Soek diegene wat die regte gesindheid vir die ewige lewe het
“Almal wat die regte gesindheid vir die ewige lewe gehad het, het gelowiges geword.”—HANDELINGE 13:48, “NW”.
1. Watter vermoë het Jehovah wat die mensehart betref?
JEHOVAH GOD kan die hart lees. Dit is toegelig toe die profeet Samuel ’n seun van Isai as koning van Israel gaan salf het. Toe hy Eliab sien, het Samuel gedink: “Gewis, hier staan voor die HERE sy gesalfde! Maar die HERE sê vir Samuel: Kyk nie na sy voorkoms en sy hoë gestalte nie, want Ek ag hom te gering. Want nie wat die méns sien, sien God nie; want die mens sien aan wat voor oë is, maar die HERE sien die hart aan.” Samuel is gevolglik aangesê om Dawid te salf, wat ’n man ‘na God se hart’ was.—1 Samuel 13:13, 14; 16:4-13.
2. Wat is in ’n mens se figuurlike hart gewortel, en wat lees ons derhalwe hieroor in die Skrif?
2 ’n Mens openbaar ’n sekere oorheersende gesindheid. Hy het ’n spesifieke neiging, wat in sy figuurlike hart gewortel is (Mattheüs 12:34, 35; 15:18-20). Ons lees derhalwe van ’n persoon wie se “hart geneig is om te veg” (Psalm 55:21, NW). Ons word meegedeel dat ‘almal wat tot woede geneig is, menige oortreding begaan’. En ons lees: “Daar bestaan metgeselle wat geneig is om mekaar aan stukke te breek, maar daar bestaan ’n vriend wat aanhankliker is as ’n broer” (Spreuke 18:24, NW; 29:22, NW). Gelukkig is baie mense soos party nie-Jode in eertydse Antiochië in Pisidië. Toe hulle hoor van Jehovah se voorsiening vir redding, “het hulle hulle verheug en die woord van Jehovah verheerlik, en almal wat die regte gesindheid vir die ewige lewe gehad het, het gelowiges geword”.—Handelinge 13:44-48, vgl. NW.
Gelowiges is “rein van hart”
3, 4. (a) Wie is dié wat rein van hart is? (b) Hoe sien dié wat rein van hart is God?
3 Daardie gelowiges in Antiochië het gedoopte Christene geword, en die getroues onder hulle kon Jesus se woorde op hulself toepas: “Salig is die wat rein van hart is, want hulle sal God sien” (Mattheüs 5:8). Maar wie is “die wat rein van hart is”? En hoe ‘sien hulle God’?
4 Die wat rein van hart is, is innerlik skoon. Hulle reinheid is ’n reinheid van waardering, liefde, begeertes en beweegredes (1 Timotheüs 1:5). Hulle sien God nou in die sin dat hulle opmerk hoe hy ten behoewe van handhawers van onkreukbaarheid optree. (Vergelyk Exodus 33:20; Job 19:26; 42:5.) Die Griekse woord wat hier met “sien” vertaal word, beteken ook “om met die verstand te sien, te begryp, te weet”. Aangesien Jesus God se persoonlikheid volmaak weerspieël het, geniet “die wat rein van hart is”—wat geloof in Christus en in sy losprysofferande het, wie se sondes vergewe word en wat God op aanvaarbare wyse dien—insig in daardie persoonlikheid (Johannes 14:7-9; Efesiërs 1:7). Die gesalfdes sien God in die volle sin van die woord wanneer hulle opgewek word tot lewe in die hemel, waar hulle God en Christus van aangesig tot aangesig sien (2 Korinthiërs 1:21, 22; 1 Johannes 3:2). Maar almal wat rein van hart is, kan God deur middel van juiste kennis en ware aanbidding sien (Psalm 24:3, 4; 1 Johannes 3:6; 3 Johannes 11). Hulle het die regte gesindheid vir die ewige lewe in die hemel of op ’n paradysaarde.—Lukas 23:43, NW; 1 Korinthiërs 15:50-57; 1 Petrus 1:3-5.
