“Julle is met ’n prys gekoop”
“Julle is met ’n prys gekoop. Verheerlik God beslis in julle liggaam.”—1 KORINTHIËRS 6:20, “NW”.
1, 2. (a) Wat het “die weë wat uit die dood lei” geopen? (b) Wat moes gedoen word om Christus se offerande wetlik geldig te maak, en waardeur is dit voorafgeskadu?
“DIE ware God is vir ons ’n God van reddingsdade” het die psalmis gesê, “en aan Jehovah, die Soewereine Heer, behoort die weë wat uit die dood lei” (Psalm 68:20, NW). Die offerande van Jesus Christus het daardie weg geopen. Maar om daardie offerande wetlik geldig te maak, moes Christus persoonlik voor God self verskyn.
2 Dit is voorafgeskadu op die Versoendag wanneer die hoëpriester in die Allerheiligste ingegaan het (Levitikus 16:12-15). “Maar”, het die apostel Paulus geskryf, “Christus, wat opgetree het as Hoëpriester . . . [het], ook nie met die bloed van bokke en kalwers nie, maar met sy eie bloed, een maal ingegaan in die heiligdom en ’n ewige verlossing teweeggebring. Want Christus het nie ingegaan in ’n heiligdom met hande gemaak, ’n teëbeeld van die ware nie, maar in die hemel self om nou voor die aangesig van God vir ons te verskyn.”—Hebreërs 9:11, 12, 24.
Die krag van bloed
3. (a) Hoe word bloed beskou deur Jehovah se aanbidders, en waarom? (b) Wat toon dat bloed die wetlike krag het om as versoening vir sondes te dien?
3 Watter rol speel Christus se bloed in ons redding? Ware aanbidders beskou bloed reeds sedert Noag se dag as heilig (Genesis 9:4-6). Bloed speel ’n belangrike rol in die lewensproses, want die Bybel sê “die siel [of lewe] van die vlees is in die bloed” (Levitikus 17:11). Die Mosaïese Wet het dus vereis dat ’n dier se bloed voor Jehovah uitgegiet moes word wanneer dit geoffer is. Soms is bloed ook op die horings van die altaar gestryk. Dit is duidelik dat die versoeningskrag van ’n offerande in sy bloed was (Levitikus 8:15; 9:9). “Byna alles word met bloed gereinig volgens die wet, en sonder bloedvergieting vind daar geen vergifnis plaas nie.”—Hebreërs 9:22.
4. (a) Wat was die doel van die beperkinge wat God op die gebruik van bloed geplaas het? (b) Wat was betekenisvol aangaande die manier waarop Jesus gesterf het?
4 Dit is dus geen wonder dat enige misbruik van bloed onder die Wet met die dood strafbaar was nie! (Levitikus 17:10). Ons almal weet dat ’n stof se waarde toeneem wanneer dit skaars is of die gebruik daarvan streng beperk word. Jehovah se beperking op die gebruik van bloed het verseker dat dit nie as iets alledaags nie maar as iets kosbaars, waardevols, beskou sou word (Handelinge 15:29; Hebreërs 10:29). Dit het gestrook met die verhewe doel waarvoor die bloed van Christus aangewend sou word. Hy het gepas op so ’n wyse gesterf dat sy bloed vergiet is. Dit was derhalwe duidelik dat Christus nie net sy menseliggaam geoffer het nie, maar dat hy sy siel uitgestort het, sy lewe as volmaakte mens geoffer het! (Jesaja 53:12). Christus het die wetlike reg op daardie lewe nie verbeur as gevolg van onvolmaaktheid nie; dus was sy gegote bloed van groot waarde en kon dit voor God aangebied word as versoening vir die mensdom se sondes.
5. (a) Wat het Christus in die hemel ingeneem, en waarom? (b) Hoe het dit duidelik geblyk dat God Christus se offerande aanvaar het?
5 Christus kon nie sy letterlike bloed in die hemel inneem nie (1 Korinthiërs 15:50). Hy het eerder geneem wat daardie bloed gesimboliseer het: die wetlike waarde van sy volmaakte menselewe wat hy geoffer het. Hy kon daardie lewe as losprys in ruil vir die sondige mensdom formeel voor God self aanbied. Op Pinkster 33 G.J. het dit duidelik geblyk dat Jehovah daardie offerande aanvaar het toe die heilige gees oor 120 dissipels in Jerusalem uitgestort is (Handelinge 2:1-4). Die mensdom was nou as ’t ware Christus se eiendom omdat hy hulle gekoop het (Galasiërs 3:13; 4:5; 2 Petrus 2:1). Sodoende kon die voordele van die losprys ten behoewe van die mensdom aangewend word.
