’n Losprys in ruil vir baie

OP 31 Maart 1970 is ’n straler naby die berg Foedji in Japan geskaak. Nege lede van ’n groep wat as die Japannese Rooi Leër-faksie bekend staan, het meer as 120 passasiers en bemanningslede as gyselaars aangehou en geëis dat hulle veilig na Noord-Korea geneem word.

Toe die vliegtuig in Seoel, Republiek Korea, geland het, het die Japannese adjunkminister van vervoer, Sjinjiro Jamamoera, aangebied om sy lewe ten behoewe van die gevangenes te waag. Die skakers het ingestem om hom te neem om hulle eie veiligheid te waarborg en het al die gyselaars buiten die vlugpersoneel vrygelaat. Daarna het hulle na Pyongyang gevlieg waar hulle hulle aan die Noord-Koreaanse owerheid oorgegee het. Mnr. Jamamoera en die vlieënier het later ongedeerd na Japan teruggekeer.

In hierdie geval het een mens hom in ruil vir die lewe van meer as 120 gyselaars gegee. Dit kan ons help om te sien hoe een mens sy lewe as ’n losprys in ruil vir baie kan gee. Maar om die Bybel se leerstelling van die losprys te verstaan, moet ons hierdie onderwerp deegliker ondersoek.

Ten eerste moet ons uitvind hoe sonde ontstaan het. ‘Deur een mens het die sonde in die wêreld ingekom en deur die sonde die dood, en so het die dood tot alle mense deurgedring, omdat almal gesondig het’, verduidelik die Bybel (Romeine 5:12). Hoe het dit gebeur? Die mens van wie daar hier gepraat word, is Adam, die eerste mens wat geskep is. Jy kan die geskiedkundige verslag oor sy skepping en wat daartoe gelei het dat hy van God se standaarde afgewyk het, lees. Dit word in die eerste drie hoofstukke van die Bybelboek Genesis uiteengesit.

Daardie verslag toon dat daar ’n opstoker agter die skerms was toe Adam in die begin gesondig het. Om sy begeerte na mag te bevredig, het daardie opstoker planne beraam om Adam en enige kinders wat hy sou hê te oorheers. Die opstoker was Satan die Duiwel. Hy word ook “die slang van ouds” genoem omdat hy ’n slang gebruik het om Adam oor te haal om te sondig (Openbaring 12:9, NAV). Hoewel die mensdom se liefdevolle Skepper Adam beveel het om Sy reg om te besluit wat reg en verkeerd is te respekteer, het die slang Adam se vrou, Eva, verlei sodat sy ongehoorsaam aan God geword het. Toe het sy haar man oorgehaal om ongehoorsaam te wees. Deur daardie weg in te slaan, het Adam sy onafhanklikheid van God verklaar, opsetlik sondig geword en kon alleenlik ’n sondige lewe aan sy kinders oordra.

Ons ly steeds die gevolge daarvan. Hoe so? Wel, die Skepper het met reg verklaar dat dit die dood tot gevolg sou hê indien Adam en Eva opsetlik kies om ongehoorsaam te wees. Deur te sondig, het Adam gevolglik die hele mensdom in slawerny aan sonde en die dood verkoop.—Genesis 2:17; 3:1-7.

Hoe kon die mensdom uit daardie sondige toestand verlos, oftewel losgekoop, word? Jesus Christus het aarde toe gekom “om sy siel te gee as ’n losprys in ruil vir baie”, en dit het die weg geopen om die mensdom los te koop.—Mattheüs 20:28, NW.

Bedekking en vrymaking

Die Bybel toon dat die proses om die mensdom los te koop twee stappe behels het: (1) terugkoping en (2) vrymaking. Bybelgeleerde Albert Barnes het oor die Griekse woord (luʹtron) wat met “losprys” vertaal word, geskryf: “Die woord losprys beteken letterlik ’n prys wat betaal word vir die loskoping van gevangenes. In oorlogstyd, wanneer ’n vyand gevangenes neem, word die geld wat vir hulle vrymaking geëis word ’n losprys genoem; dit wil sê, dit is die middel waardeur hulle vrylating bewerkstellig word. Enigiets wat iemand dus uit ’n toestand van straf, of lyding, of sonde vrymaak, word ’n losprys genoem.”

