Lojaliteit—Tot watter prys?
“Teenoor iemand wat lojaal is, sal u lojaal optree.”—PSALM 18:25, “NW”.
1, 2. (a) Wat is lojaliteit, en hoe raak die fasette daarvan ons lewe? (b) Waarom is dit goed om ons tot Jehovah te wend as ons uitmuntende Voorbeeld?
GETROUHEID, plig, liefde, verpligting, trou. Wat het hierdie woorde gemeen? Hulle is verskillende fasette van lojaliteit. Lojaliteit is ’n godvrugtige eienskap wat uit hartgrondige toegewydheid voortspruit. Maar lojaliteit het vir baie mense vandag min betekenis. Getrouheid aan ’n huweliksmaat, verpligtinge teenoor ouer familielede, ’n werknemer se trou aan sy werkgewer—al hierdie dinge word lig opgeneem en dikwels nie nagekom nie. En wat gebeur as daar ’n botsing van lojaliteite is? Toe ’n rekenmeester in Engeland onlangs die waarheid oor sy maatskappy se finansies aan die belastinginspekteurs vertel het, het hy sy werk verloor.
2 Dit is maklik om net van lojaliteit te praat, maar ware lojaliteit behels dat ’n mens daadwerklik optree en nie voor vrees swig nie. Wat dit betref, faal ons as onvolmaakte mense dikwels. Dit is dus goed as ons die voorbeeld beskou van iemand wie se lojaliteit glad nie betwis kan word nie, Jehovah God self.
Voorbeelde van Jehovah se lojaliteit
3. Hoe was Jehovah lojaal teenoor sy voorneme wat in Genesis 3:15 opgeteken is?
3 Toe Adam gesondig het, het Jehovah sy voorneme duidelik uitgespreek om die mensdom wat toe nog nie gebore was nie, los te koop. Die grondslag vir hierdie optrede was sy liefde vir sy menseskepsele (Johannes 3:16). Mettertyd het dit geblyk dat Jesus Christus, die beloofde saad wat in Genesis 3:15 voorspel is, die losprysoffer was, en dit sou vir Jehovah ondenkbaar wees om sy uitgesproke voorneme nie gestand te doen nie. As ons Jesus se offerande aanvaar, sal ons geloof ons nie teleurstel nie.—Romeine 9:33.
4. Hoe was Jehovah lojaal teenoor Jesus, en wat was die gevolge?
4 Jehovah se lojaliteit teenoor Jesus het die Seun baie versterk gedurende sy tyd op die aarde. Jesus het geweet dat hy sou moes sterf, en hy was vasbeslote om tot die einde toe lojaal teenoor sy God te bly. Tydens sy doop en salwing deur die heilige gees het hy breedvoeriger kennis oor sy voormenslike bestaan opgedoen. Die aand toe hy verraai is, het hy gebid vir sy terugkeer na sy hemelse Vader, na ‘die heerlikheid wat hy by Jehovah gehad het voordat die wêreld was’ (Johannes 17:5). Hoe sou dit moontlik kon wees? Slegs as Jehovah sy lojale Seun nie in die graf sou laat om verderwing te sien nie. Jehovah het hom uit die dood tot onsterflikheid opgewek, en het dus lojaal die profetiese belofte vervul wat in Psalm 16:10 opgeteken is: “U sal my siel aan die doderyk nie oorgee nie.”—Handelinge 2:24-31; 13:35; Openbaring 1:18.
5. Watter ander lojale dade hou verband met Jehovah se beloftes aan Jesus?
5 Na sy opstanding het Jesus eweneens geweet dat hy kon staatmaak op Jehovah se woorde dat hy ‘sy vyande ’n voetbank vir sy voete sal maak’ (Psalm 110:1). Daardie tyd het in 1914 aangebreek, aan die einde van die “tye van die nasies”, toe die Koninkryk in die hemele opgerig is. Die belofte dat Jesus oor sy vyande sou heers, het in vervulling begin gaan toe Satan en sy demone uit die hemele gewerp is. Dit sal ’n hoogtepunt bereik wanneer hulle duisend jaar lank in die afgrond gewerp word en “die konings van die aarde en hulle leërs” vernietig word.—Lukas 21:24; Openbaring 12:7-12; 19:19; 20:1-3.