Die eerste begunstigdes van die losprys
6. Watter voorsienings het God gemaak sodat die voordele van Christus se losprys aangewend kon word?
6 Dit het egter nie beteken dat die mensdom onmiddellik liggaamlike volmaaktheid sou kry nie, want liggaamlike volmaaktheid is nie moontlik nie, tensy die mens se sondige natuur te bowe gekom word (Romeine 7:18-24). Hoe en wanneer sal sondigheid te bowe gekom word? God het eers voorsiening gemaak vir 144 000 hemelse ‘priesters vir onse God om as konings oor die aarde te heers’ saam met Christus Jesus (Openbaring 5:9, 10, vgl. NW; 7:4; 14:1-3). Hulle sal die voordele van die losprys geleidelik oor ’n tydperk van duisend jaar ten behoewe van die mensdom aanwend.—1 Korinthiërs 15:24-26; Openbaring 21:3, 4.
7. (a) Wat is die nuwe verbond, wie is daarby betrokke en wat is die doel daarvan? (b) Waarom moes iemand sterf om die nuwe verbond moontlik te maak, en watter rol speel Christus se bloed?
7 Om dit te bewerkstellig, word die 144 000 koning-priesters ‘uit die mense gekoop’ (Openbaring 14:4). Dit word deur middel van “’n nuwe verbond” bereik. Hierdie verbond is ’n kontrak tussen Jehovah God en die geestelike Israel van God waarvolgens sy lede as konings en priesters kan dien (Jeremia 31:31-34; Galasiërs 6:16; Hebreërs 8:6-13; 1 Petrus 2:9). Maar hoe is ’n verbond tussen God en onvolmaakte mense moontlik? Paulus verduidelik: “Waar ’n verbond is [tussen God en onvolmaakte mense], moet die dood van die menslike verbondsluiter aangetoon word. Want ’n verbond is geldig oor dooie slagoffers, aangesien dit nooit van krag is solank die menslike verbondsluiter nog leef nie.”—Hebreërs 9:16, 17, NW.
8, 9. Watter verband is daar tussen die losprys en die nuwe verbond?
8 Die losprysoffer is dus die grondslag vir die nuwe verbond, waarvan Jesus die Middelaar is. Paulus het geskryf: “Daar is een God en een Middelaar tussen God en die mense, die mens Christus Jesus, wat Homself gegee het as ’n [“ooreenstemmende”, NW] losprys vir almal, as ’n getuienis op die regte tyd” (1 Timotheüs 2:5, 6). Hierdie woorde is veral van toepassing op die 144 000, met wie die nuwe verbond gesluit is.
9 Wanneer God ’n verbond met vleeslike Israel gesluit het, was dit volgens die wet nie geldig totdat dierebloed as offerande uitgegiet is nie (Hebreërs 9:18-21). Christus moes eweneens die “bloed van die verbond” uitgiet sodat die nuwe verbond in werking gestel kon word (Mattheüs 26:28, NW; Lukas 22:20, NAV). Aangesien Christus as Hoëpriester sowel as “Middelaar van ’n nuwe verbond” optree, wend God die waarde van Jesus se bloed aan ten behoewe van diegene met wie die nuwe verbond gesluit is en skryf hy wettig menslike geregtigheid aan hulle toe (Hebreërs 9:15, NAV; Romeine 3:24; 8:1, 2). God kan hulle dan in die nuwe verbond inneem om hemelse koning-priesters te wees! As hulle Middelaar en Hoëpriester help Jesus hulle om ’n rein posisie voor God te behou.—Hebreërs 2:16, NW; 1 Johannes 2:1, 2.
Die versameling van die dinge op die aarde
10, 11. (a) Hoe bevoordeel die losprys ander, benewens gesalfde Christene? (b) Wie is die groot menigte, en watter verhouding het hulle met God?
