“Laat ons ook elke las aflê”

“Ek is so neerslagtig en mismoedig”, het Mary gekla. Met verwysing na al die Christelike verantwoordelikhede het dié Christin bygevoeg: “Ek sien dat van my vriende uitbrand. Ek ondervind ook die moegheid en die stres. Help my asseblief verstaan waarom dit so is.”

VOEL jy ook dat jy onder druk verkeer en te moeg is om jou teokratiese verantwoordelikhede goed na te kom? Lyk dit soms of die Christelike bediening ’n swaar pak, ’n ondraaglike las, is? Talle getroue Christene raak soms mismoedig, want ons is voortdurend omring deur negatiewe invloede wat ons vreugde kan demp. Dit is inderdaad ’n uitdaging om vandag ’n opregte Christen te wees. Party voel dus soms dat die Christelike bediening ’n swaar pak is.

Soek die oorsaak

Die Skrif maak dit duidelik dat Jehovah nie onredelike eise aan ons stel nie. Die apostel Johannes het gesê dat God se ‘gebooie nie swaar is nie’ (1 Johannes 5:3). Jesus het eweneens aan sy volgelinge gesê: “Neem my juk op julle en leer van My, want Ek is sagmoedig en nederig van hart, en julle sal rus vind vir julle siele; want my juk is sag en my las is lig” (Mattheüs 11:29, 30). Dit is duidelik dat dit nie Jehovah se wil is dat ons oorlaai of belas in ons diens aan hom moet voel nie.

Hoe is dit dan dat ’n getroue Christen sy Christelike verantwoordelikhede as ’n swaar las kan begin beskou? Daar is waarskynlik verskeie faktore daarby betrokke. Let op die woorde van die apostel Paulus: “Laat ons ook elke las aflê . . . , en met volharding die wedloop loop wat voor ons lê” (Hebreërs 12:1). Paulus se woorde dui aan dat ’n Christen soms onnodige laste op homself kan laai. Dit behels nie noodwendig ernstige sondes nie. Maar ’n Christen kan oordeelsfoute begaan wat sy lewe baie kan kompliseer en dit vir hom baie moeilik maak om die wedloop te loop wat voor ons lê.

’n Gebalanseerde beskouing van materiële dinge

Beskou byvoorbeeld die kwessie van sekulêre werk. In baie lande kan die ekonomiese situasie veroorsaak dat ’n Christen nie anders kan as om lang ure te werk nie. Maar mense aanvaar dikwels werk bloot om opgang te maak of om luukseartikels te vergaar. Deur hulle werklike behoeftes opnuut in oënskou te neem, het sommige Christene dit verstandig gevind om veranderinge in hulle werksituasie aan te bring. Dit was die geval met Debbie en haar man, wat albei Getuies van Jehovah is. Sy sê: “Ons finansiële situasie het verander, en dit was nie werklik meer nodig dat ek voltyds moes werk nie. Maar dit was moeilik om op te hou.” Sy het kort voor lank die druk begin voel omdat sy te veel gehad het om te doen. Sy verduidelik: “Saterdag was my enigste vry dag om huiswerk te doen. Ek was dikwels net nie lus om in die velddiens uit te gaan nie. Ek het sleg gevoel daaroor, en my gewete het my gepla, maar ek was lief vir my werk! Eindelik moes ek die werklikheid onder die oë sien. Daar was net een oplossing. Ek het opgehou werk.” So ’n groot verandering is weliswaar vir sommige nie moontlik nie. ’n Noukeurige ondersoek van jou werkrooster kan egter aan die lig bring dat jy sekere veranderinge moet aanbring.

Daar is dalk ander maniere waarop ons van onnodige laste ontslae kan raak. Ons kan moontlik ons plesierreise, sportbedrywighede of ander vermaak verminder—die tyd wat ons daaraan bestee om televisie te kyk inkluis. En selfs nadat ons ’n gewenste balans op hierdie gebiede bereik het, sal dit moontlik nodig wees om voortdurend veranderinge aan te bring om so ’n balans te behou.

Redelikheid is noodsaaklik

Redelikheid in sulke sake sal ons help om ons by nuwe omstandighede aan te pas wanneer hulle ontstaan. Ons kan dus ’n positiewe beskouing van ons bediening behou.—Efesiërs 5:15-17, NW; Filippense 4:5, NW.

Vind jy dat jy onder druk verkeer om by te hou by wat ander in God se diens doen? Dit kan ook bekommernis en frustrasie in jou lewe veroorsaak. Hoewel die goeie voorbeeld van ander jou ongetwyfeld kan aanmoedig om meer te doen, sal redelikheid jou help om realistiese doelwitte na gelang van jou eie omstandighede en vermoëns te stel. Die Skrif sê: “Laat elkeen sy eie werk op die proef stel; en dan sal hy grond vir roem hê alleen wat homself betref en nie [in vergelyking met die ander persoon] nie. Want elkeen sal sy eie pak dra.”—Galasiërs 6:4, 5, vgl. NW.

Plaaslike gebruike en tradisies kan ook ons laste meer maak. In Jesus se dag was die mense uitgeput omdat hulle probeer het om die talle godsdiensreëls en mensgemaakte tradisies na te kom. Jehovah se volk is vandag bevry van valse godsdienstradisies. (Vergelyk Johannes 8:32.) ’n Christen kan nietemin te diep by plaaslike gebruike betrokke raak. Soms sluit geleenthede soos troues byvoorbeeld taamlik oordadige gebruike in. Hierdie gebruike is dalk nie verkeerd nie, en hulle kan selfs oulik en interessant wees. Maar Christene het moontlik nie die tyd of die geld om al sulke dinge te volg nie, en om dit te probeer doen, kan nog onnodige laste meebring.

