“Wandel soos kinders van die lig”
“En julle met die nuwe persoonlikheid moet beklee, wat na God se wil geskep is in ware regverdigheid en lojaliteit.”—EFESIËRS 4:24, NW.
1. Waarmee word aanbidders van Jehovah geseën? Waarom?
JEHOVAH GOD is “die Vader van die hemelse ligte”, en “geen duisternis is in Hom nie” (Jakobus 1:17, NW; 1 Johannes 1:5). Sy Seun, Jesus Christus, het van homself gesê: “Ek is die lig van die wêreld; wie My volg, sal sekerlik nie in die duisternis wandel nie, maar sal die lig van die lewe hê” (Johannes 8:12). Ware aanbidders van Jehovah, die volgelinge van sy Seun, word derhalwe met verligting geseën—verstandelike, sedelike en geestelike verligting—en hulle “skyn soos ligte in die wêreld”.—Filippense 2:15.
2. Watter teenstelling tussen God se volk en die wêreld is voorspel?
2 Die profeet Jesaja is lank gelede geïnspireer om die volgende teenstelling te voorspel: “Want kyk, die duisternis sal die aarde oordek en donkerheid die volke; maar oor jou sal die HERE opgaan, en sy heerlikheid sal oor jou gesien word.” Trouens, daar word gesê dat alle mense wat van God vervreemd is onder die mag en invloed van “die wêreldheersers van die duisternis” is.—Jesaja 60:2; Efesiërs 6:12.
3. Om watter redes stel ons besonder belang in Paulus se tydige raad?
3 Die apostel Paulus was baie besorg daaroor dat sy mede-Christene vry van sulke duisternis moes bly. Hy het hulle aangespoor om ‘nie langer te bly wandel soos die nasies ook wandel nie’, maar dat hulle ‘soos kinders van die lig moet wandel’ (Efesiërs 4:17, NW; 5:8). Hy het ook verduidelik hoe hulle dit kon regkry. Vandag het die duisternis en donkerheid wat die nasies oordek al hoe digter geword. Die wêreld het al hoe dieper in die moeras van sedelike en geestelike verval weggesink. Aanbidders van Jehovah is gevolglik in ’n stryd gewikkel wat al hoe moeiliker word. Daarom stel ons besonder baie belang in wat Paulus gesê het.
Leer omtrent die Christus
4. Wat het Paulus in gedagte gehad toe hy gesê het: “Julle het Christus nie so leer ken nie”?
4 Nadat Paulus die vrugtelose strewes en onreinheid van die wêreld beskryf het, het hy sy aandag weer op sy mede-Christene in Efese toegespits. (Lees asseblief Efesiërs 4:20, 21.) Paulus het ongeveer drie jaar in daardie stad deurgebring terwyl hy gepreek en mense geleer het, en hy moes baie in die gemeente persoonlik geken het (Handelinge 20:31-35). Toe hy dus gesê het: “Julle het Christus nie so leer ken nie”, het hy uit sy persoonlike kennis gespreek dat die Efesiese Christene nie die een of ander permissiewe, afgewaterde weergawe van die waarheid geleer is wat die walglike wangedrag vergoeilik het wat hy in verse 17 tot 19 beskryf het nie. Hy het geweet dat hulle die ware Christelike lewenswyse, soos Jesus Christus dit uitgeleef het, op ’n behoorlik en noukeurige wyse geleer is. Daarom het hulle nie langer in die duisternis gewandel soos die nasies gewandel het nie, maar hulle was kinders van die lig.
