“Laat die huwelik onder almal eerbaar wees”
“Laat die huwelik onder almal eerbaar wees, en die huweliksbed sonder verontreiniging.”—HEBREËRS 13:4, NW.
1. Wat het baie mense oor ’n suksesvolle huwelik geleer?
IN HIERDIE eeu waar mense so maklik skei, geniet miljoene mense huwelike wat staande bly. Hulle het ’n resep vir geluk gevind, ten spyte van verskille in persoonlikheid en agtergrond. Sulke huwelike word onder Jehovah se Getuies gevind. In die meeste gevalle sal hierdie egpare erken dat hulle hulle goeie en slegte tye gehad het, dat hulle selfs redes tot klagtes teen mekaar gehad het. Tog het hulle geleer om geringe storms te trotseer en hulle huweliksbootjie op koers te hou. Wat is van die faktore wat hulle op koers gehou het?—Kolossense 3:13.
2. (a) Wat is van die positiewe faktore wat ’n huwelik staande hou? (b) Wat is van die faktore wat ’n huwelik kan ondermyn? (Sien venster op bladsy 14.)
2 Dit is nogal insiggewend om te hoor wat sommige gesê het wie se Christelike huwelike gelukkig is en gehou het. ’n Man wat al 16 jaar getroud is, het gesê: “Wanneer ’n probleem ook al opgeduik het, het ons werklik probeer om na mekaar se standpunt te luister.” Dit beklemtoon een van die faktore wat baie huwelike versterk—oop, eerlike kommunikasie. ’n Vrou wat al 31 jaar getroud is, het gesê: “Om handjies vas te hou en saam pret te hê sodat ons die romantiese sy van ons huwelik behou, was nog altyd vir ons ’n prioriteit.” En dít is ’n bykomende aspek van kommunikasie. ’n Ander egpaar wat al amper 40 jaar getroud is, het die belangrikheid daarvan beklemtoon om ’n humorsin te behou, om vir hulleself en mekaar te kan lag. Hulle het ook gesê dat dit help as ’n mens die beste en die slegste in mekaar kan sien en nogtans lojale liefde kan betoon. Die man het gesê ’n mens moet bereid wees om jou foute te erken en dan om verskoning te vra. Waar daar ’n toegewende gesindheid is, sal die huwelik buigsaam wees en aanpas pleks van verbrokkel.—Filippense 2:1-4; 4:5, Kingdom Interlinear.
’n Veranderende klimaat
3, 4. Watter gesindheidsveranderinge het ten opsigte van getrouheid in die huwelik ingetree? Kan jy voorbeelde noem?
3 Gedurende die afgelope paar dekades het beskouings oor getrouheid in die huwelik wêreldwyd verander. Party getroudes meen dat daar niks met ’n buite-egtelike verhouding, ’n hedendaagse eufemisme vir owerspel, verkeerd is nie, veral as die ander huweliksmaat daarvan weet en dit aanvaar.
4 ’n Christenopsiener het die volgende oor die situasie gesê: “Die wêreld probeer in werklikheid nie eens meer om volgens ’n sedewet te leef nie. Rein gedrag word nou as ouderwets beskou.” Vooraanstaande politieke, sport- en vermaaklikheidspersoonlikhede skend openlik die Bybel se standaarde van sedelike gedrag, en sulke mense word steeds opgehemel. Daar kleef feitlik geen stigma aan enige soort sedelike oortreding of perversie nie. Die sogenaamde hoëlui het maar selde waarde aan kuisheid en eerbaarheid geheg. Die massas het dan, na aanleiding van die beginsel ‘as hulle dit kan doen, kan ons ook’, daardie voorbeeld gevolg en dinge goedgepraat wat God veroordeel. Dit is soos Paulus dit gestel het: “Hulle het heeltemal afgestomp geraak en hulle met ’n onversadigbare drang aan losbandigheid oorgegee om al wat vuil is, te doen.”—Efesiërs 4:19, NAV; Spreuke 17:15; Romeine 1:24-28; 1 Korinthiërs 5:11.
5. (a) Wat is God se standpunt ten opsigte van owerspel? (b) Wat behels die Bybel se gebruik van die woord “hoerery”?
