Die dag om te onthou

“Dit het Ek vir julle gesê, dat julle in My vrede kan hê. In die wêreld sal julle verdrukking hê; maar hou goeie moed, Ek het die wêreld oorwin.”—JOHANNES 16:33.

1, 2. Watter dag in die geskiedenis word van alle ander dae onderskei, en waarom?

DIE wêreld het vandag baie te sê oor vrede. Aan die einde van die Tweede Wêreldoorlog is vrede geassosieer met O-E-Dag en O-J-Dag.a Elke jaar laat Kersfees mense aan “vrede op aarde” dink (Lukas 2:14). Maar daar is een dag in die hele mensegeskiedenis wat van alle ander dae onderskei word. Dit is die dag waarop Jesus Christus die woorde gespreek het wat hierbo aangehaal word. Uit die meer as tweemiljoen dae wat die mensdom hier op die aarde bestaan, is dit die een dag wat die mensdom se lewensloop geheel en al tot hulle ewige voordeel verander het.

² Daardie belangrike dag was 14 Nisan op die Joodse kalender. In die jaar 33 van ons Gewone Jaartelling het 14 Nisan op 1 April met sononder begin. Kom ons kyk na die gebeure tydens daardie epogmakende dag.

14 Nisan!

3. Hoe benut Jesus hierdie laaste ure?

³ Teen skemeraand skyn daar waarskynlik ’n pragtige volmaan wat mense daaraan herinner dat Jehovah tye en geleenthede bepaal (Handelinge 1:7). En wat gebeur in daardie bovertrek waar Jesus en sy 12 apostels vergader om die Jode se jaarlikse Pasga te vier? Terwyl Jesus hom daarop voorberei ‘om uit hierdie wêreld oor te gaan na die Vader, toon hy tot die einde toe dat hy sy eie mense liefhet’ (Johannes 13:1). Hoe doen hy dit? Deur woord en daad gaan Jesus voort om eienskappe by sy dissipels in te skerp wat hulle sal help om die wêreld te oorwin.

Beklee julle met nederigheid en liefde

4. (a) Hoe demonstreer Jesus ’n belangrike eienskap aan sy dissipels? (b) Hoe weet ons dat Petrus die belangrikheid van nederigheid geleer het?

⁴ Die apostels moet hulle nog van ’n mate van eersugtige jaloesie en trots vrymaak. Jesus maak dus ’n doek om hom vas en begin hulle voete was. Dit is geen vertoon van skynnederigheid, soos dié wat elke jaar deur die Christendom se pous in Rome uitgevoer word nie. Nee, beslis nie! Ware nederigheid is om van jouself te gee uit ‘nederigheid wat ander hoër ag as jouself’ (Filippense 2:2-5). Petrus snap eers nie die les nie en weier dat Jesus sy voete was. Toe hy tereggewys word, vra hy Jesus om sy hele liggaam te was (Johannes 13:1-10). Maar Petrus moes tog die les geleer het. Jare later het hy ander die regte raad gegee (1 Petrus 3:8, 9, NAV; 5:5). Hoe belangrik is dit tog vandag dat ons almal in nederigheid as slawe van Christus dien!—Sien ook Spreuke 22:4; Mattheüs 23:8-12.

5. Watter gebod deur Jesus toon die belangrikheid van ’n ander fundamentele eienskap?

⁵ Een van die 12 vind nie baat by Jesus se raad nie. Dit is Judas Iskariot. Namate die Pasgamaal vorder, raak Jesus ontsteld in sy gees, identifiseer Judas as sy verraaier en stuur hom uit. Dit is eers hierna dat Jesus vir sy 11 getroue dissipels sê: “’n Nuwe gebod gee Ek julle, dat julle mekaar moet liefhê; soos Ek julle liefgehad het, moet julle ook mekaar liefhê. Hieraan sal almal weet dat julle my dissipels is, as julle liefde onder mekaar het” (Johannes 13:34, 35). Dit is waarlik ’n nuwe gebod, wat deur Jesus se eie voortreflike voorbeeld toegelig word! Wanneer die uur vir sy offerdood nader kom, openbaar Jesus uitnemende liefde. Hy gebruik elke kosbare minuut om daardie dissipels te leer en aan te moedig. Later beklemtoon hy die belangrikheid van liefde deur te sê: “Dit is my gebod, dat julle mekaar moet liefhê net soos Ek julle liefgehad het. Groter liefde het niemand as dit nie, dat iemand sy lewe vir sy vriende gee.”—Johannes 15:12, 13.