10 Is dit slegs gesalfde Christene wat deur middel van die losprys verlos kan word en vergifnis vir hulle sondes kan kry? Nee, God versoen alle ander dinge met homself deur vrede te maak deur die bloed wat aan die folterpaal uitgestort is, soos Kolossense 1:14, 20 aandui. Dit sluit die dinge in die hemele (die 144 000) sowel as die dinge op die aarde in. Laasgenoemde is diegene wat in aanmerking kom vir lewe op die aarde, mense wat volmaakte lewe in die Paradys op aarde sal geniet. Daar is veral sedert 1935 ’n kragtige poging aangewend om sulke mense te versamel. Openbaring 7:9-17 beskryf hulle as “’n groot menigte” wat redding aan God en die Lam verskuldig is. Hulle moet nog “die groot verdrukking” oorlewe en na ‘lewende waterfonteine gelei word’, want Openbaring 20:5 toon dat sulke mense volkome lewend sal word en teen die einde van die Duisendjarige Heerskappy van Christus volmaakte menselewe sal geniet. Diegene wat dan ’n laaste toets in hulle volmaakte menslike toestand slaag, sal regverdig verklaar word vir ewige lewe op aarde.—Openbaring 20:7, 8.
11 Die groot menigte het nietemin reeds “hul klere gewas en hul klere wit gemaak in die bloed van die Lam” (Openbaring 7:14). Christus tree nie vir hulle op as Middelaar van die nuwe verbond nie, maar hulle vind baat by hierdie verbond deur die werk van God se Koninkryk. Christus tree egter steeds ten behoewe van hulle op as Hoëpriester deur wie Jehovah die losprys kan aanwend en wel in so ’n mate aanwend dat hulle nou as vriende van God regverdig verklaar word. (Vergelyk Jakobus 2:23.) Gedurende die Millennium sal hulle geleidelik “vrygemaak . . . word van die slawerny van die verganklikheid tot [hulle uiteindelik] die vryheid van die heerlikheid van die kinders van God [het]”.—Romeine 8:21.
12. Op watter grondslag het God teenoor getroue mense in voor-Christelike tye opgetree?
12 Wat hulle verhouding met God betref, lyk dit dalk of die groot menigte min verskil van voor-Christelike aanbidders. Maar God het teenoor laasgenoemde opgetree met die toekomstige losprys in gedagte (Romeine 3:25, 26). Hulle sondes is net voorlopig vergewe (Psalm 32:1, 2). Pleks van hulle ten volle van die “bewustheid van sondes” te verlos, was diereofferandes vir hulle “’n herinnering aan die sondes”.—Hebreërs 10:1-3, vgl. NW.
13. Watter voordele het ons wat voor-Christelike knegte van God nie gehad het nie?
13 Dit is vandag anders vir ware Christene. Hulle aanbid op grond van ’n losprys wat reeds betaal is! Deur hulle Hoëpriester ‘gaan hulle met vrymoedigheid na die troon van die genade’ (Hebreërs 4:14-16). Om met God versoen te raak, is nie die een of ander ontwikkeling waarop daar gehoop word nie, maar ’n hedendaagse werklikheid! (2 Korinthiërs 5:20). Wanneer hulle sondig, kan hulle ware vergifnis ontvang (Efesiërs 1:7). Hulle geniet voorwaar ’n gereinigde gewete (Hebreërs 9:9; 10:22; 1 Petrus 3:21). Hierdie seëninge is ’n voorsmaak van die glorieryke vryheid van die kinders van God wat Jehovah se knegte in die toekoms sal geniet!
Die diepte van God se wysheid en liefde
14, 15. Hoe is die losprys ’n blyk van Jehovah se ondeurgrondelike wysheid, asook van sy geregtigheid en liefde?
14 Wat ’n wonderlike gawe van Jehovah is die losprys tog! Dit is maklik om te verstaan, tog diepsinnig genoeg om die grootste intellek met ontsag te vervul. Ons hersiening van die funksies van die losprys het skaars aan die oppervlak geraak. Nogtans roep ons saam met die apostel Paulus uit: “O, diepte van die rykdom en wysheid en kennis van God! Hoe ondeurgrondelik is sy oordele en onnaspeurlik sy weë!” (Romeine 11:33). Jehovah se wysheid blyk uit die feit dat hy die mensdom kon red en sy soewereiniteit kon verdedig. “God se regverdigheid” is deur middel van die losprys “geopenbaar . . . God het hom [Christus] as soenoffer gestel deur middel van geloof in sy bloed.”—Romeine 3:21-26, vgl. NW.