5 God se standaarde het nie verander nie. Dit is sy standpunt dat dit hoerery is om saam te woon sonder om getroud te wees. Ontrouheid in die huwelik is steeds owerspel.a Die apostel Paulus het dit duidelik gestel: “Of weet julle nie dat die onregverdiges die koninkryk van God nie sal beërwe nie? Moenie dwaal nie! Geen hoereerders of afgodedienaars of egbrekers of wellustelinge of sodomiete . . . sal die koninkryk van God beërwe nie. En dit was sommige van julle; maar julle het jul laat afwas, maar julle is geheilig, maar julle is geregverdig in die Naam van die Here Jesus en deur die Gees van onse God.”—1 Korinthiërs 6:9-11.
6. Watter bemoediging kan ons uit Paulus se woorde in 1 Korinthiërs 6:9-11 put?
6 ’n Bemoedigende gedagte in daardie teks is Paulus se uitdrukking: “En dit was sommige van julle; maar julle het jul laat afwas.” Ja, baie wat in die verlede saam met die wêreld se “stroom van losbandigheid” gegaan het, het tot hulle sinne gekom, Christus en sy offerande aangeneem en is skoongewas. Hulle het besluit om God te behaag deur sedelike lewens te lei en is gevolglik baie gelukkiger.—1 Petrus 4:3, 4.
7. Watter botsende begrippe bestaan daar oor die betekenis van “onsedelikheid”, en wat is die Bybel se beskouing?
7 Daarenteen is die hedendaagse wêreld se definisie van onsedelikheid só afgewater dat dit nie met God se beskouing strook nie. ’n Woordeboek definieer “onsedelik” as “strydig met gevestigde sedelikheid”. Hedendaagse “gevestigde sedelikheid”, wat voorhuwelikse en buite-egtelike seks sowel as homoseksualiteit goedkeur, is wat die Bybel as onsedelikheid veroordeel. Ja, uit die Bybelse oogpunt is onsedelikheid ’n growwe skending van God se sedewet.—Exodus 20:14, 17; 1 Korinthiërs 6:18.
Die invloed op die Christengemeente
8. Hoe kan onsedelikheid diegene in die Christengemeente beïnvloed?
8 Onsedelikheid is vandag so algemeen dat dit selfs druk op diegene in die Christengemeente kan uitoefen. Dit kan hulle beïnvloed deur die immerteenwoordige, perverse TV-programme, video’s en pornografiese leesstof. Hoewel slegs ’n klein persentasie Christene beïnvloed word, moet ons besef dat die meerderheid gevalle van uitsetting onder Jehovah se Getuies weens onberouvolle gedrag wat vir ’n Christen onvanpas is, met die een of ander vorm van geslagsonsedelikheid verband hou. Dit is egter aanmoedigend dat ’n groot persentasie van diegene wat uitgesit word uiteindelik hulle foute erken, weer ’n skoon lewe begin lei en mettertyd in die gemeente herstel word.—Vergelyk Lukas 15:11-32.
9. Hoe manipuleer Satan diegene wat onbehoedsaam is?
9 Daar bestaan geen twyfel nie dat Satan soos ’n brullende leeu rondloop, gereed om diegene wat onbehoedsaam is te verslind. Elke jaar word onbehoedsame Christene deur sy sette of “listige dade” verstrik. Die immerteenwoordige gees van sy wêreld is ’n gees van selfsug, hedonisme en losbandigheid. Dit bevredig die vlees. Dit verwerp selfbeheersing.—Efesiërs 2:1, 2; 6:11, 12, NW, voetnoot; 1 Petrus 5:8.
10. Wie word aan versoeking blootgestel, en waarom?
10 Wie in die gemeente kan aan die versoekinge van onsedelikheid blootgestel word? Die meeste Christene, of hulle nou ouere manne in ’n plaaslike gemeente is, reisende opsieners, Betheliete, pioniers wat elke maand baie ure aan die predikingswerk bestee, besige ouers wat na ’n gesin omsien of jongmense wat met portuurdwang te doen kry. Almal kom voor vleeslike versoekinge te staan. Seksuele drange kan gewek word wanneer dit die minste verwag word. Paulus kon dus skryf: “Daarom, wie meen dat hy staan, moet oppas dat hy nie val nie. Geen versoeking wat meer is as wat ’n mens [mans en vroue] kan weerstaan, het julle oorval nie.” Dit is betreurenswaardig, maar sommige Christene in verantwoordelike posisies het aan hierdie verlokking van onsedelikheid toegegee.—1 Korinthiërs 10:12, 13, NAV.
