Leer gehoorsaamheid deur dissipline te aanvaar
STEL jou voor dat jy bo-op ’n hoë berg staan, en dit letterlik voel of die wêreld aan jou behoort. Wat ’n wonderlike gevoel van vryheid!
Maar jou vryheid is in werklikheid baie beperk. Die wet van swaartekrag lê elke beweging van jou in ’n groot mate aan bande; net een verkeerde beweging kan rampspoedig wees. Hoe gerusstellend is dit daarenteen om te weet dat dieselfde wet van swaartekrag verhinder dat jy hulpeloos na die buitenste ruimte wegdryf. Die wet is dus duidelik vir jou eie beswil. Dit is voordelig, en kan selfs jou lewe red, as jy aanvaar dat dit jou beweging daar bo-op daardie berg beperk.
Ja, soms kan wette en gehoorsaamheid daaraan ons vryheid beperk, maar maak dit gehoorsaamheid ongewens?
God se beskouing van gehoorsaamheid
As die “Groot Skepper” is Jehovah “die bron van die lewe”. Om hierdie rede is al sy skepsele hom tereg gehoorsaamheid verskuldig. Die psalmis het die regte gesindheid geopenbaar toe hy geskryf het: “Laat ons aanbid en neerbuig; laat ons kniel voor Jehovah ons Maker. Want hy is ons God, en ons is die volk van sy weide en die skape van sy hand.”—Prediker 12:1, NW; Psalm 36:9, NW; 95:6, 7, NW.
Jehovah het van die begin af gehoorsaamheid van sy skepsele vereis. Adam en Eva se voortbestaan in die Paradys het van hulle gehoorsaamheid afgehang (Genesis 2:16, 17). Gehoorsaamheid is eweneens van die engele verwag, selfs al is hulle ’n hoër lewensvorm as die mens. Omdat sommige van hierdie geesskepsele “ongehoorsaam was toe die lankmoedigheid van God eenmaal gewag het in die dae van Noag”, is hulle gestraf deur God wat hulle “aan kettings van duisternis oorgegee het, om vir die oordeel in bewaring gehou te word”.—1 Petrus 3:19, 20; 2 Petrus 2:4.
Eenvoudig gestel, God beskou gehoorsaamheid as ’n vereiste om sy goedkeuring te verkry. Ons lees: “Het die HERE behae in brandoffers en slagoffers soos in gehoorsaamheid aan die stem van die HERE? Kyk, om gehoorsaam te wees is beter as slagoffer, om te luister beter as die vet van ramme.”—1 Samuel 15:22.
Gehoorsaamheid moet geleer word—waarom en hoe
Gehoorsaamheid lei tot ’n regverdige posisie voor God; hoe noodsaaklik is dit dus tog dat ons dit leer! Net soos ons ’n ander taal kan leer terwyl ons jonk is, kan ons ook leer om gehoorsaam te wees terwyl ons jonk is. Dit is waarom die Bybel beklemtoon dat kinders van kleins af geleer moet word.—Josua 8:35.
Sommige moderniste weerspreek die Bybel se beskouing en sê dat dit op verstandelike verkragting neerkom om gehoorsaamheid van kinders te vereis. Hulle voer aan dat kinders toegelaat moet word om sonder die inmenging van volwassenes hulle eie persoonlike idees te ontwikkel, asook standaarde waarvolgens hulle kan lewe.
Maar in die sestigerjare, toe baie ouers hierdie beskouing gehuldig het, het Wilhelm Hansen, lektor, redakteur en professor in die sielkunde, nie hiermee saamgestem nie. Hy het geskryf: “Vir ’n kind in sy vroeë wordingsjare, op ’n tyd wanneer sy verhouding met sy ouers nog ’n deurslaggewende rol speel, is die ‘slegte’ die dinge wat die ouers verbied en die ‘goeie’ die dinge wat hulle aanbeveel of prys. Dit is dus alleenlik gehoorsaamheid wat die kind lei op die weg van sedelikheid en van die vernaamste deugde waarvan sy beskouing van die sedelike orde afhang.”—Vergelyk Spreuke 22:15.
God se Woord beklemtoon die belangrikheid daarvan om gehoorsaamheid te leer. Ons lees: “Ek weet, O HERE, dat ’n mens nie sy eie weë kan kies nie; dit is ook nie vir ’n mens om sy eie lewensweg te bepaal nie” (Jeremia 10:23, The New English Bible). Die geskiedenis bevat talle gevalle waar mense hulle eie lewensweg volgens persoonlike standaarde bepaal het en hulle as gevolg daarvan ernstige probleme op die hals gehaal het. Waarom gebeur dit so dikwels? Omdat mense nie die kennis, wysheid en insig het om hulle lewensweg sonder hulp te bepaal nie. Nog ernstiger is die feit dat hulle ’n oorgeërfde neiging het om die verkeerde besluite te neem. Onmiddellik na die Vloed het Jehovah van die mens gesê: “Die versinsels van die mens se hart is sleg van sy jeug af.”—Genesis 8:21.
