Onthou jy?

Het jy dit waardeer om die onlangse nommers van Die Wagtoring te lees? Wel, kyk of jy die volgende vrae kan beantwoord:

◻ Op grond waarvan kan geestelike herders die inisiatief neem om met party uitgesettenes in aanraking te kom om te sien of hulle nie dalk beweeg kan word om berou te toon nie?

Selfs terwyl die Israeliete in ballingskap en nog onberouvol was, het Jehovah, soos ’n herder, die inisiatief geneem om na hulle te soek en sy profete na hulle toe te stuur. Christelike herders stel daarin belang om enige berouvolles te help wat dalk soos verlore skape is. (Vergelyk Lukas 15:4-7.)—4/15, bladsye 21-3.

◻ Hoe toon Jesus se gelykenis van die verlore seun wat ons gevoelens en optrede behoort te wees wanneer iemand in die Christengemeente herstel word? (Lukas 15:22-32).

Ons doel moet wees om die vader na te volg, wat bly was toe sy verlore seun teruggekeer het. Gevolglik moet ons vrylik met die herstelde broer praat en hom aanmoedig om nou vooruitgang in die waarheid te maak.—4/15, bladsy 25.

◻ Watter praktiese voorsorg kan geneem word om te voorkom dat jy ’n slagoffer van misdaad word?

Waar moontlik, moet jy dit vermy om in die nag in gevaarlike dele buite te wees. Moenie jou juweliersware oop en bloot dra nie, en dra artikels soos kameras in ’n inkopiesak. Wees versigtig om nie naby die kant van ’n sypaadjie te loop nie, veral nie as jy ’n aktetas of ’n handsak dra nie. (Sien Spreuke 3:21-23.)—5/1, bladsye 5-6.

◻ Waarom sê die profesie in Sefanja 2:3: “Miskien sal jy verborge bly op die dag van die toorn van die HERE”?

Redding tot lewe hang af van getrouheid en volharding (Mattheüs 24:13). Gevolglik sal net diegene wat aan God se regverdige standaarde voldoen en die suiwer taal aanhou praat, verborge bly op die dag van Jehovah se toorn (Sefanja 2:1, 2).—5/1, bladsy 14.

◻ Wat behels dit om God eerste in jou gesinslewe te stel?

Ouers en kinders moet Jehovah aanbid en aan sy standaarde, soos in die Bybel uiteengesit, voldoen.—5/15, bladsy 5.

◻ Waarom straf Jehovah sondaars nie onmiddellik nie?

Een rede is sodat God se naam oor die hele aarde bekend gemaak moet word. (Vergelyk Romeine 9:17.) ’n Ander is om tyd toe te laat sodat die geskille oor God se soewereiniteit en die mens se onkreukbaarheid wat deur die opstand in Eden ontstaan het, besleg kan word. God se lankmoedigheid bied aan oortreders ook die geleentheid om hulle te bekeer en hulle weë te verander (2 Petrus 3:9).—5/15, bladsye 11-12.

◻ Watter feite getuig dat die Bybel van bomenslike oorsprong is?

Die Bybel is geskryf deur sowat 40 verskillende skrywers wat uit alle stande kom en wat oor ’n tydperk van 1 600 jaar gelewe het; tog het al hierdie skrywers een fundamentele tema gevolg. Hierdie interne harmonie van die Bybel sou onmoontlik wees as dit aan die toeval of bloot menslike leiding oorgelaat is.—6/1, bladsy 5.

◻ Watter vreemde daad en ongewone werk wat in Jesaja 28:21 voorspel is, sal Jehovah in ons dag uitvoer?

Die waarskuwing in Openbaring 17:16 toon dat Babilon die Grote se politieke minnaars eendag teen haar sal draai. Gevolglik sal die Christendom saam met alle ander valse godsdiens heeltemal vernietig word. Dit sal Jehovah se vreemde daad en sy ongewone werk vir ons dag wees.—6/1, bladsye 22-3.

◻ Wat moet Christenvroue in gedagte hou wat die gebruik van juwele en grimering betref?