6. Watter vaste hoop gee God ons, en hoe kan ons ons waardering daarvoor betoon?
6 Die psalmis het gemaan: “Wag op die HERE en hou sy weg, en Hy sal jou verhoog, om die aarde te besit” (Psalm 37:34). Ons kan vol vertroue wees dat Jehovah altyd sy woord sal hou en dat hy mans, vroue en kinders wat ‘sy weg hou’ deur die einde van hierdie goddelose wêreld heen sal red. Daardie frase dra in die oorspronklike Hebreeus die gedagte oor van ywer sowel as getrouheid in diens aan Jehovah. Dit is derhalwe nie nou die tyd om moeg te word of om diensvoorregte wat ons kry op te gee nie. Dit is nou die tyd om ons in lojale diens aan ons God en sy Koninkryk in te span (Jesaja 35:3, 4). Daar is goeie voorbeelde om ons aan te moedig. Kom ons bespreek ’n paar van hulle.
Aartsvaders weerspieël lojaliteit
7, 8. (a) Watter werkopdragte het Jehovah aan Noag en sy gesin gegee? (b) Hoe het Noag se huishouding bewys dat hulle God se beskerming gedurende die aardwye vloed waardig was?
7 Toe Jehovah hom voorgeneem het om ’n goddelose mensegemeenskap deur middel van ’n watervloed te vernietig, het hy met die aartsvaderlike familiehoof Noag ’n verbond gesluit oor die bewaring van sy gesin en die behoud van lewe op hierdie aarde (Genesis 6:18). Noag was dankbaar oor die vooruitsig op goddelike beskerming, maar hy en sy gesin moes bewys dat hulle dit waardig was. Hoe? Deur te doen wat Jehovah hulle beveel het. Hulle het eerstens die ontsaglike taak gehad om die ark te bou. Wanneer dit klaar was, moes Noag dit vul met verteenwoordigers uit die diereryk en met genoeg voedsel om hulle vir ’n lang tydperk aan die lewe te hou. Maar dit was nie al nie. Gedurende die lang tydperk van voorbereiding het Noag alles moontlik gedoen in ’n ongeëwenaarde predikingswerk om mense te waarsku teen die goddelike oordeel wat sou kom.—Genesis, hoofstukke 6 en 7; 2 Petrus 2:5.
8 Die Bybel deel ons mee: “Noag het dit gedoen. Net soos God hom beveel het, so het hy gedoen” (Genesis 6:22; 7:5). Noag en sy gesin het hulle take lojaal uitgevoer. Hulle self-opofferende gees het beteken dat hulle hul tyd nuttig bestee het, maar die taak was swaar en die predikingswerk moeilik. Die feit dat Noag se seuns en hulle vrouens nie voor die Vloed kinders voortgebring het nie, het hulle gehelp om hulle aandag toe te spits op die opgelegte werk waarmee hulle besig was en om hulle bedrywighede te koördineer. Daardie rampspoedige Vloed het ’n regverdige einde aan ’n goddelose wêreld gebring. Slegs Noag, sy vrou en hulle drie seuns en drie skoondogters het dit oorlewe. Ons kan bly wees dat hulle lojaal teenoor God en sy opdragte was, aangesien elkeen van ons regstreeks van Noag afstam, hetsy deur Sem, Gam of Jafet.—Genesis 5:32; 1 Petrus 3:20.
9. (a) Hoe is Abraham se lojaliteit op die proef gestel toe Jehovah hom getoets het? (b) Hoe het Isak in hierdie opsig lojaal gebly?
