Bly na aan Jehovah

“Volhard in die gebed.”—ROMEINE 12:12.

1. Wat is Jehovah se wil met betrekking tot gebed, en watter aanmoediging het die apostel Paulus oor gebed gegee?

JEHOVAH is “die God van die hoop” vir sy hele getroue volk. As die “Hoorder van die gebed” luister hy na hulle smekinge om hulp om die vreugdevolle hoop wat hy vir hulle in die vooruitsig stel te beërwe (Romeine 15:13; Psalm 65:3). En deur sy Woord, die Bybel, spoor hy al sy knegte aan om hom te eniger tyd te nader. Hy is altyd daar en wil hulle innerlike bekommernisse aanhoor. Trouens, hy moedig hulle aan om ‘in die gebed te volhard’ en om ‘sonder ophou te bid’a (Romeine 12:12; 1 Thessalonicense 5:17). Dit is Jehovah se wil dat alle Christene hom voortdurend in gebed aanroep, hulle harte voor hom uitstort en dit in die naam van sy geliefde Seun, Jesus Christus, doen.—Johannes 14:6, 13, 14.

2, 3. (a) Waarom het God ons vermaan om ‘in die gebed te volhard’? (b) Watter versekering het ons dat God wil hê ons moet bid?

² Waarom gee God ons hierdie vermaning? Omdat die druk en verantwoordelikhede van die lewe ons so kan beswaar dat ons kan vergeet om te bid. Of probleme kan ons oorweldig en maak dat ons ons nie meer in die hoop verbly nie en ophou bid. Met die oog hierop het ons herinnerings nodig wat ons aanspoor om te bid en ons tot die bron van hulp en vertroosting, Jehovah ons God, te nader.

³ Die dissipel Jakobus het geskryf: “Nader tot God, en Hy sal tot julle nader” (Jakobus 4:8). Ja, al is ons as mense onvolmaak is God nie te verhewe of te ver verwyderd om ons betuigings teenoor hom te hoor nie (Handelinge 17:27). Daarbenewens is hy nie onverskillig en ongeërg nie. Die psalmis sê: “Die oë van die HERE is op die regverdiges, en sy ore tot hulle hulpgeroep.”—Psalm 34:16; 1 Petrus 3:12.

4. Hoe kan die aandag wat Jehovah aan gebed gee, toegelig word?

⁴ Ja, Jehovah verwelkom gebed. Ons kan dit vergelyk met ’n geselligheid waar ’n hele paar mense gelyk gesels. Jy is daar, en jy luister hoe die ander gesels. Jou rol is dié van ’n toeskouer. Maar dan draai iemand hom na jou toe, noem jou naam en praat direk met jou. Dit trek jou aandag op ’n spesiale manier. God gee eweneens altyd ag op sy volk, waar hulle ook al is (2 Kronieke 16:9; Spreuke 15:3). Hy hoor dus as ’t ware ons woorde terwyl hy beskermend en belangstellend oor ons waak. Maar wanneer ons God se naam in gebed aanroep, word sy aandag getrek en dan konsentreer hy direk op ons. Jehovah het selfs die mag om die mens se onuitgesproke versoek in die dieptes van sy hart en verstand waar te neem en te verstaan. God verseker ons dat hy tot almal sal nader wat sy naam opreg aanroep en na aan hom wil bly.—Psalm 145:18.

Antwoorde volgens God se voorneme

5. (a) Wat toon die raad ‘om in die gebed te volhard’ oor ons gebede? (b) Hoe verhoor God gebede?

