Die Christengesin doen dinge saam
“Maar ek vermaan julle, broeders, . . . dat julle verenig moet wees in dieselfde gesindheid en in dieselfde mening.”—1 KORINTHIËRS 1:10.
1. Wat is die situasie ten opsigte van eenheid in baie gesinne?
IS JULLE gesin ’n verenigde gesin? Of lyk dit of elkeen sy of haar eie gang gaan? Doen julle dinge saam? Of is julle selde almal terselfdertyd op dieselfde plek? Die woord “gesin” beteken juis ’n verenigde huishouding.a Maar nie alle gesinne is verenig nie. Een Britse dosent het selfs gesê: “Pleks van die grondslag van die goeie gemeenskap te wees, is die gesin . . . die bron van al ons ontevredenheid.” Is dit waar van jou gesin? Indien wel, moet dit so wees?
2. Watter Bybelkarakters toon dat hulle uit ’n goeie gesin gekom het?
2 Die eenheid of verdeeldheid van ’n gesin hang gewoonlik af van wie die leiding in die gesin neem, of dit nou twee ouers of ’n enkelouer is. In Bybeltye het verenigde gesinne wat saam aanbid het Jehovah se seën geniet. Dit was die geval in eertydse Israel, waar Jefta se dogter, Simson sowel as Samuel elkeen op ’n ander manier getoon het dat hulle uit ’n godvrugtige gesin kom (Rigters 11:30-40; 13:2-25; 1 Samuel 1:21-23; 2:18-21). Timotheüs, Paulus se getroue metgesel op party van Paulus se sendingreise, is in vroeë Christelike tye deur sy grootmoeder Loïs en sy moeder Eunice met ’n kennis van die Hebreeuse Geskrifte grootgemaak. Wat ’n uitsonderlike dissipel en sendeling het hy tog geword!—Handelinge 16:1, 2; 2 Timotheüs 1:5; 3:14, 15; sien ook Handelinge 21:8, 9.
Waarom dinge saam doen?
3, 4. (a) Watter eienskappe moet kenmerkend van ’n verenigde gesin wees? (b) Hoe kan ’n huis meer as net ’n woonplek wees?
3 Waarom is dit nuttig dat gesinne dinge saam doen? Omdat dit wedersydse begrip en respek opbou. Pleks van ons van mekaar te distansieer, bly ons na aan mekaar en ondersteun ons mekaar. ’n Onlangse artikel in die tydskrif Family Relations het gesê: “’n Betreklik duidelike prentjie het te voorskyn gekom wat spesifieke kenmerke van ‘sterk gesinne’ beskryf. Sulke eienskappe sluit in ’n verpligting teenoor en waardering vir mekaar, ’n samehorigheidsgevoel, goeie kommunikasie, die vermoë om probleme op te los en ’n sterk geestelike lewe.”
4 Wanneer hierdie eienskappe in ’n gesin voorkom, is die huis nie meer soos ’n vulstasie waar ’n mens net vir brandstof stilhou nie. Dit is meer as net ’n huis. Dit is ’n vriendelike plek wat gesinslede aantrek. Dit is ’n veilige hawe van hartlikheid en toegeneentheid, medelye en begrip (Spreuke 4:3, 4). Dit is ’n tuiste waar gesinseenheid aangetref word, nie ’n skerpioennes van wrywing en verdeeldheid nie. Maar hoe word dit bereik?
Studeer saam as ’n gesin
5. Wat moet ons gebruik om ware aanbidding te leer?
5 Ware aanbidding van Jehovah word geleer deur ons redeneervermoë, of “denkvermoë”, te gebruik (Romeine 12:1, NW). Ons gedrag moenie deur kortstondige emosies oorheers word, soos dié wat opgewek word deur middel van preke wat slim retoriek gebruik en TV-dienste wat op ’n aantreklike manier aangebied word nie. Dit is eerder ons gereelde studie en bepeinsing van die Bybel en Bybelstudielektuur wat deur “die getroue en verstandige dienskneg” voorsien word wat ons tot optrede aanspoor (Mattheüs 24:45). Ons Christelike gedrag spruit voort uit die feit dat ons in enige situasie of versoeking wat kan ontstaan, vasstel wat die sin van Christus is. In daardie opsig is Jehovah ons Groot Opvoeder.—Psalm 25:9; Jesaja 54:13; 1 Korinthiërs 2:16.