Weggesleep en verlok
11-13. Wat is van die situasies wat al tot onsedelikheid gelei het?
11 Wat is die versoekinge en situasies wat al daartoe gelei het dat sommige die dwase weg van owerspel en hoerery gevolg het? Daar is talle en hulle is kompleks en kan van een land of kultuur tot ’n ander verskil. Maar daar is sekere basiese situasies wat in baie lande opduik. Daar word byvoorbeeld berig dat sommige partytjies gereël het waar alkoholiese drank vryelik beskikbaar was. Ander het van die wêreld se suggestiewe musiek en uitlokkende danse gehou. In sommige dele van Afrika is daar welgestelde mans—ongelowiges—wat byvroue het; sommige vroue het in die versoeking gekom om ekonomiese sekuriteit in so ’n situasie te probeer vind, selfs al het dit ’n onsedelike lewe beteken. In ander gebiede het Christenmans hulle gesinne agtergelaat om op die myne of ander plekke geld te gaan verdien. Hulle lojaliteit en getrouheid word dan aan strawwer toetse onderwerp of in ander opsigte beproef as wat tuis die geval sou wees.
12 In ontwikkelde lande het sommige in Satan se strik getrap deur dikwels in die geselskap van iemand van die ander geslag te wees sonder dat ’n derde persoon by is—soos om gereeld in die beperkte ruimte van ’n motor te wees vir rylesse.b Ouere manne wat herdersbesoeke doen, moet ook versigtig wees om nie alleen met ’n suster te wees wanneer hulle raad gee nie. Gesprekke kan emosies opwek en tot ’n situasie lei wat albei in die verleentheid kan bring.—Vergelyk Markus 6:7; Handelinge 15:40.
13 Die bogenoemde omstandighede het daartoe gelei dat sommige Christene hulle waaksaamheid verslap het en hulle aan onsedelike dade skuldig gemaak het. Net soos in die eerste eeu het hulle toegelaat dat hulle ‘deur hulle eie begeerlikheid weggesleep en verlok word’, wat tot sonde gelei het.—Jakobus 1:14, 15; 1 Korinthiërs 5:1; Galasiërs 5:19-21.
14. Waarom is selfsug ’n onderliggende faktor in gevalle van owerspel?
14 Wanneer ’n mens uitsettingsgevalle noukeurig ondersoek, toon dit dat onsedelike dade sekere onderliggende faktore in gemeen het. In sulke gevalle is daar die een of ander vorm van selfsug. Waarom sê ons dit? Omdat ’n onskuldige persoon of persone in gevalle van owerspel gaan seerkry. Dit is dalk die wettige huweliksmaat. Dit sal beslis die kinders wees, indien daar enige is, want as owerspel tot ’n egskeiding lei, sal die kinders, wat die sekuriteit van ’n verenigde gesin nodig het, die hoogste prys betaal. Die owerspeler dink hoofsaaklik aan sy of haar eie genot en voordeel. Dít is selfsug.—Filippense 2:1-4.
15. Wat was al moontlik van die oorsake wat tot owerspel gelei het?
15 Owerspel is gewoonlik nie ’n skielike daad van swakheid nie. Daar was ’n geleidelike, selfs onbespeurbare agteruitgang in die huwelik self. Kommunikasie het miskien blote roetine of betekenisloos geword. Daar was dalk min onderlinge aanmoediging. Albei het mekaar moontlik as vanselfsprekend begin aanvaar. Die huweliksmaats het mekaar miskien al ’n ruk lank nie seksueel bevredig nie. Wanneer owerspel plaasvind, het die persoon se verhouding met God ook reeds verswak. Jehovah word nie meer duidelik as ’n lewende God gesien wat van al ons gedagtes en dade bewus is nie. In die owerspeler se gedagtes het “God” dalk ’n blote woord geword, ’n abstrakte entiteit wat nie ’n deel van sy daaglikse lewe is nie. Dan word dit makliker om teen God te sondig.—Psalm 51:4, 5; 1 Korinthiërs 7:3-5; Hebreërs 4:13; 11:27.
