Jesus se lewe en bediening

Wanneer Christus in Koninkryksmag kom

JESUS is nog steeds saam met sy apostels op die Olyfberg. In antwoord op hulle versoek om ’n teken van sy teenwoordigheid en die voleinding van die stelsel van dinge, vertel hy nou vir hulle die laaste in ’n reeks van drie gelykenisse. “Wanneer die Seun van die mens in sy heerlikheid kom en al die heilige engele saam met Hom”, begin Jesus, “dan sal Hy op sy heerlike troon sit.”

Dit is nie vir mense moontlik om engele in hulle hemelse heerlikheid te sien nie. Daarom moet die Seun van die mens, Jesus Christus, se koms saam met die engele onsigbaar vir mense-oë wees. Die koms vind in die jaar 1914 plaas. Maar met watter doel? Jesus verduidelik: “En voor Hom sal al die nasies versamel word, en Hy sal hulle van mekaar afskei soos die herder die skape van die bokke afskei; en Hy sal die skape aan sy regterhand en die bokke aan sy linkerhand sit.”

Jesus beskryf wat met diegene aan die begunstigde kant gaan gebeur en sê: “Dan sal die Koning vir die wat aan sy regterhand is, sê: Kom, julle geseëndes van my Vader, beërf die koninkryk wat vir julle berei is van die grondlegging van die wêreld af.” Die skape sal nie saam met Jesus in die hemel regeer nie, maar sal die Koninkryk beërf in die sin dat hulle die aardse onderdane daarvan sal wees. “Die grondlegging van die wêreld” het plaasgevind toe Adam en Eva kinders begin voortbring het wat voordeel kon trek uit God se voorsiening om die mensdom vry te koop.

Maar waarom word die skape aan die Koning se regterhand van guns geplaas? “Want Ek het honger gehad”, antwoord die Koning, “en julle het My te ete gegee; Ek het dors gehad, en julle het My te drinke gegee; Ek was ’n vreemdeling, en julle het My herberg gegee; Ek was naak, en julle het My geklee; Ek was siek, en julle het My besoek; in die gevangenis was Ek, en julle het na My gekom.”

Aangesien die skape op aarde is, wil hulle weet hoe hulle sulke goeie dade aan hulle hemelse Koning kon gedoen het. “Here, wanneer het ons U honger gesien en gevoed”, vra hulle, “of dors, en te drinke gegee? En wanneer het ons U ’n vreemdeling gesien, en herberg gegee; of naak, en geklee? En wanneer het ons U siek gesien of in die gevangenis, en na U gekom?”

“Voorwaar Ek sê vir julle”, antwoord die Koning, “vir sover julle dit gedoen het aan een van die geringstes van hierdie broeders van My, het julle dit aan My gedoen.” Christus se broers is dié van die 144 000, die groep wat saam met hom in die hemel sal regeer, wat nog op aarde oorbly. En om goed te doen aan hulle, sê Jesus, is dieselfde as om goed te doen aan hom.

Vervolgens praat die Koning met die bokke. “Gaan weg van My, julle vervloektes, in die ewige vuur wat berei is vir die duiwel en sy engele. Want Ek het honger gehad, en julle het My nie te ete gegee nie; Ek het dors gehad, en julle het My nie te drinke gegee nie. Ek was ’n vreemdeling, en julle het vir My nie herberg gegee nie; naak, en julle het My nie geklee nie; siek en in die gevangenis, en julle het My nie besoek nie.”

Die bokke kla egter: “Here, wanneer het ons U honger gesien of dors of ’n vreemdeling of naak of siek of in die gevangenis, en U nie gedien nie?” Die bokke ontvang ’n ongunstige oordeel op dieselfde grondslag as wat die skape ’n gunstige oordeel ontvang. “Vir sover julle dit nie gedoen het aan een van hierdie geringstes [van My broeders] nie”, antwoord Jesus, “het julle dit aan My ook nie gedoen nie.”

Christus se teenwoordigheid in Koninkryksmag, net voor hierdie goddelose stelsel van dinge in die groot verdrukking eindig, sal dus ’n tyd van oordeel wees. Die bokke “sal weggaan in die ewige straf, maar die regverdiges [die skape] in die ewige lewe”. Mattheüs 25:31-46; Openbaring 14:1-3.

◆ Waarom moet Christus se teenwoordigheid onsigbaar wees, en watter werk doen hy in daardie tyd?

◆ In watter sin beërf die skape die Koninkryk?

◆ Wanneer het “die grondlegging van die wêreld” plaasgevind, en waarom toe?

◆ Op grond waarvan word mense as skape of as bokke geoordeel?