Tonele uit die Beloofde Land

Nasaret—tuiste van die profeet

“DIE skare sê: Dit is Jesus, die profeet, van Nasaret in Galilea.” Ja, selfs tydens Jesus se bediening het die blote vermelding van hom mense aan die nou beroemde stad Nasaret laat dink. Diegene wat gekom het om hom te arresteer het dus nie gesê dat hulle Jesus soek nie, maar “Jesus, die Nasarener”.—Mattheüs 21:11; 26:71; Johannes 18:3-5; Handelinge 26:9.

Die foto hierbo toon wat jy sal vind as jy Nasaret vandag besoek. Dit is baie groter as toe ’n engel “na ’n stad in Galilea met die naam van Nasaret” gekom het om vir Maria te vertel dat sy God se Seun sou baar (Lukas 1:26-33). Toe was Nasaret meer soos die dorpie op die volgende bladsy, met vierkantige huise teen ’n heuwelhang. Josef en Maria het heel moontlik in ’n soortgelyke huis gewoon. Maar net voor Maria geboorte sou gee, moes hulle na Betlehem in die suide gaan, waar Jesus toe gebore is. Hulle het later na Egipte gevlug om die kindjie teen Herodes se moordplanne te beskerm. Daarna “het hulle teruggegaan na Galilea, na hulle stad Nasaret”.—Lukas 2:4, 39; Mattheüs 2:13-23.

Sodoende het Jesus grootgeword, nie in ’n bedrywige sentrum soos Jerusalem of Tiberias nie, maar op ’n stil plekkie. Nasaret was in ’n kom geleë, omring deur die heuwels van Benede-Galilea, waar graan, druiwe, olywe en vye floreer het. Dit het aangename koel somers geniet, tog was die winters nie so straf soos in Bo-Galilea nie.

Josef het as timmerman gewerk om sy vrou, seuns en dogters te onderhou en het moontlik ’n werkswinkel, soos hierdie een in hedendaagse Nasaret, gehad. Hy het dalk balke en houtdeure vir huise in die dorp gemaak of selfs tafels, stoele en ander houtmeubels. Ons weet dat Jesus gekyk en geleer het, want hy is ook “die timmerman” genoem (Markus 6:3; Mattheüs 13:55). Die landbouwerk om Nasaret het heel waarskynlik ander werk geskep. Miskien het Jesus ’n juk gemaak soos die een wat op hierdie diere gesien kan word. Josef kon intussen sy gereedskap gebruik het om ploeë of dorssleë te maak wat agter die juk getrek is.—2 Samuel 24:22; Jesaja 44:13.

As jong seun het Jesus moontlik dikwels in die gebied om Nasaret gaan stap, soos na “Kana in Galilea”, 13 kilometer na die noorde, waar hy later sy eerste wonderwerk verrig het (Johannes 2:1-12). As Jesus omtrent 10 kilometer suidooswaarts, in die rigting van die laagte van Jisreël en die Moreheuwel, geloop het, sou hy die stad Nain, wat op bladsy 17 gesien kan word, bereik heta (Rigters 6:33; 7:1). Onthou dat Jesus tydens sy eerste predikingsreis op ’n begrafnisstoet naby Nain afgekom het. Hy het ’n weduwee se seun opgewek omdat hy haar innig jammer gekry het.—Lukas 7:11-16.

Nasaret was nie op enige van die land se hoofroetes geleë nie, maar dit was maklik om sulke paaie daarvandaan te bereik. Jy kan dit op die voorbladkaart van Jehovah se Getuies se kalender vir 1990 sien, wat ook ’n groter foto van hedendaagse Nasaret het. Die roete van oos na wes deur die laagte van Jisreël het die seehawe van Akko, of Ptolemais, met die See van Galilea en die Jordaanvallei verbind. ’n Roete wat hiermee gekruis het, het suidwaarts vanaf Damaskus deur Samaria tot in Jerusalem gestrek.

Nasaret het sy eie sinagoge gehad, en Jesus het vroeg in sy bediening daarheen gegaan “soos Hy gewoond was”. Hy het Jesaja 61:1, 2 gelees en dit op homself toegepas. Hoe sou die dorpsmense, waarvan sommige hom sien grootword het en hom heel moontlik selfs vir timmerwerk betaal het, reageer? Hulle was woedend en het hom van ’n krans probeer afgooi, maar Jesus het weggekom (Lukas 4:16-30). Klaarblyklik het die nuus van wat hy later in Nain en op ander plekke gedoen het Nasaret bereik, want toe hy teruggekeer en in die plaaslike sinagoge geleer het, het niemand daarvan gepraat om hom dood te maak nie. Nogtans het ‘hy nie baie kragtige dade daar gedoen nie’ omdat kennisse in Nasaret nie geloof in hom as profeet gestel het nie.—Mattheüs 13:53-58.

Markus berig wat Jesus se reaksie was: “’n Profeet is nie ongeëerd nie, behalwe in sy vaderland en onder sy familie en in sy huis.” Hoe jammer tog dat dit waar was van baie in Nasaret. Ons kan nietemin aan daardie stad dink as die tuiste van die Profeet vir wie ons wil eer.—Markus 6:4.

[Voetnoot]

[Foto-erkenning op bladsy 16]

Pictorial Archive (Near Eastern History) Est.

[Prent op bladsy 17]

[Prent op bladsy 17]

[Prent op bladsy 17]