“Die weg en die waarheid en die lewe”

6. Watter doel hou Jesus aan sy intieme dissipels voor?

⁶ Jesus sê vir die getroue 11: “Laat julle hart nie ontsteld word nie; glo in God, glo ook in My. In die huis van my Vader is daar baie wonings; as dit nie so was nie, sou Ek dit vir julle gesê het. Ek gaan om vir julle plek te berei” (Johannes 14:1, 2). Hierdie plek sal in “die koninkryk van die hemele” wees (Mattheüs 7:21). Jesus sê hoe hierdie intieme groep lojale dissipels hulle doel kan bereik. Hy sê: “Ek is die weg en die waarheid en die lewe; niemand kom na die Vader behalwe deur My nie” (Johannes 14:6). Dit is ook van toepassing op diegene onder die mensdom wat die ewige lewe op die aarde verkry.—Openbaring 7:9, 10; 21:1-4.

7-9. Waarom beskryf Jesus homself as “die weg en die waarheid en die lewe”?

⁷ Jesus is “die weg”. Ons kan God slegs deur Jesus Christus in gebed nader. Jesus verseker sy dissipels self dat die Vader hulle alles sal gee wat hulle in Jesus se naam vra (Johannes 15:16). Gebede wat tot ikone of tot godsdiens-“heiliges” gerig word of wat met Ave Marias en ’n herhalende gesing-praat oorlaai is, word nie een deur die Vader gehoor en aangeneem nie (Mattheüs 6:5-8). Verder lees ons aangaande Jesus in Handelinge 4:12: “Daar is ook geen ander naam onder die hemel wat onder die mense gegee is, waardeur ons gered moet word nie.”

⁸ Jesus is “die waarheid”. Die apostel Johannes het van hom gesê: “Die Woord het vlees geword en het onder ons gewoon—en ons het sy heerlikheid aanskou, ’n heerlikheid soos van die Eniggeborene wat van die Vader kom—vol van genade en waarheid” (Johannes 1:14). Jesus het die waarheid geword van honderde profesieë in die Hebreeuse Geskrifte deur hulle te vervul (2 Korinthiërs 1:20; Openbaring 19:10, NW). Hy het die waarheid bekend gemaak deur met sy dissipels en die skares wat geluister het, te praat, deur met die skynheilige geestelikes te redeneer en deur sy sprekende voorbeeld.

⁹ Jesus is “die lewe”. As die Seun van God het Jesus gesê: “Hy wat in die Seun glo, het die ewige lewe; maar hy wat die Seun ongehoorsaam is, sal die lewe nie sien nie, maar die toorn van God bly op hom” (Johannes 3:36). Geloof in Jesus se offer lei tot die ewige lewe—onsterflikheid in die hemel vir ’n “klein kuddetjie” van gesalfde Christene en die ewige lewe op ’n paradysaarde vir ’n groot menigte “ander skape”.—Lukas 12:32; 23:43, NW; Johannes 10:16.

Volhard onder vervolging

10. Waarom moet ons “die wêreld oorwin”, en watter bemoediging gee Jesus in hierdie verband?

¹⁰ Diegene wat die hoop het om in Jehovah se nuwe stelsel te lewe, het te kampe met ’n wêreld wat “in die mag van die Bose”, Satan die Duiwel, lê (1 Johannes 5:19). Hoe bemoedigend is Jesus se woorde in Johannes 15:17-19 dus! Hy sê: “Dit gebied Ek julle, dat julle mekaar moet liefhê. As die wêreld julle haat, moet julle weet dat hy My voor julle gehaat het. As julle van die wêreld was, sou die wêreld sy eiendom liefhê. Maar omdat julle nie van die wêreld is nie, maar Ek julle uit die wêreld uitverkies het, daarom haat die wêreld julle.” Ware Christene word nog altyd gehaat, selfs tot in hierdie jaar 1992, en hoe verbly ons ons in die goeie voorbeelde van diegene wat steeds vasstaan en nederig krag vind onder die kragtige hand van God! (1 Petrus 5:6-10). Ons kan almal ook onder beproewinge volhard deur geloof te beoefen in Jesus, wat sy bespreking afsluit met hierdie hartverblydende woorde: “In die wêreld sal julle verdrukking hê; maar hou goeie moed, Ek het die wêreld oorwin.”—Johannes 16:33.