15 Niemand kan God kritiseer omdat hy sondes van voor-Christelike aanbidders in die verlede vergewe het nie. Daarbenewens kan niemand Jehovah kritiseer omdat hy die gesalfdes as sy seuns of die groot menigte as sy vriende regverdig verklaar het nie (Romeine 8:33). God se optrede was, ten koste van homself, volkome wettig, of eerlik, en dit het Satan se valse bewering dat Jehovah ’n onregverdige heerser is heeltemal weerlê! God se onselfsugtige liefde vir sy skepsele is eweneens bo alle twyfel gedemonstreer.—Romeine 5:8-11.
16. (a) In watter opsig het die losprys gehelp om die geskil ten opsigte van die onkreukbaarheid van God se knegte te besleg? (b) Hoe gee die losprys ons ’n grondslag vir geloof in ’n komende nuwe wêreld van geregtigheid?
16 Die manier waarop die losprys voorsien is, het ook die geskille ten opsigte van die onkreukbaarheid van God se knegte besleg. Jesus se gehoorsaamheid alleen het dit bewerkstellig (Spreuke 27:11; Romeine 5:18, 19). Maar voeg hierby die lewenswandel van 144 000 Christene wat, ondanks Satan se teenstand, tot die dood toe getrou bly! (Openbaring 2:10). Die losprys maak dit vir hulle moontlik om onsterflikheid—onvernietigbare lewe—as hulle beloning te ontvang! (1 Korinthiërs 15:53; Hebreërs 7:16). Dit maak Satan se bewering dat God se knegte onbetroubaar is absurd! Die losprys het ons ook ’n vaste grondslag vir geloof in God se beloftes gegee. Ons kan ’n raamwerk van redding sien wat “wettelik gegrond” is deur middel van die losprysofferande (Hebreërs 8:6). ’n Nuwe wêreld van geregtigheid word sodoende gewaarborg!—Hebreërs 6:16-19.
Moenie die doel daarvan mis nie
17. (a) Hoe toon party dat hulle die doel van die losprys gemis het? (b) Wat kan ons beweeg om sedelik rein te bly?
17 Om by die losprys baat te vind, moet ’n mens kennis inneem, geloof beoefen en volgens Bybelstandaarde lewe (Johannes 3:16; 17:3). Betreklik min mense is egter bereid om dit te doen (Mattheüs 7:13, 14). Selfs onder ware Christene kan sommige ‘God se onverdiende goedheid aanvaar en die doel daarvan mis’ (2 Korinthiërs 6:1, NW). Met die verloop van die jare is duisende byvoorbeeld vir seksuele wangedrag uitgesit. Hoe jammer tog met die oog op wat Jehovah en Christus vir ons gedoen het! Behoort waardering vir die losprys ’n mens nie te beweeg om nie ‘die reiniging van sy vorige sondes te vergeet’ nie? (2 Petrus 1:9). Paulus herinner Christene derhalwe gepas: “Julle is met ’n prys gekoop. Verheerlik God beslis in julle liggaam” (1 Korinthiërs 6:20, NW). As ons dit in gedagte hou, sal dit ’n kragtige beweegrede wees om sedelik rein te bly!—1 Petrus 1:14-19.
18. Hoe kan ’n Christen wat hom aan ernstige sonde skuldig gemaak het steeds van die losprys gebruik maak?
18 Maar sê nou iemand het reeds in ernstige sonde verval. Wat dan? Hy moet die vergifnis wat deur die losprys moontlik gemaak word, benut en hulp van liefdevolle opsieners ontvang (Jakobus 5:14, 15). Selfs as streng dissipline nodig is, moet ’n berouvolle Christen nie mismoedig word as hy sulke teregwysing ontvang nie (Hebreërs 12:5, NAV). Ons het hierdie wonderlike versekering in die Bybel: “As ons ons sondes bely, Hy is getrou en regverdig om ons die sondes te vergewe en ons van alle ongeregtigheid te reinig.”—1 Johannes 1:9.
