Wie volg die lig van die wêreld?
“Julle skyn soos ligte in die wêreld.”—FILIPPENSE 2:15.
1. Wat sê die Bybel oor valse godsdiensligte?
DIE Bybel identifiseer Jesus duidelik as “’n groot lig”, “die lig van die wêreld” (Jesaja 9:1; Johannes 8:12). Maar betreklik min mense het hom gevolg toe hy op aarde was. Die meerderheid het verkies om valse ligte te volg, wat in werklikheid draers van duisternis was. God se Woord sê van hulle: “Sulke mense is valse apostels, bedrieglike arbeiders wat hulleself verander in apostels van Christus. En geen wonder nie! Want die Satan self verander hom in ’n engel van die lig. Dit is dus niks besonders wanneer sy dienaars hulle ook voordoen as dienaars van geregtigheid nie. Maar hulle einde sal wees volgens hulle werke.”—2 Korinthiërs 11:13-15.
2. Wat sou volgens Jesus se woorde die grondslag wees waarop mense geoordeel sou word?
2 Al is die lig so wonderlik, wil nie alle mense dit hê nie. Jesus het gesê: “Dit is die oordeel: dat die lig in die wêreld gekom het, en die mense het die duisternis liewer gehad as die lig; want hulle werke was boos. Want elkeen wat kwaad doen, haat die lig en kom nie na die lig nie, dat sy werke nie bestraf mag word nie.”—Johannes 3:19, 20.
Liefhebbers van die duisternis
3, 4. Hoe het die godsdiensleiers in Jesus se dag getoon dat hulle nie die lig wou volg nie?
3 Kom ons kyk hoe dit die geval was toe Jesus op aarde was. God het Jesus die krag gegee om opwindende wonderwerke te doen om bewys te lewer dat hy die Messias is. Hy het byvoorbeeld op ’n Sabbat ’n blindgebore man laat sien. Wat ’n wonderlike daad van barmhartigheid! Hoe dankbaar was die man tog nie! Hy kon vir die heel eerste keer in sy lewe sien! Maar hoe het die godsdiensleiers hierop gereageer? Johannes 9:16 deel ons mee: “Sommige van die Fariseërs sê [oor Jesus]: Hierdie man kom nie van God nie, omdat Hy die sabbat nie hou nie.” Hoe verdorwe was hulle harte tog! Hier het ’n wonderlike genesing plaasgevind, maar pleks van bly te wees saam met die man wat blind was en waardering te toon vir die geneser, het hulle Jesus veroordeel! Deur hulle optrede het hulle waarskynlik teen die werking van God se heilige gees gesondig, ’n onvergeeflike sonde.—Mattheüs 12:31, 32.
4 Toe daardie huigelaars die man wat blind was later oor Jesus uitgevra het, het die man gesê: “Hierin is tog iets wonderliks dat julle nie weet van waar Hy [Jesus] is nie, en Hy het my oë geopen! En ons weet dat God nie sondaars verhoor nie; maar as iemand godvresend is en sy wil doen, dié verhoor Hy. Van ouds af is dit nie gehoor dat iemand die oë van ’n blindgebore mens geopen het nie. As Hy [Jesus] nie van God was nie, sou Hy niks kon doen nie.” Wat was die godsdiensleiers se reaksie hierop? “Hulle antwoord en sê vir hom: Jy is heeltemal in sondes gebore, en leer jy ons? En hulle het hom uitgeban.” Wat ’n gebrek aan medelye! Hulle harte was van klip. Daarom het Jesus vir hulle gesê dat hulle geestelik heeltemal blind was al kon hulle met hulle fisiese oë sien.—Johannes 9:30-41.
5, 6. Wat het die eerste-eeuse godsdiensleiers gedoen wat getoon het dat hulle die duisternis liefgehad het?
5 Dat hierdie godsdienshuigelaars teen God se gees gesondig het, blyk duidelik uit ’n ander geleentheid toe Jesus Lasarus uit die dood opgewek het. As gevolg van daardie wonderwerk het baie van die gewone mense geloof in Jesus gestel. Maar let op wat die godsdiensleiers gedoen het. “Die owerpriesters en die Fariseërs het die Raad byeengeroep en gesê: Wat sal ons doen?—want hierdie man doen baie tekens. As ons Hom so laat begaan, sal almal in Hom glo; en die Romeine sal kom en ons land en ons nasie albei afneem” (Johannes 11:47, 48). Hulle was bekommerd oor hulle posisie en aansien. Hulle wou die Romeine, en nie God nie, tot elke prys tevrede stel. Wat het hulle dus gedoen? “Van dié dag af het hulle toe saam beraadslaag om Hom [Jesus] om die lewe te bring.”—Johannes 11:53.
