Word met vreugde vervul
“Die dissipels is vervul met blydskap [“vreugde”, “NW”] en met die Heilige Gees.”—Handelinge 13:52.
1. (a) Watter soort vrug is vreugde? (b) Vir watter vreugdevolle voorsiening moet God verheerlik word?
VREUGDE! In Paulus se beskrywing van die vrug van die gees word net liefde voor hierdie Christelike eienskap genoem (Galasiërs 5:22-25). En wat veroorsaak hierdie vreugde? Die goeie nuus wat God se engel meer as 1 900 jaar gelede aan nederige herders meegedeel het: “Kyk, ek bring julle ’n goeie tyding van groot blydskap wat vir die hele volk sal wees, dat vir julle vandag in die stad van Dawid gebore is die Saligmaker wat Christus, die Here, is.” Toe het die leërskare van engele verskyn en God vreugdevol saam met die engel begin prys en gesê: “Eer aan God in die hoogste hemele en vrede op aarde, in die mense ’n welbehae!”—Lukas 2:10-14.
2, 3. (a) Waarom was dit gepas dat God sy eersgebore Seun gestuur het om die mensdom se Verlosser te word? (b) Op watter ander maniere het Jesus God se werk gedoen terwyl hy op aarde was?
2 Jehovah se welwillendheid teenoor mense word getoon deurdat hy redding deur middel van Christus die Heer moontlik maak. Hierdie eersgebore Seun van God is die verpersoonliking van ware wysheid en het ten tyde van die skepping aangaande sy Vader gesê: “Toe het ek naas hom ’n ferme en vaste werker geword, toe is ek van dag tot dag met vreugde vervul, en het by elke geleentheid voor hom gejubel; gejubel in die vrugbare grond van sy aarde, ja, die volheid van my vreugde was met die mensekinders.”—Spreuke 8:30, 31, Rotherham.
3 Dit was dus gepas dat Jehovah hierdie Seun, wat sulke behae in die mensekinders geskep het, gestuur het om die mensdom se Verlosser te wees. En hoe sou dit God verheerlik? Dit sou hom in staat stel om sy grootse voorneme te bewerkstellig om die aarde met regverdige en vredeliewende mense te vul (Genesis 1:28). Daarbenewens sou hierdie Seun, Jesus, terwyl hy op aarde was, onder die strafste beproewing toon dat ’n volmaakte man Jehovah as Soewereine Heer kán gehoorsaam, en sy Vader se regmatige heerskappy oor Sy skepping sodoende ten volle verheerlik (Hebreërs 4:15; 5:8, 9). Jesus se lewenswyse van onkreukbaarheid het ook ’n model gelaat sodat alle ware Christene sy voetstappe noukeurig kon navolg.—1 Petrus 2:21.
4. Watter groot vreugde was die resultaat van Jesus se volharding, en hoe moet dit ons aanspoor?
4 Jesus het groot vreugde daaruit geput om sy Vader se wil te doen, en dit terwyl hy selfs groter vreugde verwag het, soos die apostel Paulus in Hebreërs 12:1, 2 toon: “[Laat ons] met volharding die wedloop loop wat voor ons lê, die oog gevestig op Jesus, die Leidsman en Voleinder van die geloof, wat vir die vreugde wat Hom voorgehou is, die kruis [“folterpaal”, NW] verdra het, die skande verag het en aan die regterkant van die troon van God gaan sit het.” Watter vreugde is dit? Dit is die vreugde wat Jesus smaak, nie net omdat hy sy Vader se naam geheilig het en die mensdom van die dood vrygekoop het nie, maar ook omdat hy as Koning en Hoëpriester dien terwyl hy gehoorsame mense tot eindelose lewe op ’n paradysaarde herstel.—Mattheüs 6:9; 20:28; Hebreërs 7:23-26.
5. Wie is Jesus se “broeders”, en in watter unieke vreugde deel hulle?
5 Ja, God se Seun het nog altyd vreugde daaruit geput om die mensdom te dien. En dit het hom vreugde verskaf om saam met sy Vader te dien en die groep onkreukbare mense te kies, wat hy sy “broeders” noem en wat na die hemel opgewek word wanneer hulle sterf. Hierdie persone gaan saam met Jesus ’n unieke vreugde binne. Hulle word “salig en heilig” genoem, en hulle “sal priesters van God en van Christus wees en sal saam met Hom as konings regeer duisend jaar lank”.—Hebreërs 2:11; Openbaring 14:1, 4; 20:6.
