Jy kan rykdom vind wat meer werd is as goud!
DIE waarhede in die Bybel kan met goud, silwer of ander verborge skatte vergelyk word. Hoewel jy dalk nog nooit na letterlike goud of silwer gesoek het nie, besef jy waarskynlik dat dit baie harde werk en volharding verg om dit te doen. En dikwels word die prospekteerder teleurgestel.
Maar jy word nooit so teleurgestel wanneer jy na verborge skatte in die Bybel soek nie. Let op hierdie bemoedigende waarborg: “As jy daarna soek soos na silwer en dit naspeur soos verborge skatte, dan sal jy die vrees van die HERE verstaan en die kennis van God vind” (Spreuke 2:4, 5). Maar jy móét soek.
“Soek en sien”
“Soek en sien dat uit Galilea geen enkele profeet verwek is nie” (NW). Dit was die raad van sommige eerste-eeuse Joodse Fariseërs aan Nikodemus, ook ’n Fariseër. “Soek en sien.” Inderdaad goeie raad. Dit was moontlik om die waarheid—iets baie waardevollers as goud—te soek en te vind.
In daardie spesifieke geval het diegene wat die raad gegee het om te ‘soek en te sien’ egter nie ooreenkomstig opgetree nie. Hoe so?
Die owerpriesters en die Fariseërs het dienaars gestuur om Jesus Christus gevange te neem. Die dienaars was hoogs beïndruk deur sy metode van onderrig en het sonder hom teruggekeer. Die Fariseërs het hulle gevolglik gevra: “Julle is tog nie ook mislei nie?” Nikodemus het gepraat en gesê (NAV): “Volgens ons wet kan ons mos nie sommer iemand veroordeel sonder om eers sy kant van die saak te hoor en vas te stel wat hy doen nie.” Hierdie woorde het aanleiding gegee tot die raad: “Soek en sien.”—Johannes 7:32, 45-52.
Hoe het die priesters en die Fariseërs versuim om dit te doen? Hulle het nie geweet of erken dat Jesus, hoewel hy in Galilea grootgemaak is, in Betlehem gebore is nie. Die profeet Miga het voorspel: “Uit jou [Betlehem] sal daar vir My uitgaan een wat ’n Heerser in Israel sal wees” (Miga 5:1). Daardie leiers het nie die bewyse dat Jesus ’n profeet was, een wat heerser in Israel sou wees, gesoek en gesien nie. Die gevolge hiervan was tragies, en dit lig toe hoe noodsaaklik dit is om die volle waarheid oor sake te soek en te vind. Maar hoe word die waarheid dikwels beskou?
Die waarheid is verwater
“Suiwer waarheid, soos suiwer goud, kan nie meer versprei word nie, omdat die mens ontdek het dat dit baie geriefliker is om die waarheid te verwater as om hulself te veredel”, het ’n 19de-eeuse skrywer gesê. Hoe gepas is hierdie woorde steeds wat die wêreld se godsdienste betref! “Die vader van die leuen”, Satan die Duiwel, sit agter hierdie verwatering van die waarheid (Johannes 8:44, NAV; Openbaring 12:9). Hy gebruik valse godsdiens om ware leerstellings oor belangrike vrae soos die volgende te verwater: Wie is God? Wat is Jesus se verhouding tot hom? Wat hou die toekoms vir die aarde en die mensdom in?
Die priesters en die Fariseërs kon na die waarheid gesoek en dit gevind het. Hulle kon rykdom gevind het wat baie meer werd is as goud. Ja, hulle kon die volle waarheid oor Jesus gekry het deur “eers sy kant van die saak te hoor en vas te stel wat hy doen”, soos Nikodemus voorgestel het. As hulle dit opreg sou doen, sou Jesus ongetwyfeld dinge aan hulle verduidelik het, soos hy dit aan sy dissipels verduidelik het (Markus 4:34). Maar waar kan ons vandag die suiwer waarheid vind? Trouens, is daar enige waarborg dat ons met welslae na die volle waarheid kan soek en dit kan vind?
[Prent op bladsy 4]
Godsdiensleiers kon die volle waarheid oor Jesus gekry het deur “eers sy kant van die saak te hoor”