Jehovah, die Een wat wonderlike dinge doen
“U is groot en doen wonders, U alleen is God.”—PSALM 86:10.
1, 2. (a) Watter uitwerking het die mens se uitvindings op die wêreld gehad? (b) Waar kan ons ’n hoop op beter dinge vind?
DIE hedendaagse mens spog dalk dat sy uitvindings wonderlik is—elektriese toestelle, telekommunikasie, televisie, die motor, straallugvaart en gerekenariseerde tegnologie. Hierdie dinge het die wêreld in een buurt omskep. Maar wat ’n buurt! Pleks van vrede, voorspoed en oorvloed vir almal het die mensdom met bloedige oorloë, misdaad, terrorisme, besoedeling, siektes en armoede te kampe. En die kernwapens wat oor die wêreld versprei is, hoewel hulle getalle verminder is, kan die mensdom steeds uitwis. Handelaars van die dood, die wapenvervaardigers, bedryf die grootste handelsonderneming op aarde. Die rykes word ryker en die armes armer. Kan enigiemand met ’n oplossing vorendag kom?
2 Ja! Want daar is Iemand wat verlossing waarborg, “iemand wat hoër is as die hoë een”, Jehovah God (Prediker 5:8, NW). Hy het mense geïnspireer om die psalms te skryf wat baie bemoediging en wyse raad vir tye van benoudheid voorsien. Een van hulle is Psalm 86 wat dié eenvoudige opskrif het: “’n Gebed van Dawid.” Dit is ’n gebed wat jy jou eie kan maak.
Geteister maar lojaal
3. Watter bemoedigende voorbeeld is Dawid in hierdie tye vir ons?
3 Dawid het hierdie psalm geskryf toe hy geteister is. Ons wat vandag gedurende “die laaste dae” van Satan se stelsel leef, gedurende hierdie “swaar tye”, kom voor soortgelyke beproewings te staan. (2 Timotheüs 3:1; sien ook Mattheüs 24:9-13.) Dawid was, soos ons, bekommerd en terneergedruk weens die probleme wat hom geteister het. Maar hy het nooit toegelaat dat daardie beproewinge sy lojale vertroue in sy Skepper ondermyn nie. Hy het uitgeroep: “[O Jehovah], neig u oor, verhoor my, want ek is [geteister] en behoeftig. Bewaar my siel, want ’n gunsgenoot is ek; U, my God, verlos u kneg wat op U vertrou.”—Psalm 86:1, 2, vgl. NW.
4. Hoe moet ons ons vertroue toon?
4 Ons kan soos Dawid vol vertroue wees dat “die God van alle vertroosting”, Jehovah, sy oor na hierdie aarde sal neig en na ons nederige gebede sal luister (2 Korinthiërs 1:3, 4). Aangesien ons volkome op ons God vertrou, kan ons Dawid se raad volg: “Werp jou sorg op die HERE, en Hý sal jou onderhou; Hy sal nooit die regverdige laat wankel nie.”—Psalm 55:23.
’n Innige verhouding met Jehovah
5. (a) Hoe het sommige noukeurige vertalings die foute van Joodse skrifgeleerdes reggestel? (b) Op watter wyse verheerlik die 85ste en 86ste psalms Jehovah? (Sien voetnoot.)
5 Volgens die oorspronklike Hebreeuse Geskrifte het Dawid die uitdrukking “o Jehovah” 11 keer in die 86ste Psalm gebruik. Hoe vurig is Dawid se gebed tog, en wat ’n innige verhouding het hy met Jehovah! Later het so ’n intieme gebruik van God se naam vir die Joodse skrifgeleerdes, veral vir die Soferim, iets afstootliks geword. Hulle het ’n bygelowige vrees om die naam te misbruik bevorder. Hulle het die feit geïgnoreer dat die mens na God se gelykenis geskep is en het geweier om eienskappe aan God toe te skryf wat mense ook openbaar. Op 7 van die 11 plekke waar die Goddelike naam in die Hebreeuse teks van hierdie een psalm voorkom, het hulle dus die naam JHWH (Jehovah) met die titel ʼAdho-naiʹ (Here) vervang. Ons kan dankbaar wees dat die New World Translation of the Holy Scriptures, sowel as ’n aantal ander noukeurige vertalings, die Goddelike naam tot sy regmatige plek in God se Woord herstel het. Gevolglik kry ons verhouding met Jehovah die vername plek wat dit verdien.a