6. (a) Watter vreugdevolle uitnodiging rig die Koning aan sy “ander skape”? (b) Watter voorregte het baie van hierdie skape vandag?
6 Daarbenewens ontvang ’n groot menigte “ander skape”, wat deur die heersende Koning aan sy regterhand van goedkeuring afgesonder word, die uitnodiging: “Kom, julle geseëndes van my Vader, beërf die koninkryk wat vir julle berei is van die grondlegging van die wêreld af” (Johannes 10:16; Mattheüs 25:34). Wat ’n vreugdevolle voorreg! Baie van diegene wat die aardse ryk van die Koninkryk gaan beërwe, aanvaar nou al, volgens Jehovah se voorspelling, verantwoordelike toewysings tesame met gesalfdes: “Die vreemdelinge sal staan en julle kleinvee oppas, en uitlanders sal julle landbouers en wynboere wees. Maar júlle sal priesters van die HERE genoem word; aan julle sal gesê word: Dienaars van onse God!” Hulle sê almal saam met God se profeet: “Ek is baie bly in die HERE, my siel juig in my God; want Hy het my beklee met die klere van heil.”—Jesaja 61:5, 6, 10.
7. Waarom is hierdie “dag” sedert 1914 iets baie besonders?
7 Ons lewe nou in ’n baie spesiale dag. Sedert 1914 is dit die dag van Christus se heerskappy as hemelse Koning, wat in Psalm 118:24, 25 soos volg beskryf is: “Dit is die dag wat die HERE gemaak het; laat ons daaroor juig en bly wees. Ag, HERE, gee tog heil; ag, HERE, gee tog voorspoed!” Dit is die dag wat ’n hoogtepunt sal bereik wanneer Jehovah Babiloniese godsdiens uitwis en Christus se bruid van 144 000 broeders met hulle hemelse Koning verenig. God se hele volk sal ‘bly wees en hulle hieroor verheug’. Hulle sal ook bly wees wanneer hulle Messiaanse Koning by Armageddon veg om sy lojale volk tot in sy regverdige nuwe wêreld te red (Openbaring 19:1-7, 11-16). Gee Jehovah voorspoed aan sy volk terwyl hulle hierdie vreugdevolle hoop bekend maak? Die volgende verslag sal verduidelik.
Wêreldwye uitbreiding
8. (a) Hoe word vreugde met die heilige gees in die rapport op bladsye 18 tot 21 van hierdie tydskrif weerspieël? (b) Wat is party glanspunte van die rapport?
8 Die hedendaagse Getuies van Jehovah is “oorvloedig . . . in die hoop deur die krag van die Heilige Gees” (Romeine 15:13). Dit word getoon op die kaart op bladsye 18 tot 21 van hierdie tydskrif, waar die wêreldwye rapport van Koninkryksdiens gedurende 1990 in besonderhede uiteengesit is. Hoe bly is ons tog dat ons ’n hoogtepunt van 4 017 213 bedrywige bedienaars in die veld gehad het! Dit is ’n vermeerdering van 77 persent gedurende die afgelope tien jaar, terwyl die insameling van die skape in 212 lande in alle wêrelddele voortsnel. Na 15 jaar het die doopsyfer weer ’n hoogtepunt bereik—301 518. Daar was besonder hoë doopsyfers by baie byeenkomste, veral by dié wat deur Getuies uit Oos-Europa bygewoon is. Onder hulle was daar baie jongmense, wat bewys dat die sosialistiese bewering dat godsdiens saam met die ou mense sou uitsterf onwaar is.
9. (a) Watter vreugdevolle resultaat bring vroeë onderrigting deur ouers mee? (b) Watter plaaslike of ander ondervindinge staaf dit?
9 Menigtes jongmense antwoord die oproep in Psalm 32:11: “Wees bly in die HERE en juig, o regverdiges! En jubel, alle opregtes van hart!” Baie ouers pas blykbaar die raad toe om hulle kinders “van kleins af” op te lei (2 Timotheüs 3:15). Die lektuur en kassetopnames wat vir die kleintjies voorsien word, word goed gebruik. Wanneer hierdie kinders skool toe gaan, lewer hulle spoedig ’n goeie getuienis, soos die agtjarige Japannese meisietjie wat vertel het: “Na die somervakansie het ek na my onderwyseres gegaan en haar gevra: ‘Het Juffrou hierdie vakansie na Juffrou se pa se graf gegaan?’ Toe sê sy: ‘Ja, my pa was ’n liewe mens, en ek gaan elke jaar na sy graf toe.’ Toe sê ek: ‘As Juffrou die Bybel studeer en God se wette hou, sal Juffrou weer Juffrou se pa in ’n aardse paradys sien.’ Toe gee ek haar My boek met Bybelverhale. Nou lees ons onderwyseres elke week met middagete een hoofstuk uit die boek vir die hele klas.”
