Is die mens se “nuwe wêreldorde” naby?
1. Hoe het mense hulle begeerte na groter politieke vryheid in die laaste jare te kenne gegee?
MILJOENE mense verkeer vandag in slawerny aan valse godsdiens, en talle verkies om in daardie toestand te bly. Terselfdertyd dring al hoe meer mense aan op politieke vryhede. Die buitengewone gebeure van die afgelope paar jaar in Oos-Europa en elders het getoon dat mense vryer regeringsvorme wil hê. As gevolg hiervan sê baie dat ’n nuwe era van vryheid ophande is. Die president van die Verenigde State het dit “’n nuwe wêreldorde” genoem. Trouens, wêreldleiers oral het gesê dat die Koue Oorlog en die wapenwedloop verby is en dat ’n nuwe era van vrede vir die mens aangebreek het.—Vergelyk 1 Thessalonicense 5:3.
2, 3. Watter toestande belemmer die kanse op ware vryheid?
2 Maar sal daar werklik ware vryheid wees as die mens daarin slaag om wapens te verminder en vryer regeringsvorme tot stand te bring? Nee, want al die nasies gaan gebuk onder skrikwekkende probleme, en dit sluit demokratiese nasies in waar die getal armoediges toeneem en miljoene sukkel om ’n bestaan te maak. Volgens ’n verslag deur die Verenigde Nasies sterf daar elke dag gemiddeld 40 000 kinders wêreldwyd aan ondervoeding of voorkombare siektes en dit ondanks die vooruitgang in die wetenskap en die geneeskunde. ’n Deskundige op dié gebied het gesê: “Armoede neem tans strukturele kenmerke aan wat werklik die toekoms van die mensdom bedreig.”
3 Daarbenewens word meer mense as ooit tevore geteister deur misdade wat al hoe boosaardiger word. Rasse-, politieke en godsdienshaat verdeel baie lande. In sommige plekke verskil die situasie nie veel van daardie toekomstige toestand wat in Sagaria 14:13 beskryf word nie, wanneer mense “so verward en bang [sal wees] dat elkeen die man langs hom [sal] gryp en hom sal aanval” (Today’s English Version). Dwelmmisbruik en seksueel oordraagbare siektes neem pandemiese afmetings aan. Miljoene mense is tans met vigs besmet; net in die Verenigde State het meer as 120 000 mense al aan vigs gesterf.
Slawerny aan sonde en die dood
4, 5. Onder watter soort slawerny gaan alle mense gebuk ondanks die vryhede wat vandag bestaan?
4 Maar al het nie een van daardie slegte toestande geheers nie, sou mense steeds nie ware vryheid hê nie. Almal sou steeds slawe wees. Waarom is dit so? Kom ons illustreer dit: Gestel ’n diktator bring alle mense op aarde in slawerny en vermoor hulle almal. Dit is in werklikheid wat met die hele mensdom gebeur het toe ons eerste ouers teen God in opstand gekom en slawe van die Duiwel se verdrukkende heerskappy geword het.—2 Korinthiërs 4:4.
5 Toe God die mens geskep het, was dit sy voorneme dat hulle vir ewig in volmaaktheid op aarde moes lewe, in ’n paradys, soos Genesis hoofstukke 1 en 2 toon. Maar vanweë ons voorvader Adam se opstand teen God is ons almal onder ’n doodvonnis van die oomblik van bevrugting af: ‘Deur een mens [Adam, die mensdom se gesinshoof] het sonde in die wêreld ingekom en deur die sonde die dood, en so het die dood tot alle mense deurgedring.’ Soos die Bybel sê: “Die dood het as koning geregeer” (Romeine 5:12, 14, vgl. NW). Ons is derhalwe almal slawe van sonde en die dood, ongeag hoeveel vryheid ons persoonlik geniet.
6. Waarom was daar min verbetering in die mens se lewensverwagting sedert Psalm 90:10 geskryf is?
6 Boonop is ons huidige lewensduur baie beperk. Selfs vir die gelukkiges is dit net ’n paar dekades. Vir die ongelukkiges, net ’n paar jaar, of minder. En ’n onlangse studie sê: “Die wetenskap en die geneeskunde het die mens se lewensverwagting tot by sy natuurlike grens geskuif.” Die rede hiervoor is dat onvolmaaktheid en die dood as gevolg van Adam se sonde in ons genetiese stelsel ingebou is. Hoe jammer is dit tog nie dat ons liggame op die ouderdom van 70 of 80, wanneer ons na regte in wysheid behoort toe te neem en die lewe beter behoort te kan geniet, agteruitgaan en dat ons uiteindelik tot stof terugkeer!—Psalm 90:10.
7. Waarom kan mense nooit die bron wees van die ware vryhede wat ons wil hê en nodig het nie?
7 Watter soort menseheerskappy kan hierdie slawerny aan sonde en die dood voorkom? Nie een nie. Geen regeringsamptenaar, wetenskaplike of dokter waar ook al kan ons van die vervloeking van siekte, ouderdom en die dood bevry nie. Hulle kan ook nie onveiligheid, ongeregtigheid, misdaad, honger en armoede uitwis nie (Psalm 89:49). Hoe goed mense se bedoelings ook al is, dit is eenvoudig nie moontlik vir hulle om die bron te wees van die ware vryhede wat ons wil hê en nodig het nie.—Psalm 146:3.
Misbruik van wilsvryheid
8, 9. Wat het die mens in sy huidige ellendige situasie gedompel?
