oud is te restoureer. Waarom? Omdat dit in die oë van kunsliefhebbers kosbaar is.

Is jy nie meer werd as ’n kryt-en-houtskooltekening nie? In God se oë is jy beslis—hoe geskend jy ook al is weens erfsonde (Psalm 72:12-14; Mattheüs 20:28). Jehovah God, die kundige oorspronklike Skepper van die mensegesin, sal doen wat nodig is om lede van daardie gesin wat gewillig is om op sy liefdevolle sorg te reageer, tot volmaaktheid te herstel.—Vergelyk Handelinge 3:21; Romeine 8:20-22.

Reageer op onverdiende goedheid

Volg die voorbeeld van die apostel Paulus na. Hy het groot waardering gehad vir die goedheid wat God teenoor hom bewys het deur hom barmhartig sy vorige sondes te vergewe en hom voortdurend te help in sy stryd om swakhede te bowe te kom wat herhaaldelik kop uitgesteek het (Romeine 7:15-25; 1 Korinthiërs 15:9, 10). Paulus het sy lewensweg verander en ook ‘sy liggaam gekasty en dit diensbaar gemaak [“as ’n slaaf gelei”, NW]’ sodat hy op ’n weg kon bly wat God goedkeur (1 Korinthiërs 9:27). Hy het nie toegelaat dat sy liggaam, met sy sondige fisiese en emosionele neigings, hom as ’n slaaf lei nie.

Aanvaar God se onverdiende goedheid en laat dit jou tot berou lei (Romeine 2:4; 2 Korinthiërs 6:1). As vorige foute jou kwel, moet jy hulle regstel en dan Jehovah se versekering glo dat hy jou vergewe het (Jesaja 1:16-18; Handelinge 2:38). As hardnekkige swakhede jou teister, moet jy aanhou om daarteen te stry. Bid ernstig om Jehovah se hulp om sulke swakhede te bowe te kom terwyl jy jou terselfdertyd op sy barmhartigheid verlaat (Psalm 55:23). Frank het uit eie ondervinding gemaan: “Wanneer iemand soms in sy stryd teen ’n slegte gewoonte faal, moet hy dit nie as ’n totale, finale mislukking beskou nie, maar eerder as ’n tydelike terugslag.” Wanneer ander jou probleme vererger deur meer van jou te vereis as wat jy kan gee, moet jy onthou dat dit God is wat jy probeer behaag, nie mense nie.—Galasiërs 1:10.

In jou stryd om te doen wat reg is, moet jy waak teen die “liste” van Satan, wat ook “die Duiwel se bose sette” genoem kan word (Efesiërs 6:11, vgl. Today’s English Version). Beskou twee “bose sette” wat hy sal gebruik om jou van die voordele van onverdiende goedheid te probeer beroof.

Satan se “bose sette”

Die Duiwel buit gevoelens van nutteloosheid uit om jou van God te probeer verwyder. Satan is die oorsprong van die sonde wat jou in die eerste plek geskend het. Nou probeer hy moontlik om die gevoel aan te moedig dat jy in God se oë nutteloos is, net soos Bildad met Job probeer doen het (Job 25:4-6; Johannes 8:44). Hoeveel veldslae is nie al verloor omdat soldate die stryd betree het toe hulle alreeds ontmoedig was nie! Moet dus nie toelaat dat Satan jou ontmoedig nie (Efesiërs 6:10-13). As jy bewus is van Satan se planne behoort dit jou aan te spoor om nog harder te stry om te doen wat reg is.—2 Korinthiërs 2:11.

Indien jy soms deur die een of ander mislukking bedroef word, moet jy seker maak dat jy nie “deur alte groot droefheid verteer word nie” (2 Korinthiërs 2:7). Dr. Claire Weekes het kommentaar gelewer oor die neiging wat sommige het om toe te laat dat vorige tekortkominge hulle oorweldig: “Dit is vernietigend om toe te laat dat skuldgevoelens uit die verlede jou teenswoordige optrede belemmer.”—Sien Handelinge 3:19.