6. Hoe kan ons toon dat Jehovah se naam vir ons kosbaar is?
6 Die gebed van Dawid lui voorts: “Wees my genadig, o [Jehovah], want ek roep U aan die hele dag deur. Verbly die siel van u kneg, want tot U, o [Jehovah], hef ek my siel op” (Psalm 86:3, 4, vgl. NW). Let op dat Dawid Jehovah “die hele dag deur” aangeroep het. Trouens, hy het dikwels deur die nag gebid, soos toe hy ’n voortvlugtige in die woestyn was (Psalm 63:7, 8). Sommige Getuies in hedendaagse tye het Jehovah eweneens hardop aangeroep toe hulle met verkragting of aanranding gedreig is. Met tye het die gelukkige resultaat hiervan hulle verbaas.b Jehovah se naam is vir ons kosbaar soos dit ook vir “Jesus Christus, die seun van Dawid”, was toe hy op die aarde was. Jesus het sy dissipels geleer om te bid dat Jehovah se naam geheilig moet word, en hy het dít waarvoor daardie naam staan aan hulle bekend gemaak.—Mattheüs 1:1; 6:9; Johannes 17:6, 25, 26.
7. Watter voorbeelde het ons van hoe Jehovah die siel van sy knegte opgehef het, en watter uitwerking moet dit op ons hê?
7 Dawid het sy siel, sy hele wese, tot Jehovah opgehef. Hy moedig ons aan om dieselfde te doen, en sê in Psalm 37:5: “Laat jou weg aan die HERE oor en vertrou op Hom, en Hý sal dit uitvoer.” Ons smeekbede tot Jehovah om ons siel te verbly, sal dus nie onbeantwoord bly nie. Talle knegte van Jehovah wat hulle onkreukbaarheid handhaaf, vind steeds groot vreugde in sy diens—ten spyte van moeilike omstandighede, vervolging en siekte. Ons broers in oorloggeteisterde dele van Afrika, soos Angola, Liberië, Mosambiek en Zaïre, het volgehou om Jehovah se diens eerste in hulle lewe te stel.c Hy het waarlik gesorg dat hulle hulle in ’n oorvloedige geestelike oes verheug. Ons moet soos hulle volhard (Romeine 5:3-5). En terwyl ons volhard, word ons verseker: “Die gesig sal nog duur tot op die vasgestelde tyd; maar dit spoed na die einde en . . . sal . . . nie versuim nie” (Habakuk 2:3). Laat ons dan met volkome vertroue in en hoop op Jehovah ook aanhou om ‘na die einde te spoed’.
Jehovah se goedheid
8. Watter innigheid kan ons in ons verhouding met Jehovah hê, en hoe het hy sy goedheid getoon?
8 Dawid rig hierdie verdere smeekbede: “U, o [Jehovah], is goed en vergewensgesind en groot van goedertierenheid vir almal wat U aanroep. [O Jehovah], luister na my gebed en let op die stem van my smekinge. In die dag van my benoudheid roep ek U aan, want U verhoor my” (Psalm 86:5-7, vgl. NW). “O Jehovah”—hoe ontroer dit ons tog elke keer wanneer ons hierdie innige uitdrukking hoor! Dit is ’n innigheid wat voortdurend deur gebed aangekweek kan word. Dawid het by ’n ander geleentheid gebid: “Dink nie aan die sondes van my jonkheid en aan my oortredinge nie; dink aan my na u goedertierenheid, om u goedheid ontwil, o [Jehovah]” (Psalm 25:7, vgl. NW). Jehovah is die absolute beliggaming van goedheid—deur sy voorsiening van Jesus se losprys, deur die genade wat hy aan berouvolle sondaars betoon en deur die goedertierenheid wat hy op sy lojale en waarderende Getuies uitstort.—Psalm 100:3-5; Maleagi 3:10.