⁵ Die raad om in die gebed te volhard, toon dat Jehovah ons soms sal toelaat om aan te hou om oor ’n saak te bid voor sy antwoord duidelik word. Ons kan selfs moeg word om versoeke om God se guns of liefderyke goedhartigheid te rig, wat dalk baie nodig lyk maar baie lank uitgestel word. Daarom smeek Jehovah God ons om nie voor sulke neigings te swig nie, maar om aan te hou bid. Ons moet aanhou om versoeke oor ons sorge tot hom te rig met die vertroue dat hy ons gebed respekteer en ons werklike behoeftes sal bevredig, nie net dié wat ons dalk uitgeredeneer het nie. Jehovah God oorweeg ons versoeke ongetwyfeld in die lig van sy voorneme. Byvoorbeeld, ander word dalk deur ons versoek geraak. Ons kan dit vergelyk met ’n pa wie se seun hom ’n fiets vra. Die pa besef dat, as hy vir daardie seun ’n fiets koop, sy ander seun ook een sal wil hê. Aangesien die een seun dalk te jonk is om fiets te ry, besluit die pa dalk om nie op daardie tydstip vir een van hulle ’n fiets te koop nie. Met die oog op sy doel en tydsbepaling vir gebeure kan ons hemelse Vader op ’n soortgelyke manier besluit wat werklik vir ons en vir ander die beste is.—Psalm 84:9, 12; vergelyk Habakuk 2:3.

6. Watter illustrasie het Jesus vertel oor gebed, en wat toon dit as ons volhard in die gebed?

⁶ Die illustrasie wat Jesus vertel het met die oog daarop dat sy dissipels “gedurig moet bid en nie moedeloos [moet] word nie”, is ook noemenswaardig. ’n Weduwee wat nie regspraak kon verkry nie, het volhard in haar versoek aan ’n menseregter tot daar uiteindelik reg aan haar gedoen is. Jesus het bygevoeg: “Sal God dan nie reg doen aan sy uitverkorenes . . . nie?” (Lukas 18:1-7). Volharding in die gebed toon ons geloof, ons vertroue op Jehovah, ons bereidwilligheid om na aan hom te bly en ons versoek te rig en die uitkoms in sy hande te laat.—Hebreërs 11:6.

Voorbeelde van diegene wat na aan Jehovah gebly het

7. Hoe kan ons Abel se geloof navolg deur na aan Jehovah te bly?

⁷ Daar is baie verslae in die Bybel van gebede wat deur God se knegte geuiter is. Hulle “is tot ons lering tevore geskrywe, sodat ons deur lydsaamheid en bemoediging van die Skrifte hoop kan hê” (Romeine 15:4). Ons hoop word versterk deur party voorbeelde van mense wat na aan Jehovah gebly het te oorweeg. Abel het ’n aanvaarbare offer aan God gebring, en hoewel die verslag nie sê dat hy gebid het nie, het hy Jehovah ongetwyfeld in gebed gesmeek dat sy offer aanvaar moet word. Hebreërs 11:4 sê: “Deur die geloof het Abel ’n beter offer aan God gebring as Kain, waardeur hy getuienis ontvang het dat hy regverdig was.” Abel was bewus van God se belofte in Genesis 3:15, maar vergeleke met wat ons vandag weet, het hy maar min geweet. En tog het Abel opgetree volgens die kennis wat hy wel gehad het. Vandag het baie van diegene wat onlangs in God se waarheid begin belangstel het nog nie baie kennis nie, maar hulle bid en benut die kennis wat hulle wel het ten beste, soos Abel gedoen het. Ja, hulle tree in geloof op.

8. Waarom kan ons seker wees dat Abraham na aan Jehovah gebly het, en watter vraag moet ons ons afvra?

⁸ Nog ’n getroue kneg van God was Abraham, ‘die vader van almal wat glo’ (Romeine 4:11). Ons het vandag meer as ooit sterk geloof nodig, en ons moet in geloof bid, soos Abraham gedoen het. Genesis 12:8 sê dat hy “vir die HERE ’n altaar gebou en die Naam van die HERE aangeroep” het. Abraham het God se naam geken en het dit in gebed gebruik. Hy het keer op keer opreg in die gebed volhard, en “die naam van die HERE, die ewige God, aangeroep” (Genesis 13:4; 21:33). Abraham het God in die geloof aangeroep waarvoor hy bekend geword het (Hebreërs 11:17-19). Gebed het Abraham gehelp om hom altyd grootliks in die Koninkrykshoop te verbly. Volg ons Abraham se voorbeeld van volharding in die gebed?