5. Watter verskil is daar om oppervlakkig in die waarheid te wees en om die waarheid in ons te hê?
5 Hoe belangrik is dit dan tog om ‘Christus te leer ken’ op die behoorlike wyse! Is daar verkeerde maniere waarop ons die Christus kan leer ken? Ja, gewis. Paulus het die broers vroeër in Efesiërs 4:14 vermaan: “Sodat ons nie meer kinders sou wees nie wat soos golwe geslinger en heen en weer gedryf word deur elke wind van lering, deur die bedrieëry van die mense, deur sluheid om listiglik tot dwaling te bring.” Daar was klaarblyklik sommige wat omtrent die Christus geleer het, maar wat steeds in die weë van die wêreld gewandel het en selfs probeer het om ander te oorreed om dit te doen. Kan ons hieruit sien hoe gevaarlik dit is om net in die waarheid te wees, soos sommige dit uitdruk, in plaas daarvan om die waarheid in ons te hê? In Paulus se dag is diegene wat net ’n oppervlakkige begrip gehad het maklik en gou deur ander beïnvloed, en dieselfde geld vandag. Om te keer dat dit gebeur, het Paulus verder gesê dat die Efesiërs ‘Christus moes hoor en deur middel van Jesus onderrig moes word’.—Efesiërs 4:21.
6. Hoe kan ons vandag van die Christus leer, hom hoor en deur hom onderrig word?
6 Die uitdrukkings “leer ken”, “gehoor het” en “onderrig is” wat deur Paulus gebruik is, sinspeel op ’n proses van studie en onderrigting, soos op skool. Ons kan natuurlik nie vandag direk van Jesus self hoor, leer of deur hom onderrig word nie. Maar hy rig ’n wêreldomvattende Bybelonderrigtingskampanje deur middel van sy “getroue en verstandige dienskneg” (Mattheüs 24:45-47; 28:19). Ons kan op ’n behoorlike en noukeurige wyse ‘Christus leer ken’ as ons gereeld die tydige geestelike voedsel inneem wat deur die diensknegklas voorsien word, dit ywerig en deeglik bestudeer, hetsy persoonlik of in ’n gemeente, daaroor peins en toepas wat ons leer. Kom ons maak seker dat ons ten volle van al die voorsienings gebruik maak sodat ons waarlik kan sê dat ons “Hom gehoor het en in [“deur middel van”, NW] Hom onderrig is”.
7. Watter betekenis kan Paulus se woorde, “die waarheid is in Jesus” inhou?
7 Dit is interessant dat Paulus, nadat hy in Efesiërs 4:21 die leerproses beklemtoon het, bygevoeg het: “Soos die waarheid is in Jesus”. Sommige Bybelgeleerdes vestig die aandag op die feit dat Paulus selde net die persoonlike naam Jesus in sy geskrifte gebruik het. Trouens, dit is die enigste keer dat dit só in die brief aan die Efesiërs gebruik is. Is daar enige besondere betekenis hieraan verbonde? Miskien het Paulus die aandag gevestig op die voorbeeld wat deur Jesus as mens gestel is. Onthou dat Jesus eenkeer van homself gesê het: “Ek is die weg en die waarheid en die lewe” (Johannes 14:6; Kolossense 2:3). Jesus het gesê: “Ek is . . . die waarheid” omdat hy dit nie net gepraat en geleer het nie, maar dit uitgeleef en verpersoonlik het. Ja, die ware Christelike godsdiens is nie net ’n begrip nie, maar ’n lewenswyse. Om ‘Christus te leer ken’, sluit in dat ons leer om hom na te volg deur die waarheid uit te leef. Volg jy Jesus in jou lewe na? Volg jy daagliks sy voetstappe noukeurig? Slegs as ons dit doen, kan ons as kinders van die lig bly wandel.
‘Lê die ou persoonlikheid af’
