Werk lojaal saam met Jehovah
“o God, U het my geleer van my jeug af, en tot nou toe verkondig ek u wonders.”—PSALM 71:17.
1. Waarom kan ons sê dat werk ’n gawe van Jehovah is?
WERK is een van God se gawes aan die mens. Jehovah het vir ons eerste ouers, Adam en Eva, gesê: “Vul die aarde, onderwerp dit.” Dit was ’n uitdagende werktoewysing, maar ’n werk wat nie bokant hulle vuurmaakplek was nie. Die fisiese en verstandelike inspanning wat nodig was, sou hulle groter lewensvreugde gee as wat die diere waarmee hulle hul aardse tuiste gedeel het, ooit ervaar het.—Genesis 1:28.
2, 3. (a) Hoe beskou baie mense werk vandag, en waarom? (b) Watter geleentheid om ’n spesiale werk te doen, moet ons oorweeg?
2 Selfs in ons onvolmaakte toestand is “moeitevolle arbeid” wat “die goeie” tot gevolg het “’n gawe van God”, soos die wyse man Salomo geskryf het (Prediker 3:13). Die mens móét sy verstandelike en liggaamlike vermoëns altyd gebruik. Dit is neerdrukkend om werkloos te wees. Maar nie alle werk is heilsaam of lonend nie. Vir baie mense is werk ’n beslommernis wat hulle noodgedwonge moet doen om ’n bestaan te kan maak.
3 Daar is egter ’n waarlik lonende werk waaraan ons almal genooi word om deel te neem. Maar diegene wat daaraan deelneem het baie teenstanders en probleme wat hulle die hoof moet bied. Waarom is dit belangrik dat ons aan die vereistes vir hierdie werk voldoen? Hoe doen ons dit? Laat ons eers die volgende beskou voordat ons hierdie vrae beantwoord:
Vir wie werk ons?
4. Watter soort werk het Jesus vreugde en tevredenheid verskaf?
4 Jesus Christus het gesê: “My voedsel is om die wil te doen van Hom wat My gestuur het en om sy werk te volbring” (Johannes 4:34). Lojale werk vir Jehovah het Jesus baie vreugde en tevredenheid verskaf. Dit het hom ’n doel in die lewe gegee, en aan die einde van sy drie en ’n half jaar lange bediening kon hy waarlik aan sy hemelse Vader sê: “Ek het U verheerlik op die aarde. Die werk wat U My gegee het om te doen, het Ek volbring” (Johannes 17:4). Net soos fisiese kos versterkend is, so is werk met ’n geestelike dimensie ook versterkend. Jesus het dit by ’n ander geleentheid beklemtoon toe hy gemaan het: “Moenie werk om die spys wat vergaan nie, maar om die spys wat bly tot in die ewige lewe” (Johannes 6:27). Daarenteen lei werk wat geestelik onproduktief is tot frustrasie en die dood.
5. Wie het die goeie werk wat Jesus gedoen het, teëgestaan, en waarom?
5 “My Vader werk tot nou toe, en Ek werk ook.” Jesus het hierdie woorde tot die Jode gerig wat hom gekritiseer het omdat hy ’n man wat 38 jaar lank siek was op die Sabbat genees het (Johannes 5:5-17). Hoewel Jesus Jehovah se werk gedoen het, het godsdiensteenstanders geweier om daardie feit te erken en het hulle alles moontlik gedoen om hom te stuit. Waarom? Omdat hulle uit hulle vader, Satan die Duiwel, was wat nog altyd Jehovah se werk teëgestaan het (Johannes 8:44). Aangesien Satan ‘hom in ’n engel van die lig kan verander’ en “allerhande verleiding van ongeregtigheid” gebruik, het ons geestelike onderskeidingsvermoë en helder denke nodig om sy werke te sien vir wat hulle is. Anders kan ons dalk vind dat ons teen Jehovah werk.—2 Korinthiërs 11:14; 2 Thessalonicense 2:9, 10.