’n Nuwe verbond word ingestel

11. Wat het Jeremia aangaande ’n nuwe verbond geprofeteer?

¹¹ Op daardie aand, ná die Pasgaviering, praat Jesus van ’n nuwe verbond. Die profeet Jeremia het dit eeue vantevore voorspel deur te sê: “Kyk, daar kom dae, spreek die HERE, dat Ek met die huis van Israel en die huis van Juda ’n nuwe verbond sal sluit; . . . Ek gee my wet in hulle binneste en skrywe dit op hulle hart; en Ek sal vir hulle ’n God wees, en hulle sal vir My ’n volk wees. . . . Ek sal hulle ongeregtigheid vergewe en aan hulle sonde nie meer dink nie” (Jeremia 31:31-34). Op 14 Nisan 33 G.J. moet die offer wat hierdie nuwe verbond geldig maak, gebring word!

12. Hoe stel Jesus die nuwe verbond in, en wat bring dit tot stand?

¹² Jesus sê vir die getroue 11 dat hy sterk daarna verlang het om hierdie Pasga met hulle te eet. Dan neem hy brood, en nadat hy gedank het, breek hy dit en gee dit aan hulle en sê: “Dit is my liggaam wat vir julle gegee word; doen dit tot my gedagtenis.” Net so gee hy ’n beker met rooi wyn aan hulle en sê: “Hierdie beker is die nuwe testament [“verbond”, NW] in my bloed wat vir julle uitgestort word” (Lukas 22:15, 19, 20). Die nuwe verbond word van krag gemaak deur Jesus se “kosbare bloed”, wat baie groter waarde het as die dierebloed wat gesprinkel is om Israel se Wetsverbond geldig te maak! (1 Petrus 1:19; Hebreërs 9:13, 14). Diegene met wie die nuwe verbond gesluit word, geniet algehele vergifnis van sondes. Daarom kan hulle voldoen aan die vereistes om van die 144 000 te wees, wat ’n ewige erfenis as geestelike Israel ontvang.—Galasiërs 6:16; Hebreërs 9:15-18, NW; 13:20; Openbaring 14:1.

“Tot my gedagtenis”

13. (a) Waaroor moet ons nadink gedurende die Gedenkmaaltyd? (b) Wie alleen moet die embleme gebruik, en waarom?

¹³ Die 1 960ste jaarlikse herdenking van Jesus se dood val op 17 April 1992. Dit is goed as ons, terwyl daardie tyd nader kom, nadink oor alles wat Jesus se volmaakte offer tot stand bring. Hierdie reëling loof Jehovah se wysheid en sy innige liefde vir die mensdom. Jesus se onberispelike onkreukbaarheid, selfs tot ’n pynlike dood, verdedig Jehovah teen Satan se aantyging dat Sy menseskepsele te kort skiet en voor beproewing sal swig (Job 1:8-11; Spreuke 27:11). Deur sy offerbloed tree Jesus op as middelaar van die nuwe verbond, die instrument waardeur Jehovah “’n uitverkore geslag, ’n koninklike priesterdom, ’n heilige volk, ’n volk as eiendom” uitkies. Terwyl hulle nog op die aarde is, ‘verkondig hulle die deugde’ van hulle God, Jehovah, wat ‘hulle uit die duisternis geroep het tot sy wonderbare lig’. (1 Petrus 2:9; vergelyk Exodus 19:5, 6.) Dit is dus gepas dat net hulle elke jaar die Gedenkmaalembleme gebruik.

14. Hoe word die miljoene waarnemers verryk?

¹⁴ Verlede jaar het 10 650 158 die Gedenkmaal oor die hele wêreld bygewoon, maar net 8 850 van hulle—minder as ’n tiende van 1 persent—het die embleme gebruik.Van watter nut is hierdie viering dan vir die miljoene waarnemers? Van groot nut! Hoewel hulle nie die embleme gebruik nie, word hulle geestelik verryk deur hierdie omgang met die groot wêreldwye broederskap, terwyl hulle al die wonderlike dinge hoor wat Jehovah deur die offer van sy Seun tot stand bring.