Die sleutel tot weerstand
16. Hoe kan ’n Christen die versoeking weerstaan om ontrou te wees?
16 Watter faktore moet in ag geneem word as ’n Christen hom of haar in ’n situasie bevind waar hy of sy versoek word om die weg van ontrouheid in te slaan? Eerstens moet daar nagedink word oor die betekenis van Christelike liefde, wat stewig op Bybelbeginsels gegrond is. ’n Mens moet nooit toelaat dat fisiese of erotiese liefde jou emosies oorheers en daartoe aanleiding gee dat jy in selfsug verval en lyding oor ander bring nie. Die situasie moet eerder uit Jehovah se oogpunt beskou word. Dit moet gesien word teen die groter agtergrond van die gemeente en die oneer wat slegte gedrag op die gemeente en op Jehovah se naam sal bring (Psalm 101:3). Rampspoed kan vermy word deur die sin van Christus oor die saak te kry en dan in ooreenstemming daarmee op te tree. Onthou, onselfsugtige liefde soos Christus s’n faal nooit nie.—Spreuke 6:32, 33; Mattheüs 22:37-40; 1 Korinthiërs 13:5, 8.
17. Watter opbouende voorbeelde van getrouheid het ons?
17 ’n Sleutel tot weerstand is om ’n mens se geloof en toekomsverwagting te versterk. Dit beteken dat jy die voortreflike voorbeelde van onkreukbaarheid wat getroue manne en vroue van die ou tyd, en Jesus self, nagelaat het, helder voor oë moet hou. Paulus het geskryf: “Daarom dan, terwyl ons so ’n groot wolk van getuies rondom ons het, laat ons ook elke las aflê en die sonde wat ons so maklik omring, en met volharding die wedloop loop wat voor ons lê, die oog gevestig op Jesus, die Leidsman en Voleinder van die geloof, wat vir die vreugde wat Hom voorgehou is, die kruis verdra het, die skande verag het en aan die regterkant van die troon van God gaan sit het. Want julle moet ag gee op Hom wat so ’n teëspraak van die sondaars teen Hom verdra het, sodat julle in jul siele nie vermoeid word en verslap nie” (Hebreërs 12:1-3). Pleks van die huweliksbootjie te laat sink, sal die wyse persoon aan maniere dink om enige skade te herstel sodat die huwelik behoue kan bly, en hy sodoende die valstrikke van verraderlikheid en valsheid kan vermy.—Job 24:15.
18. (a) Waarom is verraderlikheid nie ’n woord wat te sterk is om owerspel te beskryf nie? (b) Hoe beskou God die vervulling van ’n gelofte?
18 Is verraderlikheid, wat verraad is, ’n woord wat te sterk is om in verband met onsedelikheid te gebruik? Verraad is die skending van vertroue. Die huweliksgelofte behels tog sekerlik vertroue en ’n belofte om jou maat lief te hê en te koester, deur dik en dun, deur goeie en slegte tye. Dit sluit iets in wat baie as ouderwets beskou vir die tye waarin ons lewe—’n mens se woord van eer wat in die huweliksgelofte gegee word. Om daardie vertroue te skend, is om ’n vorm van verraad teen ’n mens se huweliksmaat te pleeg. God se beskouing van geloftes word duidelik in die Bybel uiteengesit: “As jy ’n gelofte aan God gedoen het, stel nie uit om dit te betaal nie, want daar is geen welgevalle in dwase nie. Betaal wat jy belowe.”—Prediker 5:3.
19. In teenstelling waarmee verheug Satan hom wanneer ’n Getuie faal?
19 Daar moet geen twyfel hieroor bestaan nie. Net soos daar groot vreugde in die hemel is wanneer een sondaar gered word, so is daar groot vreugde op aarde onder Satan se hordes, sigbaar en onsigbaar, wanneer een van Jehovah se Getuies nie sy of haar onkreukbaarheid behou nie.—Lukas 15:7; Openbaring 12:12.
