Nuwe boek gryp miljoene aan

EEN van die toesprake by die “Liefhebbers van Vryheid”-Streekbyeenkomste wat verlede Junie begin het, was “Die grootste mens wat nog geleef het”. Die hoogtepunt daarvan was die uitreiking van die boek met dieselfde titel. Meer as sesmiljoen mense wêreldwyd het reeds hierdie reeks byeenkomste bygewoon en die toespraak gehoor, wat effens gewysig in die voorgaande twee artikels van hierdie tydskrif verskyn.

Meer as 12 miljoen eksemplare van die boek Die grootste mens wat nog geleef het is in sowat 60 tale gedruk. Dit is selfs beskikbaar in die Oos-Europese tale Albanees, Hongaars, Kroaties, Macedonies, Pools, Russies, Serwies en Sloweens. Die meer as 74000 wat die sewe byeenkomste in die Sowjetunie bygewoon het, was veral verheug om dit in Russies te ontvang.

Hoe die boek ontstaan het

Die materiaal in die boek het oorspronklik as ’n reeks artikels vanaf Die Wagtoring van 1 April 1985 in 149 opeenvolgende nommers verskyn. Baie lesers het gesê dat hulle hartseer was toe die reeks met die nommer van 1 Junie 1991 ten einde geloop het. Melissa, ’n 12-jarige in Italië, het trane in haar oë gehad toe sy die laaste verhaal in Die Wagtoring gelees het. “Die nag voor ons byeenkoms”, het sy gesê, “het ek tot Jehovah gebid en hom gevra vir ’n boek oor die lewe van Jesus. Toe die boek uitgereik is, het ek hande geklap totdat ek nie meer kon nie.”

Die materiaal uit die reeks in Die Wagtoring is geredigeer en saamgevat in die nuwe pragtig geïllustreerde boek met 448 bladsye en 133 hoofstukke. ’n Poging is aangewend om elke toespraak wat Jesus gehou het en elke opgetekende gebeurtenis in sy aardse lewe, waaronder al sy illustrasies en wonderwerke, in te sluit. Alles is so ver moontlik weergegee in die volgorde waarin dit plaasgevind het. Aan die einde van elke hoofstuk is daar ’n lys van die Bybeltekste waarop die hoofstuk gebaseer is.

Iemand dink dalk: ‘Wel, ek het die boek reeds deurgelees, want ek het die reeks in Die Wagtoring gelees.’ Maar lesers van Die Wagtoring het die verslag van Jesus se lewe in klein deeltjies gekry in artikels wat oor ’n tydperk van meer as ses jaar elke twee weke verskyn het. Die artikels in die reeks was leersaam. Maar stel jou voor hoe goed dit sal wees om die hele verslag in ’n kort tydjie te lees en die geheelbeeld te kry van die grootste mens wat nog geleef het!

Geloofversterkend

“Ek het die publikasie binne twee weke deurgelees”, skryf ’n vrou van Washington, DC, VSA. “Terwyl ek dit gelees het, het trane in my oë opgewel. Ek het dan opgehou lees en gebid en gehuil. Dit het my laat voel asof ek daar saam met Jesus was en saam met hom gely het. Selfs ’n week nadat ek die boek gelees het, het daar nog trane in my oë opgewel wanneer ek nagedink het oor wat ek gelees het. Ek voel selfs nader aan Jehovah omdat hy sy Seun gegee het.”

“Ek het die boek oor Jesus vandag klaar gelees”, het ’n vrou van Pittsburgh, Pennsilvanië, VSA, geskryf. “Dit was wonderlik. Ek het trane in my oë gehad terwyl ek die laaste paar hoofstukke gelees het. Dit was so lekker om alles tegelyk in die boek te lees. Ek kan nie werklik beskryf hoe ek daaroor voel nie—ek kan net sê dat ek dit terdeë geniet het!”