6. Watter wêreldwye voorbeeld van gesinstudie het ons?
6 Die gesinsbybelstudie speel ’n noodsaaklike rol in die geestelikheid van elke Christengesin. Wanneer hou julle julle gesinstudie? As dit aan die toeval oorgelaat of op die ingewing van die oomblik gedoen word, word dit, indien dit wel gehou word, waarskynlik nie gereeld gehou nie. Om as ’n gesin saam te studeer, vereis ’n gereelde, vaste rooster. Dan weet almal watter dag en hoe laat hulle daar moet wees om ’n geestelike gesinsamekoms te geniet. Die meer as 12 000 lede van die wêreldwye Bethelgesin weet dat hulle gesinstudie Maandagaande gehou word. Hoe treffend is dit tog vir hierdie Bethelvrywilligers wanneer hulle daaraan dink dat hulle almal aan die einde van die dag dieselfde materiaal bestudeer op eilande van die Stille Oseaan en in Nieu-Seeland en later in Australië, Japan, Taiwan, Hongkong en dan in Asië, Afrika en Europa en uiteindelik in die Amerikas. Hoewel hulle deur duisende kilometers en baie tale geskei word, gee hierdie gesinstudie die Bethelgesinslede ’n samehorigheidsgevoel. Julle kan deur julle gesinstudie dieselfde gevoel op ’n kleiner skaal wek.—1 Petrus 2:17; 5:9.
7. Hoe moet ons die woord van waarheid volgens Petrus beskou?
7 Die apostel Petrus gee ons die volgende raad: “En verlang sterk soos pasgebore kindertjies na die onvervalste melk van die woord, dat julle daardeur kan opgroei, as julle ten minste gesmaak het dat die Here goedertieren is” (1 Petrus 2:2, 3). Wat ’n pragtige beeld roep Petrus tog met daardie woorde op! Hy het die Griekse werkwoord e·pi·po·theʹsa·te gebruik wat, volgens die Linguistic Key to the Greek New Testament, van ’n woord kom wat beteken “om te verlang na, te begeer, te hunker na”. Dit verwys na ’n vurige begeerte. Het jy al gesien hoe ’n klein diertjie gretig na sy ma se tepel soek en hoe tevrede ’n mensebaba is wanneer hy aan sy moeder se bors drink? Ons moet dieselfde begeerte vir die woord van die waarheid hê. Die Griekse geleerde William Barclay het gesê: “Om God se woord te bestudeer, is vir die opregte Christen nie ’n straf nie, maar ’n vreugde, want hy weet dat sy hart daardeur die voedsel ontvang waarna dit verlang.”
8. Watter uitdaging het die gesinshoof wanneer hy die gesinstudie hou?
8 Die gesinstudie plaas ’n groot verantwoordelikheid op die gesinshoof. Hy moet seker maak dat almal die studie interessant vind en daaraan kan deelneem. Kinders moenie voel dat die studie eintlik net vir die grootmense is nie. Die gehalte van die studie is belangriker as die hoeveelheid materiaal wat gedek word. Laat die Bybel lewe. Waar dit gepas is, moet jy jou kinders help om die gebiede en kenmerke van Palestina te visualiseer waar die gebeure onder bespreking plaasgevind het. Almal moet aangemoedig word om hulle persoonlike navorsing te doen en dit met die gesin te deel. So kan kinders ook ‘by Jehovah grootword’.—1 Samuel 2:20, 21, vgl. NW.