5. Wat is die enigste manier waarop iemand ’n gelowige en ware volgeling van Jesus Christus kan word?
5 Diegene wat nie die regte gesindheid vir die ewige lewe het nie, sal nie gelowiges word nie. Dit is vir hulle nie moontlik om geloof te beoefen nie (2 Thessalonicense 3:2). Daarbenewens kan niemand ’n ware volgeling van Jesus Christus word tensy hy ontvanklik is en Jehovah, wat sien wat die hart is, hom trek nie (Johannes 6:41-47). Jehovah se Getuies veroordeel natuurlik niemand vooruit in hulle predikingswerk van huis tot huis nie. Hulle kan nie harte lees nie, maar laat die resultate aan ’n liefdevolle God oor.
6. (a) Wat is gesê aangaande persoonlike kontak in die huis-tot-huisbediening? (b) Watter voorsienings is gemaak om Jehovah se Getuies te help om diegene te vind wat die regte gesindheid vir die ewige lewe het?
6 Een geleerde het gepas gesê: “[Paulus] het die waarheid in die openbaar en van huis tot huis geleer. Hy het Christus nie net van die verhoog af verkondig nie, maar ook wanneer hy persoonlik met mense in aanraking gekom het. Persoonlike kontak is dikwels baie doeltreffender as enige ander soort kontak of metode om siele te bereik” (August Van Ryn). Publikasies soos die Teokratiese Bedieningskool-handleiding, Redenering uit die Skrif, en Ons Koninkryksbediening help Jehovah se Getuies om toesprake te hou en om persoonlike kontak in hulle velddiens ten beste te benut. Demonstrasies tydens die Diensvergadering en raad tydens die Teokratiese Bedieningskool is ook nuttig. Diegene wat die skool bywoon, kry waardevolle opleiding in spraakhoedanighede, soos goeie inleidings, behoorlike gebruik van die Skrif, logiese ontwikkeling, oortuigende redenasies, gebruik van illustrasies en doeltreffende slotte. Kom ons kyk hoe die Bybel ons kan help met hierdie onderrig wat God se volk bekwamer kan maak wanneer hulle diegene soek wat die regte gesindheid vir die ewige lewe het.
Gedagteprikkelende inleidings
7. Wat leer ons omtrent inleidings uit die openingswoorde van Jesus se Bergpredikasie?
7 Diegene wat hulle vir die getuieniswerk van huis tot huis voorberei, kan uit Jesus se voorbeeld iets leer omtrent inleidings wat belangstelling wek. Aan die begin van sy Bergpredikasie het hy die woord “gelukkig” nege keer gebruik. Hy het byvoorbeeld gesê: “Gelukkig is diegene wat bewus is van hulle geestelike behoefte, want aan hulle behoort die koninkryk van die hemele. . . . Gelukkig is die sagaardiges, want hulle sal die aarde beërwe” (Mattheüs 5:3-12, NW). Die sinne was reguit en duidelik. En daardie inleiding het beslis belangstelling gewek en sy luisteraars in die gesprek betrek, want wie wil nie gelukkig wees nie?
8. Hoe moet ’n onderwerp van bespreking in die huis-tot-huisbediening ingelei word?
8 ’n Onderwerp van bespreking wat in die huis-tot-huisbediening gebruik word, moet op ’n positiewe, aangename manier ingelei word. Maar niemand moet ’n skokkende inleiding gebruik nie, soos: “Ek het vir u ’n boodskap uit die buitenste ruimte.” Die goeie nuus kom wel van ’n hemelse bron, maar so ’n inleiding kan ’n huisbewoner heel moontlik laat wonder of hy die Getuie ernstig moet neem of hom so gou moontlik die deur moet wys.
Sny die Woord van God reg
9. (a) Hoe moet tekste in die bediening ingelei, gelees en toegepas word? (b) Watter voorbeeld word aangehaal om te toon hoe Jesus vrae gebruik het?
