Wat is nodig om jou gelukkig te maak?

POLITICI wat deur die mense verkies is, probeer hard om sulke mense gelukkig te maak. Hulle werk hang op stuk van sake daarvan af. Maar ’n nuustydskrif praat van “’n ontnugterde en vervreemde kiesersvolk” in Pole. ’n Joernalis verduidelik dat die Verenigde State ’n samelewing “vol wantroue jeens formele politiek” is. Nog ’n skrywer vertel ons van “toenemende politieke onverskilligheid in Frankryk”. Sulke wydverspreide onverskilligheid en ontevredenheid—wat hoegenaamd nie tot hierdie drie lande beperk is nie—gee te kenne dat die politici se pogings om mense gelukkig te maak, misluk.

Godsdiensleiers belowe ook geluk, indien nie in hierdie lewe nie, dan ten minste in ’n toekomstige een. Hulle baseer dit op die veronderstelling dat mense ’n onsterflike of transmigrerende siel het, ’n opvatting wat baie mense om verskeie redes verwerp en wat duidelik deur die Bybel weerlê word. Leë kerke en lidmaatlyste wat krimp, toon dat miljoene mense nie meer dink dat godsdiens noodsaaklik vir geluk is nie.—Vergelyk Genesis 2:7, 17; Esegiël 18:4, 20.

Ontevrede liefhebbers van silwer

As geluk nie in die politiek of in godsdiens gevind kan word nie, waar kan dit gevind word? Dalk in die handelswêreld? Die handelswêreld beweer ook dat hulle geluk kan voorsien. Hulle stel hulle saak deur middel van reklame en sê in soveel woorde: Jy kan geluk vind deur al die materiële dinge en dienste te hê wat geld kan koop.

Dit lyk asof al hoe meer mense op hierdie manier na geluk soek. ’n Hele paar jaar gelede is daar berig dat elke tweede huisgesin in Duitsland diep in die skuld is. Dit is dus geen wonder nie dat die vername Duitse koerant Die Zeit voorspel het dat “baie [van hulle] nie die geringste kans staan om ooit uit die skuld te kom nie”. Hy verduidelik: “Dit is so maklik om oortrokke te raak tot by die perk wat die bank gedurig aanbied—en so moeilik om uit daardie strik los te kom.”

Met ander hoogs geïndustrialiseerde lande is die situasie soortgelyk. ’n Paar jaar gelede het David Caplovitz, ’n sosioloog aan die City University van New York, geraam dat daar in die Verenigde State tussen 20 miljoen en 25 miljoen huisgesinne is wat diep in die skuld is. “Mense kan nie kop bo water hou nie”, het hy gesê, “en dit vernietig hulle lewe.”

Dit klink nouliks na geluk! Maar behoort ons van die handelswêreld te verwag om dít reg te kry wat die ander twee (politiek en godsdiens) klaarblyklik nie kan nie? Die ryk koning Salomo het op ’n keer geskryf: “Iemand wat bloot ’n liefhebber van silwer is, sal nie met silwer tevrede wees nie, en ook nie ’n liefhebber van rykdom met inkomste nie. Ook dit is ydelheid.”—Prediker 5:10, NW.

Om geluk in materiële besittings te soek, is om lugkastele te bou. Dit is dalk opwindend om hulle te bou, maar jy sal probleme teëkom as jy in hulle probeer woon.

Geluk is bereikbaar, maar hoe?

Die apostel Paulus noem Jehovah “die gelukkige God” (1 Timotheüs 1:11, NW). Deur mense na sy eie beeld te skep, het die gelukkige God ook vir hulle die vermoë gegee om gelukkig te wees (Genesis 1:26). Maar hulle geluk sou afhang van hulle diens aan God, soos die psalmis getoon het: “Welgeluksalig is die volk wie se God die HERE is!” (Psalm 144:15b). Wat ons diens aan God behels en hoe ons diens aan hom tot ware geluk lei, kan beter verstaan word as ons ’n paar van die plekke ondersoek waar die woorde “gelukkig” en “geluk” in die Bybel voorkom.

Wees bewus van jou geestelike behoefte

Jesus Christus, die Seun van God, het in sy beroemde Bergpredikasie gesê: “Gelukkig is diegene wat bewus is van hulle geestelike behoefte” (Mattheüs 5:3, NW). Die handelswêreld probeer ons mislei deur ons te laat dink dat die aankoop van weeldeartikels genoeg is vir geluk. Hulle sê vir ons dat geluk ’n rekenaar by die huis, ’n videokamera, ’n telefoon, ’n motor, die nuutste sporttoerusting of stylvolle klere is. Hulle vertel ons egter nie dat tienmiljoene mense in die wêreld nie hierdie dinge het nie en tog nie noodwendig ongelukkig is nie. Hoewel hierdie dinge die lewe moontlik gemakliker en geriefliker maak, is dit nie noodsaaklik vir geluk nie.