Werk saam as evangeliedienaars
9. Hoe kan die predikingswerk ’n vreugdevolle gesinsondervinding gemaak word?
9 Jesus het gesê: “Die evangelie moet eers aan al die nasies verkondig word” (Markus 13:10). Daardie woorde gee elke pligsgetroue Christen ’n toewysing—om die evangelie te verkondig, om die goeie nuus van God se Koninkryksheerskappy aan ander te vertel. As ’n gesin dit saam doen, kan dit ’n bemoedigende en vreugdevolle ondervinding wees. Moeders en vaders is trots op die wyse waarop hulle kinders die goeie nuus verkondig. Een egpaar met drie seuns tussen die ouderdomme van 15 en 21 sê dat hulle hulle kinders altyd elke Woensdag ná skool en elke Saterdagoggend in die openbare predikingswerk vergesel het. Die pa het gesê: “Ons leer hulle elke keer iets. En ons maak seker dat dit ’n genotvolle, bemoedigende ondervinding is.”
10. Hoe kan ouers hulle kinders in die bediening tot voordeel wees?
10 Dit kan baie lonend wees as ’n gesin saam aan die predikings- en onderrigtingswerk deelneem. Soms reageer mense gunstiger op ’n kind se eenvoudige maar opregte aanbieding. Dan is Ma of Pa daar om te help as dit nodig is. Ouers kan seker maak dat hulle kinders progressief opgelei word en sodoende bedienaars word ‘wat hulle nie hoef te skaam nie, wat die woord van die waarheid reg sny’. As hulle só saam aan die predikingswerk deelneem, kan ouers op hulle kind se gesindheid, bekwaamheid en goeie maniere in die bediening let. As hulle ’n vaste roetine het, kan hulle sien hoe die kind vorder en volgehoue opleiding en aanmoediging verskaf om sy of haar geloof te versterk. Die kinders sien terselfdertyd dat hulle ouers ’n goeie voorbeeld in die bediening stel. In hierdie kritieke en gewelddadige tye kan dit selfs ’n mate van beskerming in buurte met ’n hoë misdaadsyfer bied as julle as ’n verenigde en liefdevolle gesin werk.—2 Timotheüs 2:15; Filippense 3:16, NW.
11. Wat kan ’n kind se ywer vir die waarheid maklik demp?
11 Kinders kan gou sien as volwassenes dubbele standaarde het. As ouers nie ware liefde vir die waarheid en vir die huis-tot-huis-bediening weerspieël nie, kan daar nouliks verwag word dat die kinders ywerig moet wees. Dit sal ’n gesonde ouer, wie se enigste velddiens die weeklikse Bybelstudie met die kinders is, dalk duur te staan kom wanneer die kinders ouer word.—Spreuke 22:6; Efesiërs 6:4.
12. Hoe kan sommige gesinne ’n spesiale seën van Jehovah af ontvang?
12 ’n Voordeel daarvan om ‘in dieselfde gesindheid verenig te wees’, is dat die gesin moontlik hulle samewerking kan gee sodat ten minste een gesinslid as ’n voltydse pionier in die gemeente kan dien. Baie gesinne oor die hele wêreld doen dit, en almal ontvang ’n seën deur die ondervindinge en groter bekwaamheid van hulle pionierlid.—2 Korinthiërs 13:11, vgl. NW; Filippense 2:1-4.
Los probleme saam op
13, 14. (a) Watter situasies kan die eenheid van ’n gesin versteur? (b) Hoe kan gesinsprobleme vermy word?
13 In hierdie moeilike tye van “spanning” en “gevaar” is ons almal onder druk (2 Timotheüs 3:1, Revised Standard Version; Phillips). Daar is probleme by die werk, by die skool, op straat en selfs tuis. Sommige sukkel met hulle gesondheid of met langdurige emosionele probleme, wat soms tot spanning en misverstande in die gesin kan lei. Hoe kan sulke situasies gehanteer word? Deur elkeen in sy dop te kruip? Deur jou af te sonder selfs al woon jy saam met ander in die huis? Nee. Ons moet eerder oor ons bekommernisse praat en hulp vra. En watter beter plek hiervoor as in ’n liefdevolle gesinskring?—1 Korinthiërs 16:14; 1 Petrus 4:8.