9 Soos op die verhoog, moet tekste in die veldbediening behoorlik ingelei word, met gepaste klem gelees word en op ’n duidelike, juiste wyse toegepas word. Vrae wat ’n huisbewoner laat dink oor skriftuurlike gedagtes kan ook nuttig wees. Weer eens is Jesus se metodes leersaam. By een geleentheid het ’n man wat goed onderleg was in die Mosaïese Wet hom gevra: “Meester, wat moet ek doen om die ewige lewe te beërwe?” In antwoord daarop het Jesus gevra: “Wat is in die wet geskrywe? Hoe lees jy?” Jesus het ongetwyfeld geweet dat die man hierdie vraag kon beantwoord. Hy het reg geantwoord deur te sê: “Jy moet die Here jou God liefhê uit jou hele hart en uit jou hele siel en uit jou hele krag en uit jou hele verstand; en jou naaste soos jouself.” Dit het daartoe gelei dat Jesus hom geprys het, en die bespreking is verder gevoer.—Lukas 10:25-37.
10. Wat moet jy in gedagte hou ten opsigte van jou onderwerp van bespreking, en wat moet ons vermy wanneer ons vrae aan huisbewoners stel?
10 Diegene wat van huis tot huis getuig, moet die tema van die onderwerp van bespreking beklemtoon en verduidelik waarom Bybeltekste gelees word om oor daardie onderwerp uit te brei. Aangesien die Getuie die hart van die huisbewoner probeer bereik, moet hy nie vrae stel wat die huisbewoner in die verleentheid sal stel nie. ‘Laat ons woord altyd aangenaam wees, met sout besprinkel’, wanneer ons God se Woord gebruik.—Kolossense 4:6.
11. Hoe kan Jesus se versoeking deur Satan ons help om die Skrif te gebruik om verkeerde beskouings reg te stel?
11 Dit is veral tydens herbesoeke dalk nodig dat verkeerde beskouings reggestel word deur te toon wat die Skrif eintlik sê of bedoel. Jesus het iets soortgelyks gedoen toe hy Satan tereggewys het nadat hy gesê het: “As U die Seun van God is, werp Uself af [van die tempelkanteel, soos ’n potensiële selfmoord]; want daar is geskrywe: Hy sal sy engele bevel gee aangaande U, en hulle sal U op die hande dra, sodat U nie miskien u voet teen ’n klip stamp nie.” Psalm 91:11, 12, wat Satan hier aangehaal het, gee ’n mens nie die reg om jou lewe, ’n gawe van God, in gevaar te stel nie. Jesus het besef dat dit verkeerd is om Jehovah op die proef te stel deur kanse te waag met sy lewe, en het vir Satan gesê: “Daar is óók geskrywe: Jy mag die Here jou God nie versoek nie” (Mattheüs 4:5-7). Satan is natuurlik nie ’n soeker na waarheid nie. Maar wanneer redelike mense verkeerde beskouings uitspreek wat hulle geestelike vordering sal belemmer, moet die bedienaar van God se Woord taktvol toon wat die Skrif werklik sê en bedoel. Dit is alles maniere waarop ons “die woord van die waarheid reg sny”—een van die belangrike lesse wat ons in die Teokratiese Bedieningskool leer.—2 Timotheüs 2:15.
Oorreding het sy plek
12, 13. Waarom is dit reg om oorreding in die bediening te gebruik?
12 Oorreding beklee ’n gepaste plek in die Christelike bediening. Paulus het sy medewerker Timotheüs byvoorbeeld aangespoor om in die dinge te bly wat hy geleer het en “oorreed is om te glo” (2 Timotheüs 3:14, NW). In Korinthe het Paulus “elke sabbat ’n toespraak in die sinagoge gehou en Jode en Grieke oorreed” (Handelinge 18:1-4, vgl. NW). In Efese het hy met welslae ‘toesprake gehou en oorreding gebruik aangaande die koninkryk van God’ (Handelinge 19:8, NW). En toe hy onder huisarres in Rome was, het die apostel mense na hom laat kom en vir hulle getuig deur “oorredingskrag te gebruik”, en sommige het gelowiges geword.—Handelinge 28:23, 24, NW.
13 Ongeag hoe oorredend die Getuie probeer wees, net diegene wat die regte gesindheid vir die ewige lewe het, sal natuurlik gelowiges word. Oortuigende redenasies en verstaanbare, taktvolle verduidelikings kan hulle oorreed om te glo. Maar wat anders kan help om hulle te oorreed?