Niemand erf derhalwe die neiging om Jehovah te gehoorsaam nie. Ons moet dit by ons kinders inskerp en dit ons lewe lank leer. Elkeen van ons moet die hartstoestand van koning Dawid aankweek, wat geskryf het: “HERE, maak my u weë bekend; leer my u paaie. Lei my in u waarheid en leer my, want U is die God van my heil. U verwag ek die hele dag.”—Psalm 25:4, 5.
Leer jou kinders gehoorsaamheid deur self gehoorsaam te wees
Jesus se moeder en pleegvader het die omstandighede van Jesus se geboorte goed geken. Hulle het gevolglik besef dat hy ’n belangrike rol in die vervulling van Jehovah se voornemens sou speel. (Vergelyk Lukas 1:35, 46, 47.) In hulle geval het die woorde “kyk, seuns is ’n erfdeel van die HERE” ’n unieke betekenis gehad (Psalm 127:3). Hulle het ten volle besef dat hulle ’n geweldige verantwoordelikheid gehad het en het gevolglik God se instruksies sonder versuim gehoorsaam, soos toe hulle aangesê is om na Egipte toe te vlug of later na Galilea toe te gaan.—Mattheüs 2:1-23.
Jesus se ouers het ook besef dat hulle ’n verantwoordelikheid gehad het om hom te dissiplineer. Jesus was weliswaar gedurende sy voormenslike bestaan gehoorsaam. Maar terwyl hy op die aarde was, het hy onder heeltemal nuwe omstandighede geleer om gehoorsaam te wees. Ten eerste moes hy onvolmaakte ouers gehoorsaam omdat selfs ’n volmaakte kind dissipline in die vorm van onderrig en opvoeding nodig het. Sy ouers het dit voorsien. Dissipline in die vorm van straf was daarenteen onnodig. Jesus was altyd gehoorsaam; sy ouers het nie nodig gehad om hulle opdragte te herhaal nie. Ons lees: “Toe het hy saam met hulle [sy ouers] huis toe gegaan in Nasaret, en hy was aan hulle gehoorsaam.”—Lukas 2:51, Phillips.
Josef en Maria het ook geweet hoe om Jesus deur hulle voorbeeld te leer. Ons lees byvoorbeeld: “Sy ouers was gewoond om elke jaar met die paasfees na Jerusalem te gaan” (Lukas 2:41). Josef het sy gesin saamgeneem en sodoende getoon dat hy in hulle geestelike welsyn belangstel en dat hy Jehovah se aanbidding ernstig opneem. Ouers kan insgelyks vandag deur hulle eie gehoorsaamheid in sake wat hulle aanbidding betref hulle kinders gehoorsaamheid leer.
As gevolg van Josef en Maria se goeie dissiplinering in geregtigheid “het [Jesus] toegeneem in wysheid en grootte en in genade by God en die mense”. Wat ’n goeie voorbeeld wat Christenouers vandag kan volg!—Lukas 2:52.
“In alles gehoorsaam”
“Kinders, julle moet jul ouers in alles gehoorsaam wees, want dit is die Here welbehaaglik” (Kolossense 3:20). Jesus kon sy ouers in alles gehoorsaam wees, want hulle gehoorsaamheid aan Jehovah het verhinder dat hulle enigiets van Jesus—of sy halfbroers en -susters—sou verwag wat in stryd met Jehovah se wil was.
Baie ouers leer ook vandag hulle kinders met welslae om in alles gehoorsaam te wees. Luister na drie vaders wat tans, nadat hulle reeds hulle kinders grootgemaak het, by ’n tak van die Wagtoringgenootskap dien.
Theo vertel hoe hy en sy vrou vyf seuns grootgemaak het. Hy sê: “Dit is belangrik om kinders reg van die begin af te laat verstaan dat volwassenes ook foute maak. Ongelukkig maak ons selfs herhaaldelik dieselfde foute en moet ons voortdurend ons hemelse Vader om vergifnis en hulp vra. Ons het doelbewus ons kinders laat sien dat ons met die probleme van volwassenes worstel net soos hulle met die probleme van die jeug worstel.”