9. (a) Waarom is Dawid se gebede van groot nut vir God se hedendaagse volk? (b) Wat kan die gevolg wees as ons soos Dawid bid om na aan Jehovah te bly?

⁹ Dawid was ’n besondere voorbeeld van iemand wat in die gebed volhard het, en sy psalms lig toe wat gebede behoort te wees. God se knegte kan byvoorbeeld tereg dinge vra soos redding of verlossing (3:8, 9; 60:7), leiding (25:4, 5), beskerming (17:8), vergifnis van sonde (25:7, 11, 18) en ’n rein hart (51:12). Toe Dawid bedruk gevoel het, het hy gebid: “Verbly die siel van u kneg” (86:4). Ons kan ook ’n vreugdevolle hart in gebed vra, want ons weet Jehovah wil hê ons moet ons in ons hoop verbly. Dawid het na aan Jehovah gebly en gebid: “My siel is aan U verkleef; u regterhand ondersteun my” (63:9). Sal ons na aan Jehovah bly, soos Dawid gedoen het? As ons dit doen, sal hy ons ook ondersteun.

10. Watter verkeerde gedagtes het die psalmis Asaf op een stadium gehad, maar wat het hy besef?

¹⁰ As ons na aan Jehovah wil bly, moet ons afguns op die goddeloses weens hulle sorgelose en materialistiese lewenswyse vermy. Die psalmis Asaf het op een stadium gevoel dat dit van geen waarde was om Jehovah te dien nie, omdat die goddeloses “altyd onbesorg” is. Maar hy het ingesien dat sy redenasie verkeerd was en dat die goddeloses “op gladde plekke” is. Hy het besef dat niks beter is as om na aan Jehovah te bly nie, en hy het sy gevoelens met hierdie woorde teenoor God uitgespreek: “Ek [is] altyddeur by U; U het my regterhand gevat. Want kyk, die wat hulle ver van U af hou, vergaan . . . Maar wat my aangaan, dit is vir my goed om naby God te wees; in die Here HERE het ek my toevlug gestel, om al u werke te vertel” (Psalm 73:12, 13, 18, 23, 27, 28). Pleks van die goddeloses, die mense sonder hoop, hulle sorgelose lewe te beny, kom ons volg Asaf na en bly na aan Jehovah.

11. Waarom is Daniël ’n goeie voorbeeld van iemand wat na aan Jehovah gebly het, en hoe kan ons hom navolg?

¹¹ Daniël het vasbeslote in die gebed volhard, al het die gevaar bestaan dat hy in die leeukuil gegooi sou word as hy amptelike beperkings op gebed geïgnoreer het. Maar Jehovah “het sy engel gestuur en die bek van die leeus toegesluit” en Daniël gered (Daniël 6:7-10, 23, 28). Daniël is ryklik geseën omdat hy in die gebed volhard het. Volhard ons ook in die gebed, veral wanneer ons voor teenstand teen ons Koninkryksprediking te staan kom?

Jesus, ons voorbeeld

12. (a) Watter voorbeeld het Jesus aan die begin van sy bediening met betrekking tot gebed gestel, en hoe kan dit Christene tot voordeel strek? (b) Wat toon Jesus se modelgebed oor gebed?

¹² Van die begin van sy aardse bediening af word Jesus uitgebeeld as iemand wat gebid het. Sy biddende gesindheid toe hy gedoop is, het ’n goeie voorbeeld gestel vir dié wat in hedendaagse tye waterdoop ondergaan (Lukas 3:21, 22). ’n Mens kan bid dat God jou sal help om uit te voer wat deur waterdoop gesimboliseer word. Jesus het ander ook gehelp om Jehovah in gebed te nader. Na Jesus een keer op ’n sekere plek gebid het, het een van sy dissipels daarna vir hom gesê: “Here, leer ons bid.” Jesus het toe die sogenoemde modelgebed gegee, waarin die volgorde van onderwerpe toon dat God se naam en voorneme voorkeur behoort te geniet (Lukas 11:1-4). Daarom moet ons ons perspektief en balans in ons gebede behou, en nie “die dinge waar dit op aankom” nalaat nie (Filippense 1:9, 10). Daar is natuurlik tye wanneer ’n mens spesiale behoeftes het of wanneer ’n spesifieke probleem aandag verg. Soos Jesus kan Christene God in gebed nader om krag te soek om sekere opdragte uit te voer of om besondere beproewings of gevare te deurstaan (Mattheüs 26:36-44). Trouens, persoonlike gebede kan feitlik elke faset van die lewe dek.

