Wandel moedig in Jehovah se weë
“Welgeluksalig is elkeen wat [Jehovah] vrees, wat in sy weë wandel!”—PSALM 128:1.
1, 2. Van watter nut is die Bybelverslag oor die woorde en dade van Jehovah se eertydse getuies?
JEHOVAH se Heilige Woord is vol verslae van die beproewinge en vreugdes van sy lojale knegte. Die ondervindinge van Noag, Abraham, Sara, Josua, Debora, Barak, Dawid en ander word op uiters aanskoulike wyse daarin vertel. Hulle was almal werklike mense wat iets besonders in gemeen gehad het. Hulle het geloof in God gehad en moedig in sy weë gewandel.
2 Die woorde en dade van Jehovah se eertydse getuies kan ons bemoedig terwyl ons daarna streef om in God se weë te wandel. Daarbenewens sal ons geluk smaak as ons ontsag vir God toon en ’n heilsame vrees het om hom te mishaag. Dit sal so wees al kom ons voor beproewinge in die lewe te staan, want die geïnspireerde psalmis het gesing: “Welgeluksalig is elkeen wat [Jehovah] vrees, wat in sy weë wandel!”—Psalm 128:1.
Wat moed is
3. Wat is moed?
3 As ons in Jehovah se weë wil wandel, moet ons moed hê. Trouens, die Skrif beveel God se volk om hierdie eienskap aan die dag te lê. Die psalmis Dawid het byvoorbeeld gesing: “Wees dus sterk en hou goeie moed, julle almal wat julle vertroue in die Here stel” (Psalm 31:24, NAV). Moed is die “verstandelike of morele krag om te waag, te volhard en gevaar, vrees of probleme te trotseer” (Webster’s Ninth New Collegiate Dictionary). ’n Moedige mens is sterk, dapper en onverskrokke. Die apostel Paulus se woorde aan sy medewerker Timotheüs toon duidelik dat Jehovah sy knegte moed gee: “Die Gees wat God ons gegee het, maak ons immers nie lafhartig nie, maar vul ons met krag en liefde en selfbeheersing.”—2 Timotheüs 1:7, NAV.
4. Wat is een manier waarop ’n mens moed kan verkry?
4 Een manier waarop ’n mens godgegewe moed kan verkry, is deur biddend oor Jehovah se Woord, die Bybel, na te dink. Daar is baie verslae in die Skrif wat ons kan help om ons moed te versterk. Kom ons kyk dus eerstens wat ons uit die verslag in die Hebreeuse Geskrifte kan leer van party wat moedig in Jehovah se weë gewandel het.
Moed om God se boodskap te verkondig
5. Hoe kan Henog se moed Jehovah se hedendaagse knegte tot voordeel strek?
5 Henog se moed kan Jehovah se hedendaagse knegte help om God se boodskap moedig bekend te maak. Voor Henog gebore is, ‘is daar begin om die Naam van Jehovah aan te roep’. Party geleerdes sê dat mense Jehovah se naam “op ’n oneerbiedige wyse begin” aanroep het (Genesis 4:25, 26; 5:3, 6). Die Goddelike naam is moontlik vir mense of selfs vir afgode gebruik. Valse godsdiens het dus gefloreer toe Henog in 3404 v.G.J. gebore is. Trouens, hy was blykbaar die enigste mens wat destyds “met God gewandel” het en ’n regverdige weg in ooreenstemming met Jehovah se geopenbaarde waarheid gevolg het.—Genesis 5:18, 24.
6. (a) Watter kragtige boodskap het Henog verkondig? (b) Watter vertroue kan ons hê?
