Woon die “Liefhebbers van Vryheid”-Streekbyeenkoms by!
DRIE lonende dae van Bybelonderrig wag op jou. Wees teenwoordig wanneer die byeenkoms Vrydagoggend om 10:20 met musiek begin. Geniet die openingstoespraak “Waarom moet ons in die volmaakte wet van die vryheid intuur?”, asook die finale deel van die oggendsessie, die programrede: “Die doel en gebruik van ons godgegewe vryheid.”
Vrydagmiddag sal Christene vermaan word om hulle opdrag as God se bedienaars uit te voer. “Besig—met dooie werke of met Jehovah se diens?” en “’n Vry volk maar met verantwoordelikheid” is twee van die onderwerpe wat bespreek sal word. Aanmoediging om ’n mens se vryheid te gebruik om Jehovah te dien, sal in ’n gekostumeerde drama aangebied word. Dit sal gegrond wees op Esra en sy metgeselle se wedervaringe toe hulle in 468 v.G.J. van Babilon na Jerusalem teruggekeer het om God se tempel te versier.
Gedurende Saterdagoggend se sessie sal daar ’n driedelige simposium “Vryheid met verantwoordelikheid in die gesinskring” aangebied word. Ná die gedagteprikkelende toespraak “Hou jou vry om Jehovah te dien” sal daar ’n toespraak oor Christelike toewyding en doop volg. Baie sal in die middag met afwagting uitsien na die toespraak “Is die huwelik die sleutel tot geluk?” Die sessie sal afsluit met ’n hoogtepunt wat ongetwyfeld aan alle liefhebbers van vryheid groot vreugde sal verskaf.
Jy sal beslis Sondagoggend teenwoordig wil wees om die driedelige simposium “Wees vissers van mense” te hoor. Dit sal Jesus se illustrasie van die net en die vis bespreek en sal toon watter deel ons in die vervulling daarvan kan hê. Die oggendsessie sal afsluit met die belangrike toesprake “Bly wakker gedurende ‘die tyd van die einde’” en “Wie sal aan die ‘tyd van benoudheid’ ontsnap?”. In die middag sal jy die openbare toespraak “Verwelkom God se nuwe wêreld van vryheid” nie wil misloop nie. Voor ’n besielende slottoespraak sal daar ’n bespreking van Die Wagtoring se studie-artikel vir die week wees. Bring jou nommer van daardie tydskrif saam.
Daar sal van September tot Januarie meer as 20 byeenkomste in Suid-Afrika alleen gehou word, en daar sal dus een nie ver van jou huis af wees nie. Vind by die plaaslike Getuies van Jehovah uit wanneer en waar die een naaste aan jou gehou gaan word.