9. Watter versekering moet berouvolle sondaars ter harte neem?
9 Moet ons ons kwel oor foute wat ons in die verlede begaan het? As ons nou reguit paaie vir ons voete maak, word ons bemoedig wanneer ons aan die apostel Petrus se versekering dink dat berouvolle persone “tye van verkwikking” van Jehovah sal ontvang (Handelinge 3:19). Laat ons in gebed na aan Jehovah bly deur middel van ons Loskoper, Jesus, wat liefdevol gesê het: “Kom na My toe, almal wat vermoeid en belas is, en Ek sal julle rus gee. Neem my juk op julle en leer van My, want Ek is sagmoedig en nederig van hart, en julle sal rus vind vir julle siele.” Wanneer lojale Getuies vandag in Jesus se kosbare naam tot Jehovah bid, vind hulle inderdaad rus.—Mattheüs 11:28, 29; Johannes 15:16.
10. Hoe bring die boek Psalms Jehovah se goedertierenheid op die voorgrond?
10 Die boek Psalms maak meer as honderd keer melding van Jehovah se “goedertierenheid”. Sulke goedertierenheid is beslis oorvloedig! In die eerste vier verse van die 118de Psalm word daar ’n beroep op God se knegte gedoen om Jehovah te dank, en daar word vier keer gesê “sy goedertierenheid is tot in ewigheid”. Die 136ste Psalm beklemtoon die liefdevolle eienskap van “sy goedertierenheid” 26 keer. Hoe ons ook al fouteer—en Jakobus 3:2 sê juis dat ‘ons almal dikwels struikel’—laat ons Jehovah altyd sonder versuim om vergifnis vra, oortuig van sy genade en goedertierenheid. Sy goedertierenheid is ’n uiting van sy lojale liefde teenoor ons. As ons lojaal aanhou om God se wil te doen, sal hy sy lojale liefde toon deur ons te versterk om elke beproewing die hoof te bied.—1 Korinthiërs 10:13.
11. Hoe kan die ouere manne se optrede help om skuldgevoelens uit die weg te ruim?
11 Daar is dalk tye wanneer ander ons laat struikel. Emosionele of fisiese mishandeling gedurende hulle kinderjare laat sommige skuldig of heeltemal onwaardig voel. So ’n slagoffer kan Jehovah aanroep, vol vertroue dat hy gehoor sal gee (Psalm 55:17, 18). ’n Goedhartige ouere man kan belangstelling toon deur so iemand te help om die feit te aanvaar dat dit nie die slagoffer se skuld is nie. Daarna kan periodieke telefoonoproepe deur die ouere man daardie persoon help tot hy (of sy) uiteindelik ‘die las kan dra’.—Galasiërs 6:2, 5.
12. Hoe het bekommernisse vermeerder, maar hoe kan ons hulle met welslae die hoof bied?
12 Daar is baie ander kommerwekkende omstandighede waarin Jehovah se volk vandag verkeer. Van die Eerste Wêreldoorlog in 1914 af het groot rampe hierdie aarde begin teister. Soos Jesus voorspel het, was dit “’n begin van die smarte”. Bekommernisse vermeerder steeds namate ons dieper in “die voleinding van die stelsel van dinge” inbeweeg (Mattheüs 24:3, 8, vgl. NW). Die Duiwel se “min tyd” stuur op ’n beslissende einde af (Openbaring 12:12). Daardie groot Teenstander gebruik, “soos ’n brullende leeu” wat op soek is na prooi, elke beskikbare slenter om ons van die kudde van God af weg te rokkel en ons te vernietig (1 Petrus 5:8). Maar hy sal nie slaag nie! Want soos Dawid vestig ons ons vertroue volkome op ons een God, Jehovah.
13. Hoe kan ouers en hulle kinders van Jehovah se goedheid gebruik maak?
13 Dawid het ongetwyfeld die noodsaaklikheid om op Jehovah se goedheid te steun in sy seun Salomo se hart ingeskerp. Derhalwe kon Salomo sy eie seun die raad gee: “Vertrou op die HERE met jou hele hart en steun nie op jou eie insig nie. Ken Hom in al jou weë, dan sal Hý jou paaie gelykmaak. Wees nie wys in jou eie oë nie; vrees die HERE, en wyk af van die kwaad” (Spreuke 3:5-7). Hedendaagse ouers moet hulle kinders eweneens leer hoe om vol vertroue tot Jehovah te bid en hoe om die aanvalle van ’n wrede wêreld—soos portuurdwang by die skool en versoekings om onsedelik te wees—die hoof te bied. As jy die waarheid elke dag saam met jou kinders uitleef, kan dit ware liefde vir Jehovah en biddende vertroue op hom by hulle inskerp.—Deuteronomium 6:4-9; 11:18, 19.