8. Watter illustrasie het Paulus in Efesiërs 4:22, 24 gebruik, en waarom is dit gepas?
8 Om te toon hoe ons met welslae ‘Christus kan leer ken’ en as kinders van die lig kan wandel, het Paulus verder in Efesiërs 4:22-24 gesê dat daar drie bepaalde stappe is wat ons moet volg. Die eerste een is: “Dat julle, wat die vorige lewenswandel betref, die oue mens [“ou persoonlikheid”, NW] moet aflê wat deur die begeerlikhede van die verleiding [“bedrieglike begeerte”, NW] te gronde gaan” (Efesiërs 4:22). Die uitdrukkings “aflê” (“uittrek”, Kingdom Interlinear) en “beklee” (vers 24) laat ’n mens dink aan ’n kledingstuk wat jy uit- en aantrek. Dit is beeldspraak wat Paulus dikwels gebruik en dit is doeltreffend (Romeine 13:12, 14; Efesiërs 6:11-17; Kolossense 3:8-12; 1 Thessalonicense 5:8). Wanneer ons klere vuil of gevlek raak, soos tydens ’n maaltyd, trek ons by die eerste geleentheid wat ons het iets anders aan. Behoort ons nie net so besorg te wees oor enige verontreiniging van ons geestelike toestand nie?
9. Hoe lê ’n mens die ou persoonlikheid af?
9 Hoe lê ’n mens dan die ou persoonlikheid af? In die oorspronklike taal is die werkwoord “aflê” in wat die onbepaalde verlede tyd genoem word. Dit dui op iets wat net een keer of eens en vir altyd gedoen word. Dit toon dat die “oue mens” saam met ons “vorige lewenswandel” met ’n besliste en doelgerigte handeling, deeglik en heeltemal, afgelê moet word. Dit is nie iets waaroor ons lank kan nadink of selfs oor kan huiwer nie. Waarom nie?
10. Waarom moet ons die ou persoonlikheid doelgerig en beslis aflê?
10 Die uitdrukking “te gronde gaan”, toon dat “die oue mens” hom in ’n voortdurende en progressiewe proses van sedelike verslegting, van kwaad tot erger, bevind. Die hele mensdom is in werklikheid op ’n afdraande pad omdat hulle geestelike verligting verwerp. Paulus het gesê dit is die gevolg van die “begeerlikhede van die verleiding”, oftewel “bedrieglike begeerte”. Vleeslike begeertes is bedrieglik omdat hulle dalk skadeloos lyk, maar hulle is op die lange duur noodlottig (Hebreërs 3:13). As hulle nie beteuel word nie, is die uiteinde verontreiniging en die dood (Romeine 6:21; 8:13). Daarom moet die ou persoonlikheid afgelê word, doelgerig en heeltemal afgestroop word, soos ’n mens ’n ou, vuil kledingstuk uittrek.
’n Nuwe “gees van die verstand”
11. Waar moet geestelike vernuwing begin?
11 Iemand wat uit ’n modderplas opstaan, moet nie net sy vuil klere uittrek nie, maar hom ook deeglik was voordat hy vars en skoon klere aantrek. Dit is presies wat Paulus as die tweede stap tot geestelike verligting uiteensit: “Dat julle nuut gemaak moet word in die krag wat julle verstand aandryf” (Efesiërs 4:23, NW). Soos hy vroeër in verse 17 en 18 getoon het, wandel die nasies “in die vrugteloosheid van hulle verstand” en is hulle “verstandelik in die duisternis”. Dit is logies dat dit die verstand, die setel van insig en begrip, is waar die vernuwing moet begin. Hoe kan dit gedoen word? Paulus het verduidelik dat dit moontlik is as ons die krag wat ons verstand aandryf nuut maak. Wat is hierdie krag?
12. Wat is die krag wat die verstand aandryf?
12 Is die krag wat ons verstand aandryf, en waarna Paulus verwys, die heilige gees? Nee. Die uitdrukking “die krag wat julle verstand aandryf”, beteken letterlik “die gees van julle verstand”. Nêrens in die Bybel word daar van God se heilige gees gepraat asof dit aan ’n mens of ’n deel van ’n mens behoort nie. Die woord “gees” beteken “asem”, maar dit word ook in die Bybel gebruik om “die krag aan te dui wat maak dat ’n mens ’n sekere gesindheid, neiging of emosie toon of ’n sekere handelwyse of weg inslaan” (Insight on the Scriptures, Deel 2, bladsy 1026). “Die gees van die verstand” is dus die krag wat ons verstand, ons eie verstandelike gesindheid en neiging, aanwakker of aandryf.