6 Henog het God se boodskap moedig oorgedra, waarskynlik deur te preek. (Hebreërs 11:5; vergelyk 2 Petrus 2:5.) “Kyk”, het hierdie enkele getuie verklaar, “[Jehovah] het gekom met sy heilige tienduisendtalle, om gerig te hou oor almal en al die goddelose mense onder hulle te straf oor al hulle goddelose werke wat hulle goddelooslik gedoen het, en oor al die harde woorde wat die goddelose sondaars teen Hom gespreek het” (Judas 14, 15, vgl. NW). Henog het die moed gehad om die naam Jehovah te gebruik toe hy daardie oordeelsboodskap aan die goddeloses oorgedra het. En net soos God Henog die moed gegee het om daardie kragtige boodskap te verkondig, gee Jehovah Sy hedendaagse Getuies die krag om Sy woord met vrymoedigheid in die bediening, by die skool en elders bekend te maak.—Vergelyk Handelinge 4:29–31.
Moed tydens beproewinge
7. Watter voorbeeld van moed het Noag gestel?
7 Noag se voorbeeld kan ons help om regverdige werke moedig te verrig wanneer ons beproewinge verduur. Hy het met moed en geloof op die Goddelike waarskuwing van ’n wêreldwye vloed gereageer en “die ark gereed gemaak tot redding van sy huisgesin”. Deur gehoorsaam en regverdig op te tree, het Noag die ongelowige wêreld weens hulle bose werke veroordeel en getoon dat hulle dit verdien om vernietig te word (Hebreërs 11:7; Genesis 6:13-22; 7:16). Bepeinsing oor Noag se lewenswandel help God se hedendaagse knegte om regverdige werke soos deelname aan die Christelike bediening moedig te verrig.
8. (a) Waarmee het Noag as ’n moedige “prediker van geregtigheid” te kampe gehad? (b) Wat sal Jehovah vir ons doen as ons moedige predikers van geregtigheid is?
8 As ons ’n regverdige weg volg, maar nie raad weet met ’n sekere beproewing nie, moet ons om wysheid bid sodat ons dit die hoof kan bied (Jakobus 1:5-8). Die feit dat Noag ten spyte van beproewinge lojaal teenoor God was, toon dat ’n mens wel beproewinge met moed en getrouheid kan verduur. Hy het die druk van ’n bose wêreld sowel as van gematerialiseerde engele en hulle basternageslag weerstaan. Ja, Noag was ’n moedige “prediker van geregtigheid” vir ’n “ou wêreld” wat op vernietiging afgestuur het (2 Petrus 2:4, 5; Genesis 6:1-9). Hoewel hy as ’n boodskapper God se waarskuwing met vrymoedigheid aan die antediluviane oorgedra het, ‘het hulle geen ag daarop geslaan totdat die vloed gekom en hulle almal weggesleur het nie’ (Mattheüs 24:36-39, NW). Maar ons moet onthou dat Jehovah ons, ten spyte van vervolging en die feit dat die meeste mense vandag ons Bybelboodskap verwerp, sal onderskraag soos hy Noag onderskraag het as ons soortgelyke geloof en moed as predikers van geregtigheid aan die dag lê.
Moed om God te gehoorsaam
9, 10. In watter opsigte het Abraham, Sara en Isak moedige gehoorsaamheid getoon?
9 ‘Jehovah se vriend’ Abraham is ’n goeie voorbeeld van moedige gehoorsaamheid aan God (Jakobus 2:23). Dit het geloof en moed van Abraham geverg om Jehovah te gehoorsaam en Ur van die Chaldeërs, ’n stad met baie materiële voordele, te verlaat. Hy het geloof gehad in God se belofte dat “al die geslagte van die aarde” hulle deur middel van hom sou seën en dat sy saad ’n land sou ontvang (Genesis 12:1-9; 15:18-21). Deur geloof het Abraham ‘as vreemdeling in die beloofde land gaan woon’ en uitgesien na “die stad wat vaste fondamente het”—God se hemelse Koninkryk, waaronder hy tot lewe op aarde opgewek sou word.—Hebreërs 11:8-16, NAV.