15. Hoe vind ander benewens die gesalfdes by Jesus se offer baat?

¹⁵ Daarbenewens sê die apostel in 1 Johannes 2:1, 2 vir ons: “Ons het ’n Voorspraak by die Vader, Jesus Christus, die Regverdige. En Hy is ’n versoening [“soenoffer”, NW] vir ons sondes, en nie alleen vir ons s’n nie, maar ook vir dié van die hele wêreld.” Ja, hoewel Jesus se offer die Johannes-klas met wie die nuwe verbond gesluit is allereers bevoordeel, maak dit ook voorsiening vir die vergifnis van “die hele wêreld” se sondes. Dit is “’n soenoffer” vir die sondes van alle ander in die mensewêreld wat geloof beoefen in Jesus se gegote bloed, waardeur hulle die gelukkige vooruitsig op die ewige lewe op ’n paradysaarde het.—Mattheüs 20:28.

“In die koninkryk van my Vader”

16. (a) Waaraan neem Jesus en sy mede-erfgename blykbaar nou deel? (b) Wat word vandag van die gesalfde oorblyfsel sowel as van die groot menigte verwag?

¹⁶ Jesus gaan voort om sy apostels aan te moedig en vestig hulle aandag op die dag wanneer hy in simboliese sin van die vrug van die wynstok nuut saam met sy dissipels in die koninkryk van sy Vader sal drink (Mattheüs 26:29). Hy sê vir hulle: “Julle is diegene wat in my beproewinge steeds by my gebly het; en ek sluit ’n verbond met julle, soos my Vader ’n verbond met my gesluit het, vir ’n koninkryk, sodat julle in my koninkryk aan my tafel kan eet en drink, en op trone kan sit om die twaalf stamme van Israel te oordeel” (Lukas 22:28-30, NW). Aangesien Jesus in 1914 Koninkryksmag in die hemele ontvang het, kan ons tot die slotsom kom dat die meeste van Jesus se mede-erfgename, wat deur die eeue heen ingesamel is, reeds opgewek is om “op trone” saam met hom te sit (1 Thessalonicense 4:15, 16). Die dag wanneer die engele “die vier winde” van “die groot verdrukking” gaan loslaat, kom vinnig nader! Dan sal die verseëling van die 144 000 van geestelike Israel en die insameling van die miljoene van die groot menigte voltooi wees. Hulle moet almal, net soos Jesus, hulle onkreukbaarheid handhaaf om die prys van die ewige lewe te verkry.—Openbaring 2:10; 7:1-4, 9.

17 en venster. (a) Wie kan ’n gesalfde redelikerwys vervang as hy verwerp word omdat hy dislojaal is? (b) Watter interessante lig het artikels in The Watchtower in 1938 op die stigting en latere uitbreiding van die teokratiese organisasie op die aarde gewerp?

¹⁷ Sê nou party gesalfdes handhaaf nie hulle onkreukbaarheid nie. Wat dan? Op hierdie laat stadium sal daar ongetwyfeld min van hierdie dislojales wees. Enige plaasvervanger sal redelikerwys nie uit pasgedooptes gekies word nie, maar uit diegene wat deur baie jare van getroue diens by Jesus gebly het in sy beproewinge. Die geestelike lig wat in die twintiger- en dertigerjare helder in The Watchtower geskyn het, dui daarop dat die insameling van die oorblyfsel van gesalfdes in daardie tyd feitlik voltooi was. Diegene wat ‘hul klere was en wit maak in die bloed van die Lam’ het sedertdien ’n ander vreugdevolle hoop. Jehovah se gees lei hulle deur Christus na “lewende waterfonteine” in die Paradysaarde.—Openbaring 7:10, 14, 17.

’n Uiters vurige gebed

18. Watter kragtige lesse leer ons uit Jesus se gebed in Johannes hoofstuk 17?

¹⁸ Jesus sluit sy Gedenkmaalvergadering saam met sy dissipels af deur die vurige gebed te doen wat in Johannes 17:1-26 opgeteken is. Hy bid ten eerste dat sy Vader hom moet verheerlik terwyl hy sy onkreukbaarheid tot die einde toe handhaaf. Sodoende sal Jehovah ook verheerlik word, omdat sy naam geheilig—van alle blaam gesuiwer—sal word. Want die volmaakte mens Jesus bewys inderdaad dat God se menseskepsele selfs onder die kwaaiste toets onberispelik kan wees (Deuteronomium 32:4, 5; Hebreërs 4:15). Daarbenewens bied Jesus se offerdood ’n wonderlike geleentheid vir Adam se nakomelinge. Jesus sê: “Dit is die ewige lewe, dat hulle U ken, die enige waaragtige God, en Jesus Christus wat U gestuur het.” Hoe noodsaaklik is dit tog dat ons juiste kennis opdoen van Jehovah God en van sy Seun, die Lam van God, wat sy lewe gegee het sodat Jehovah verheerlik en die mensdom gered kan word! (Johannes 1:29; 1 Petrus 2:22-25). Waardeer jy daardie uiters liefdevolle offer soveel dat jy jou geheel en al aan Jehovah en sy kosbare diens toegewy het?

