‘Moet ek my laat doop?’
VAN al die besluite wat ons in ons lewe moet neem, is daar moontlik nie een wat belangriker is as dié een nie: ‘Moet ek my laat doop?’ Waarom is dit so belangrik? Omdat ons besluit in verband met hierdie vraag nie net direk betrekking het op ons huidige lewensweg nie, maar ook op ons ewige welsyn.
Staan jy voor hierdie besluit? Miskien studeer jy die Bybel al ’n ruk lank saam met Jehovah se Getuies. Of dalk leer jou ouers jou al van kleins af die Skrif. Jy het nou die punt bereik waar jy moet besluit oor wat jy gaan doen. Om die regte besluit te kan neem, is dit belangrik dat jy verstaan wat doop behels en wie gedoop behoort te word.
Wat doop behels
In sekere sin is doop soos ’n huwelik, want dit is ’n plegtigheid wat ’n verhouding voltrek. In die geval van ’n huwelik het die man en die vrou reeds ’n hegte verhouding opgebou. Die huwelikseremonie maak bloot in die openbaar bekend wat privaat ooreengekom is, naamlik dat hulle twee nou in die huwelik tree. Dit bring ook voorregte mee wat die paartjie kan geniet, asook verantwoordelikhede wat hulle in hulle huwelikslewe moet nakom.
Doop kom grootliks hiermee ooreen. Namate ons die Bybel bestudeer, leer ons van die liefdevolle dinge wat Jehovah vir ons gedoen het. Hy het ons nie net ons lewe gegee en alles wat ons nodig het om dit te onderhou nie, maar ook sy eniggebore Seun, wat die weg vir die sondige mensdom gebaan het om ’n verhouding met Hom te verkry en die ewige lewe op ’n paradysaarde te beërwe. Word ons nie aangespoor om iets van ons kant te doen as ons aan al hierdie dinge dink nie?
Wat kan ons doen? God se Seun, Jesus Christus, deel ons mee: “As iemand agter My aan wil kom, moet hy homself verloën en sy [folterpaal] opneem en My volg” (Mattheüs 16:24, vgl. NW). Ja, ons kan dissipels van Jesus Christus word en sy voorbeeld volg om die belange van sy Vader, Jehovah, te bevorder. Om dit te kan doen, vereis egter dat ons onsself “verloën”, dit wil sê dat ons ’n vrywillige besluit neem om God se wil bo ons eie te stel; dit behels dat ons ons lewe daaraan toewy om sy wil te doen. ’n Openbare plegtigheid word dan gehou om hierdie vrywillige en private besluit bekend te maak. Waterdoop is die plegtigheid waartydens ons ons toewyding aan God in die openbaar simboliseer.
Wie moet gedoop word?
Jesus Christus het sy volgelinge beveel om ‘heen te gaan, dissipels te maak van al die nasies en hulle te doop in die Naam van die Vader en die Seun en die heilige gees, en om hulle te leer om alles te onderhou wat hy hulle beveel het’ (Mattheüs 28:19). Dit is dus duidelik dat ’n mate van volwassenheid van hart en verstand van diegene vereis word wat hulle gaan laat doop. Hulle persoonlike studie van God se Woord het hulle laat besef dat hulle ‘tot inkeer moet kom’ en hulle moet ‘bekeer’ van hul vorige lewensweg (Handelinge 3:19). Verder het hulle besef dat hulle moet deelneem aan die evangelisasiewerk wat Jesus Christus gedoen het en het hulle sy dissipels geword. Al hierdie dinge het reeds voor hulle doop plaasgevind.
Het jy hierdie stadium in jou geestelike ontwikkeling bereik? Wil jy God graag dien? Indien wel, moet jy biddend nadink oor die Bybelverslag oor die Ethiopiese hofdienaar, soos opgeteken in Handelinge hoofstuk 8. Toe die profesieë oor Jesus, die Messias, aan hierdie man verduidelik is, het hy sy verstand en hart ondersoek en gevra: “Wat verhinder my om gedoop te word?” Blykbaar was daar niks wat hom verhinder het nie; gevolglik is hy gedoop.—Handelinge 8:26-38.
Vandag vra baie dieselfde vraag: “Wat verhinder my om gedoop te word?” In 1991 was daar gevolglik 300 945 wat hulle kort na hulle toewyding laat doop het. Dit het Jehovah se hele volk groot vreugde verskaf, en die ouere manne in die gemeentes help ander wat die regte hartstoestand het met graagte om te vorder en aan die vereistes vir doop te voldoen.
Maar miskien raai die ouere manne in jou gemeente jou aan om te wag. Of as jy nog jonk is, sê jou ouers dalk vir jou om te wag. Wat dan? Moenie ontmoedig word nie. Hou in gedagte dat dit ’n baie ernstige saak is om ’n persoonlike verhouding met die Allerhoogste te betree. Jy moet aan hoë standaarde voldoen en dit handhaaf. Luister derhalwe na die wenke wat gegee word en pas dit heelhartig toe. As die redes wat gegee is vir jou nie heeltemal duidelik is nie, moet jy nie skaam wees nie, maar vrae vra totdat jy regtig verstaan hoe jy jou moet voorberei.
Aan die ander kant huiwer sommige om, soos hulle dit noem, die groot stap te doen. Is jy een van hulle? Daar kan natuurlik bepaalde redes wees waarom jy jou toewyding en doop moet uitstel. Maar as jy aan die vereistes voldoen en steeds huiwer, is dit goed as jy jou afvra: “Wat verhinder my om gedoop te word?” Ondersoek jou situasie biddend, en kyk of jy regtig ’n grondige rede het om nie dadelik te reageer op Jehovah se uitnodiging om ’n persoonlike verhouding met hom te betree nie.