Teenstanders aan die werk
6. Waarom is afvalliges “bedrieglike arbeiders”? Illustreer.
6 Sommige, soos sekere afvalliges van vandag, werk dislojaal as Satan se agente om nuwe lede wat met die Christengemeente assosieer se geloof te ondermyn (2 Korinthiërs 11:13). Pleks van eenvoudig die Bybel as die grondslag vir ware leringe te gebruik, lê hulle hul daarop toe om die New World Translation of the Holy Scriptures te probeer diskrediteer, asof Jehovah se Getuies geheel en al daarop vertrou vir ondersteuning. Maar dit is nie die geval nie. Die Getuies het amper ’n eeu lank hoofsaaklik die King James Version, die Rooms-Katolieke Douay Version, of watter vertalings ook al in hulle taal beskikbaar was, gebruik om die waarheid oor Jehovah en sy voornemens te leer. En hulle het hierdie ouer vertalings gebruik om die waarheid te verkondig oor die toestand van die dode, die verwantskap tussen God en sy Seun en waarom slegs ’n klein kuddetjie hemel toe gaan. Ingeligte mense is ook daarvan bewus dat Jehovah se Getuies steeds talle vertalings van die Bybel in hulle wêreldwye evangelisasiewerk gebruik. Sedert 1961 het hulle egter ook die genot gesmaak om die New World Translation te gebruik, wat ’n bygewerkte, akkurate vertaling is en wat maklik lees.
7. (a) Waarom verwerp Jesus baie mense wat geloof in hom bely? (b) Waarom is dit belangrik om op die raad in 1 Johannes 4:1 (NW) ag te slaan?
7 Jesus het gesê dat hy baie mense wat geloof in hom bely, sal verwerp. Hy het erken dat hulle dalk sal profeteer, duiwels sal uitdryf en ‘baie kragte in sy Naam sal doen’. Nogtans bestempel hy hierdie dinge as werke van “wetteloosheid” (Mattheüs 7:21-23, vgl. NW). Waarom? Omdat hulle nie die wil van sy hemelse Vader doen nie en wat Jehovah God betref nutteloos is. Buitengewone werke, wat selfs oënskynlik wonderwerke is, kan vandag steeds hulle oorsprong by die aartsbedrieër, Satan, hê. Die apostel Johannes, wat sy eerste algemene brief ongeveer 60 jaar na Jesus se dood en opstanding geskryf het, het Christene gemaan: “Glo nie elke geïnspireerde uiting nie, maar beproef die geïnspireerde uitinge om te sien of hulle uit God voortspruit.” Ons moet dit ook doen.—1 Johannes 4:1, NW.
Nuttelose werke
8. Wat moet ons beskouing van die werke van die vlees wees?
8 Selfs al neem ons nie deel aan werke wat geestelik teenproduktief is nie, is ons werke nutteloos as hulle steeds die begeertes van die gevalle vlees bevredig. Die apostel Petrus het gesê dat ons lank genoeg tyd daaraan bestee het om “die wil van die heidene . . . in ongebondenheid, begeerlikheid, dronkenskap, brasserye, drinkpartye en ongeoorloofde afgoderye” te volbring (1 Petrus 4:3, 4). Dit beteken natuurlik nie almal wat nou toegewyde Christene is, het aan sulke dade deelgeneem nie, maar dit beteken wel dat die gesindheid van diegene wat dit gedoen het vinnig sou moes verander namate hulle geestelike insig vermeerder het. Die wêreld sal lasterlik van hulle praat omdat hulle hul bekeer het; ’n mens kan dit verwag. Maar hulle moet verander as hulle lojale werkers in Jehovah se diens wil word.—1 Korinthiërs 6:9-11.