9 Toe Abraham voorbereidsels getref het om Isak op te offer, het hy getrou opgetree in gehoorsaamheid aan Jehovah se bevel. Hoe is sy lojaliteit tog nie op die proef gestel nie! Maar Jehovah het Abraham se hand teëgehou en gesê: “Nou weet Ek dat jy God vrees en jou seun, jou enigste, van My nie teruggehou het nie.” Dit sal egter goed wees as ons die dinge wat vooraf gebeur het in oënskou neem. Gedurende die driedaagse reis na die berg Moria het Abraham beslis genoeg tyd gehad om sake te oordink en om van gedagte te verander. Wat van Isak wat die hout vir die offerande gedra het en wat toegelaat het dat sy hande en voete vasgebind word? Hy het nie geweifel om aan sy vader, Abraham, trou te bly nie; ook het hy nie die rol wat hy daarin moes hê, bevraagteken nie, hoewel dit gelyk het asof sy lojale optrede hom sy lewe sou kos.—Genesis 22:1-18; Hebreërs 11:17.
Christelike lojaliteit
10, 11. Watter voorbeelde van lojaliteit was daar onder die vroeë Christene?
10 Jehovah het nog altyd waarlik lojaal opgetree. “Wees dan navolgers van God”, maan die apostel Paulus (Efesiërs 5:1, 2). Christene moes optree soos die aartsvaders opgetree het. Die vroeë Christene het goeie voorbeelde gestel wat lojale aanbidding betref, soos die volgende ondervinding toon.
11 Romeinse keiser Konstantius I, vader van keiser Konstantyn, het blykbaar groot respek vir die volgelinge van Jesus Christus gehad. Om die lojaliteit van die Christene wat in sy paleis gewerk het op die proef te stel, het hy vir hulle gesê dat hulle net in sy diens kon bly as hulle instem om afgodsoffers te bring. Hulle is meegedeel dat hy hulle sou ontslaan en hom op hulle sou wreek as hulle sou weier. Konstantius wou deur hierdie eenvoudige set vasstel wie nooit hulle lojaliteit sou prysgee nie. Diegene wat lojaal teenoor God en sy beginsels was, is in die keiser se diens gehou en sommige het selfs vertroude raadgewers geword. Diegene wat dislojaal teenoor God se gebod was, is oneervol ontslaan.
12. Hoe moet Christenopsieners lojaliteit openbaar, en waarom is dit noodsaaklik vir die gemeente se welsyn?
12 Hoewel lojaliteit ’n kenmerk van alle Christene se lewe moet wees, word dit in die besonder in Titus 1:8 (NW) gemeld as een van die vereistes vir ’n man om ’n Christenopsiener te wees. William Barclay sê dat hoʹsi·os, die Griekse woord wat hier as “lojaal” vertaal word, “die man [beskryf] wat gehoorsaam is aan die ewige wette wat voor enige mensgemaakte wette was en is”. Dit is noodsaaklik dat ouere manne so ’n lojale standpunt ten opsigte van gehoorsaamheid aan God se wette inneem. Hierdie regte voorbeeld sal die gemeente help om te groei en om sterk genoeg te wees om alle beproewinge en druk te deurstaan wat die gemeente as ’n liggaam of sy individuele lede bedreig (1 Petrus 5:3). Aangestelde ouere manne het ’n groot verantwoordelikheid teenoor die kudde om nooit hulle lojaliteit teenoor Jehovah prys te gee nie, want die gemeente word vermaan om ‘hulle geloof na te volg’.—Hebreërs 13:7.
Lojaliteit—Tot watter prys?
13. Wat word bedoel met die aksioom “Daar is niemand wat nie omgekoop kan word nie”, en watter voorbeelde staaf dit blykbaar?
13 “Daar is niemand wat nie omgekoop kan word nie”, is ’n aksioom wat aan sir Robert Walpole, ’n Britse eerste minister van die 18de eeu, toegeskryf word. Dit som die feit mooi op dat lojaliteit deur die geskiedenis heen dikwels vir selfsugtige gewin ingeboet is. Beskou Bybelvertaler William Tyndale, wat ’n fout gemaak het deur Henry Phillips as ’n lojale vriend te aanvaar. In 1535 het Phillips dislojaal opgetree en Tyndale aan sy vyande verraai, wat tot Tyndale se onmiddellike inhegtenisname en ontydige dood gelei het. Een geskiedskrywer sê dat Phillips, waarskynlik ’n agent van òf die Engelse koning òf die Engelse Katolieke, “goed betaal is vir sy Judaswerk”. Die geskiedskrywer het natuurlik na Judas Iskariot verwys, wat 30 silwerstukke aanvaar het as die prys om Jesus Christus te verraai. Ons moet egter nie uit hierdie voorbeelde aflei dat ’n mens altyd met geld omgekoop kan word om sy lojaliteit prys te gee nie. Dit is nie die geval nie.