Wees logies en oortuigend
14. (a) Wat behels logiese, samehangende ontwikkeling? (b) Oortuigende redenasie vereis wat?
14 Een van die spraakhoedanighede wat in die Teokratiese Bedieningskool beklemtoon word, is logiese, samehangende ontwikkeling. Dit behels dat al die hoofpunte en verwante materiaal in ’n redelike volgorde gerangskik word. Ook belangrik is oortuigende redenasies, wat vereis dat ’n goeie grondslag gelê word en grondige bewyse voorgelê word. Dit sluit in dat ons luisteraars help om te redeneer deurdat ons ’n gemeenskaplike grondslag behou, gedagtes voldoende ontwikkel en hulle doeltreffend toepas. Die Skrif gee weer eens riglyne.
15. (a) Hoe het Paulus mense se aandag getrek en ’n gemeenskaplike grondslag gelê toe hy op Marsheuwel gepraat het? (b) Watter bewys het ons in Paulus se toespraak van logiese, samehangende ontwikkeling?
15 Hierdie spraakhoedanighede is duidelik in die apostel Paulus se beroemde toespraak op Marsheuwel in eertydse Athene (Handelinge 17:22-31). Sy inleiding het aandag getrek en ’n gemeenskaplike grondslag gelê, want hy het gesê: “Atheners, ek sien dat julle in elke opsig baie godsdienstig is.” Hulle het dit ongetwyfeld as ’n kompliment beskou. Nadat Paulus melding gemaak het van ’n altaar wat “Aan ’n onbekende God” gewy is, het hy sy gedagtes logies en samehangend ontwikkel en oortuigende redenasies gebruik. Hy het daarop gewys dat hierdie God wat hulle nie geken het nie “die wêreld gemaak het en alles wat daarin is”. In teenstelling met Athena of ander Griekse godhede ‘woon hy nie in tempels wat met hande gemaak is nie; ook is dit nie nodig dat hy deur mensehande gedien word nie’. Die apostel het vervolgens getoon dat hierdie God ons die lewe gegee het en ons nie in die duister na hom laat soek nie. Paulus het toe geredeneer dat ons Skepper, wat tye van afgodiese onkunde oorgesien het, ‘aan mense oral verkondig dat hulle hul moet bekeer’. Dit het logies tot die gedagte gelei dat ‘God die wêreld in geregtigheid sal oordeel deur ’n aangestelde man wat hy uit die dode opgewek het’. Aangesien Paulus “die evangelie van Jesus en die opstanding verkondig het”, het daardie Atheners geweet dat hierdie Regter Jesus Christus sou wees.—Handelinge 17:18.
16. Hoe kan ’n mens se bediening beïnvloed word deur Paulus se toespraak op Marsheuwel en deur die opleiding in die Teokratiese Bedieningskool?
16 Paulus het weliswaar nie op Marsheuwel van huis tot huis getuig nie. Maar Jehovah se Getuies kan uit sy toespraak en die opleiding wat hulle in die Teokratiese Bedieningskool kry baie leer om hulle veldbediening te verbeter. Ja, al hierdie dinge help hulle om bekwamer bedienaars te wees, net soos Paulus se logiese ontwikkeling en oortuigende redenasies party van daardie Atheners oorreed het om gelowiges te word.—Handelinge 17:32-34.
Gebruik leersame illustrasies
17. Watter soort illustrasies moet in die bediening gebruik word?
17 Die Teokratiese Bedieningskool help God se bedienaars ook om goeie illustrasies in die getuieniswerk van huis tot huis en in ander fasette van hulle bediening te gebruik. Om belangrike gedagtes te beklemtoon, moet eenvoudige illustrasies wat van goeie smaak getuig, gebruik word. Die Getuie moet bekende situasies gebruik as agtergrond vir sy illustrasies en moet sorg dat die toepassing daarvan duidelik is. Jesus se illustrasies het aan al hierdie vereistes voldoen.