’n Liefdevolle verhouding tussen ’n kind en sy ouers is noodsaaklik as ’n ouer wil hê dat sy kind gehoorsaamheid moet leer. Hermann sê van sy vrou: “Sy was nie net die seuns se ma nie, maar ook hulle vriendin. Hulle het dit waardeer, en dit was dus nie vir hulle moeilik om gehoorsaam te wees nie.” Dan gee hy ’n praktiese wenk oor hoe om ’n beter ouer-kindverhouding op te bou: “Ons het doelbewus jare lank nie ’n skottelgoedwasser gehad nie, sodat die skottelgoed met die hand gewas en afgedroog moes word. Dit was ons seuns se werk om beurte te maak om dit af te droog. Dit was die beste tyd vir informele kommunikasie.”
’n Liefdevolle ouer-kindverhouding dien as ’n model van die verhouding wat ’n Christen met Jehovah moet hê. Rudolf verduidelik wat hy en sy vrou gedoen het om hulle twee seuns te help om so ’n verhouding op te bou: “Ons grondslag was ’n gereelde gesinstudie. Ons het die kinders ’n aantal gepaste onderwerpe gegee waaroor hulle navorsing moes doen. Ons het ook ons Bybellees saamgedoen en dan die materiaal bespreek. Ons seuns kon sien dat Jehovah van ouers gehoorsaamheid verwag, nie net van kinders nie.”
Christenouers besef dat die geïnspireerde teks “die teregwysinge van die dissipline is die weg van die lewe” op hulle sowel as op hulle kinders van toepassing is. Terwyl kinders dus die verantwoordelikheid het om hulle ouers in alles te gehoorsaam, moet ouers ook gehoorsaam wees in alles wat Jehovah van hulle verwag. Benewens om die ouer-kindverhouding te versterk, wil ouers en kinders hulle verhouding met God versterk.—Spreuke 6:23, NW.
’n Positiewe beskouing van gehoorsaamheid
Hoe dankbaar kan ons tog wees dat God se Woord sulke praktiese raad oor die grootmaak van kinders gee! (Sien venster.) Kinders wat gehoorsaamheid leer van ouers wat hulle in geregtigheid dissiplineer, is ’n ware bron van vreugde vir die hele Christenbroederskap.
Aangesien gehoorsaamheid aan God die lewe beteken, moet ons nooit—selfs nie vir ’n oomblik nie—daaraan dink om die beperkings te oorskry wat God se wette op ons persoonlike vryheid plaas nie. Stel jou byvoorbeeld voor dat ons ’n rukkie die wet van swaartekrag kan vryspring. Hoe opwindend sal dit wees om van ’n berg af in die lug in op te skiet sonder dat iets ons vryheid beperk! Maar wat sou gebeur wanneer dinge weer na normaal terugkeer? Dink aan hoe hard ons met die grond sal kennis maak!
As ons gehoorsaamheid leer deur dissipline te aanvaar, sal dit daartoe bydra dat ons ’n gebalanseerde persoonlikheid ontwikkel en ons help om ons beperkings te ken. Dit help ons om nie veeleisend en ongevoelig teenoor ander se regte en behoeftes te wees nie. Dit help ons om nie met tye aan onsekerheid toe te gee nie. Kortom, dit bring geluk.
Hetsy jy dus ’n volwassene of ’n kind is, leer gehoorsaamheid deur dissipline te aanvaar sodat “dit met jou goed mag gaan” en “jy lank mag lewe op die aarde” (Efesiërs 6:1-3). Wie wil sy vooruitsig om vir ewig te lewe in gevaar stel deurdat hy nie gehoorsaamheid wil leer deur dissipline te aanvaar nie?—Johannes 11:26.
[Venster op bladsy 29]
OUERS, LEER HULLE GEHOORSAAMHEID DEUR IN GEREGTIGHEID TE DISSIPLINEER
1. Dissiplineer met skriftuurlike wette en beginsels as grondslag.
2. Moenie dissiplineer bloot deur gehoorsaamheid te eis nie, maar deur te verduidelik waarom gehoorsaamheid die wyse weg is.—Mattheüs 11:19b.
3. Moenie dissiplineer wanneer jy kwaad is of deur op jou kinders te skree nie.—Efesiërs 4:31, 32.
4. Dissiplineer in die hartlikheid van ’n liefdevolle verhouding.—Kolossense 3:21; 1 Thessalonicense 2:7, 8; Hebreërs 12:5-8.
5. Dissiplineer kinders van kleins af.—2 Timotheüs 3:14, 15.
6. Dissiplineer herhaaldelik en wees konsekwent.—Deuteronomium 6:6-9; 1 Thessalonicense 2:11, 12.
7. Dissiplineer eers jouself, en leer hulle sodoende deur jou voorbeeld.—Johannes 13:15; vergelyk Mattheüs 23:2, 3.
8. Dissiplineer terwyl jy ten volle op Jehovah steun, en in gebed sy hulp vra.—Rigters 13:8-10.
[Prent op bladsy 28]
“Die teregwysinge van die dissipline is die weg van die lewe”