Versoekinge wat oor ons almal kom
20. Hoe kan ons versoeking weerstaan? (2 Petrus 2:9, 10).
20 Is onsedelikheid in sommige gevalle onvermydelik? Is die vlees en Satan so sterk dat Christene dit nie kan weerstaan en hulle onkreukbaarheid kan behou nie? Paulus moedig ons met hierdie woorde aan: “God is getrou, wat nie sal toelaat dat julle bo julle kragte versoek word nie; maar Hy sal saam met die versoeking ook die uitkoms gee, sodat julle dit sal kan verdra.” In vandag se wêreld sal ons versoeking nie heeltemal kan vermy nie, maar as ons ons in gebed tot God wend, sal ons beslis enige versoeking kan verduur en daaroor seëvier.—1 Korinthiërs 10:13.
21. Watter vrae sal in ons volgende studie beantwoord word?
21 Wat bied God ons om ons te help om versoekinge te verduur en daaroor te seëvier? Wat het ons elkeen nodig sodat ons ons huwelik, ons gesin sowel as die reputasie van Jehovah se naam en dié van die gemeente kan beskerm? Ons volgende artikel sal hierdie vrae bespreek.
[Voetnote]
a “‘Hoerery’ in die breë sin van die woord, en soos dit in Mattheüs 5:32 en 19:9 gebruik is, het dus klaarblyklik betrekking op ’n wye reeks onwettige of ongeoorloofde, buite-egtelike geslagsverhoudinge. Porneia [die Griekse woord wat in hierdie tekste gebruik word] behels die growwe onsedelike gebruik van ten minste een mens se geslagsorgaan (of organe) (hetsy op ’n natuurlike of ’n perverse manier); en daar moes ook ’n ander party by die onsedelikheid betrokke gewees het—’n mens van enige geslag of ’n dier” (Die Wagtoring, 1 Junie 1983, bladsy 28). Owerspel: “Vrywillige geslagsomgang tussen ’n getroude persoon en ’n maat wat nie die persoon se wettige man of vrou is nie.”—The American Heritage Dictionary of the English Language.
b Daar sal natuurlik gepaste geleenthede wees wanneer ’n broer ’n suster êrens heen moet neem, en sulke situasies moet nie verkeerd vertolk word nie.
Kan jy onthou?
◻ Wat is van die faktore wat help om ’n huwelik te versterk?
◻ Waarom moet ons die wêreld se beskouing van sedelikheid verwerp?
◻ Wat is sommige versoekinge en situasies wat tot onsedelikheid kan lei?
◻ Wat is die vernaamste sleutel om sonde te weerstaan?
◻ Hoe help God ons in tye van versoeking?
[Venster op bladsy 14]
FAKTORE WAT HUWELIKE LAAT HOU
◻ Nougesette handhawing van Bybelbeginsels
◻ Albei huweliksmaats het ’n hegte verhouding met Jehovah
◻ Die man respekteer sy vrou, haar gevoelens en haar sienswyse
◻ Goeie kommunikasie op ’n daaglikse basis
◻ Soek maniere om mekaar te behaag
◻ ’n Humorsin; moet vir jouself kan lag
◻ Erken jou foute vryelik; vergewe vryelik
◻ Moenie die romantiese sy van die huwelik verwaarloos nie
◻ Wees verenig in die wyse waarop kinders grootgemaak en gedissiplineer word
◻ Gereelde, verenigde gebed tot Jehovah
NEGATIEWE FAKTORE WAT DIE HUWELIK ONDERMYN
◻ Selfsug en hardkoppigheid
◻ Huweliksmaats doen nie dinge saam nie
◻ Swak kommunikasie
◻ Gebrek aan oorlegpleging tussen die huweliksmaats
◻ Swak hantering van geldsake
◻ Verskillende maatstawwe in die manier waarop kinders en/of stiefkinders behandel word
◻ Man werk laat of verwaarloos gesin om na ander verpligtinge om te sien
◻ Versuim om na gesin se geestelike behoeftes om te sien
[Prent op bladsy 15]
Wanneer die huwelik eerbaar bly, lei dit tot blywende geluk