19. Watter beskouing kan ’n Christen hê oor sy wangedrag voordat hy die waarheid geleer het?
19 Soms is Christene baie mismoedig vanweë verkeerde gedrag in die verlede. “Voordat ons in die waarheid gekom het”, het een mismoedige broer geskryf, “het ek en my vrou genitale herpes opgedoen. Soms voel ons onrein, asof ons nie in Jehovah se rein organisasie ‘inpas’ nie.” Dit is waar dat sommige, selfs nadat hulle Christene geword het, in ’n mate die gevolge van foute in die verlede kan dra (Galasiërs 6:7). Daar is nogtans geen rede om onrein in Jehovah se oë te voel as ’n mens berou getoon het nie. “Die bloed van Christus” kan ons “gewete reinig van dooie werke”.—Hebreërs 9:14.
20. Hoe kan geloof in die losprys ’n Christen help om ’n onnodige skuldgevoel te verlig?
20 Ja, geloof in die losprys kan ons help om onnodige skuldelaste te verlig. Een jong suster het erken: “Ek sukkel nou al 11 jaar om van die onrein masturbasiegewoonte ontslae te raak. Ek het op een stadium byna opgehou om vergaderinge by te woon, omdat ek gemeen het dat Jehovah nie sal wil hê dat so ’n walglike mens sy gemeente moet besoedel nie.” Ons moet egter onthou dat Jehovah “goed en vergewensgesind” is solank ons gewetensgetrou teen ongeregtigheid stry en nie daarvoor swig nie!—Psalm 86:5.
21. Hoe moet die losprys ons beskouing van diegene wat ons aanstoot gee, beïnvloed?
21 Die losprys moet ook die manier waarop ons ander behandel, beïnvloed. Hoe tree jy byvoorbeeld op wanneer ’n mede-Christen jou aanstoot gee? Vergewe jy hom vrylik met ’n gesindheid soos Christus? (Lukas 17:3, 4). Is jy ‘vriendelik en vol ontferming, en vergeef jy ander soos God ook in Christus jou vergewe het’? (Efesiërs 4:32). Of is jy geneig om ’n wrok te koester of haatdraend te wees? Dit sal beslis beteken dat jy die doel van die losprys mis.—Mattheüs 6:15.
22, 23. (a) Watter uitwerking moet die losprys op ons doelwitte en lewenstyl hê? (b) Wat moet alle Christene hulle voorneem ten opsigte van die losprys?
22 Ten laaste moet waardering vir die losprys ’n diepgaande uitwerking op ons doelwitte en lewenstyl hê. Paulus het gesê: “Julle is met ’n prys gekoop; word nie langer slawe van mense nie” (1 Korinthiërs 7:23, NW). Is ekonomiese noodsaaklikhede—huis, werk, kos, klere—steeds die middelpunt van jou lewe? Of soek jy eers die Koninkryk deur geloof te stel in God se belofte om in jou behoeftes te voorsien? (Mattheüs 6:25-33). Sloof jy jou dalk af vir jou werkgewer, maar versuim jy om genoeg tyd in te ruim vir teokratiese bedrywighede? Onthou Christus ‘het Homself vir ons gegee om vir Homself ’n volk as sy eiendom te reinig, ywerig in goeie werke’.—Titus 2:14; 2 Korinthiërs 5:15.
23 “[Ons] dank God deur Jesus Christus” vir hierdie voortreflike gawe—die losprys! (Romeine 7:25). Mag ons nooit die doel van die losprys mis nie, maar dit toelaat om ’n ware krag in ons lewe te wees. Mag ons God altyd in gedagte, in woord en in daad verheerlik en met dankbaarheid onthou dat ons met ’n prys gekoop is.
Hersieningsvrae
◻ Waarom word bloed as heilig beskou, en hoe is Christus se bloed voor Jehovah in die hemel aangebied?
◻ Watter rol het Christus se bloed gespeel wat die bekragtiging van die nuwe verbond betref?
◻ Hoe vind die gesalfdes sowel as die groot menigte by die losprys baat?
◻ Hoe kan ons toon dat ons nie die doel van die losprys gemis het nie?
[Prent op bladsy 16]
Die versoenkrag van ’n offerande is in sy lewensbloed
[Prent op bladsy 17]
Iemand wat God se vergifnis waardeer, is bereid om ander te vergewe