Ja, daar kan na “enigiets wat iemand . . . vrymaak” verwys word as luʹtron. Hierdie Griekse woord beklemtoon dus die daad of proses van vrymaking.a

Die apostel Paulus het die verwante woord an·tiʹlu·tron gebruik om die waarde van die prys wat as losprys betaal is te beklemtoon. In 1 Timotheüs 2:6 het hy geskryf dat “[Jesus] homself as ’n ooreenstemmende losprys vir almal gegee het” (NW). Parkhurst se Greek and English Lexicon to the New Testament sê hieroor: “Dit dui gepas ’n prys aan waardeur gevangenes van die vyand losgekoop word; en daardie soort uitruiling waarin die lewe van die een deur die lewe van ’n ander losgekoop word.” Die klem word hier geplaas op die ooreenstemmende aard of die effektiewe waarde van die losprys wat betaal is om die skaal van geregtigheid te balanseer. Hoe kan Jesus se losprysoffer as “’n ooreenstemmende losprys” beskou word?

’n Ooreenstemmende losprys

Adam het die hele mensdom, ons inkluis, aan sonde en die dood verkoop. Die prys, of boete, wat hy betaal het, was sy volmaakte menselewe, sowel as die vooruitsig om vir ewig te lewe. Om dit te bedek, moes nog ’n volmaakte menselewe—’n ooreenstemmende losprys—betaal word. Niemand wat uit ’n onvolmaakte mens gebore is, kon egter die volmaakte menselewe voorsien wat nodig was nie (Job 14:4; Psalm 51:7). Maar in sy wysheid het God ’n uitweg uit hierdie verknorsing voorsien. Hy het die lewe van sy eniggebore Seun uit die hemele na die baarmoeder van ’n maagd oorgeplaas en hom sodoende as ’n volmaakte mens gebore laat word (Lukas 1:30-38; Johannes 3:16-18). Hierdie leerstelling van Jesus wat uit ’n maagd gebore is, is nie ’n storie wat versin is om die stigter van ’n godsdiens op te hemel nie. Dit verduidelik eerder ’n logiese stap in God se voorsiening van die losprys.

Om die loskoping tot stand te kon bring, moes Jesus die hele tyd wat hy op die aarde was ’n skoon rekord behou. Hy het dit wel gedoen. Toe het hy ’n offerdood gesterf. Op hierdie manier het Jesus die prys betaal van sy volmaakte menselewe as die losprys om die mensdom te bevry (1 Petrus 1:19). Ons kan dus tereg sê dat “een mens vir almal gesterwe het” (2 Korinthiërs 5:14, NW). Ja, “soos hulle almal in Adam sterwe, so sal hulle ook almal in Christus lewend gemaak word”.—1 Korinthiërs 15:22.

Een mens in ruil vir baie

In die skaking van die vliegtuig wat vroeër gemeld is, was daar geen manier waarop die gyselaars hulleself kon bevry nie, selfs al was hulle ryk. Hulp van buite was nodig, en die persoon wat hom in ruil gegee het, moes aan sekere voorwaardes voldoen. Dieselfde is waar in ’n baie meer verhewe opsig in verband met die losprys wat nodig was om die mensdom los te koop. ’n Psalmis het geskryf: “Dié . . . wat hulle op die oorvloed van hulle rykdom bly beroem, nie een van hulle kan op enige wyse selfs ’n broer loskoop nie, nóg aan God ’n losprys vir hom gee; (en die loskoopprys van hulle siel is so kosbaar dat dit vir ’n onbepaalde tyd ontbreek het)” (Psalm 49:6-8, NW). Die mensdom het inderdaad hulp van buite nodig gehad. Die lewe van een mens sou genoeg wees om die hele mensdom los te koop mits hy aan die vereistes voldoen het wat nodig was om God se skaal van geregtigheid te balanseer. Jesus Christus was die enigste volmaakte mens wat aan die vereistes voldoen het.