6 Was dit al? Nee. Wat hulle vervolgens gedoen het, toon hoe lief hulle die duisternis gehad het: “Die owerpriesters het besluit om Lasarus ook om die lewe te bring, omdat baie van die Jode deur hom weggegaan en in Jesus geglo het” (Johannes 12:10, 11). Watter ongelooflike boosheid! Wat het gebeur ondanks al hulle pogings om hulle posisies te beskerm? In daardie selfde geslag het hulle teen die Romeine in opstand gekom, en die Romeine het in 70 G.J. teen hulle opgetrek en hulle land, hulle nasie sowel as hulle lewe geneem!—Jesaja 5:20; Lukas 19:41-44.
Jesus se medelye
7. Waarom het liefhebbers van die waarheid na Jesus toe gestroom?
7 In ons tyd wil ook nie almal geestelike lig hê nie. Maar diegene wat die waarheid liefhet, sal na die lig toe kom. Hulle wil God as hulle Soewerein hê en hulle wend hulle gretig tot Jesus, die een wat God gestuur het om vir hulle te verduidelik wat die lig is, en hulle volg hom. Dit is wat nederige mense gedoen het toe Jesus op aarde was. Hulle het na hom toe gestroom. Selfs die Fariseërs moes dit erken. Hulle het gekla: “Die hele wêreld loop agter Hom aan” (Johannes 12:19). Skaapgeaarde mense het Jesus liefgehad omdat hy anders was as daardie selfsugtige, magsbehepte godsdiensleiers van wie Jesus gesê het: “Hulle bind pakke saam wat swaar en moeilik is om te dra, en sit dit op die skouers van die mense, maar self wil hulle dit nie met hulle vinger verroer nie. En hulle doen al hul werke om deur die mense gesien te word.”—Mattheüs 23:4, 5.
8. Watter gesindheid het Jesus in teenstelling met dié van die godsdienshuigelaars getoon?
8 Let in teenstelling hiermee op na Jesus se medelydende gesindheid: “Toe Hy die skare sien, het Hy innig jammer gevoel vir hulle, omdat hulle moeg en uitgeput was, soos skape wat geen herder het nie” (Mattheüs 9:36). En wat het hy daaromtrent gedoen? Hy het aan diegene wat deur Satan se stelsel uitgebuit is, gesê: “Kom na My toe, almal wat vermoeid en belas is, en Ek sal julle rus gee. Neem my juk op julle en leer van My, want Ek is sagmoedig en nederig van hart, en julle sal rus vind vir julle siele; want my juk is sag en my las is lig” (Mattheüs 11:28-30). Jesus het gedoen wat in Jesaja 61:1, 2 van hom voorspel is, en dit lees: “Die Gees van die Here HERE is op My, omdat die HERE My gesalf het om ’n blye boodskap te bring aan die ootmoediges; Hy het My gestuur om te verbind die gebrokenes van hart, om vir die gevangenes ’n vrylating uit te roep en vir die geboeides opening van die gevangenis; om uit te roep ’n jaar van die welbehae van die HERE en ’n dag van die wraak van onse God; om al die treurendes te troos.”
Die ligdraers word ingesamel
9. Watter belangrike gebeurtenis het in 1914 plaasgevind?
9 Ná sy hemelvaart moes Jesus wag tot die tyd aangebreek het dat God vir hom Koninkryksmag gee. Dan sou hy “die skape” van “die bokke” afskei (Mattheüs 25:31-33; Psalm 110:1, 2). Daardie tyd het aangebreek toe “die laaste dae” in 1914 begin het (2 Timotheüs 3:1-5). Jesus, gekroon as die Koning van God se hemelse Koninkryk, het diegene wat die lig wou volg tot sy regterhand van guns versamel. Daardie insamelingswerk het ná die Eerste Wêreldoorlog teen ’n versnelde tempo voortgegaan.
10. Watter vraag kan gevra word oor diegene wat Jesus vir die insamelingswerk gebruik?
10 Onder die leierskap van Christus Jesus is die insamelingswerk met groot sukses bekroon. Daar was nog nooit in die geskiedenis soveel mense uit alle nasies wat tot verligte ware aanbidding versamel is nie. En wie volg vandag die lig wat van God en Christus af kom? Wie “skyn soos ligte in die wêreld”, soos Filippense 2:15 sê, en nooi ander om te ‘kom en die water van die lewe te neem, verniet’?—Openbaring 22:17.