Soos Paulus sê diegene wat bewus is van hulle geestelike behoefte: “As ons voedsel en klere het, moet ons daarmee vergenoeg wees” (1 Timotheüs 6:8). Waarom? Omdat dit die bevrediging van geestelike behoeftes is wat tot die ewige lewe lei.—Johannes 17:3.

Is enigiets daarmee verkeerd om goeie dinge te geniet as ons die geld het om dit te koop? Waarskynlik nie. Nogtans versterk dit ons geestelikheid as ons leer om nie aan elke gier toe te gee of iets te koop net omdat ons dit kan bekostig nie. Ons leer dus om vergenoeg te wees en ons bly gelukkig, soos Jesus, selfs al was sy ekonomiese situasie volgens wêreldse standaarde nie van die beste nie (Mattheüs 8:20). En Paulus het nie te kenne gegee dat hy ongelukkig was toe hy die volgende geskryf het nie: “Ek het geleer om vergenoeg te wees met die omstandighede waarin ek is. Ek weet om verneder te word, ek weet ook om oorvloed te hê; in elke opsig en in alle dinge is ek onderrig: om versadig te word sowel as om honger te ly, om oorvloed te hê sowel as om gebrek te ly.”—Filippense 4:11, 12.

Vertrou op Jehovah

As ’n mens bewus is van jou geestelike behoefte, toon dit dat jy gewillig is om op God te vertrou. Dit bring geluk mee, soos koning Salomo verduidelik het: “Hy wat op die HERE vertrou, is gelukkig.”—Spreuke 16:20.

Maar is dit nie ’n feit dat baie mense groter vertroue in geld en besittings stel as wat hulle in God stel nie? Vanuit hierdie standpunt beskou, is daar nouliks ’n meer onvanpaste plek om die leuse “Op God vertrou ons” te vertoon as op geld, hoewel daardie uitdrukking op die Amerikaanse geldeenheid voorkom.

Koning Salomo, wat geen tekort gehad het aan die goeie dinge wat geld kon koop nie, het erken dat vertroue op materiële besittings nie tot blywende geluk lei nie (Prediker 5:11-14). Geld in die bank kan deur bankrotskap of inflasie verloor word. Vaste eiendom kan deur hewige storms vernietig word. Hoewel versekeringspolisse materiële verliese gedeeltelik kan vervang, kan dit nooit vir emosionele verliese vergoed nie. Effekte en obligasies kan in ’n skielike ineenstorting van die effektemark oornag waardeloos word. Selfs ’n goed besoldigde betrekking kan—om verskeie redes—vandag hier wees en môre weg wees.

Om hierdie redes sien diegene wat op Jehovah vertrou hoe verstandig dit is om na Jesus se waarskuwing te luister: “Moenie vir julle skatte bymekaarmaak op die aarde, waar mot en roes verniel en waar diewe inbreek en steel nie; maar maak vir julle skatte bymekaar in die hemel, waar geen mot of roes verniel nie en waar diewe nie inbreek en steel nie.”—Mattheüs 6:19, 20.

Watter groter gevoel van veiligheid en geluk kan daar wees as om te weet dat ’n mens jou vertroue in die almagtige God, wat altyd voorsien, gestel het?—Psalm 94:14; Hebreërs 13:5, 6.

Aanvaar Goddelike teregwysing

Raad, selfs teregwysing, is welkom as dit in ’n gees van liefde deur ’n ware vriend gegee word. ’n Voorgewende vriend van God se kneg Job het op ’n keer selfvoldaan vir hom gesê: “Gelukkig is die man wat deur God tereggewys word.” Hoewel dit waar is, was dít wat Elifas met hierdie woorde geïmpliseer het—dat Job hom aan ernstige wangedrag skuldig gemaak het—nie waar nie. Wat ’n ‘treurige vertrooster’! Toe Jehovah Job egter later op ’n liefdevolle manier tereggewys het, het Job die teregwysing nederig aanvaar en hom op die weg van groter geluk geplaas.—Job 5:17,NW; 16:2; 42:6, 10-17.

God praat vandag nie direk met sy knegte soos hy met Job gepraat het nie. Hy wys hulle eerder deur sy Woord en sy geesgerigte organisasie tereg. Christene wat materiële belange najaag, het egter dikwels nie die tyd, die krag of die begeerte om die Bybel gereeld te bestudeer en al die vergaderinge wat Jehovah se organisasie voorsien, by te woon nie.