10. Van watter nut was die Jongmense vra-boek, en wat is ’n paar voorbeelde?
10 Jongmense in hulle tienderjare het die boek Vrae wat jongmense vra—Antwoorde wat werk goed gebruik, nie net vir private studie nie, maar ook om ander jeugdiges te help. Ook ouers het hierdie boek waardeer. ’n Suster in Switserland, wat as ’n hulppionier dien, het besluit om die ouers van haar kind se skoolmaats te besoek. Dit het haar die geleentheid gebied om goeie besprekings met baie ouers te hê, en 20 boeke (meestal Jongmense vra) en 27 tydskrifte is onder hulle versprei. Toe ’n skooldogter in Trinidad hierdie boek vir haar onderwyser by die skool gegee het, het haar ma dit verder gevoer en 25 eksemplare onder die personeel van 36 versprei. Die volgende maand het sy spesiale aandag geskenk aan ouers wat sy persoonlik ken, en het nog 92 boeke versprei en nuwe tuisbybelstudies begin. In Korea het ’n onderwyser in ’n middelbare skool die Jongmense vra-boek gebruik om kort lesings oor onderwerpe soos “Hoe kan ek my punte verbeter?” en “Hoe kan ek met my onderwyser oor die weg kom?” te hou en het dan die boek aangebied. Nadat leerlinge 39 geneem het, het party ouers begin kla. Maar die skoolhoof het na ’n eksemplaar gekyk, gesê dit is “wonderlik” en het een vir sy dogter bestel.
Die beste opvoeding
11, 12. Wat is ’n paar bewyse van die feit dat publikasies van die Wagtoringgenootskap die beste opvoeding gee?
11 Baie mense besef ook van watter opvoedkundige waarde ons tydskrifte is, soos een skool in die VSA wat 1 200 eksemplare van die Ontwaak! se nommer van 22 Julie 1990 (wat crack-verslawing bespreek) bestel het om in sy klasse te bespreek. Daarenteen het kinders van Jehovah se Getuies se voorbeeldige gedrag steeds ’n goeie indruk gemaak. In ’n lawaaierige klaskamer in Thailand het die onderwyseres 11-jarige Racha voor die klas laat opstaan en hom vir sy gedrag geprys en gesê: “Julle kan gerus sy voorbeeld volg. Hy is vlytig met sy skoolwerk en hy gedra hom goed.” Toe het sy bygevoeg: “Wel, ek reken julle sal seker ook soos Racha Jehovah se Getuies moet word voor julle gedrag sal verbeter.”—Vergelyk Spreuke 1:8; 23:22, 23.
12 ’n Jong suster in die Dominikaanse Republiek skryf: “Toe ek net vier jaar oud was, het ek op die punt gestaan om ’n godsdienstige kleuterskool te verlaat waar ek geleer lees en skryf het. Ek het die boek Jy kan vir ewig in die Paradys op aarde lewe vir die non wat my onderwyseres was present gegee met die boodskap: ‘Ek is baie dankbaar dat u my geleer lees en skryf het. Ek wens dat u ook my geloof kon verstaan en soos ek kon hoop om vir ewig op hierdie aarde te lewe wanneer dit ’n paradys is.’ Hiervoor is ek uit die skool gesit. Agt jaar later het ek die onderwyseres weer ontmoet. Sy het vertel hoe sy, ondanks groot teenstand van die priester, dit reggekry het om die boek te lees. Sy het na die hoofstad getrek, waar dit vir haar moontlik was om die Bybel saam met ’n Getuie te studeer. Sy is saam met my by die ‘Suiwer Taal’-Streekbyeenkoms gedoop.” Wysheid kan volgens profesie selfs “uit die mond van kinders” gehoor word!—Mattheüs 21:16; Psalm 8:2, 3.