9. Wat leer ons uit die ondervinding van die Getuie wat begin het om haar opleiding as operasangeres te ontvang?
9 Jehovah het ons baie gawes gegee vir ons genot, waaronder musiek. Maar “die hele wêreld [lê] in die mag van die Bose”, Satan die Duiwel. Sluit dit dan nie die musiekwêreld in nie? (1 Johannes 5:19). Ja, musiek kan ’n subtiele strik wees, soos Sylvana ontdek het. Sy het die geleentheid gehad om haar opleiding as operasangeres in Frankryk te ontvang. “Ek het steeds ’n sterk begeerte gehad om Jehovah te dien”, verduidelik sy. “Ek het aan die hulppionierdiens deelgeneem en het gehoop om hierdie twee dinge in my lewe met mekaar te versoen. Maar die eerste probleem waarvoor ek te staan gekom het in die najaging van my beroep was onsedelikheid. My kollegas het my aanvanklik as naïef beskou wanneer ek nie aan hulle onsedelike praatjies wou deelneem en nie hulle voorbeeld wou volg nie. Later het die verdorwe omgewing my minder gevoelig gemaak en my verdraagsaam gemaak teenoor dinge wat Jehovah haat. Een van my onderwysers het my voortdurend aangespoor om ’n godsdiens van my sang te maak, en ek is geleer om aggressief op die verhoog te wees en om te dink dat ek almal se meerdere is. Dit alles het my baie bekommerd gemaak. Ek moes uiteindelik vir ’n spesiale oudisie voorberei. Ek het tot Jehovah gebid om my duidelik te wys watter rigting ek moes inslaan. Hoewel ek goed gesing het en vol vertroue was, was ek nie onder diegene wat gekies is nie. Ek het later uitgevind waarom nie—die uitslae is lank voor die wedstryd in die geheim bepaal. Maar ek het ’n duidelike antwoord op my gebed gehad en het besluit om die operatoneel te verlaat om sanglesse by die huis te gee.” Hierdie suster het later met ’n ouere man in ’n Christengemeente getrou, waar albei nou lojale werk doen om Koninkryksbelange te bevorder.
10. Tot watter slotsom laat Jesus se woorde in Johannes 3:19-21 jou kom?
10 Jesus het gesê: “Elkeen wat kwaad doen, haat die lig en kom nie na die lig nie, dat sy werke nie bestraf mag word nie.” Maar “hy wat die waarheid doen, kom na die lig, sodat sy werke openbaar kan word, dat hulle in God gedoen is” (Johannes 3:19-21). Wat ’n seën is dit tog om in ooreenstemming met Jehovah se wil en voorneme te werk! Maar as ons dit met welslae wil doen, moet ons altyd toelaat dat ons werke noukeurig in die lig van God se Woord ondersoek word. Ons is nooit te oud en dit is nooit te laat om ons leefwyse te verander en om die uitnodiging te aanvaar om Jehovah se lonende diens te betree nie.
“Goeie werke” wat vandag gedoen word
11. Watter “goeie werke” jaag baie mense na, en waarom kan sulke werke tot frustrasie lei?
11 Werk wat vandag lonend is, moet die dringendheid van ons tyd weerspieël. Talle opregte mense is dit hiermee eens en hou hulle besig met werke wat dikwels as “goeie werke” beskryf word, wat tot voordeel van die mensdom in die geheel of spesifiek vir een saak gedoen word. Maar hoe frustrerend kan hierdie soort werk tog wees! In Brittanje het CAFOD (Katolieke Fonds vir Buitelandse Ontwikkeling) verslag gelewer oor sy kampanje vir die verligting van hongersnood en gesê: “Drie jaar gelede . . . is miljoene [rande] ingesamel vir noodleniging. Duisende lewens is gered. Nou word daardie lewens weer eens bedreig . . . Maar waarom? Wat het verkeerd geloop?” Die CAFOD Journal het sy verslag voortgesit en verduidelik dat langtermynprobleme nooit aangepak is nie en dat “geldmiddele wat dringend nodig was vir die opheffing van die mens gebruik is om die konflik [burgeroorlog] aan te stook”. Jy het ongetwyfeld al sulke kommentare gehoor van liefdadigheidsorganisasies wat aan soortgelyke werk deelneem.