13. Hoe het Jesus getoon hoe belangrik dit is om vir ander te bid?

¹³ Jesus het deur sy goeie voorbeeld getoon hoe belangrik dit is om ten behoewe van ander te bid. Hy het geweet dat sy dissipels, soos hy, gehaat en vervolg sou word (Johannes 15:18-20; 1 Petrus 5:9). Daarom het hy God versoek om “hulle van die Bose [te] bewaar” (Johannes 17:9, 11, 15, 20). En omdat hy geweet het van die spesifieke beproewing wat vir Petrus voorgelê het, het hy vir hom gesê: “Ek het vir jou gebid, dat jou geloof nie ophou nie” (Lukas 22:32). Hoe heilsaam is dit tog as ons ook aanhou om vir ons broers te bid, omdat ons aan ander dink en nie net aan ons eie probleme en belange nie!—Filippense 2:4; Kolossense 1:9, 10.

14. Hoe weet ons dat Jesus gedurende sy hele aardse bediening baie na aan Jehovah gebly het, en hoe kan ons hom navolg?

¹⁴ Dwarsdeur sy bediening het Jesus in die gebed volhard en baie na aan Jehovah gebly (Hebreërs 5:7-10). Die apostel Petrus haal Psalm 16:8 in Handelinge 2:25-28 aan en pas dit op die Here Jesus Christus toe: “Dawid sê van Hom: Ek het die Here altyddeur voor My gesien, want Hy is aan my regterhand, dat Ek nie sou wankel nie.” Ons kan dit ook doen. Ons kan bid dat God na aan ons sal wees, en ons kan ons vertroue in Jehovah toon deur hom voortdurend in gedagte te hou. (Vergelyk Psalm 110:5; Jesaja 41:10, 13.) Dan sal ons allerlei moeilikhede vermy, want Jehovah sal ons ondersteun, en ons sal nooit wankel nie.

15. (a) In watter verband moet ons nooit nalaat om in die gebed te volhard nie? (b) Watter waarskuwing word in verband met ons dankbaarheid gegee?

¹⁵ Mag ons nooit nalaat om ons dank teenoor Jehovah te betuig vir al sy goedheid teenoor ons nie; ja, “die allesoortreffende onverdiende goedhartigheid van God”, wat die gawe van sy Seun as ’n losprysoffer vir ons sondes insluit (2 Korinthiërs 9:14, 15, NW; Markus 10:45; Johannes 3:16; Romeine 8:32; 1 Johannes 4:9, 10). Ons moet inderdaad “God die Vader altyd vir alles dank” in die naam van Jesus (Efesiërs 5:19, 20; Kolossense 4:2; 1 Thessalonicense 5:18). Ons moet versigtig wees dat ons dankbaarheid vir wat ons het, nie bederf word deur kommer oor wat ons nie het nie of oor ons persoonlike probleme nie.

Werp jou sorge op Jehovah

16. Wat moet ons doen wanneer die een of ander las ons kwel?

¹⁶ Volharding in die gebed toon die diepte van ons toegewydheid. Wanneer ons God aanroep, het dit ’n heilsame uitwerking op ons selfs voor ons ’n antwoord van hom kry. As die een of ander las ons kwel, kan ons na aan Jehovah bly deur hierdie raad te volg: “Werp jou sorg op die HERE, en Hý sal jou onderhou” (Psalm 55:23). Deur al ons sorge—bekommernisse, teleurstellings, vrese, ensovoorts—met volle vertroue op God te werp, ontvang ons ’n kalm hart, “die vrede van God, wat alle verstand te bowe gaan”.—Filippense 4:4, 7; Psalm 68:20; Markus 11:24; 1 Petrus 5:7.