13. Hoe reageer baie tienderjariges op Salomo se raad, en hoe word dit in die wêreldrapport weerspieël?
13 Salomo het die aanmoedigende raad gegee: “Verbly jou, o jongeling, in jou jeug en laat jou hart jou vrolik maak in die dae van jou jonkheid; en wandel in die weë van jou hart” (Prediker 11:9). Dit is vandag aangenaam om te sien dat soveel kinders van Jehovah se Getuies hierdie woorde toepas en hulle tienderjare gebruik om hulle voor te berei vir ’n lewe van voltydse diens aan Jehovah en hierdie allerbeste loopbaan betree wanneer hulle die skool verlaat. Die pioniergeledere neem steeds vinnig toe, met 821 108 wat hierdie jaar gerapporteer het. Saam met die 11 092 broers en susters wat in Bethel gedien het, verteenwoordig dit 21 persent van al die verkondigers!
14. Watter bydrae lewer ons susters, en watter lof verdien hulle?
14 Dit is interessant dat ongeveer 75 persent van al die pionierverkondigers in baie lande, soos die Verenigde State, susters is, en dit verleen krag aan die woorde van Psalm 68:12: “Die Here het die woord laat hoor—die vroue wat die goeie tyding gebring het, was ’n groot skare.” Ons susters moet geprys word omdat hulle die grootste deel van die werk in die veld doen. Hulle vaardige onderrigting by tuisbybelstudies lei baie mense na die waarheid, en getroude susters wat hulle mans, wat baie gemeentelike verantwoordelikhede het, lojaal ondersteun, moet ook hartlik geprys word.—Spreuke 31:10-12; Efesiërs 5:21-25, 33.
Bybelonderrig floreer
15. (a) Hoe het party lande wat in die wêreldrapport genoem word goeie resultate behaal in die tuisbybelstudiewerk? (b) Watter ondervindinge kan jy vertel wat toon hoe vrugbaar Bybelstudies kan wees?
15 Die Bybelonderrigtingswerk floreer, en studies word wêreldwyd in gemiddeld 3 624 091 plekke per maand gehou. Bybelwaarheid kan persoonlikhede verander, soos ’n verslag uit Australië getuig. Vroeg in Januarie 1987 is ’n man uit Australië na Nieu-Seeland gedeporteer nadat hy 25 maande tronkstraf vir roof en vervalsing uitgedien het. Hy was ook aan dwelms verslaaf en het dit meer as 17 jaar lank verkoop. Die volgende jaar het sy vrou die Bybel met Jehovah se Getuies begin studeer, en, namate sy meer geleer het, het hy ’n merkwaardige verandering in haar gedrag gesien. Sy het ’n beter vrou en moeder geword. Op aandrang van sy vrou het hy in Junie 1989 ’n kringbyeenkoms bygewoon. Daarna het hy ’n tuisbybelstudie aanvaar, en groot veranderinge kon in sy voorkoms en lewenswyse bespeur word. Al sewe gesinslede het begin om vergaderinge by te woon. Hy is in Januarie 1990 gedoop as iemand wat Paulus se uitstekende raad in Efesiërs 4:17-24 gevolg het.
16. (a) Hoe is die rapport oor die Gedenkmaal in 1990 ’n bron van vreugde? (b) Watter dringendheid kan gesien word, en watter poging moet ons aanwend om te help?
16 ’n Besondere kenmerk van die jaar se rapport is die rekordbywoning van 9 950 058 by die viering van die Gedenkmaal, wat op Dinsdag, 10 April 1990 gehou is. Meer as 70 uit 212 lande het berig gelewer van bywonings wat meer as drie maal meer as hulle verkondigerhoogtepunt was. Byvoorbeeld, sewe Afrika-lande met ’n gesamentlike hoogtepunt van 62 712 verkondigers het ’n Gedenkmaalbywoning van 204 356 gehad. Geteisterde Liberië se 1 914 verkondigers was verheug om 7 811 by die Gedenkmaal te hê. Haïti, met ’n verkondigerhoogtepunt van 6 427 het ’n bywoning van 36 551 gerapporteer. Die 886 verkondigers in die verspreide eilande van Mikronesië het 3 958 gehad. Sri Lanka se 1 298 verkondigers het 4 521 gerapporteer, en Zambië, met 73 729 verkondigers het 326 991 gehad wat die Gedenkmaal bygewoon het, ’n verhouding van een persoon uit 25 van Zambië se bevolking. Die wêreldwye rapport toon weer eens dat daar miljoene opregte mense is wat net wag om in die kudde opgeneem te word. Maar opregtheid is nie genoeg nie. Kan ons die gehalte van ons tuisbybelstudiewerk verhoog en meer daarin doen sodat ons meer Gedenkmaalbywoners kan help om ’n sterk geloof te bou? Ons wil hê dat hulle ons bedrywige metgeselle moet word wat Jehovah loof. Hulle lewe hang daarvan af!—Psalm 148:12, 13; Johannes 17:3; 1 Johannes 2:15-17.
