Jesus se lewe en bediening

Jesus leef!

TOE die vroue Jesus se graf leeg aantref, hardloop Maria Magdalena om Petrus en Johannes daarvan te gaan vertel. Maar die ander vroue bly blykbaar by die graf. Kort hierna verskyn ’n engel en nooi hulle in.

Hier sien die vroue nog ’n engel, en een van die engele sê vir hulle: “Wees nie bevrees nie, want ek weet dat julle Jesus soek, die een wat aan die paal gehang is. Hy is nie hier nie, want hy is opgewek, soos hy gesê het. Kom, kyk na die plek waar hy gelê het. Gaan nou gou na sy dissipels en sê vir hulle dat hy uit die dood opgewek is” (NW). Hierdie vroue hardloop dus ook met vrees en groot blydskap na die dissipels toe.

Teen hierdie tyd het Maria Petrus en Johannes gevind, en sy sê vir hulle: “Hulle het die Here uit die graf weggeneem, en ons weet nie waar hulle Hom neergelê het nie.” Die twee apostels hardloop dadelik na die graf. Johannes is vinniger—blykbaar omdat hy jonger is—en hy bereik die graf eerste. Die vroue is reeds weg, en daar is derhalwe niemand in die omgewing nie. Johannes kyk bukkend by die graf in en sien die doeke, maar hy bly buite.

Wanneer Petrus daar aankom, huiwer hy nie maar gaan dadelik in. Hy sien die doeke daar lê en hy sien ook die doek waarmee Jesus se kop toegedraai was. Dit lê eenkant opgerol. Johannes gaan nou ook in die graf in, en hy glo wat Maria hulle vertel het. Maar nie Petrus of Johannes besef dat Jesus opgewek is nie, hoewel Hy dikwels vir hulle gesê het dat Hy opgewek sou word. Die twee gaan dronkgeslaan huis toe, maar Maria, wat na die graf teruggekom het, bly agter.

Soos die engele hulle beveel het, haas die ander vroue hulle na die dissipels om hulle te vertel dat Jesus opgewek is. Terwyl hulle so vinnig as hulle kan hardloop, kom Jesus hulle teë en sê: “Wees gegroet!” Hulle val voor sy voete neer en bring hom hulde. Dan sê Jesus: “Moenie vrees nie. Gaan heen en vertel my broeders dat hulle na Galilea moet gaan; en daar sal hulle My sien.”

Vroeër, toe die aardbewing plaasgevind en die engele verskyn het, het die wagte hulle lam geskrik en het hulle soos dooies geword. Toe hulle herstel het, het hulle dadelik na die stad gegaan en die owerpriesters vertel wat gebeur het. Ná hulle saam met die “ouderlinge” van die Jode raad gehou het, besluit hulle om die saak te probeer stilhou deur die soldate om te koop. Die soldate word beveel om te sê: “Sy dissipels het in die nag gekom en Hom gesteel terwyl ons aan die slaap was.”

Aangesien Romeinse soldate die doodstraf opgelê kan word as hulle op hulle pos aan die slaap raak, beloof die priesters: “As dit [die feit dat julle aan die slaap geraak het] by die goewerneur gehoor word, sal ons hom tevrede stel en maak dat julle sonder sorg is.” Omdat die omkoopprys groot genoeg is, doen die soldate soos hulle gesê word. Die vals berig dat Jesus se liggaam gesteel is, word gevolglik algemeen onder die Jode versprei.

Maria Magdalena, wat by die graf agterbly, is oorstelp van droefheid. Waar kon Jesus wees? Toe sy vooroor buk om by die graf in te kyk, sien sy die twee engele met wit klere aan wat weer verskyn het! Die een sit by die hoof en die ander by die voete waar die liggaam van Jesus gelê het. “Vrou, waarom ween jy?” vra hulle.

“Omdat hulle my Here weggeneem het, en ek weet nie waar hulle Hom neergelê het nie”, antwoord Maria. Dan draai sy om en sien sy iemand wat die vraag herhaal: “Vrou, waarom ween jy?” En hy vra ook: “Wie soek jy?”

Omdat sy dink dat hy die opsigter is van die tuin waar die graf geleë is, sê sy vir hom: “Meneer, as u Hom weggedra het, sê vir my waar u Hom neergelê het, en ek sal Hom wegneem.”

“Maria!” sê die persoon. En onmiddellik weet sy, weens die bekende manier waarop hy met haar praat, dat dit Jesus is. “Rabboeni!” (wat “Meester!” beteken) roep sy uit. En met uitbundige vreugde gryp sy hom vas. Maar Jesus sê: “Raak My nie aan nie, want Ek het nog nie opgevaar na my Vader nie; maar gaan na my broeders en sê vir hulle: Ek vaar op na my Vader en julle Vader, en my God en julle God.”

Maria hardloop nou na waar die apostels en mededissipels vergader het. Die ander vroue het reeds vertel dat hulle die verrese Jesus gesien het, en Maria vertel nou ook wat sy gesien het. Maar hierdie manne, wat nie die eerste vroue geglo het nie, glo Maria blykbaar ook nie. Mattheüs 28:3-15; Markus 16:5-8; Lukas 24:4-12; Johannes 20:2-18.

◆ Wat doen Maria Magdalena toe sy sien dat die graf leeg is, en wat gebeur met die ander vroue?

◆ Hoe reageer Petrus en Johannes wanneer hulle sien dat die graf leeg is?

◆ Wat kom die ander vroue teë terwyl hulle op pad is om vir die dissipels te vertel dat Jesus opgewek is?

◆ Wat gebeur met die wagte, en hoe reageer die priesters op wat die wagte hulle vertel?

◆ Wat gebeur wanneer Maria Magdalena alleen by die graf is, en hoe reageer die dissipels op wat die vroue hulle vertel?