11. Wat is die Christendom se toestand wat geestelike lig betref?
11 Doen die Christendom dit? Die Christendom met sy verdelende godsdienste skyn beslis nie as ’n lig nie. Trouens, die geestelikes is net soos die godsdiensleiers van Jesus se dag. Hulle weerkaats nie die ware lig wat van God en Christus af kom nie. Drie-en-dertig jaar gelede het die tydskrif Theology Today gesê: “Tot ons spyt moet ons erken dat hierdie lig nie met besondere helderheid in die Kerk skyn nie. . . . Die Kerk het al hoe meer soos die gemeenskappe om hom geword. Hy is nie soseer die lig van die wêreld as wat hy eerder ’n weerkaatser is van die ligte wat in die wêreld skyn nie.” En die Christendom se toestand is vandag selfs erger. Die sogenaamde lig van die wêreld wat deur die Christendom weerkaats word, is in werklikheid duisternis omdat dit al is wat Satan en sy wêreld kan gee. Nee, daar kom geen lig van waarheid van die strydende en heeltemal wêreldse godsdienste van die Christendom af nie.
12. Wie is vandag die ware ligdraende organisasie?
12 Daar kan met oortuiging gesê word dat die nuwewêreld-gemeenskap van Jehovah se Getuies vandag die ware, ligdraende organisasie is. In eenheid laat al sy lede—manne, vroue en jongmense—hulle lig wat van Jehovah en Christus af kom voor al die mense skyn. Verlede jaar het ver oor die viermiljoen ligdraers, in amper 70 000 gemeentes van Jehovah se Getuies in alle wêrelddele, ander ywerig van God en sy voornemens vertel. En ons sien nou elke jaar ’n geweldige insameling van mense wat geestelik verlig wil wees. Honderdduisende word gedoop nadat hulle die Bybel bestudeer het en tot ’n juiste kennis van die waarheid gekom het. Dit is inderdaad God se wil “dat alle mense gered word en tot kennis [“juiste kennis”, NW] van die waarheid kom”.—1 Timotheüs 2:4.
13. Waarmee kan ons die lig vergelyk wat van Jehovah af kom?
13 Ons kan die lig wat vandag van Jehovah af kom, vergelyk met wat gebeur het toe God se eertydse volk Egipte verlaat het: “Die HERE het voor hulle uit getrek, bedags in ’n wolkkolom om hulle op die pad te lei, en snags in ’n vuurkolom om hulle voor te lig, sodat hulle dag en nag kon trek. Die wolkkolom het nie bedags en die vuurkolom nie snags voor die volk gewyk nie” (Exodus 13:21, 22). Die wolk bedags en die vuur snags was betroubare wegwysers van God. Hulle was so betroubaar soos die son wat God geskep het om vir ons in die dag lig te gee. Daarom kan ons ook op Jehovah vertrou om die weg geestelik gesproke vir waarheidsoekers in hierdie bose laaste dae te verlig. Spreuke 4:18 verseker ons: “Die pad van die regverdiges is soos die lig van die môreglans, wat al helderder word tot die volle dag toe.”
Hulle weerkaats die Koninkrykslig
14. Wat moet ligdraers se hoofdoel wees?
14 Hoewel Jehovah die Bron van lig en Christus die Hoofweerkaatser van daardie lig is, moet Jesus se volgelinge ook daardie lig weerkaats. Hy het van hulle gesê: “Julle is die lig van die wêreld. . . . Laat julle lig só skyn voor die mense, dat hulle julle goeie werke kan sien en julle Vader wat in die hemele is, verheerlik” (Mattheüs 5:14, 16). En wat was die hooftema van hierdie lig wat sy volgelinge voor die mense moes laat skyn? Wat moes hulle ander tydens hierdie klimaks van die wêreldgeskiedenis leer? Jesus het nie gesê dat sy volgelinge demokrasie, diktatorskap, vereniging van Kerk en Staat of enige ander wêreldse ideologie sou verkondig nie. Hy het eerder in Mattheüs 24:14 voorspel dat, ondanks wêreldwye teenstand, “hierdie evangelie van die koninkryk verkondig [sal] word in die hele wêreld tot ’n getuienis vir al die nasies; en dan sal die einde kom”. Gevolglik vertel die hedendaagse ligdraers ander van God se Koninkryk, wat ’n einde aan Satan se wêreld gaan maak en die regverdige nuwe wêreld gaan inlui.—1 Petrus 2:9.
15. Waarheen sal diegene wat die lig wil hê hulle wend?
15 Diegene wat die lig liefhet, sal hulle nie deur hierdie wêreld se sogenaamde prestasies en doelwitte van stryk laat bring nie. Al daardie sogenaamde prestasies en oogmerke sal binnekort verdwyn, want hierdie wêreld nader sy einde. Liefhebbers van geregtigheid sal hulle eerder tot die goeie nuus wend wat verkondig word deur diegene wat die lig van God se Koninkryk tot in die uithoeke van die aarde laat skyn. Dit is hulle van wie Openbaring hoofstuk 7:9, 10 voorspel het: “Ek [het] gesien, en kyk, daar was ’n groot menigte wat niemand kon tel nie, uit alle nasies en stamme en volke en tale; hulle het gestaan voor die troon [van God] en voor die Lam [Christus] . . . en hulle het met ’n groot stem geroep en gesê: Heil aan onse God wat op die troon sit, en aan die Lam!” Vers 14 sê: “Dit is hulle wat uit die groot verdrukking kom.” Ja, hulle oorleef die einde van hierdie wêreld en betree die eindelose nuwe wêreld onder God se Koninkryk.
