Onthou jy?

Het jy dit geniet om die onlangse nommers van Die Wagtoring te lees? Wel, kyk of jy die volgende vrae kan beantwoord:

◻ Wat het dit vir die ongehoorsame engele beteken dat hulle tot Tartarus verdoem is? (2 Petrus 2:4).

Hulle beklee nie meer ’n plek in Jehovah se heilige organisasie nie en is nou afgesny van goddelike verligting. Hulle is egter steeds onder Satan se leiding bedrywig en behou steeds noue kontak met mense terwyl hulle probeer om beheer oor mans, vroue en selfs kinders te verkry (Openbaring 12:12, 17).—4/15, bladsy 14.

◻ Waarom is dit noodsaaklik om wat Jehovah as “kwaad” beskou te “haat”? (Psalm 97:10).

Diegene wat die kwaad haat, sal nie maniere soek waarop hulle dit kan beoefen nie. Daarenteen sal mense wat dit nie haat nie hulle dalk fisies daarvan weerhou terwyl hulle verstandelik wens dat hulle aan slegte dinge kan deelneem.—4/15, bladsy 21.

◻ Watter ernstige les bevat Jesus se gelykenis van die talente vir almal wat verklaar dat hulle Christus volg? (Mattheüs 25:14-30).

Hulle moet werk om die besittings van hulle hemelse Meester te vermeerder deur ’n volle aandeel in die predikingswerk te hê. Slegs dan kan hulle verseker wees dat Jesus hulle sal prys en beloon. Hulle verhoed sodoende dat hulle in die buitenste duisternis uitgewerp word en uiteindelik vernietig word.—5/1, bladsy 9.

◻ Wat het Jesus bedoel toe hy vir sy dissipels gesê het om te bid: “Lei ons nie in versoeking nie”? (Mattheüs 6:13).

Hierdie woorde moenie vertolk word dat Jehovah ons versoek sodat ons sonde sal doen nie. Inteendeel, ons kan in werklikheid vir Jehovah vra om nie toe te laat dat ons swig wanneer ons in die versoeking kom of onder druk verkeer om ongehoorsaam aan hom te wees nie. Ons kan ons Vader smeek om ons voetstappe te rig sodat geen versoeking wat te swaar is vir ons oor ons sal kom nie (1 Korinthiërs 10:13).—5/15, bladsy 19.

◻ Is dit reg vir ’n Christen om ’n inspuiting van ’n bloedfraksie, soos immuunglobulien of albumien, te ontvang?

In gehoorsaamheid aan God se wet aanvaar Christene nie bloedoortappings van die vername komponente van bloed—plasma, rooi bloedselle, wit bloedselle of bloedplaatjies—nie. Sommige van Jehovah se Getuies het egter gevoel dat hulle met ’n skoon gewete ’n inspuiting van een van die klein proteïenfraksies van die plasma kan aanvaar. Interessant genoeg gaan sommige van hierdie proteïene op natuurlike wyse van die bloedstroom van ’n swanger vrou na die aparte bloedstelsel van haar fetus.—6/1, bladsye 30, 31.

◻ Met watter doel het Jesus die voete van die dissipels by die laaste geldige Pasga gewas?

Jesus het sy dissipels ’n les in nederigheid geleer. Niemand moet ooit die eerste plek soek omdat hy dink dat hy belangrik is nie. Almal moet eerder Jesus se voorbeeld volg en bereid wees om mekaar te dien sonder partydigheid, ongeag hoe onaangenaam of gering die taak moontlik is (Johannes 13:12-17).—6/15, bladsy 9.

◻ In watter sin het die Jode in Berea die Skrifte ‘sorgvuldig ondersoek’? (Handelinge 17:11, NW).

Dit was nie omdat die Bereane getwyfel het aan Paulus en die boodskap wat hy gebring het nie, maar hulle het navorsing gedoen om te bewys dat Jesus die Messias is. Die feit dat baie van hulle gelowiges geword het, bewys dat hulle beweegrede opreg was (Handelinge 17:12).—6/15, bladsy 18.

◻ Wat is “die boek van die Oorloë van Jehovah”? (Numeri 21:14, NW).

Dit is ’n betroubare geskiedenis van God se oorloë ten behoewe van sy volk. Dit het moontlik begin met Abraham se oorwinning oor die gewapende invallers van die Beloofde Land, soos opgeteken in Genesis hoofstuk 14. Die grootse slot van die boek sal “die oorlog van die groot dag van die almagtige God” by Armageddon wees (Openbaring 16:14, 16).—7/1, bladsye 20, 22.

◻ Hoe help God se Woord, die Bybel, ons om pyn te verdra?

Die Bybel vertel ons waarom Jehovah pyn toegelaat het en gee ons ook die versekering dat pyn binnekort sal eindig (Romeine 5:12; Openbaring 21:1-5, NW).—7/15, bladsye 4, 5.

◻ Hoe kan God se volk vandag “die heerlikheid van Jehovah soos spieëls weerkaats”? (2 Korinthiërs 3:18, NW).

God se heerlikheid skyn deur middel van “die glorieryke goeie nuus oor die Christus, wat die beeld van God is”. Jehovah se Getuies weerspieël hierdie heerlikheid deur oor die heerlikheid van Jehovah en die heerlikheid van sy Koninkryk deur sy Seun te praat (2 Korinthiërs 4:4-6, NW).—7/15, bladsye 15, 16.

◻ Wanneer moet ’n mens gedoop word?

Doop is ’n stap wat jy doen wanneer jy deur Christus Jesus ’n algehele, onvoorwaardelike toewyding aan Jehovah gemaak het om God se wil te doen.—8/1, bladsy 14.