14 Voorsorg voorkom nasorg, soos enige dokter weet. Dieselfde geld vir gesinsprobleme. Die openhartige en eerlike bespreking van probleme kan dikwels voorkom dat dit ernstig raak. Selfs wanneer ernstige probleme ontstaan, kan die gesin daarvan werk maak en dit selfs oplos as hulle die Bybelbeginsels wat daarby betrokke is saam bespreek. Wrywing kan dikwels in ’n goeie verhouding omskep word deur Paulus se woorde in Kolossense 3:12-14 toe te pas: “Beklee julle dan, as uitverkorenes van God, heiliges en geliefdes, met innerlike ontferming, goedertierenheid, nederigheid, sagmoedigheid, lankmoedigheid. Verdra mekaar en vergewe mekaar as die een teen die ander ’n klag het; . . . beklee julle bo dit alles met die liefde wat die band van die volmaaktheid is.”
Ontspan saam as ’n gesin
15, 16. (a) Watter eienskap moet Christengesinne onderskei? (b) Watter soort mense word deur sommige godsdienste voortgebring, en waarom?
15 Jehovah is ’n gelukkige God, en die waarheid is ’n gelukkige boodskap—’n boodskap van hoop vir die mensdom. Daarbenewens is blydskap een van die vrugte van die gees. Hierdie blydskap verskil grootliks van die kortstondige vreugde van die atleet wat die oorwinning in die een of ander mededingende sportsoort behaal het. Dit is die diep, langdurige gevoel van tevredenheid waarvan die hart oorloop omdat ’n mens ’n intieme verhouding met Jehovah aankweek. Dit is ’n vreugde wat op geestelike waardes en opbouende verhoudings gegrond is.—Galasiërs 5:22; 1 Timotheüs 1:11, NW.
16 As Christengetuies van Jehovah het ons dus geen rede om stuurs of vervelig te wees nie. Sommige godsdienste bring sulke mense voort omdat hulle soort geloof negatiewe faktore beklemtoon. Hulle leerstellings het ’n sombere, vreugdelose soort aanbidding tot gevolg, wat onbybels en ongebalanseerd is. Hulle bring nie gelukkige gesinne in God se diens voort nie. Jesus het geweet dat vermaak en ontspanning nodig is. By een geleentheid het hy sy dissipels byvoorbeeld genooi: “Kom julle self in die eensaamheid na ’n verlate plek en rus ’n bietjie.”—Markus 6:30-32; Psalm 126:1-3; Jeremia 30:18, 19.
17, 18. Op watter gepaste maniere kan Christengesinne ontspan?
17 Gesinne het ook tyd nodig om te ontspan. Een ouer het van sy kinders gesê: “Ons doen baie genotvolle dinge saam—ons gaan strand toe, speel met ’n bal in die park, reël ’n piekniek in die berge. Nou en dan het ons ’n ‘pionierdag’ saam in die bediening; dan vier ons dit met ’n spesiale maaltyd en gee soms selfs vir mekaar geskenke.”
18 Ander dinge waaraan ouers kan dink, is gesinsuitstappies na die dieretuin, pretparke, museums en ander fassinerende plekke. Staptogte in die bosse, voëlkykery en tuinmaak is bedrywighede wat saam geniet kan word. Ouers kan hulle kinders ook aanmoedig om op ’n musiekinstrument te leer speel of ’n praktiese stokperdjie te begin. Gebalanseerde ouers sal beslis tyd inruim om met hulle kinders te speel. As gesinne saam ontspan, sal hulle waarskynlik hegte gesinne bly!
19. Watter moderne neiging kan ’n gesin skade berokken?
19 ’n Moderne neiging onder jongmense is om hulle van die gesin af te skei en hulle eie gang te gaan wanneer dit by ontspanning kom. Hoewel dit nie verkeerd is dat ’n jongmens ’n stokperdjie of sy eie gunstelingtydverdryf het nie, sal dit onverstandig wees om toe te laat dat sulke belange ’n permanente skeiding van die res van die gesin veroorsaak. Ons moet eerder die beginsel toepas waarvan Paulus gepraat het: “Julle moet nie elkeen na sy eie belange omsien nie, maar elkeen ook na die ander s’n.”—Filippense 2:4.