8 Die mensdom bevind hom in hierdie ellendige situasie omdat Adam en Eva hulle wilsvryheid misbruik het. Eerste Petrus 2:16 sê, volgens The Jerusalem Bible: “Gedra julle soos vry mense, en moet nooit julle vryheid gebruik as ’n verskoning om kwaad te doen nie.” Dit is derhalwe duidelik dat dit nie God se voorneme was dat die mens se vryheid geen grense moes hê nie. Dit moes beoefen word binne die grense van God se wette, wat regverdig is en almal tot voordeel sou strek. En daardie grense het genoeg ruimte gelaat vir baie persoonlike keusevryheid, sodat God se heerskappy nooit verdrukkend sou wees nie.—Deuteronomium 32:4.
9 Maar ons eerste ouers het dit goedgedink om vir hulself te besluit wat reg en wat verkeerd is. Aangesien hulle opsetlik buite God se heerskappy beweeg het, het hy sy steun aan hulle onttrek (Genesis 3:17-19). Gevolglik het hulle onvolmaak geword, en dit het tot siekte en die dood gelei. Pleks van vry te wees, het die mensdom slawe van sonde en die dood geword. Hulle is ook onderwerp aan die giere van onvolmaakte en, dikwels, wrede menseheersers.—Deuteronomium 32:5.
10. Hoe het Jehovah sake op ’n liefdevolle wyse laat verloop?
10 God het die mense vir slegs ’n beperkte tyd toegelaat om met hulle vermeende algehele vryheid te eksperimenteer. Hy het geweet die resultate sal buite alle twyfel toon dat menseheerskappy onafhanklik van God nie sal slaag nie. Aangesien wilsvryheid, as dit behoorlik uitgeoefen word, so kosbaar is, het God liefdevol tydelik toegelaat dat hierdie dinge gebeur pleks van mense die gawe van wilsvryheid te ontneem.
‘Die mens kan sy voetstappe nie rig nie’
11. Hoe het die geskiedenis die juistheid van die Bybel bevestig?
11 Die geskiedenisverslag het die juistheid bevestig van Jeremia hoofstuk 10, verse 23 en 24, wat sê: “Dit kom die aardse mens wat loop nie toe selfs om sy voetstappe te rig nie. Wys my tereg, o Jehovah” (NW). Die geskiedenis het ook die juistheid van Prediker 8:9 getoon, wat sê: “Die een mens heers oor die ander tot sy ongeluk.” Hoe waar is dit tog nie! Die mensdom het van die een ramp na die ander gegaan, en die einde vir almal is die graf. Die apostel Paulus het die situasie raak beskryf toe hy volgens Romeine 8:22 gesê het: “Ons weet dat die hele skepping tesame sug en tesame in barensnood is tot nou toe.” Ja, onafhanklikheid van God se wette was rampspoedig.
12. Wat sê sommige wêreldlike bronne omtrent algehele vryheid?
12 Die boek Inquisition and Liberty het die volgende oor vryheid gesê: “Onafhanklikheid is nie, op sigself, noodwendig ’n deug nie: dit is nie iets waarop ’n mens sonder verdere voorbehoud trots kan wees nie. Dit kan, om die waarheid te sê, eenvoudig een van die laer vorme van selfsug wees . . . Die mens is nie, en kan nie sonder om absurd te wees eers daarna streef om ’n heeltemal onafhanklike skepsel te wees nie.” En prins Philip van Engeland het eenkeer gesê: “Vryheid om elke gier en instink te bevredig is dalk aanloklik, maar die ondervinding leer keer op keer dat vryheid sonder selfbeheersing . . . en gedrag sonder bedagsaamheid teenoor ander die gewisse manier is om die lewensgehalte van ’n gemeenskap te vernietig, ongeag hoe welvarend dit is.”
Wie weet die beste?
13, 14. Wie alleen kan die mensdom ware vryheid gee?
13 Wie weet die beste hoe ’n huis georganiseer moet word—liefdevolle, bekwame, ervare ouers, of jong kinders? Die antwoord is voor die hand liggend. Die Skepper van die mens, ons hemelse Vader, weet eweneens beslis wat die beste vir ons is. Hy weet hoe die mensegemeenskap georganiseer en geregeer moet word. Hy weet hoe wilsvryheid gereguleer moet word om vir almal die voordele van ware vryheid te bring. Net die almagtige God, Jehovah, weet hoe om die mensdom uit sy slawerny te bevry en vir almal ware vryheid te gee.—Jesaja 48:17-19.
14 In sy Woord, in Romeine 8:21, maak Jehovah hierdie bemoedigende belofte: “Die skepping self [sal] vrygemaak . . . word van die slawerny van die verganklikheid tot die vryheid van die heerlikheid van die kinders van God.” Ja, God belowe om die mensdom geheel en al van sy huidige ellendige toestand te bevry. Die volgende artikel sal bespreek hoe dit gaan gebeur.
Hoe sal jy antwoord?
(Hersiening van bladsye 3 tot 8)
◻ Waarom voel mense so sterk oor vryheid?
◻ In watter opsigte is mense deur die geskiedenis heen in slawerny gebring?
◻ Waarom het Jehovah toegelaat dat wilsvryheid so lank misbruik word?
◻ Wie alleen kan die mensdom ware vryheid gee en waarom?
[Prent op bladsy 7]
Die mens se lewensduur is nog min of meer net so lank as wat Psalm 90:10 3 500 jaar gelede gesê het
[Erkenning]
Courtesy of The British Museum