13. Waarom moet ons verstandelike gesindheid nuut gemaak word?
13 Die natuurlike gesindheid en neiging van die onvolmaakte verstand is tot fisiese, vleeslike en materialistiese dinge (Prediker 7:20; 1 Korinthiërs 2:14; Kolossense 1:21; 2:18). Selfs al lê iemand die ou persoonlikheid met sy slegte gebruike af, sal sy sondige verstandelike gesindheid, as dit nie verander word nie, hom kort voor lank beweeg om terug te keer na dinge wat hy afgelê het. Is dit nie die ondervinding van baie wat byvoorbeeld probeer ophou om te rook, drink of ander slegte gebruike probeer aflê nie? As hulle hulle glad nie inspan om nuut gemaak te word in die krag wat hulle verstand aandryf nie, is dit amper onvermydelik dat hulle sal terugval. Enige ware verandering moet ’n deeglike vernuwing van die verstand insluit.—Romeine 12:2.
14. Hoe kan die krag wat die verstand aandryf, vernuwe word?
14 Hoe vernuwe ’n mens dan daardie krag sodat dit ’n mens se verstand in die regte rigting sal laat neig? Die werkwoord “nuut gemaak word” in die Griekse teks is in die teenwoordige tyd, wat ononderbroke optrede uitdruk. Die krag wat die verstand aandryf, kan dus vernuwe word as ons aanhou om God se Woord van waarheid te bestudeer en oor die betekenis daarvan te peins. Wetenskaplikes deel ons mee dat ons in ons brein inligting in die vorm van gekodeerde elektriese of chemiese impulse het wat van neuron tot neuron beweeg en verbindings oorbrug wat sinapse genoem word. “Die een of ander geheue word in die senusinapse geskep wanneer die gekodeerde impuls daardeur beweeg, en dit laat sy individuele afdruk agter”, sê die boek The Brain. Wanneer dieselfde impuls volgende keer deurbeweeg, herken die senuselle dit en reageer vinniger daarop. Mettertyd skep dit ’n nuwe denkpatroon in die individu. Namate ons voortdurend opbouende geestelike inligting inneem, word ’n nuwe denkpatroon opgebou en die krag wat ons verstand aandryf, word nuut gemaak.—Filippense 4:8.
‘Beklee julle met die nuwe persoonlikheid’
15. In watter sin is die nuwe persoonlikheid nuut?
15 Paulus het ten laaste gesê: “[Beklee] julle met die nuwe persoonlikheid . . . wat na God se wil geskep is in ware regverdigheid en lojaliteit” (Efesiërs 4:24, NW). Ja, ’n Christen beklee hom met ’n nuwe persoonlikheid. “Nuwe” verwys hier nie na tyd nie, maar na gehalte. Dit wil sê, dit is nie nuut in die sin dat dit die nuutste vorm is nie. Dit is ’n heeltemal nuwe, vars persoonlikheid “wat na God se wil geskep is”. In Kolossense 3:10 het Paulus soortgelyke taal gebruik en gesê dat dit “vernuwe word . . . na die beeld van sy Skepper”. Hoe ontstaan hierdie nuwe persoonlikheid?
16. Waarom kan daar gesê word dat die nuwe persoonlikheid “na God se wil geskep is”?
16 Jehovah God het die eerste mensepaar, Adam en Eva, na Sy beeld en gelykenis geskep. Hulle is met sedelike en geestelike eienskappe toegerus wat hulle van die diereskepping onderskei en ver bo die diereskepping verhef het (Genesis 1:26, 27). Selfs al het hulle opstand die hele mensdom in sonde en onvolmaaktheid gedompel, het ons, as Adam se nakomelinge, steeds die vermoë om sedelike en geestelike eienskappe te toon. Dit is God se wil dat diegene wat geloof in die losprysoffer beoefen die ou persoonlikheid moet aflê en “die vryheid van die heerlikheid van die kinders van God” geniet.—Romeine 6:6; 8:19-21; Galasiërs 5:1, 24.