Beskou wat gebeur het toe Jesus ’n vrou genaamd Martha besoek het. Pleks van ten volle baat te vind by sy goddelike wysheid ‘was Martha baie besig om alles klaar te maak’. Sy was besorg oor talle kleinighede (Lukas 10:40). Maar Jesus het vriendelik voorgestel dat sy haar reëlings vir die maaltyd vereenvoudig sodat sy by sy onderrig kon baat vind (Lukas 10:41, 42). Dit lig mooi toe dat goeie oordeel en redelikheid jou sal help om ’n behoorlike balans in jou Christelike bediening te kry.—Jakobus 3:17, NW.

Goeie oordeel is ook nodig wanneer jy jou metgeselle kies. Spreuke 27:3 waarsku: “Klip en sand is swaar om te dra, maar die ergernis wat ’n dwaas veroorsaak, is swaarder as altwee” (NAV). Jou intieme vriende sal sonder uitsondering ’n sterk invloed op jou denkwyse hê. As jy omgaan met dié wat gou is om fout te vind en ander in die gemeente kritiseer, kan dit saadjies van ontmoediging en negatiewe denke in jou saai (1 Korinthiërs 15:33). As jy opmerk dat dit ’n probleem is, kan ’n paar verstandige veranderinge wat jou vriende betref jou pak ligter maak.

Wandel beskeie met God

In Miga 6:8 vind ons hierdie gedagteprikkelende vraag: “Wat vra Jehovah van jou anders as . . . om beskeie te wandel met jou God?” (NW). Beskeidenheid word omskryf as ’n bewustheid van ’n mens se beperkinge. Diegene wat nie hulle beperkinge erken nie, kan hulleself met te veel verpligtinge oorlaai. Dit het al met ervare Christene, selfs opsieners, gebeur, en dit het ontmoediging, frustrasie en verlies van vreugde meegebring. Kenneth, ’n Christen- ouere man, het erken: “Ek het besef dat ek depressief begin raak, en ek het gesê: ‘Ek gaan nie toelaat dat dit met my gebeur nie.’ Ek het dus sommige van my verpligtinge verminder en my toegelê op wat ek kon doen.”

Selfs die nederige profeet Moses het dit moeilik gevind om sy eie beperkinge te erken. Jetro, Moses se skoonvader, moes hom dus help om nugter na te dink oor die buitensporige hoeveelheid werk wat hy self probeer doen het. “Wat is dit wat jy vir die volk doen?” het Jetro gevra. “Die ding wat jy doen, is nie goed nie. Jy sal heeltemal uitgeput raak . . . Want die saak is te swaar vir jou; jy kan dit nie alleen doen nie. . . . Maar kies jy uit die hele volk bekwame manne . . . : al die groot sake moet hulle na jou bring, maar in al die klein sake moet hulle self regspreek. Maak dit so ligter vir jou, en laat hulle saam met jou dra.” Moses het dadelik van sy werk aan ander begin oordra en sodoende verligting gekry van wat ’n ondraaglike pak begin word het.—Exodus 18:13-26.

By ’n ander geleentheid het Moses vir Jehovah gesê: “Ek alleen kan hierdie hele volk nie dra nie, want dit is vir my te swaar.” Die antwoord was weer eens om van sy verantwoordelikhede aan ander oor te dra. Dit kan ook die oplossing wees vir jou probleem as jy voel dat jy deur te veel verpligtinge oorweldig word.—Numeri 11:14-17.

Jehovah help ons om die las te dra

Jesus het gesê dat sy juk sag is en sy las lig is, maar nie gewigloos nie. Die juk wat Jesus ons uitgenooi het om op ons te neem, is nie ’n juk van ydelheid nie. Dit is ’n juk van volkome toegewydheid aan God as ’n dissipel van Jesus Christus. ’n Sekere mate van gewig of druk gaan derhalwe met die lewe van ’n ware Christen gepaard (Mattheüs 16:24-26; 19:16-29; Lukas 13:24). Namate wêreldtoestande versleg, sal die druk toeneem. Ons het egter rede om ’n positiewe beskouing te hê, want Jesus se uitnodiging gee te kenne dat ander saam met hom onder sy juk kan kom en dat hy hulle sal help.a Solank ons dus Christus se leiding volg, sal ons ons las altyd kan behartig, omdat hy ons sal help.

God gee om vir diegene wat hom liefhet, en hy bewaak die harte en sinne, of geestelike vermoëns, van almal wat biddend hulle las op hom werp (Psalm 55:23; Filippense 4:6, 7; 1 Petrus 5:6, 7). Die psalmis het gesê: “Geseënd is Jehovah, wat daagliks die pak vir ons dra, die ware God van ons redding” (Psalm 68:19, NW). Ja, wees verseker dat God daagliks vir jou ook die pak sal dra as jy elke las aflê en die wedloop wat voor jou lê met volharding loop.

[Voetnoot]

[Prent op bladsy 24]

Verstandige ouere manne is gewillig om sommige take aan ander oor te dra en die las te deel