Tonele uit die Beloofde Land

Sinai—berg van Moses en genade

WANNEER jy aan die berg Sinai dink, dink jy moontlik aan Moses. Waarom? Omdat Moses God se Wet op ’n berg in die Sinaïese Skiereiland ontvang het. Watter berg? Heel moontlik die een wat hierbo getoon word.a

Op die suidelike deel van die skiereiland, ongeveer halfpad tussen die inhamme van die Rooi See, is ’n rant met twee pieke. Die algemene ligging pas by die Bybelse verslae aangaande Moses. Die een piek word Jebel Musa genoem, wat “Berg van Moses” beteken.

Verskeie Bybelse verslae maak daardie naam heel gepas. Onthou jy dat Moses Jetro se kudde opgepas het toe ’n engel in ’n brandende bos verskyn het? Waar was dit? Die Bybel sê dat dit by “die berg van God, Horeb” was, wat ook die berg Sinai genoem word (Exodus 3:1-10; 1 Konings 19:8). Nadat Moses God se volk uit Egipte gelei het, het hy hulle hiernatoe gebring. Exodus 19:2, 3 sê dat “Israel . . . daar teenoor die berg laer opgeslaan [het]. Maar Moses het opgeklim na God toe, en die HERE het hom van die berg af toegeroep.”

Dit was die eerste keer dat Moses teen die berg Sinai opgeklim het, en hy het nie net ’n klein entjie teen die hange opgeloop nie. Ons lees: “Terwyl die HERE op die berg Sinai neerdaal, op die top van die berg, het die HERE Moses na die top van die berg geroep.”—Exodus 19:20.

Duisende hedendaagse toeriste het al met groot inspanning in die nag teen gemerkte paadjies uitgesukkel om die piek te bereik, gewag om die sonsopkoms te sien en dan weer teen twaalfuur afgeklim. Dit was nie die geval met Moses nie. God het vir hom gesê: “Klim op die berg na My toe en vertoef daar, dat Ek jou die kliptafels kan gee en die wet.” By daardie geleentheid ‘was Moses veertig dae en veertig nagte op die berg’.—Exodus 24:12-18.

Ons kan gevolglik verstaan waarom Moses se naam aan hierdie berg gekoppel word, maar waarom met “genade”? Wel, terwyl Moses op die berg was en die Wet ontvang het, het die mense op die vlakte daaronder (moontlik die Vlakte van er-Raha op die foto) dwaas opgetree. Hulle het druk op Moses se broer uitgeoefen om ’n god te maak. Aäron het gesê: “Ruk die goue ringe af . . . en bring dit vir my.” Gevolglik het hulle ’n goue kalf gemaak om te aanbid. Dit het die ware God toornig gemaak en tot die dood van duisende gelei (Exodus 32:1-35). Maar Aäron is genade betoon en hy is gered. Waarom?

God se woorde in Exodus 32:10 toon dat hy Aäron moontlik nie as die hoofaanstigter van Israel se verkeerde optrede beskou het nie. En toe die konfrontasie uitgebreek het, het “al die seuns van Levi” God se kant gekies, wat ongetwyfeld Aäron ingesluit het (Exodus 32:26). Ten spyte van Aäron se mate van skuld het hy dus aan die voet van die berg Sinai van God se genade ontvang.

Moses het later die begeerte uitgespreek om Jehovah beter te ken en Sy heerlikheid te sien (Exodus 33:13, 18). Hoewel dit vir Moses onmoontlik was om God se gesig te sien, het Jehovah hom van Sy heerlikheid gewys en beklemtoon dat Hy ‘genadig sal wees vir wie Hy genadig wil wees’ (Exodus 33:17–34:7). Dit was baie gepas dat God sy genade beklemtoon het, want die Bybel gebruik “genade” die meeste wanneer dit by God se handelinge met Israel kom, met wie hy by Sinai ’n verbond gesluit het.—Psalm 103:7-13, 18.

Besoekers wat die berg Sinai vandag besoek, tref ’n klooster aan die voet daarvan aan, wat ’n mens nouliks laat dink aan die ware aanbidding waarvan Moses bo op die berg geleer het. Die godsdiens in die klooster lê eerder klem op ikone. Die een wat hier getoon word, is “Die leer na die Paradys”. Dit is gegrond op ’n boek deur die Bisantynse monnik John Climacus. Nadat hy ongeveer 40 jaar in ’n kloostersel deurgebring het, het hy ab van die klooster geword en van ’n simboliese leer na die hemel geskryf. Maar let op dat party geestelikes uitgebeeld word waar demone hulle in ewige foltering in ’n helse vuur in aftrek. Aanskoulik, maar onskriftuurlik!—Prediker 9:5, 10; Jeremia 7:31.

In teenstelling met daardie valse leerstelling is die waarheid dat die Almagtige ’n “barmhartige en genadige God, lankmoedig en groot van goedertierenheid en trou” is (Exodus 34:6). Op die berg Sinai het Moses na aan hierdie genadige God gekom.

[Voetnoot]

[Foto-erkenning op bladsy 8]

Pictorial Archive (Near Eastern History) Est.

[Foto-erkenning op bladsy 9]

Pictorial Archive (Near Eastern History) Est.

[Foto-erkenning op bladsy 9]

Pictorial Archive (Near Eastern History) Est.