Die lig van die nuwe wêreld
16. Wat sal met Satan se wêreld tydens die groot verdrukking gebeur?
16 Die nuwe wêreld sal in die helder lig van die waarheid gehul wees. Trouens, stel jou voor hoe dit sal wees die dag ná God hierdie stelsel van dinge vernietig het. Satan, sy demone en sy politieke, kommersiële en godsdiensstelsels—die laaste een van hulle—sal nie meer daar wees nie! Satan se hele propagandamasjinerie sal ook nie meer daar wees nie. Ná die groot verdrukking sal daar dus nooit weer ’n enkele koerant, tydskrif, boek, pamflet of traktaat gedruk word wat hierdie bose wêreld ondersteun nie. Die televisie of radio sal nie meer programme uitsaai wat ’n slegte invloed op mense het nie. Die hele verderflike milieu van Satan se wêreld sal met een magtige slag uitgewis word!—Mattheüs 24:21; Openbaring 7:14; 16:14-16; 19:11-21.
17, 18. Hoe sal jy die geestelike milieu ná die einde van Satan se wêreld beskryf?
17 Wat ’n verligting sal dit tog nie wees nie! Van daardie dag af sal net heilsame, opbouende geestelike lig wat van Jehovah en sy Koninkryk af kom die mense beïnvloed. Jesaja 54:13 voorspel: “Al jou kinders sal deur die HERE geleer wees, en die vrede van jou kinders sal groot wees.” Met God se regering wat oor die hele aarde heers, is dit sy belofte, soos Jesaja 26:9 sê, dat ‘die inwoners van die wêreld geregtigheid sal leer’.
18 Die hele verstandelike en geestelike milieu sal onmiddellik ten goede verander. Opbouende dinge sal aan die orde van die dag wees, pleks van die ontmoedigende, onsedelike dinge wat nou so algemeen voorkom. Almal wat dan leef, sal die waarheid oor God en sy voornemens geleer word. Die profesie in Jesaja 11:9 sal dan ten volle vervul word waar dit sê: “Die aarde sal vol wees van die kennis van die HERE soos die waters die seebodem oordek.”
Uiters belangrik om die lig te volg
19, 20. Waarom moet diegene wat die lig volg op hulle hoede bly?
19 Dit is nou, in die laaste jare van hierdie bose stelsel, uiters belangrik om die lig van die wêreld te volg. En ons moet op ons hoede wees, want daar word ’n hewige stryd gevoer om te keer dat ons in die lig wandel. Hierdie teenstand kom van die magte van die duisternis—van Satan, sy demone en sy aardse organisasie. Dit is waarom die apostel Petrus waarsku: “Wees nugter en waaksaam, want julle teëstander, die duiwel, loop rond soos ’n brullende leeu en soek wie hy kan verslind.”—1 Petrus 5:8.
20 Satan sal enige hindernis in die weg lê van diegene wat met die lig in aanraking kom omdat hy hulle in die duisternis wil hou. Dit kan druk van familie of vorige vriende wees wat die waarheid teëstaan. Dit kan twyfelgedagtes oor die Bybel wees omdat ’n mens verblind is deur die leringe van valse godsdiens of die propaganda van ongelowige ateïste en agnostici. Dit kan ’n mens se eie sondige neigings wees wat dit moeilik maak om aan die goddelike vereistes te voldoen.
21. Wat moet almal doen wat in God se nuwe wêreld wil lewe?
21 Wil jy graag, ongeag die hindernisse wat daar mag wees, die lewe in ’n wêreld sonder armoede, misdaad, ongeregtigheid of oorlog geniet? Wil jy werklik volmaakte gesondheid en die ewige lewe op ’n paradysaarde geniet? Dan moet jy Jesus as die lig van die wêreld aanneem en volg, en na die boodskap luister van diegene wat aan “die woord van die lewe” vashou en wat “skyn soos ligte in die wêreld”.—Filippense 2:15, 16.
Hoe sou jy antwoord?
◻ Hoe toon godsdiensleiers dat hulle liefhebbers van die duisternis is?
◻ Watter gesindheid het Jesus teenoor mense betoon?
◻ Hoe het die insameling van ligdraers gevorder?
◻ Watter belangrike veranderinge gaan binnekort plaasvind?
◻ Waarom is dit uiters belangrik om vandag die lig van die wêreld te volg?
[Prent op bladsy 14, 15]
Die hardvogtige Fariseërs het die man wie se oë deur Jesus geopen is uit die tempel geban