Jehovah se weergalose werke
14, 15. Wat is sommige van Jehovah se weergalose werke?
14 Dawid sê met volle oortuiging: “Daar is niemand soos U onder die gode, [o Jehovah], en daar is niks soos u werke nie” (Psalm 86:8, vgl. NW). Jehovah se werke is groter, grootser, majestueuser as wat enige mens hom ooit kan indink. Die geskape heelal—sy eindeloosheid, sy harmonie, sy grootsheid—is, soos die hedendaagse wetenskap ontdek het, baie ontsagwekkender as enigiets wat Dawid waargeneem het. Tog is selfs hy beweeg om te sê: “Die hemele vertel die eer van God, en die uitspansel verkondig die werk van sy hande.”—Psalm 19:2.
15 Jehovah se werke word ook wonderbaarlik getoon deur die wyse waarop hy die aarde geplaas en voorberei het en sodoende voorsiening gemaak het vir dag en nag, die seisoene, saai- en oestyd en ’n menigte vreugdes vir die mensdom se toekomstige genot. En hoe wonderlik is ons tog gemaak en toegerus sodat ons Jehovah se werke om ons kan geniet!—Genesis 2:7-9; 8:22; Psalm 139:14.
16. Wat is die grootste blyk van Jehovah se goedheid, en tot watter ander weergalose werke gee dit aanleiding?
16 Nadat ons eerste ouers aan God ongehoorsaam was, en daardeur aanleiding gegee het tot die probleme wat die aarde tot vandag toe teister, het Jehovah uit sy liefde iets wonderliks gedoen deur sy Seun na die aarde toe te stuur om God se Koninkryk te verkondig en as ’n losprys vir die mensdom te sterf. En wonder bo wonder! Jehovah het Christus toe opgewek om sy gekose mede-Koning te word (Mattheüs 20:28; Handelinge 2:32, 34). God het ook uit lojale mense “’n nuwe skepping” gekies wat saam met Christus as ’n welwillende “nuwe hemel” sal regeer oor “’n nuwe aarde”-gemeenskap wat miljarde verresenes sal insluit (2 Korinthiërs 5:17, NW; Openbaring 21:1, 5-7; 1 Korinthiërs 15:22-26). Jehovah se werke sal sodoende ’n glorieryke klimaks bereik! Ons kan waarlik uitroep: “HERE, . . . hoe groot is u goedheid wat U weggelê het vir die wat U vrees!”—Psalm 31:18-20.
17. Hoe word Psalm 86:9 nou met betrekking tot Jehovah se werke vervul?
17 Jehovah se hedendaagse werke sluit in wat Dawid in Psalm 86:9 beskryf het: “Al die nasies wat U gemaak het, sal kom en hulle voor u aangesig neerbuig, [o Jehovah], en hulle sal u Naam eer” (vgl. NW). Nadat Jehovah die oorblywende lede van sy nuwe skepping, die “klein kuddetjie” Koninkrykserfgename, onder die mensdom uit geroep het, het hy voortgegaan om “’n groot menigte” “ander skape”, miljoene wat ook geloof in Jesus se vergote bloed beoefen, uit “alle nasies” te versamel. Hy het hulle opgebou tot ’n dinamiese organisasie, die enigste wêreldwye gemeenskap van vredeliefhebbers op aarde vandag. Aangesien die hemelse leërskare dit aanskou, buig hulle hulle voor Jehovah neer en sê: “Die lof en die heerlikheid en die wysheid en die danksegging en die eer en die krag en die sterkte aan onse God tot in alle ewigheid.” Die groot menigte verheerlik ook Jehovah se naam, en hulle dien hom “dag en nag” met die hoop om hierdie wêreld se einde te oorleef en vir ewig op ’n paradysaarde te lewe.—Lukas 12:32; Openbaring 7:9-17; Johannes 10:16.