12. Wat is die enigste oplossing vir die probleme waarmee die wêreld vandag te kampe het?
12 Hongersnood is ’n dringende probleem. Maar wie wys daarop dat vandag se tragedies van hongersnood en oorlog Jesus Christus se profesie vervul, wat op die einde van die huidige stelsel van dinge dui? (Mattheüs 24:3, 7). Wie het bewyse gepubliseer wat hierdie gebeure in verband bring met die rit van die vier perderuiters wat duidelik in die Bybelboek Openbaring, hoofstuk 6, uitgebeeld word? Jehovah se Getuies het dit deurgaans lojaal gedoen deur middel van hierdie tydskrif. Waarom? Om te toon dat dit buite mense se bereik is om enige blywende oplossing te bewerk. Dit beteken nie dat Christene onverskillig teenoor die wêreld se probleme staan nie. Dit is glad nie die geval nie. Hulle is deernisvol en sal alles in hul vermoë doen om lyding te verlig. Nogtans is hulle realisties en sien hulle die feit onder die oë dat die wêreld se probleme nooit sonder goddelike ingryping opgelos sal word nie. Soos die armes, sal hierdie probleme bly bestaan solank as wat Satan toegelaat word om as die heerser van hierdie wêreld voort te gaan.—Markus 14:7; Johannes 12:31.
Die kosbaarste werk
13. Wat is vandag die dringendste werk, en wie doen dit?
13 Dit is vandag uiters dringend om die goeie nuus te verkondig dat die Koninkryk van Jehovah God binnekort alle wêreldlike regerings sal vervang en die verligting sal bring waarna godvresende mense uitsien (Daniël 2:44; Mattheüs 24:14, vgl. NW). Jesus Christus het die verkondiging van die hemelse Koninkryk sy hoofdoel in die lewe gemaak, hoewel sy prediking tot die land Palestina beperk was. Vandag word hierdie predikingswerk oor die hele wêreld gedoen, net soos Jesus gesê het dit sou gebeur (Johannes 14:12; Handelinge 1:8). Dit is ’n onvergelyklike voorreg om ’n deelname, selfs ’n klein deelname, aan God se werk te hê. Mans en vroue, oud en jonk, wat vroeër nooit kon droom dat hulle predikers van die goeie nuus sou wees nie, neem die voortou in die evangelisasiewerk wat vandag deur Jehovah se Getuies gedoen word. As ’n voorspel tot die einde van hierdie stelsel van dinge doen hulle, soos Noag en sy gesin, in God se krag die werk wat Hy hulle opgedra het lojaal.—Filippense 4:13; Hebreërs 11:7.
14. Hoe is die predikingswerk lewensreddend en terselfdertyd ’n beskerming?
14 Die getuieniswerk van Jehovah se Getuies gedurende hierdie laaste dae is lewensreddend vir diegene wat luister na die goeie nuus wat hulle hoor, en daarop ag slaan (Romeine 10:11-15). Dit is ook ’n beskerming vir diegene wat preek. As ons opreg daarin belangstel om mense te help wie se probleme groter as ons s’n is, sal ons waarskynlik nie oormatig besorg raak oor probleme wat ons dalk het nie. Ons besef dat hierdie wêreld met sy verlagende standaarde graag sal wil hê dat ons ons na sy weë skik. Dit is dus meer as geloofversterkend om ons verstande tydens ons predikingswerk met God se gedagtes te vul; dit is in ons belang. Soos een Getuie dit gestel het: “As ek nie probeer om die mense wat ek teëkom te verander nie, kan hulle my verander!”—Vergelyk 2 Petrus 2:7-9.
Werk saam met die gemeente
15. Watter verantwoordelikhede rus vandag op onderherders, en wat moet die beskouing van manlike lede van die gemeente wees met die oog op 1 Timotheüs 3:1?