Die man wat deur God tereggewys word, erken in ooreenstemming met Spreuke 3:11-18 hoe verstandig dit is om sulke teregwysing te aanvaar: “Gelukkig die mens wat wysheid gevind het, en die mens wat verstand verkry; want die verkryging daarvan is beter as dié van silwer, en die verwerwing daarvan beter as van goud; dit is kosteliker as korale, en al jou kleinode kan daar nie mee vergelyk word nie. In sy regterhand is lengte van dae, in sy linkerhand rykdom en eer; sy weë is lieflike weë, en al sy paaie is vrede. Dit is ’n lewensboom vir die wat dit aangryp, en elkeen wat dit vashou, is gelukkig.”

Om rein en vredeliewend te wees

Jesus het gelukkige mense beskryf as “rein van hart” en “vredemakers” (Mattheüs 5:8, 9). Maar in ’n wêreld wat ’n materialistiese lewenswyse aanmoedig, is dit so maklik vir selfsugtige, moontlik selfs onrein, begeertes om in ons hart pos te vat! As ons nie deur Goddelike wysheid gerig word nie, kan ons baie maklik mislei word om na finansiële welstand te streef deur van twyfelagtige metodes gebruik te maak, wat vreedsame verhoudings met ander sal vernietig! Die Bybel waarsku ons nie sonder rede nie: “Die geldgierigheid is ’n wortel van alle euwels; en omdat sommige dit begeer, het hulle afgedwaal van die geloof en hulleself met baie smarte deurboor.”—1 Timotheüs 6:10.

Die liefde vir geld moedig ’n egotistiese sienswyse aan wat ontevredenheid, ondankbaarheid en hebsug bevorder. Om te voorkom dat so ’n verkeerde gees ontwikkel, vra party Christene, voordat hulle groot finansiële besluite neem, hulle vrae af soos: Het ek dit werklik nodig? Het ek hierdie duur kopie of hierdie goed besoldigde, tydrowende betrekking meer nodig as die miljoene ander mense wat daarsonder moet lewe? Kan ek miskien my geld en my tyd beter gebruik deur ’n groter aandeel aan ware aanbidding te hê, deur die wêreldwye predikingswerk te ondersteun of deur mense te help wat minder bevoorreg is as ek?

Toon volharding

Een van die beproewinge wat Job moes verduur, was ekonomiese verliese (Job 1:14-17). Soos sy voorbeeld toon, is volharding in elke aspek van die lewe nodig. Party Christene moet vervolging verduur; ander verduur versoeking; nog ander verduur ekonomiese toestande wat alles behalwe ideaal is. Maar Jehovah sal elke soort volharding beloon, soos die Christendissipel Jakobus met verwysing na Job geskryf het: “Ons verklaar diegene wat volhard het gelukkig.”—Jakobus 5:11, NW.

As ons geestelike belange verwaarloos om ons ekonomiese situasie te verbeter, kan dit tydelike ekonomiese verligting bring, maar sal dit ons help om ons beeld van permanente ekonomiese verligting onder God se Koninkryk helder te hou? Is dit die moeite werd om daardie risiko te loop?—2 Korinthiërs 4:18.

Vind nou en vir ewig geluk

Party mense betwis vanselfsprekend Jehovah se siening van wat nodig is om mense gelukkig te maak. Omdat hulle die belangriker langtermynvoordele oor die hoof sien, sien hulle geen onmiddellike persoonlike voordeel daarin om te doen wat God aanraai nie. Hulle besef nie dat dit ydelheid is en tot frustrasie lei om op materiële dinge te vertrou nie. Die Bybelskrywer het tereg gevra: “As die goed baie word, word die eters baie; watter voordeel het die besitter dan daarvan, behalwe dat sy oë dit aanskou?” (Prediker 5:11; sien ook Prediker 2:4-11; 7:12.) Hoe vinnig neem belangstelling tog af, en dinge wat ons gedink het ons eenvoudig móét hê, beland op ’n rak en doen nie veel meer as om plek in beslag te neem en stof te vergaar nie!

’n Ware Christen sal hom nooit aan druk onderwerp om in materiële sin ‘by die bure by te hou nie’. Hy weet dat dit wat werklik waarde het, nie gemeet word aan wat ’n mens het nie, maar aan wat jy is. Daar is by hom geen twyfel oor wat nodig is om ’n persoon gelukkig te maak nie—ware geluk: om ’n goeie verhouding met Jehovah te geniet en besig te bly in Sy diens.

[Prent op bladsy 20]

Materiële dinge alleen kan nooit blywende geluk bring nie

[Prent op bladsy 22]

Die Bybel sê: “Gelukkig is diegene wat bewus is van hulle geestelike behoefte”