17. Waarom is regverdigheid en lojaliteit uitsonderlike eienskappe van die nuwe persoonlikheid?
17 Ware regverdigheid en lojaliteit is die twee eienskappe wat deur Paulus uitgesonder word as kenmerkend van die nuwe persoonlikheid. Dit beklemtoon verder dat die nuwe persoonlikheid nuut gemaak word volgens die beeld van die Een wat dit geskep het. Psalm 145:17 sê vir ons: “Die HERE is regverdig in al sy weë en goedgunstig [“lojaal”, NW] in al sy werke.” En Openbaring 16:5 sê die volgende oor Jehovah: “U, die Een wat is en wat was, die Lojale, u is regverdig” (NW). Waarlik, regverdigheid en lojaliteit is noodsaaklike eienskappe as ons ooreenkomstig die feit wil lewe dat ons na God se beeld geskep is en sy heerlikheid moet weerspieël. Laat ons soos Sagaria, die vader van Johannes die Doper, wees wat deur heilige gees beweeg is om God te loof omdat Hy sy volk “die voorreg verleen het om onbevrees heilige diens voor hom te verrig met lojaliteit en regverdigheid”.—Lukas 1:74, 75, NW.
‘Bly wandel soos kinders van die lig’
18. Hoe het Paulus ons gehelp om die wêreld se weë te sien soos hulle werklik is?
18 Noudat ons Paulus se woorde in Efesiërs 4:17-24 uitvoerig bespreek het, het ons baie om oor na te dink. In verse 17 tot 19 het Paulus ons gehelp om die wêreld se weë te sien soos hulle werklik is. Diegene wat nog in die wêreld is, het hulle van die ware bron van die lewe afgesny omdat hulle die kennis van God verwerp het en hulle hart teenoor hom verhard het. Hulle strewes is gevolglik sonder ’n ware doel of rigting en lei op die ou end tot dwaasheid en vrugteloosheid. Hulle sink al hoe dieper weg in ’n moeras van sedelike en geestelike verval. Wat ’n treurige situasie! En wat ’n kragtige rede gee dit ons om vasbeslote te wees om as kinders van die lig te bly wandel!
19. Watter aanmoediging gee Paulus laastens sodat ons as kinders van die lig kan bly wandel?
19 Toe het Paulus in verse 20 en 21 die belangrikheid daarvan beklemtoon dat ons die waarheid in alle erns ons eie moet maak omdat ons nie net in die waarheid moet wees nie, maar dit moet uitleef soos Jesus gedoen het. Laastens, in verse 22 tot 24 het hy ons vermaan om die ou persoonlikheid af te lê en ons met die nuwe te beklee—op ’n doelgerigte en besliste wyse. Intussen moet ons ons verstandelike gesindhede steeds in ’n gesonde, geestelike rigting rig. Ons moet ons bowenal tot Jehovah om hulp wend sodat ons as kinders van die lig kan bly wandel. “Want God wat gesê het dat daar uit duisternis lig moet skyn—dit is Hy wat in ons harte geskyn het om die verligting te bring van die kennis van die heerlikheid van God in die aangesig van Jesus Christus.”—2 Korinthiërs 4:6.
Kan jy onthou?
◻ Hoe kan ons vandag ‘Christus leer ken’?
◻ Waarom moet die ou persoonlikheid op ’n doelgerigte wyse afgelê word?
◻ Wat is die krag wat die denke aandryf, en hoe word dit nuut gemaak?
◻ Watter eienskappe is kenmerkend van die nuwe persoonlikheid?
[Prent op bladsy 15]
Jesus het gesê: “Ek is die weg en die waarheid en die lewe”
[Prent op bladsy 16]
‘Lê die ou persoonlikheid met sy werke af’—toorn, woede, boosheid, laster, skandelike taal en leuens.—Kolossense 3:8, 9, NW
[Prent op bladsy 17]
“[Beklee] julle met die nuwe persoonlikheid . . . wat na God se wil geskep is in ware regverdig- heid en lojaliteit.”—Efesiërs 4:24, NW