17. Hoe kan ons die vrede van God verkry?

¹⁷ Kom hierdie vrede van God oombliklik? Hoewel ons onmiddellik ’n mate van verligting kan kry, geld Jesus se woorde oor hoe ons om heilige gees moet vra ook in hierdie geval: “Bly vra, en daar sal vir julle gegee word; bly soek, en julle sal vind; bly klop, en daar sal vir julle oopgemaak word” (Lukas 11:9-13, NW). Aangesien heilige gees die middel is waardeur ons ons sorge van ons afwerp, moet ons daarin volhard om die vrede van God te vra en te vra dat hy ons met ons laste sal help. Ons kan seker wees dat ons, deur in die gebed te volhard, die verligting en kalmte van hart sal kry wat ons wil hê.

18. Wat doen Jehovah vir ons as ons in ’n sekere situasie nie weet presies waarvoor om te bid nie?

¹⁸ Maar sê nou ons weet nie presies waarvoor om te bid nie? Ons innerlike sugte bly dikwels onuitgespreek omdat ons nie ons situasie ten volle verstaan nie, of omdat ons nie weet wat om vir Jehovah te sê nie. Hier kan die heilige gees vir ons intree. Paulus het geskryf: “Ons weet nie reg wat ons moet bid nie, maar die Gees self tree vir ons in met onuitspreeklike sugtinge” (Romeine 8:26). Hoe so? In God se Woord is daar geïnspireerde profesieë en gebede wat verband hou met ons omstandighede. Hy laat hulle as ’t ware vir ons intree. Hy aanvaar hulle as gebede wat ons sou gedoen het as ons net geweet het wat hulle in ons geval beteken, en hy verhoor hulle dienooreenkomstig.

Gebed en hoop om voort te gaan

19. Waarom sal gebed en hoop vir ewig voortduur?

¹⁹ Gebed tot ons hemelse Vader sal vir ewig voortduur, veral met betrekking tot dankbaarheid vir die nuwe wêreld en al sy seëninge (Jesaja 65:24; Openbaring 21:5). Ons sal ook voortgaan om ons in die hoop te verbly, want die een of ander vorm van hoop sal altyd bly bestaan. (Vergelyk 1 Korinthiërs 13:13.) Ons kan ons nie eers indink watter nuwe dinge Jehovah sal voortbring wanneer hy nie meer in sy selfopgelegde Sabbatdag van rus ten opsigte van die aarde is nie (Genesis 2:2, 3). Hy sal tot in alle ewigheid liefdevolle verrassings vir sy volk hê, en die toekoms hou wonderlike dinge vir hulle in met betrekking tot die uitvoering van sy wil.

20. Wat moet ons voorneme wees, en waarom?

²⁰ Met so ’n opwindende hoop voor ons, mag ons almal na aan Jehovah bly deur in die gebed te volhard. Mag ons nooit ophou om ons hemelse Vader te bedank vir al ons seëninge nie. Op die regte tyd sal ons verwagtings met vreugde verwesenlik word, ver bo enigiets wat ons ons kon indink of verwag, want Jehovah kan “veel meer . . . doen as alles wat ons vra of waarvan ons ’n denkbeeld kan vorm” (Efesiërs 3:20, NW). Laat ons dan met die oog hierop tot in ewigheid alle lof en eer en dank gee aan Jehovah ons God, die “Hoorder van die gebed”!

[Voetnoot]

Hoe sal jy antwoord?

◻ Waarom moet ons in die gebed volhard?

◻ Wat leer ons uit voor-Christelike voorbeelde van gebed?

◻ Wat leer Jesus se voorbeeld ons oor gebed?

◻ Hoe kan ons ons sorge op Jehovah werp, en met watter gevolg?

[Prent op bladsy 17]

Daniël het in die gebed volhard ondanks die gevaar dat hy in die leeukuil gegooi sou word