Jehovah se grootsheid
18. Hoe het Jehovah getoon dat hy ‘alleen God’ is?
18 Dawid vestig vervolgens die aandag op Jehovah se Godheid, en sê: “U is groot en doen wonders, U alleen is God” (Psalm 86:10). Jehovah toon al van ouds af dat hy inderdaad ‘alleen God’ is. Dit was ’n tirannieke Farao van Egipte wat Moses tartend uitgedaag het: “Wie is [Jehovah] na wie se stem ek moet luister om Israel te laat trek? Ek ken [Jehovah] nie.” Maar hy het kort voor lank uitgevind hoe groot Jehovah wel is! Die almagtige God het Egipte se gode en towerpriesters verneder deur rampspoedige plae te stuur, Egipte se eersgebore seuns te laat sterf en Farao en sy uitsoekleër in die Rooi See te verdelg. Waarlik, daar is niemand soos Jehovah onder die gode nie!—Exodus 5:2, vgl. NW; 15:11, 12.
19, 20. (a) Wanneer sal die lied van Openbaring 15:3, 4 sy grootse klimaks bereik? (b) Hoe kan ons selfs nou ’n deelgenoot in Jehovah se werk wees?
19 As die een wat alleen God is, het Jehovah wonderlike dinge gedoen ter voorbereiding van sy gehoorsame aanbidders se verlossing uit hedendaagse Egipte—Satan se wêreld. Hy het gesorg dat sy Goddelike oordele as ’n getuienis oor die hele aarde verkondig word deur middel van die omvangrykste predikingsveldtog in die ganse geskiedenis, en sodoende is Jesus se profesie in Mattheüs 24:14 vervul. “Die einde” moet binnekort kom wanneer Jehovah sy grootsheid op ’n ongeëwenaarde skaal sal bewys deur alle goddeloosheid op die aarde uit te wis (Psalm 145:20). Dan sal die lied van Moses en die lied van die Lam ’n crescendo bereik: “Groot en wonderlik is u werke, Here God, Almagtige; regverdig en waaragtig is u weë, o Koning van die heiliges! Wie sal U nie vrees nie, Here, en u Naam nie verheerlik nie? Want U alleen is heilig.”—Openbaring 15:3, 4.
20 Laat ons op ons beurt ywerig met ander oor hierdie grootse voornemens van God praat. (Vergelyk Handelinge 2:11.) Jehovah sal steeds groot en wonderlike dinge in ons dag en in die toekoms doen, soos ons volgende artikel sal toon.
[Voetnote]
a ’n Bybelkommentaar van 1874 haal Andrew A. Bonar aan waar hy gesê het: “Daar is baie, so baie, van God se besonderse persoonlikheid, sy glorieryke naam, wat aan die einde van die laaste [85ste] Psalm geopenbaar word. Dit verklaar moontlik waarom dit deur nog een, ‘’n Gebed van Dawid’, gevolg word wat amper net soveel van die persoonlikheid van Jehovah openbaar. Die grondtoon van hierdie [86ste] Psalm is Jehovah se naam.”
b Sien bladsy 28 van die Ontwaak! van 22 Oktober 1984 wat deur die Watch Tower Bible and Tract Society of Pennsylvania uitgegee is.
c Sien die tabel “Wêreldrapport van Jehovah se Getuies vir die 1992-diensjaar” wat in Die Wagtoring van 1 Januarie 1993 sal verskyn vir verdere besonderhede.
Onthou jy?
◻ Waarom moet ons die gebed van Psalm 86 ons eie maak?
◻ Hoe kan ons ’n innige verhouding met Jehovah verkry?
◻ Hoe betoon Jehovah sy goedheid teenoor ons?
◻ Wat is sommige van Jehovah se weergalose werke?
◻ Hoe is Jehovah ‘alleen God’ wat sy grootsheid betref?
[Prent op bladsy 10]
In die komende “nuwe aarde” sal die wonderlike werke van Jehovah steeds van sy heerlikheid en goedheid getuig