Tonele uit die Beloofde Land

’n Besoek aan Silo—goeie kinders en slegtes

DINK jy, wanneer jy aan stede, dorpe of gebiede van die Beloofde Land dink, ook aan sekere merkwaardige manne en vroue? Heel waarskynlik, want die meeste Bybelverslae handel oor volwassenes. Maar wat van die kinders van daardie tyd? Kan jy hulle in die tonele sien?

Die toneel hierbo kan ons help om verslae waarby jongmense betrokke was van naderby te beskou; party was voortreflike voorbeelde vir Christene en ander se voorbeelde dien as waarskuwings. Die ronde heuwel in die middel is klaarblyklik die ligging van antieke Silo.a

Jy onthou waarskynlik dat Israel, toe hulle die Beloofde Land binnegegaan het, eers God se tabernakel by Gilgal naby Jerigo opgeslaan het (Josua 4:19). Maar toe die land verdeel is, is hierdie heilige tent—die middelpunt van Israel se aanbidding—hier na Silo verskuif (Josua 18:1). Dit was ongeveer 30 kilometer noord van Jerusalem in die bergstreek van Efraim. Mans en vroue van oor die hele Israel het na Silo gekom; groot skares kon bymekaarkom in die vallei suid van waar die tabernakel waarskynlik gestaan het (Josua 22:12). Kan jy in jou verbeelding kinders hierheen sien kom?

Party het. Die vernaamste voorbeeld waarvan ons behoort te weet, is jong Samuel. Sy ouers, Elkana en Hanna, het in ’n dorp anderkant die heuwels na die Weste toe gewoon. Hulle het elke jaar hierheen gereis, en miskien het hulle van Elkana se kinders, wat hy by ’n ander vrou gehad het, saamgebring. Uiteindelik het Jehovah Hanna geseën met ’n seun wat hulle Samuel genoem het. Mettertyd het sy ouers hom na Silo toe gebring om daar te bly sodat hy saam met die hoëpriester Eli by die tabernakel kon dien.—1 Samuel 1:1–2:11.

Die seun het take gehad wat hy in die huis van God moes verrig, en hy moes baie geleenthede gehad het om in die heuwels daar naby te gaan stap (1 Samuel 3:1, 15). Terrasse was teen party heuwels aangelê en hulle was vol olyfbome soos ons in die foto op bladsy 9 sien. Let op die klipwagtorinkie. Afgeleë boere of herders kon van so ’n toring af waghou, maar jy kan jou voorstel dat jong Samuel opgeklim het om ook te kyk. (Vergelyk 2 Kronieke 20:24, NW.) Dit sou ’n gunstige posisie wees om op die uitkyk te wees vir wilde diere.

Destyds was daar meer bome as nou, daar was selfs woude met wilde diere (Josua 17:15, 18). Dit blyk uit ’n voorval toe Elisa God se vernaamste profeet was. Elisa was op reis van Jerigo na Bet-el, en hy was dus in hierdie gebied, sowat 16 kilometer suid van Silo. Watter soort ontvangs sou hy kry van die mense van Bet-el, wat ’n sentrum geword het vir die aanbidding van ’n goue kalf? (1 Konings 12:27-33; 2 Konings 10:29). Die volwassenes was klaarblyklik vyandiggesind teenoor Jehovah se profeet, en dit lyk asof hulle gesindheid hulle kinders beïnvloed het.

Tweede Konings 2:23, 24 vertel ons van ’n klomp kinders wat met God se profeet gespot het: “Gaan op, kaalkop! Gaan op, kaalkop!” In reaksie hierop het Elisa “hul- le gevloek in die Naam van die HERE; en twee berinne het uit die bos gekom en van hulle twee-en-veertig kinders verskeur”. Sulke Siriese bruinbere kan baie wreed wees as hulle verras word of as dit lyk of hulle welpies bedreig word (2 Samuel 17:8; Spreuke 17:12; 28:15). God het hulle gebruik om Goddelike geregtigheid te voltrek teen diegene wat sy verteenwoordiger so verag het en dus Jehovah self verag het.

Dat ’n kind sulke wilde diere in die heuwels om Silo kon teëkom, behoort ons te help om ons waardering te vergroot vir die geloof wat Samuel se ouers getoon het deur hom te bring om by die tabernakel te dien.

’n Ander ware aanbidder het vroeër soortgelyke geloof en toegewydheid getoon—rigter Jefta. Hy het in die heuwelagtige streek van Gilead, oos van die Jordaan, gewoon. Met ywer vir Jehovah teen die vyandige Ammoniete het Jefta ’n gelofte afgelê dat die eerste lid van sy huis wat uitkom om hom te ontmoet aan Jehovah geoffer sou word. Sy maagdelike dogter was toe daardie een. Daarom het hy sy enigste kind na die heiligdom van God by Silo gebring, waar sy gebly het en jare lank getrou gedien het.—Rigters 11:30-40.

Die getroue toegewydheid wat Samuel en Jefta se dogter in die omgewing van Silo aan die dag gelê het, vorm ’n skerp teenstelling met die negatiewe voorbeeld van die 42 jeugdiges wat met Jehovah se profeet in hierdie selfde streek gespot het.—Vergelyk 1 Korinthiërs 10:6, 11.

[Voetnoot]

[Foto-erkenning op bladsy 8]

Pictorial Archive (Near Eastern History) Est.

[Foto-erkenning op bladsy 9]

Pictorial Archive (Near Eastern History) Est.

[Foto-erkenning op bladsy 9]

Safari Zoo, Ramat-Gan, Tel Aviv