Vrae van lesers
Sal mense opgewek word as hulle nie nou die ware Christelike godsdiens aanvaar nie en voor die begin van die groot verdrukking sterf?
Dit is goed dat ons almal enige neiging weerstaan om as regters op te tree en besef dat dit uiteindelik Jehovah se oordeel deur middel van Jesus Christus is wat tel (Johannes 5:22; Handelinge 10:42; 2 Timotheüs 4:1). Maar die Skrif voorsien wel nuttige inligting in antwoord op die voorafgaande vraag.
Die wêreldwye verkondiging van die goeie nuus van God se Koninkryk is ’n lewensbelangrike aspek van ‘die teken van Jesus se teenwoordigheid’. Hierdie teken is sedert vroeg in hierdie eeu reeds duidelik te sien. Die predikingswerk het ’n skeiding van mense van alle nasies tot gevolg ter vervulling van Jesus se gelykenis van “die skape” en “die bokke”. Met die voltooiing van hierdie predikings- en skeidingswerk sal die “groot verdrukking” die einde van die huidige bose stelsel van dinge inlui.—Mattheüs 24:3, 21, 22, NW; 25:31-46.
Jehovah en sy Seun sal oordeel of iemand wat die Koninkryksboodskap verwerp en voor die aanvang van die groot verdrukking sterf onder die bokke klassifiseer. Jesus het gesê dat die bokke “sal weggaan in die ewige straf”. Daarom kan ons tot die gevolgtrekking kom dat diegene wat deur Goddelike beslissing bokke is nie ’n opstanding sal ontvang nie. Hulle het ’n soortgelyke oordeel as diegene wat tydens die groot verdrukking “die regterlike straf van ewige vernietiging ondergaan”.—2 Thessalonicense 1:9, NW.
Maar wat van diegene wat klaarblyklik nie voldoende met die Koninkryksboodskap kontak gehad het om ’n weloorwoë standpunt vir of teen die waarheid te kon inneem voor hulle gedurende hierdie “laaste dae” gesterf het nie?—2 Timotheüs 3:1.
Baie wat voor die groot verdrukking sterf terwyl die predikingswerk aan die gang is, sal klaarblyklik ’n opstanding kry. Dit word getoon deur wat ons aangaande die rit van die simboliese perderuiters in Openbaring 6:7, 8 lees. Baie mense het as slagoffers van oorloë, hongersnood en dodelike plae gesterf. Aangesien dit “Hades” is wat hierdie slagoffers van die “Dood” eis, sal hulle gedurende Christus se Duisendjarige Heerskappy opgewek word wanneer Hades al die dooies gee wat daarin is (Openbaring 20:13, NW). ’n Aantal van diegene wat tot lewe opgewek word, het dalk in ’n sekere mate kontak met die Koninkryksboodskap gehad voordat hulle gesterf het.
Hoe dankbaar kan ons tog wees dat Jesus dit nie aan mense oorgelaat het om te bepaal wie soos skape en wie soos bokke is nie! Onvolmaakte mense kan nie na regte bepaal in watter mate ’n sekere persoon die geleentheid gehad het om die goeie nuus te hoor en aan te neem nie. Weet ons wat sy hartstoestand was en of hy regverdigheid werklik liefgehad het? Kan ons bepaal hoeveel sy reaksie dalk deur sy familie, sy godsdiensagtergrond of ander dinge beïnvloed is? Natuurlik nie. Tog kan ons seker wees dat Jehovah God en Jesus Christus sulke sake kan evalueer en dan oordele sal vel wat volmaak, reg en regverdig is.—Deuteronomium 32:4; Jesaja 11:1-5.
Ons het derhalwe geen rede om te spekuleer oor wie onder diegene wat onlangs gesterf het dalk ’n opstanding sal kry en wie nie. Dit is iets wat ons nie gemagtig is om te doen nie. (Vergelyk Lukas 12:13, 14.) Dit is baie verstandiger as ons op die regverdige Regters, Jehovah God en Jesus Christus, se besluite wag. Dit sal ons as Jehovah se knegte groter gemoedsrus gee. Dit sal ons ook help om ons aandag beter te bepaal by wat ons aangewys is om te doen—‘om te gaan en dissipels te maak van al die nasies en hulle te leer om alles te onderhou wat Jesus beveel het’.—Mattheüs 28:19.
[Foto-erkenning op bladsy 31]
Leicester sheep, Meyers