Jehovah God het voorsiening gemaak vir die bevryding van die mensdom deur die losprys wat Jesus Christus betaal het. Maar God het meer gedoen. Hy het ’n doodsvonnis oor Satan die Duiwel, die een wat die mensdom in sonde laat verval het, uitgespreek (Openbaring 12:7-9). Jehovah gaan daardie skuldige persoon binnekort opsluit en sal uiteindelik oordeel aan hom voltrek deur ‘hom in die poel van vuur en swawel te werp’, wat ewige vernietiging simboliseer (Openbaring 20:1-3, 7-10, 14). Met die vernietiging van hierdie bose geesskepsel en deur die aanwending van die losprys sal die mensdom nie net van die greep van sonde en die dood bevry word nie, maar ook van die invloed van Satan. Deur hierdie bevryding en deur die waarde van Christus se losprysoffer wat ten volle ten behoewe van hulle aangewend word, sal die gehoorsame mensdom geleidelik tot menslike volmaaktheid verhef word.

Die losprysreëling en jy

Baie mense in die Ooste het, nadat hulle van Jesus Christus se losprysoffer geleer het, diep waardering gekry vir wat God vir hulle gedoen het. Kazoeo is ’n voorbeeld hiervan. Die belangrikste ding in sy lewe was om verfverdunner in te asem en daardeur bedwelmd te raak. Hy het verskeie kere, terwyl hy onder die invloed daarvan bestuur het, ’n ongeluk veroorsaak waarin sy motor onherstelbaar beskadig is. Drie van sy vriende het selfmoord gepleeg nadat hulle hulle gesondheid verwoes het. Kazoeo het ook selfmoord probeer pleeg. Later het hy die Bybel begin bestudeer. Die waarheid wat hy geleer het, het hom beweeg om sy lewe in orde te bring. Hy het gesukkel om sy verslawing aan verfverdunner—’n gewoonte wat sy liggaam afgetakel het—te bowe te kom, en daar was baie terugslae. Hy was verdeeld tussen sy vleeslike begeerte en ’n begeerte om te doen wat reg is. Hoe bly was hy tog dat hy op grond van Jesus Christus se losprysoffer tot God om vergifnis kon bid! Deur middel van gebed en met die hulp van Christenvriende het Kazoeo sy verslawing te bowe gekom en dien Jehovah nou as ’n gelukkige bedienaar met ’n rein gewete.

Onthou jy Tsjisako, wat aan die begin van die vorige artikel gemeld is? Deur middel van ’n studie van die Bybel het sy ook die liefdevolle losprysreëling begin verstaan. Dit het haar diep geraak toe sy geleer het dat God sy Seun gegee het om die mensdom van sonde los te koop. Tsjisako het haar lewe aan Jehovah toegewy. Selfs nou, op die ouderdom van 77, bestee sy sowat 90 uur elke maand om ander te vertel van Jehovah se groot liefde en die onverdiende goedhartigheid wat hy betoon.

Die losprys behoort vir jou ook belangrik te wees. Deur middel daarvan sal God die weg tot ware vryheid—vryheid van sonde en die dood—vir die mensdom open. ’n Blink toekoms van ewige lewe op ’n paradysaarde wag op diegene wat die losprysoffer van Jesus Christus aanvaar. Kom gerus in aanraking met Jehovah se Getuies en vind self uit hoe jy vryheid van sonde en die dood deur die liefdevolle losprysreëling kan geniet.

[Voetnoot]

[Foto-erkenning op bladsy 5]

Courtesy of the Mainichi Shimbun