Die Bybel verbied nie die gebruik van sulke skoonheidsmiddels nie (Exodus 32:2, 3; Ester 2:7, 12, 15). Maar beskeidenheid moet aan die dag gelê word. ’n Vrou kan maklik wêreldse style begin navolg, en selfs soos Isebel ’n oormaat lipstiffie, wangrooisel of oogskaduwee gebruik (2 Konings 9:30). Versigtigheid moet aan die dag gelê word dat skoonheidsmiddels nie swaar aangewend word en die juwele wat gebruik word nie oordadig is nie.—6/1, bladsye 30-1.

◻ Hoe het die Israeliete “al die kwaai siektes van Egipte” wat vroeër algemeen was, vrygespring? (Deuteronomium 7:15).

Klaarblyklik het hulle sulke siektes grotendeels vrygespring omdat hulle die gevorderde gesondheidsgebruike nagekom het wat deur die Wetsverbond opgelê is.—6/15, bladsy 4.

◻ Waarom het God beveel dat mense nie bloed mag eet nie? (Genesis 9:3, 4; Levitikus 17:10, 11; Handelinge 15:22-29).

Lewe is ’n gawe van God en menselewe hang af van die lewensonderhoudende vloeibare weefsel wat bloed genoem word (Psalm 36:10). Deur bloed as iets spesiaals te respekteer, toon mense dat hulle van God afhanklik is vir lewe. Die hoofrede vir God se bevel rakende bloed was dus nie omdat die inname van bloed ongesond was nie, maar omdat dit vir God spesiale betekenis gehad het.—6/15, bladsye 8-9.

◻ Hoe kan Christenouers en -jongmense seker maak dat ’n minderjarige wat ’n bloedoortapping weier se besluit gerespekteer sal word?

Hoewel ’n Christenjongmens volgens die wet nie ’n volwassene is nie, moet hy duidelik en ferm kan verduidelik wat sy sterk godsdienstige beswaar teen die inname van bloed is. Ouers kan oefensessies met hulle kinders hou sodat hulle ondervinding opdoen en hulle hulle eie oortuigings kan verduidelik.—6/15, bladsy 18.

◻ Hoe is vroue gedurende Jesus se aardse bediening grootliks geseën?

Jesus het ’n werk begin wat vertroosting, hoop en nuwe waardigheid aan vroue van alle rasse gegee het. Hy het vroue diep geestelike waarhede geleer (Johannes 4:7, 24-26). Gedurende sy bediening het hy ook die diens van vroue aanvaar terwyl hy deur die land gereis het (Markus 15:40, 41).—7/1, bladsye 14-15.

◻ Watter onderrigtingstegnieke van Jesus vind ouers doeltreffend met hulle kinders?

Ouers kan illustrasies gebruik om Christelike waarhede in die hart van hulle jong kinders ingang te laat vind, en hulle kan deurdagte vrae gebruik om uit te vind wat hulle ouer kinders werklik dink. (Vergelyk Mattheüs 17:24-27.)—7/1, bladsy 26.

◻ Waarom moet ons liefderyke goedhartigheid najaag?

Die eienskap van liefderyke goedhartigheid maak ons vir God en ander mense aantreklik. Dit bevorder gasvryheid en maak ons meer bedagsaam. Dit verstewig die bande in die gesin en in die Christengemeente. Liefderyke goedhartigheid bring bowenal eer op Jehovah.—7/15, bladsy 22.

◻ Waarom is dit moontlik dat ’n Christen in die kwessie van geselskap mislei kan word? (1 Korinthiërs 15:33).

Iemand lyk miskien vriendelik en is ’n aangename mens, maar as hy nie die Christen se belangstelling in Jehovah se diens deel of nie eens in die Bybel glo nie, is hy slegte geselskap. Waarom? Omdat sy lewe op ander beginsels gegrond is, en dinge wat vir ’n Christen belangrik is, is dalk vir hom van weinig betekenis.—7/15, bladsy 23.

◻ Waarom is die Oordeelsdag ’n tyd van hoop?

Die Oordeelsdag is ’n tydperk van duisend jaar. God self sal, saam met sy Seun, Christus Jesus, wat deur God aangestel is om as Regter op te tree, daaroor toesig hou. Dit sal ’n tyd wees om die mensdom te herstel tot die volmaakte menselewe wat Adam vir sy nageslag verloor het (1 Korinthiërs 15:21, 22).—8/1, bladsye 5-7.