19. Hoe kan die oorblyfsel en die groot menigte kosbare eenheid geniet?

¹⁹ Jesus bid verder tot sy Heilige Vader en vra dat Hy oor die dissipels moet waak terwyl hulle bewys dat hulle geen deel van die wêreld is nie, Sy woord as die waarheid aanhang en hulle kosbare eenheid met die Vader en die Seun behou. Hoe wonderlik is hierdie gebed tog nie tot op hede verhoor nie, terwyl die gesalfde oorblyfsel en die groot menigte eensgesind in bande van liefde dien en hulle neutraliteit ten opsigte van die wêreld, sy geweld en goddeloosheid handhaaf! Hoe kosbaar is Jesus se slotwoorde aan sy Vader, Jehovah! “Ek het u Naam aan hulle bekend gemaak en sal dit bekend maak”, het Jesus gesê, “sodat die liefde waarmee U My liefgehad het, in hulle kan wees, en Ek in hulle.”—Johannes 17:14, 16, 26.

20. Waarom is 14 Nisan 33 G.J. beslis die dag om te onthou?

²⁰ Jesus gaan uit na die tuin van Getsemane en geniet vir ’n kort rukkie nog opbouende omgang met sy dissipels. Dan sak sy vyande op hom toe! Woorde kan nie Jesus se fisiese pyn, sy hartverskeurende smart oor die smaad wat op Jehovah se naam gebring word en sy voorbeeldige onkreukbaarheid deur dit alles beskryf nie. Jesus volhard tot die einde toe, dwarsdeur die nag en dwarsdeur die grootste gedeelte van die dagligure van daardie dag. Hy toon duidelik dat sy Koninkryk nie deel van die wêreld is nie. En met sy laaste asem roep hy uit: “Dit is volbring!” (Johannes 18:36, 37; 19:30). Hy oorwin die wêreld volkome. 14 Nisan 33 G.J. is beslis die dag om te onthou!

[Voetnoot]

Hoe sal jy antwoord?

◻ Wat het Jesus aangaande nederigheid en liefde geleer?

◻ Hoe het Jesus “die weg en die waarheid en die lewe” geword?

◻ Wat is die doel van die nuwe verbond?

◻ Watter eenheid en liefde bestaan daar onder die gesalfde oorblyfsel en die groot menigte?

[Venster op bladsy 20]

Die wysheid van die grotere Salomo

Die artikels met die titel “Organization” in The Watchtower van 1 Junie en 15 Junie 1938 het die basiese teokratiese reëling uiteengesit wat Jehovah se Getuies tot vandag toe volg. Hulle het ’n hoogtepunt aangedui in ’n merkwaardige tydperk van leerstellige en organisatoriese veranderings wat in 1919 begin het (Jesaja 60:17). The Watchtower het daardie 20-jarige tydperk vergelyk met die 20 jaar waartydens Salomo die tempel en die koning se huis in Jerusalem gebou het en gesê: “Die Skrif toon dat Salomo, na die twintig jaar van sy bouprogram . . . , ’n landswye bouprogram aangepak het (1 Kon. 9:10, 17-23; 2 Kron. 8:1-10). Toe het die koningin van Skeba “van die eindes van die aarde af” gekom “om die wysheid van Salomo te hoor” (Matt. 12:42; 1 Kon. 10:1-10; 2 Kron. 9:1-9, 12). Dit laat dié vraag opkom: Wat hou die onmiddellike toekoms vir Jehovah se volk op die aarde in? Ons sal met volle vertroue wag, en ons sal sien.” Daardie vertroue was nie misplaas nie. Onder teokratiese organisasie is meer as viermiljoen van die groot menigte deur ’n groot wêreldwye geestelike bouprogram ingesamel. Soos die koningin van Skeba het hulle van die eindes van die aarde af gekom om die wysheid van die grotere Salomo, Christus Jesus—deur “die getroue en verstandige dienskneg”—te hoor.—Mattheüs 24:45-47.