Die pragtige illustrasies in die boek dra by tot die uitwerking wat die boek op jou het, soos een waarderende leser opmerk: “Dit laat my voel asof ek hulle amper kan hoor huil oor ’n kind wat gesterf het (hoofstuk 47) of asof ons weet waaraan Jesus gedink het toe die vrou wat aan bloedvloeiing gely het hom aangeraak het en genees is (hoofstuk 46). Die uitdrukkings op hulle gesigte is so eg dat dit jou seermaak. . . . Pleks dat lees ’n roetine is, maak hierdie boek dit meer soos ontspanning of iets spesiaals aan die einde van my dag. Die sensitiewe wyse waarop die boek geskryf is, vertel nie net vir ons wat Jesus gedoen het nie, maar gee ons ’n idee van wat hy gedink en gevoel het.”

Verskillende gebruike

Baie het die boek in hulle gesinsbybelstudie begin gebruik. “Ons het drie jong kinders”, skryf ouers uit Silverton, Oregon, VSA, “en hierdie boek is ideaal vir ons gesinstudie elke aand. Hoe gepas is dit tog dat ons ’n noukeurige studie van die agtergrond van ons liefdevolle Koning, Christus Jesus, maak.”

’n Tiener van Japan verduidelik: “My pa lees vir ons voor wanneer ons ná ons aandete ontspan. As ’n gesin lees ons die boek van voor af, maar ek het besluit om elke aand voor ek gaan slaap ’n hoofstuk van agter af te lees. Maar die boek is so boeiend dat dit dikwels eenuur in die oggend is voor ek oplet hoe laat dit al is.”

Baie is verbaas oor hoeveel besonderhede in die verslae ingesluit is. “Ek het so baie dinge geleer wat ek eenvoudig nie geweet het nie”, het een Getuie geskryf. ’n Brief uit Kalifornië, VSA, het gelui: “Ek en my vrou is al meer as 35 jaar in die waarheid, en ons kan eerlik sê dat ons nog nooit ’n publikasie in ons hande gehad het wat naastenby so aangrypend soos hierdie een is nie.”

Die boek behoort te help om die leuen dat Jehovah se Getuies nie in Jesus glo nie die nek in te slaan. Een waarderende leser het opgemerk: “Ek kon dit nie neersit nie, want dit is die beste antwoord op die onkunde van diegene wat sê dat Jehovah se volk nie in Jesus Christus glo of hom eer nie. Al wat ons nou moet doen, is om hierdie antwoord op hulle onkunde in hulle hande te sit.”

Hierdie boek sal ongetwyfeld ’n belangrike plek in die bediening van Jehovah se Getuies hê. “Ek het die boek vir ’n vrou gegee met wie ek ’n Bybelstudie hou”, het een Getuie geskryf, “en die uitwerking wat dit op haar gehad het, is soos ’n wonderwerk. Sy studeer al ’n jaar lank, en ek het gesukkel om haar so ver te kry om vergaderinge by te woon.” Nadat die student 45 hoofstukke van die nuwe boek gelees het, het die Getuie verduidelik, “het sy vir my gesê dat sy Sondag by die vergadering gaan wees, omdat dit tyd is dat sy haar standpunt inneem”.

Waardevolle kenmerke

In wese is Die grootste mens wat nog geleef het ’n kommentaar op die Evangelies. Verduidelikings word gegee oor baie van die dinge wat Jesus gesê en geleer het, en die boek kan dus as ’n waardevolle navorsingshulp gebruik word, want dit bly getrou by die Bybelverslae.

’n Uiters besondere kenmerk is dat alles basies in chronologiese volgorde vertel word. As jy bloot daardeur blaai met dit in gedagte kan dit ’n ware hulp wees om te bepaal wanneer sekere gebeurtenisse in die loop van Jesus se bediening plaasgevind het. Lesers van die Evangelies vind dikwels dinge wat na weersprekings lyk. Die nuwe boek klaar die oënskynlike weersprekings op sonder om onnodig aandag daarop te vestig.

As Christene wil ons ongetwyfeld nie nalaat om ’n noukeurige studie van die lewe van ons getroue Voorbeeld, Jesus Christus, te maak nie. Laat ons die Evangelieverslae dus noukeurig ondersoek aan die hand van die nuwe boek Die grootste mens wat nog geleef het.