‘Ek is nog jonk’
As jy ’n jongmens is, dink jy dalk: ‘Ek is nog jonk.’ Indien jongmense gehoorsaam bly aan hul Christenouers en die Skrif na die beste van hulle vermoë toepas, kan hulle weliswaar die vertroue hê dat Jehovah hulle as “heilig” beskou. Trouens, die Bybel sê vir ons dat die goddelike goedkeuring wat regverdige ouers geniet ook aan hulle afhanklike kinders toegereken word (1 Korinthiërs 7:14). Maar die Bybel sê nie op watter ouderdom hierdie afhanklikheidsperiode eindig nie. Daarom is dit belangrik dat Christenjongmense ernstig nadink oor die vraag: ‘Moet ek my laat doop?’
Die Bybel moedig jongmense aan om ‘in die dae van hulle jonkheid aan hulle Skepper te dink’ (Prediker 12:1). In hierdie opsig het ons die voorbeeld van jong Samuel, wat ‘as seun voor die aangesig van die HERE gedien het’. Daar is ook die voorbeeld van Timotheüs, wat van kleins af die waarheid wat sy ma en ouma hom geleer het ter harte geneem het.—1 Samuel 2:18; 2 Timotheüs 1:5; 3:14, 15.
Net so het baie jongmense hulle lewe vandag aan Jehovah toegewy om hom te dien. Akifoesa, ’n 15-jarige, het gesê dat ’n deel op die Diensvergadering hom help besluit het om hom te laat doop. Ajoemi is gedoop toe sy tien jaar oud was. Sy wou Jehovah dien omdat sy hom werklik liefgekry het. Sy is nou 13 en het pas gesien hoe haar Bybelstudent, wat Jehovah ook liefgekry het, op 12-jarige ouderdom gedoop is. Ajoemi se jonger broer, Hikaroe, is ook op die ouderdom van tien gedoop. “Party het gesê dat ek te jonk is”, sê hy, “maar Jehovah het geweet hoe ek voel. Toe ek eers besluit het om my lewe toe te wy om hom met al my krag te dien, was ek vasbeslote om gedoop te word.”
Die voorbeeld van ouers is ook ’n faktor, soos blyk uit die ondervinding van ’n jong suster. Haar pa het haar ma verbied om die Bybel met haar en haar broer en suster te studeer. Hy het hulle geslaan en hulle boeke verbrand. Maar vanweë die ma se volharding en geloof kon die kinders sien hoe belangrik dit is om Jehovah God te dien. Hierdie jong meisie is op 13 gedoop, en haar jonger broer en suster het haar voorbeeld gevolg.
‘Ek is te oud’
Die psalmis het gesê: “Oues saam met die jonges—laat hulle die Naam van die HERE loof!” (Psalm 148:12, 13). Ja, dié wat al ouer is, moet ook besef hoe noodsaaklik dit is om hulle aan Jehovah se kant te skaar. Maar sommige bejaardes bring nie graag veranderinge aan nie. Hulle meen dat ’n bejaarde nie maklik iets nuuts aanleer nie. Maar dink aan getroue Abraham—hy was 75 toe Jehovah vir hom gesê het: “Trek uit jou land en uit jou familie, en kom na die land wat Ek jou sal wys” (Handelinge 7:3; Genesis 12:1, 4). Moses was 80 toe hy die opdrag van Jehovah ontvang het: “Lei my volk . . . uit Egipte uit” (Exodus 3:10). Hierdie manne, en ander, was goed in hulle lewenswyse gevestig toe Jehovah hulle gevra het om hulle liefde vir en toewyding aan hom te bewys. Hulle het nie gehuiwer om ag te slaan op Jehovah se versoek nie.
Wat van vandag? Sjizoemoe was reeds 78 jaar ’n Boeddhis toe hy met ’n Bybelstudie begin het. Sy gesin het hom teëgestaan en hom nie eens toegelaat om in sy eie huis te studeer nie. Na slegs een jaar het hy gesien dat hy hom aan Jehovah moet toewy en is hy gedoop. Waarom het hy die verandering aangebring? Hy het gesê: “Ek is jare lank deur valse godsdiens bedrieg, en ek wou voortgaan om vir ewig die waarheid van Jehovah te ontvang.”
‘Wat ons nou red’
Die tyd is kort. Lewens, ook joune, is op die spel. Dit is dringend dat jy ernstig daaroor nadink of jy jou aan Jehovah gaan toewy en dit deur waterdoop gaan simboliseer. Die apostel Petrus het dit benadruk toe hy gepraat het van “die doop [wat] ons nou ook red”. Hy het verder verduidelik dat doop nie “’n aflegging van die vuilheid van die vlees” is nie (’n persoon sou dit reeds gedoen het voordat hy aan die vereistes vir doop voldoen het), maar “’n bede tot God om ’n goeie gewete”.—1 Petrus 3:21.
Omdat hy aan Jehovah se vereistes voldoen het, kry die gedoopte dissipel ’n goeie gewete. Deur Jehovah voortdurend na die beste van sy vermoë te dien, geniet hy gemoedsrus en tevredenheid (Jakobus 1:25). Hy kan bowenal met vertroue uitsien na eindelose seëninge van Jehovah in die komende nuwe stelsel. Mag dit jou deel wees as jy positief reageer op die vraag: ‘Moet ek my laat doop?’
[Prent op bladsy 21]
As ’n seun het Samuel voor die aangesig van Jehovah gedien
[Prent op bladsy 22]
Moses was 80 toe hy sy opdrag van Jehovah ontvang het
[Prente op bladsy 23]
Vandag kan beide jonk en oud wat hulle laat doop, uitsien na eindelose seëninge in God se nuwe stelsel