14. Hoe is Josef se lojaliteit teenoor Jehovah op die proef gestel, en wat was die gevolge?
14 Toe Potifar se vrou by Josef aangedring het om ‘met haar gemeenskap te hê’, is sy lojaliteit teenoor Jehovah op die proef gestel. Wat sou hy doen? Josef, wat reeds duidelik besef het watter beginsels hierby betrokke is, het uit die huis gehardloop, vasbeslote dat hy nooit ‘hierdie groot kwaad kan doen en teen God sondig nie’. Die vooruitsig op seksuele genot kon Josef nie sy lojaliteit teenoor sy God, Jehovah, laat prysgee nie.—Genesis 39:7-9.
15. Hoe het Absalom dislojaal opgetree, en wat was die gevolge?
15 Maar daar is ander gevare; ambisie kan lojaliteit ondermyn. Dit het Absalom beweeg om teen sy vader, koning Dawid, in opstand te kom. Absalom het deur konkelry en onderduimsheid probeer om hom by die volk bemind te maak. Hy het uiteindelik ’n leër op die been gebring om teen sy vader se lojale ondersteuners te veg. Toe Absalom deur Joab doodgemaak is, het dit ’n einde gemaak aan sy dislojaliteit teenoor sy vader, Dawid, maar wat ’n prys moes hy tog betaal vir sy poging om die teokratiese reëling omver te werp!—2 Samuel 15:1-12; 18:6-17.
Die lojaliteit wat nie prysgegee sal word nie
16. Wat openbaar 2 Korinthiërs 11:3 oor Satan se motiewe?
16 Hoewel Satan beweer dat elkeen omgekoop kan word, en dit wel in die geval van Absalom waar was, was dit nie met Josef die geval nie, en dit was nooit waar wat lojale aanbidders van Jehovah betref nie. Nogtans sal Satan ons enigiets aanbied sodat ons ons lojaliteit teenoor ons Skepper sal prysgee. Die apostel Paulus het die vrees uitgespreek dat ons sinne miskien bedorwe kan raak, “net soos die slang Eva deur sy listigheid bedrieg het”, en dat ons dan ons lojaliteit teenoor Jehovah sal prysgee en sal ophou om hom te aanbid.—2 Korinthiërs 11:3.
17. Waarvoor het sommige kosbare diensvoorregte verruil?
17 Dit is gepas dat ons ons afvra: ‘Is daar enigiets waardeur ek my sal laat omkoop in ruil vir my voorreg om my Skepper lojaal te aanbid?’ Dit is ongelukkig waar dat sommige wat toegewyde knegte van Jehovah was, in teenstelling met Josef, baie min in ruil gevra het. Selfs party ouere manne het hulle kosbare voorreg van heilige diens vir die tydelike genieting van onsedelike sinsgenot verruil. Hetsy hulle ouere manne is of nie, baie van diegene wat dit gedoen het, het gesinseenheid, die liefde en respek van die gemeente en die goedkeuring van Jehovah—juis die Een wat hulle krag kan gee om lojaal te bly en om enige versoeking van Satan te weerstaan—vir ewig verloor.—Jesaja 12:2; Filippense 4:13.
18. Waarom is dit belangrik om op die waarskuwing in 1 Timotheüs 6:9, 10 ag te slaan?
18 Ander, wie se ambisie hulle vasbeslote maak om in wêreldse strewes opgang te maak, het “hulleself met baie smarte deurboor”, ondanks die Bybel se duidelike waarskuwings (1 Timotheüs 6:9, 10). Demas, ’n Christen van wie Paulus melding gemaak het, het as gevolg hiervan tydelik of permanent skade gely (2 Timotheüs 4:10). Ons kan nooit ons lojaliteit teenoor Jehovah prysgee sonder rampspoedige gevolge nie. “God laat Hom nie bespot nie; want net wat die mens saai, dit sal hy ook maai.”—Galasiërs 6:7.