20. Hoe kan kring- en streekbyeenkomste vreugdevolle geleenthede wees?
20 Wat ’n vreugde is dit vir ons almal om te sien hoe gesinne tydens kring- en streekbyeenkomste bymekaar sit! Die ouer kinders kan sodoende dikwels met die jongeres help. So ’n reëling voorkom ook die neiging van sommige adolessente om in groepe in die agterste rye te gaan sit en min aandag aan die byeenkomsprogram te skenk. Dit kan selfs vreugdevolle geleenthede wees om na en van die byeenkomste te reis as daar met die gesin bespreek word watter roete hulle gaan volg, watter plekke hulle op pad gaan besoek en waar hulle sal tuisgaan. Stel jou voor hoe opwindend dit in Jesus se tyd vir gesinne moes gewees het om saam tot in Jerusalem te reis!—Lukas 2:41, 42.
Die seëninge wanneer gesinne dinge saamdoen
21. (a) Hoe kan ons sukses in die huwelik nastreef? (b) Wat is vier goeie wenke wat ’n huwelik laat hou?
21 Dit was nog nooit maklik om suksesvolle huwelike en verenigde gesinne tot stand te bring nie, en hulle kom nie toevallig tot stand nie. Vir sommige is dit blykbaar makliker om ‘tou op te gooi’, die huwelik deur ’n egskeiding te ontbind en van voor af te probeer begin. Tog kom dieselfde probleme dikwels in ’n tweede of derde huwelik voor. Die Christelike antwoord daarop is baie beter: Streef sukses na deur die Bybelbeginsels van liefde en respek toe te pas. Verenigde gesinne is gegrond op ’n gesindheid van gee en neem, van onselfsugtigheid. Een huweliksraadgewer het ’n eenvoudige resep gegee om huwelike te laat hou. Hy het geskryf: “Die vier noodsaaklike elemente wat in byna alle goeie huwelike aangetref word, is die gewilligheid om te luister, die vermoë om om verskoning te vra, die vermoë om voortdurend emosionele ondersteuning te gee en die begeerte na liefdevolle aanraking.” Daardie faktore kan beslis help om ’n huwelik te laat hou omdat hulle ook op betroubare Bybelstandaarde gegrond is.—1 Korinthiërs 13:1-8; Efesiërs 5:33; Jakobus 1:19.
22. Wat is sommige voordele daarvan om ’n verenigde gesin te hê?
22 As ons die Bybel se raad volg, sal ons ’n vaste grondslag vir ’n verenigde gesin hê, en verenigde gesinne is die grondslag van ’n verenigde en geestelik sterk gemeente. Ons sal derhalwe ryk seëninge van Jehovah af ontvang terwyl ons hom eendragtig in groter mate loof.
[Voetnoot]
a “Gesin kom van die Nederlandse gezin, wat oorspronklik die bediendes in die huishouding ingesluit het en dan ook die ouers met hulle kinders.”—Afrikaanse woordeboek—verklarend met woordafleidings, deur H. J. Terblanche en J. J. Odendaal.
Onthou jy?
◻ Waarom is dit nuttig dat gesinne saam dinge doen?
◻ Waarom is ’n gereelde gesinsbybelstudie noodsaaklik?
◻ Waarom is dit goed dat ouers saam met hulle kinders aan die veldbediening deelneem?
◻ Waarom is dit nuttig om probleme in die gesinskring te bespreek?
◻ Waarom moet Christengesinne nie somber en vreugdeloos wees nie?
[Prent op bladsy 17]
Geniet julle gesin ten minste een maaltyd per dag saam?
[Prent op bladsy 18]
Gesinsuitstappies moet ontspannend en genotvol wees