Vrae van lesers
◼ Waarom het Jesus die Gedenkmaal net met die apostels ingestel en nie met ander dissipels wat in die nuwe verbond opgeneem sou word nie?
Hierdie vraag berus blykbaar op die wanbegrip dat Jesus daardie aand met sy apostels vergader het om die Here se Aandmaal in te stel met die Christengemeente van gesalfdes wat reeds in die nuwe verbond was. Die Christengemeente was egter nog nie teen 14 Nisan 33 G.J. gevorm nie, en Jesus en sy apostels het bymekaargekom om die jaarlikse Joodse Pasgamaal te eet.
Jesus het natuurlik ook ander dissipels gehad buiten die 12 wat as apostels bekend gestaan het. Hy het die jaar voor sy dood 70 dissipels op ’n predikingsreis uitgestuur. Ná sy opstanding “het Hy verskyn aan oor die vyfhonderd broers tegelyk”. En daar was “omtrent honderd-en-twintig” dissipels op Pinksterdag bymekaar (1 Korinthiërs 15:6; Handelinge 1:15, 16, 23; Lukas 10:1-24). Maar kom ons beskou die groep wat saam met Jesus was toe hy die jaarlikse viering ingestel het wat as die Here se Aandmaal bekend staan.
Lukas 22:7, 8 verduidelik wanneer dit plaasvind en sê: “Die dag van die ongesuurde brode het gekom waarop die pasga geslag moes word. Toe stuur Hy Petrus en Johannes en sê: Gaan berei die pasga vir ons, dat ons dit kan eet.” Die verslag sê voorts: “Julle moet vir die eienaar van die huis sê: Die Meester vra u—waar is die kamer waar Ek die pasga met my dissipels kan eet?” Jesus was dus daardie aand saam met die 12 vir ’n Joodse viering. Hy het vir hulle gesê: “Ek het baie sterk daarna verlang om hierdie pasga met julle te eet voordat Ek ly.”—Lukas 22:11, 15.
Die Pasga was sedert dit in Egipte begin het ’n gesinsviering. God het met die instelling van die Pasga vir Moses gesê dat ’n skaap geslag moes word vir elke huisgesin. As die gesin te klein was om ’n hele skaap op te eet, kon ’n naburige gesin genooi word om dit saam te eet. Dit is dus logies dat die meeste van Jesus se dissipels normaalweg die Pasga van 33 G.J. saam met hulle eie gesin sou eet.
Maar Jesus het “baie sterk daarna verlang” om die laaste geldige Pasga en die laaste nag voor sy dood saam met sy intiemste volgelinge te wees, wat die grootste deel van sy bediening saam met hom gegaan het. Aan die einde van daardie Pasgamaal het Jesus hulle van ’n nuwe viering vertel wat in die toekoms deur al sy volgelinge gehou sou word. Die wyn van daardie toekomstige Christelike viering sou die bloed van “die nuwe verbond” voorstel wat die Wetsverbond sou vervang.—Lukas 22:20, NW.
Die aand van 14 Nisan 33 G.J. was die nuwe verbond egter nog nie van krag nie, want die offerande wat dit sou bekragtig—Jesus—was nog nie geoffer nie. Die Wetsverbond was steeds van krag. Dit was nog nie aan die paal genael nie. Daarbenewens sou dit nie tot en met Pinksterdag duidelik wees dat die ou verbond met natuurlike Israel deur die nuwe verbond met geestelike Israel vervang is nie.—Galasiërs 6:16; Kolossense 2:14.
Daarom was nóg die 11 getroue apostels nóg enigeen van die ander dissipels daardie aand in die nuwe verbond. En Jesus het geensins getoon dat hy die ander Joodse dissipels afkeur deur hulle toe te laat om die Pasga saam met hulle gesin te vier nie.