As ons volmaak aan al God se vereistes kon voldoen, sou dit ’n verdiende goedheid wees as hy ons die seëninge gee wat hy belowe het. Maar Jehovah God en Jesus Christus betoon goedheid aan ons wat ‘onverdiend’ is. A Greek-English Lexicon of the New Testament deur J. H. Thayer verduidelik die betekenis van die woord wat die apostel Paulus gebruik het om hierdie eienskap van God te beskryf: “Die woord [khaʹris] bevat die gedagte van goedheid wat aan iemand iets skenk wat hy nie verdien het nie.” Ons kan nie God se seën met enige werke verdien nie. Dit is, soos Paulus gesê het, ’n onverdiende goedheid. As jy opreg alles in jou vermoë doen om jou verpligtinge teenoor God na te kom, moet jy daarmee tevrede wees. Jehovah vra nie meer van jou nie.

Jy moet egter op jou hoede wees vir nog een van Satan se “bose sette”. Hy mislei sommige sodat hulle dink dat hulle God se onverdiende goedheid kan uitbuit, dat hulle sy barmhartigheid kan misbruik. Jehovah vergewe liefdevol ons swakhede, maar dit beteken nie dat ons kan ophou stry om hulle te bowe te kom nie. Paulus het sommige beskryf wat “die Seun van God vertrap het en . . . die gees van onverdiende goedheid met veragting gekrenk het” (Hebreërs 10:29, NW). Hierdie persone het geen respek vir God se regverdige beginsels getoon nie en het God se wette verag, sodat hulle nie weer herstel kon word nie. Jesus se halfbroer Judas, wat die gevaar gesien het wat sulke dupes van Satan inhou, het geskryf: “Sekere mense het [in die gemeentes] ingesluip . . . goddelose mense wat die genade [“onverdiende goedheid”, NW] van onse God verander in ongebondenheid.”—Judas 4.

Satan kan sulke mense wysmaak dat hulle so te sê opsetlik aan sonde kan toegee en God dan om vergifnis kan vra. Maar Jehovah sal nie sulke moedswillige oortreders van sy wette vergewe nie. Hy is “groot van goedertierenheid” teenoor diegene wat daarna streef om hom, ten spyte van hulle onvolmaakthede, na hulle beste vermoë te dien. Maar hy sal “sonde nooit ongestraf laat bly nie”.—Exodus 34:6, 7.

Jy kan by onverdiende goedheid baat vind

Dit is bemoedigend om te weet dat Jehovah jou nie net in jou onvolmaakte, geskende toestand sien nie. Hy weet wat jy kan wees wanneer die herstellingskrag van Jesus se losprysoffer ten volle toegepas word. Bid derhalwe met vrymoedigheid tot Jehovah soos die psalmis Dawid gedoen het. “Wees my genadig, o God”, het Dawid gesê, “na u goedertierenheid; delg my oortredinge uit na die grootheid van u barmhartigheid. Was my heeltemal van my ongeregtigheid en reinig my van my sonde. Want ek ken my oortredinge, en my sonde is altyddeur voor my. Verberg u aangesig vir my sondes en delg uit al my ongeregtighede. . . . ’n Gebroke en verslae hart sal U, o God, nie verag nie!”—Psalm 51:3-5, 11, 19.

Jou sondes en tekortkominge is moontlik altyddeur voor jou. Jy kan by tye soos die verlore seun voel wat Jesus beskryf het. Toe hierdie jong man na die huis teruggekeer het nadat hy sy erfporsie skandelik in die vreemde verkwis het, het hy vir sy vader gesê: “Ek is nie meer werd om u seun genoem te word nie” (Lukas 15:21). Hierdie jong man het egter die regte gesindheid gehad. Hy het nie sy vader se goedheid verwerp of misbruik nie. Daarom het sy vader hom liefdevol in die huis terugontvang (Lukas 15:20-24). Jehovah is verheug om vandag dieselfde vir sondige mense te doen wat ywerig probeer om sy wil te doen.—Psalm 103:8-14; Jesaja 55:7.

Frank het nie toegelaat dat gevoelens van nutteloosheid hom oorweldig nie. Hy het gereageer op God se onverdiende goedheid en dien nou as ’n bedieningskneg in ’n gemeente van Jehovah se Getuies. “Dit is nou vir my ’n groot bron van vreugde”, sê hy, “wanneer ek dink aan wat Jehovah God en Jesus Christus vir ons gedoen het en nog sal doen!”

[Voetnoot]