18. Hoe kan Mattheüs 13:45, 46 nuttig wees in die bediening?
18 Neem byvoorbeeld Jesus se woorde: “Die koninkryk van die hemele [is] soos ’n koopman wat mooi pêrels soek; en toe hy een baie kosbare pêrel kry, gaan hy weg en verkoop alles wat hy het, en koop dit” (Mattheüs 13:45, 46). Pêrels is kosbare edelstene wat binne die skulpe van oesters en ander weekdiere gevind word. Maar net party pêrels is “mooi”. Die koopman het die onderskeidingsvermoë gehad wat nodig was om die ongeëwenaarde waarde van hierdie een pêrel te waardeer en hy was bereid om van alles afstand te doen om dit te bekom. Miskien kan hierdie illustrasie tydens ’n herbesoek of ’n tuisbybelstudie gebruik word om te toon dat iemand wat God se Koninkryk werklik waardeer soos daardie koopman sal optree. So ’n persoon sal die Koninkryk eerste in sy lewe stel, met die wete dat dit enige opoffering werd is.
Sluit af met aansporing
19. Wat moet slotte in die huis-tot-huisbediening vir die huisbewoner toon?
19 In die Teokratiese Bedieningskool leer God se volk ook dat die slot van ’n toespraak of bespreking regstreeks verband moet hou met die tema en dat dit die hoorders moet toon wat hulle moet doen en hulle moet aanspoor om dit te doen. In die huis-tot-huisbediening moet die huisbewoner spesifiek daarop gewys word wat van hom verwag word, naamlik om ’n Bybelse publikasie te aanvaar of om in te stem dat hy weer besoek kan word.
20. Watter goeie voorbeeld het ons in Mattheüs 7:24-27 van ’n aansporende slot?
20 Die slot van Jesus se Bergpredikasie is ’n goeie voorbeeld. Jesus het deur middel van ’n maklik verstaanbare illustrasie getoon dat dit verstandig sal wees om op sy woorde ag te slaan. Hy het afgesluit: “Elkeen dan wat na hierdie woorde van My luister en dit doen, hom sal Ek vergelyk met ’n verstandige man wat sy huis op die rots gebou het. En die reën het geval en die waterstrome het gekom en die winde het gewaai en teen daardie huis aangestorm, en dit het nie geval nie, want sy fondament was op die rots. En elkeen wat na hierdie woorde van My luister en dit nie doen nie, sal vergelyk word met ’n dwase man wat sy huis op die sand gebou het. En die reën het geval en die waterstrome het gekom en die winde het gewaai en teen daardie huis aangestorm en dit het geval, en sy val was groot” (Mattheüs 7:24-27). Hoe goed lig dit toe dat God se bedienaars moet probeer om huisbewoners tot optrede aan te spoor!
21. Wat het ons bespreking toegelig, maar wat moet ons besef?
21 Die voorgaande gedagtes illustreer hoe die Teokratiese Bedieningskool baie mense kan help om bekwame Koninkryksverkondigers te word. Natuurlik kom ons bekwaamheid hoofsaaklik van God (2 Korinthiërs 3:4-6). En al is die bedienaar ook hoe bekwaam, kan hy mense nie oorreed om gelowiges te word tensy God hulle deur Christus trek nie (Johannes 14:6). Nogtans moet God se volk beslis al die geestelike voorsienings van Jehovah benut terwyl hulle diegene soek wat die regte gesindheid vir die ewige lewe het.
Wat is jou antwoorde?
◻ Wie is “die wat rein van hart is”, en hoe “sien” hulle God?
◻ Watter faktore moet oorweeg word wanneer die Koninkryksboodskap in die huis-tot-huiswerk verkondig word?
◻ Hoe kan God se Woord in die bediening reg gesny word?
◻ Wat sal help om ons aanbiedings in die velddiens logies en oortuigend te maak?
◻ Wat moet ons onthou aangaande illustrasies wat in die bediening gebruik word?
◻ Wat moet bereik word deur slotte wat in die getuieniswerk gebruik word?
[Prent op bladsy 16]
Jesus het gesê dat “die wat rein van hart is” ‘God sal sien’. Wat het dit beteken?
[Prent op bladsy 18]
Tekste moet behoorlik ingelei word, met gepaste klem gelees word en die toepassing daarvan moet duidelik en korrek wees