Die volheid van vreugde
17. Watter eerste-eeuse voorbeelde moet help om ons vasberadenheid om ons vreugde te behou te versterk?
17 Voor watter beproewinge ons ook al te staan kom, laat ons vasbeslote wees om ons vreugde te behou. Ons sal waarskynlik nie so ’n vreeslike ondervinding soos Stefanus hoef deur te maak nie, maar sy voorbeeld kan ons versterk. Hy kon sy vreugdevolle kalmte behou toe hy beskuldig is. Sy vyande het gesien “dat sy gesig soos die gesig van ’n engel was”. God het hom gedurende sy beproewing bygestaan. Hy het met vrymoedigheid getuig, omdat hy tot met sy marteldood “vol van die Heilige Gees” was. Toe Paulus en Barnabas hulle tot die nasies gewend het in hulle prediking, “was hulle [die heidene] bly; en hulle het die woord van die Here geprys”. Vervolging het weer opgevlam. Maar dit het nie die gelowiges afgeskrik nie. “Die dissipels is vervul met blydskap en met die Heilige Gees” (Handelinge 6:15; 7:55; 13:48-52). Wat ons vyande ook al aan ons doen, wat ons daaglikse beproewinge ook al behels, ons moet nooit toelaat dat ’n demper op ons vreugde van die heilige gees geplaas word nie. Paulus vermaan: “Verbly julle in die hoop; wees geduldig in die verdrukking; volhard in die gebed.”—Romeine 12:12.
18. (a) Wat is die nuwe Jerusalem, en waarom moet God se volk saam met haar bly wees? (b) Hoe sal “nuwe hemele en ’n nuwe aarde” die mensdom seën?
18 Hoe wonderlik is daardie hoop tog! Jehovah sê vir sy hele volk: “Kyk, Ek skep nuwe hemele en ’n nuwe aarde, en aan die vorige dinge sal nie gedink word en hulle sal in die hart nie opkom nie. Maar wees julle bly en juig vir ewig oor wat Ek skep.” Christus die Heer sal tesame met die “nuwe Jerusalem” (nou die hoofstad van God se hemelse organisasie, “die Jerusalem daarbo”) en die nuwewêreld-gemeenskap op aarde oorvloedige vreugde vir die mensdom bring (Galasiërs 4:26). Die opstanding van die mensedode, die verheffing van alle gehoorsame mense tot ewige lewe in volmaaktheid, ’n ewigheid van nuttige, kragtige lewe op ’n paradysaarde—wat ’n wonderlike hoop en rede tot vreugde is dit tog nie! Soos Jehovah self ‘in Jerusalem juig en bly is oor sy volk’, so rig sy profeet vervolgens die oproep tot God se volk: “Wees bly saam met Jerusalem en juig oor haar, almal wat haar liefhet! Wees vrolik saam met haar” (Jesaja 65:17-19; 66:10; Openbaring 14:1; 20:12, 13; 21:2-4). Laat ons altyd met vreugde en heilige gees vervul wees terwyl ons ag gee op die apostel Paulus se raad: “Verbly julle altyd in die Here; ek herhaal: Verbly julle!”—Filippense 4:4.
Ter opsomming van ons vreugde:
◻ Watter voorbeeld van vreugdevolle volharding het Jesus vir ons gestel?
◻ Watter redes tot vreugde het twee toegewyde groepe?
◻ Hoe verheug jonk en oud hulle reeds in die waarheid?
◻ Wanneer ons na die rapport vir 1990 kyk, watter antwoord word nou gegee op die gebed: “Ag, HERE, gee tog voorspoed”?
◻ Wanneer en hoe sal die volheid van vreugde bereik word?
[Tabel op bladsy 18-21]
WÊRELDRAPPORT VAN JEHOVAH SE GETUIES VIR DIE 1990-DIENSJAAR
(See bound volume)
[Prent op bladsy 16]
Jehovah se engel het die geboorte van Christus die Heer aangekondig as “’n goeie tyding van groot blydskap”