15 Wanneer nuwe belangstellendes na die gemeente kom, kom hulle onder die sorg van die Groot Herder, Jehovah God, en sy Goeie Herder, Jesus Christus (Psalm 23:1; Johannes 10:11). Hierdie hemelse Herders word hier op aarde verteenwoordig deur lojale onderherders van die kudde, mans wat in die gemeentes aangestel word (1 Petrus 5:2, 3). Dit is ’n kosbare voorreg om in hierdie laaste dae so ’n amp te hê. Die herders se werk is ’n gewigtige werk, wat nie net behels dat hulle die leiding neem wat onderrig in die gemeente en die evangelisasiewerk betref nie, maar ook dat hulle die kudde beskerm teen geestelike roofdiere en die aanslae van die stormagtige atmosfeer van die wêreld waarin ons lewe. Die lonendste werk waarna manlike lede van die gemeente kan strewe, is om te help om na die geestelike welsyn van die lede van die groeiende Christengemeente om te sien.—1 Timotheüs 3:1; vergelyk Jesaja 32:1, 2.
16. In watter opsigte vul Christenherders mekaar aan?
16 Ons moet egter nooit vergeet nie dat sulke herders mense is met verskillende persoonlikhede en foute net soos die res van die kudde. Terwyl die een miskien in ’n sekere aspek van die herderswerk uitblink, sal ’n ander se gawes die gemeente in ’n ander opsig tot nut strek. Hulle werke as Christen- ouere manne vul mekaar aan om die gemeente te versterk (1 Korinthiërs 12:4, 5). ’n Gees van wedywering moet nooit onder hulle posvat nie. Hulle werk saam om Koninkryksbelange te beskerm en te bevorder en ‘hef lojale hande op’ in gebed tot Jehovah om sy seën en leiding te vra op al hulle beraadslaging en besluite.—1 Timotheüs 2:8, NW.
17. (a) Onder watter verpligting staan ons? (b) Watter dinge moet ons vermy as ons ons verpligting goed wil nakom?
17 Die predikingswerk word nou al hoe dringender namate die einde van Satan se ryk nader. Omdat ons die waarheid oor Jehovah God se Woord ken, is ons as sy Getuies onder verpligting om die goeie nuus by elke geleentheid te verkondig. Die werk wat nou aan die gang is, is meer as genoeg om ons tot die einde toe besig te hou. Ons moet nooit toelaat dat ons aandag afgetrek word deur hedonistiese, onsedelike najaging van plesier nie of dat ons deur materialisme beswaar word nie. Ons moet nie by bespiegelinge betrokke raak deur oor woorde te debatteer nie, want dit kan nutteloos en tydrowend wees (2 Timotheüs 2:14; Titus 1:10; 3:9). Toe die dissipels Jesus gevra het: “Here, gaan U in hierdie tyd die koninkryk vir Israel weer oprig?” het Jesus hulle denke reggestel en hulle aandag gevestig op die belangrike taak wat hulle moes uitvoer en gesê: “Julle sal my getuies wees in Jerusalem sowel as in die hele Judea en Samaria en tot aan die uiterste van die aarde.” Daardie opdrag geld ook vir ons dag.—Handelinge 1:6-8.
18. Waarom is dit so lonend om saam met Jehovah te werk?
18 Om vandag saam met Jehovah te werk deur saam met sy wêreldwye gemeente te preek, bring geluk en tevredenheid mee en maak ons lewe waarlik doelgerig. Dit is ’n geleentheid vir elke liefhebber van Jehovah om toegewydheid en lojaliteit teenoor hom te openbaar. Hierdie werk met sy baie fasette sal nooit weer herhaal word nie. Mag ons, met die vooruitsig op die ewige lewe duidelik voor ons, lojaal aanhou om “God welbehaaglik [te] dien met eerbied en vrees” tot sy lof en tot ons eie redding.—Hebreërs 12:28.
Hoe sal jy antwoord?
◻ Watter werk het Jesus vreugde en tevredenheid verskaf?
◻ Wie staan Jehovah se werk teë, en waarom?
◻ Hoe vergelyk wêreldse “goeie werke” en die verkondiging van die goeie nuus van God se Koninkryk met mekaar?
[Prent op bladsy 18]
Jesus het sy dissipels opdrag gegee om te gaan preek