19, 20. (a) Wat is party van die gevare verbonde aan te veel televisiekykery? (b) Watter voorbeeld het een Getuiegesin gestel?
19 Soms kan die omkoopprys op ’n baie subtiele manier aangebied word. Byvoorbeeld, ’n verslag uit die Verenigde State sê dat baie gesinne ongeveer die helfte van die tyd wat hulle by die huis is en nie slaap nie daaraan bestee om televisie te kyk, en jongmense in die besonder is daaraan verslaaf. As ’n Christen sy gedagtes hoofsaaklik sou voed met televisie, met sy seks en geweld, kan dit spoedig sy Christelike beginsels ondermyn. Dit kan maklik daartoe lei dat hy dislojaal word en van Jehovah vervreemd raak. Sulke slegte omgang bederf beslis goeie sedes (1 Korinthiërs 15:33). Ons moenie vergeet dat die Skrif ons vermaan om tyd daaraan af te staan om Jehovah se Woord te studeer en daaroor te peins nie. Is dit billik om baie tyd voor ’n televisieskerm deur te bring ten koste van tyd wat gebruik kon word om kennis op te doen wat tot die ewige lewe lei as ’n lojale aanbidder van Jehovah? Baie mense wat vandag kennis van die waarheid opdoen, moes in hierdie opsig groot veranderinge in hulle denke aanbring.—1 Timotheüs 4:15, 16; 2 Timotheüs 2:15.
20 Takasji is ’n Japannese sakeman wat in Engeland woon. Hy het gewoonlik die meeste aande drie of vier uur lank saam met sy gesin televisie gekyk. Toe hy en sy vrou drie jaar gelede gedoop is, het hy hom voorgeneem dat persoonlike en gesinsbybelstudie die voorkeur moet geniet. Omdat hy sy televisiekykery gemiddeld tot bloot 15 of 30 minute per dag verminder het, kon hy goeie leiding aan sy gesin gee. Hoewel Takasji twee Bybels moet gebruik om te studeer, een Engels en die ander Japannees, was sy geestelike groei vinnig, en hy dien nou as ’n bedieningskneg in ’n Engelssprekende gemeente. Sy vrou is ’n hulppionier. “Om die geestelikheid van ons twee jong seuns te beskerm”, sê hy, “gaan ek elke dag sorgvuldig saam met my vrou na waarna hulle op televisie mag kyk.” Sulke self-dissipline is lonend.
21. Wat weet ons van Satan se taktiek, en hoe kan ons ons beskerm?
21 Ons kan hiervan seker wees: Satan ken ons swakhede, miskien beter as wat ons dit self ken. Hy sal vir niks stuit terwyl hy probeer om ons sover te kry om te swig of om ons trou aan Jehovah te verswak nie. (Vergelyk Mattheüs 4:8, 9.) Hoe kan ons ons dus beskerm? Deur voortdurend ons toewyding in gedagte te hou en deur vreugde daaruit te put om bekwaamhede te ontwikkel terwyl ons in ander se geestelike behoeftes voorsien. As lojale knegte van Jehovah moet ons in sy diens besig bly en te alle tye deur sy heilige Woord gelei word. Dit sal ons help in ons vaste voorneme dat geen prys wat Satan ooit kan aanbied ons ons lojaliteit teenoor God sal laat prysgee nie.—Psalm 119:14-16.
Hoe sal jy antwoord?
◻ Hoe het Jehovah en Jesus lojaliteit geopenbaar?
◻ Noem ’n paar ander Bybelse voorbeelde van lojaliteit.
◻ Wat kan Satan ons dalk aanbied of probeer doen?
◻ Hoe kan ons ons versterk om lojaal in ons aanbidding van Jehovah te bly?