10 Abraham se vrou, Sara, het die nodige geloof en moed gehad om Ur te verlaat, saam met haar man na ’n vreemde land te trek en enige probleme te verduur wat hulle daar sou teëkom. En hoe is sy tog nie vir haar moedige gehoorsaamheid aan God beloon nie! Hoewel Sara onvrugbaar was tot sy ongeveer 90 en reeds “oor die leeftyd” was, is sy in staat gestel ‘om bevrug te word, omdat sy God getrou geag het wat dit beloof het’. Later het sy Isak gebaar (Hebreërs 11:11, 12; Genesis 17:15-17; 18:11; 21:1-7). Jare later het Abraham God moedig gehoorsaam en “Isak so goed as geoffer”. Die patriarg is deur ’n engel gekeer en het sy moedige en gehoorsame seun “op sinnebeeldige wyse” uit die dood ontvang. Hy en Isak het dus in profetiese sin afgebeeld hoe Jehovah God sy Seun, Jesus Christus, as ’n losprys sou voorsien sodat diegene wat geloof in hom beoefen die ewige lewe kan hê (Hebreërs 11:17-19, NW; Genesis 22:1-19; Johannes 3:16). Die moedige gehoorsaamheid van Abraham, Sara en Isak moet ons beslis beweeg om Jehovah te gehoorsaam en altyd sy wil te doen.
Moed om ons by God se volk te skaar
11, 12. (a) Hoe het Moses moed aan die dag gelê met betrekking tot Jehovah se volk? (b) Watter vraag kan met die oog op Moses se moed gevra word?
11 Moses het hom moedig by God se verdrukte volk geskaar. In die 16de eeu v.G.J. het Moses se ouers self ook moed aan die dag gelê. Hulle het nie die koning se bevel om pasgebore Hebreeuse seuntjies te vermoor, gevrees nie, maar het Moses weggesteek en hom toe in ’n mandjie tussen die riete langs die oewer van die Nylrivier gesit. Farao se dogter het op hom afgekom en hy is as haar eie seun grootgemaak, hoewel hy eers in sy ouerhuis geestelike onderrig ontvang het. As ’n lid van Farao se huishouding is Moses “opgelei in al die wysheid van die Egiptenaars” en het hy “magtig in woorde en dade” geword, magtig in geestes- en fisiese vermoëns.—Handelinge 7:20-22; Exodus 2:1-10; 6:19.
12 Ten spyte van die materiële voordele van die koninklike huis het Moses moedig verkies om hom by die aanbidders van Jehovah te skaar, wat toe in slawerny aan die Egiptenaars was. Toe hy ’n Israeliet verdedig het, het hy ’n Egiptenaar doodgemaak en daarna na Midian gevlug (Exodus 2:11-15). Ongeveer 40 jaar later het God hom gebruik om die Israeliete uit slawerny te lei. By daardie geleentheid het Moses “Egipte verlaat sonder om die toorn van die koning te vrees”, wat hom met die dood gedreig het omdat hy opgetree het as Jehovah se woordvoerder ten behoewe van Israel. Moses het gewandel asof hy “die Onsienlike”, Jehovah God, sien (Hebreërs 11:23-29; Exodus 10:28). Het jy die soort geloof en moed wat jou sal beweeg om Jehovah en sy volk ten spyte van moeilike tye en vervolging aan te kleef?
Moed om ‘Jehovah getrou te volg’
13. Hoe het Josua en Kaleb ’n voorbeeld ten opsigte van moed gestel?
13 Moedige Josua en Kaleb het bewys gelewer dat ons in God se weë kan wandel. Hulle het ‘Jehovah getrou gevolg’ (Numeri 32:12, NAV). Josua en Kaleb was twee van die 12 manne wat gestuur is om die Beloofde Land te verken. Omdat tien van die verkenners die land se bewoners gevrees het, het hulle Israel probeer afraai om Kanaän binne te gaan. Maar Josua en Kaleb het moedig gesê: “As die HERE ’n welbehae in ons het, sal Hy ons in hierdie land inbring en dit aan ons gee, ’n land wat oorloop van melk en heuning. Wees net nie teen die HERE opstandig nie, en wees julle nie bevrees vir die volk van die land nie, want hulle is ons spys. Hulle beskutting het van hulle gewyk, en die HERE is met ons. Wees nie bevrees vir hulle nie!” (Numeri 14:8, 9). Vanweë hulle gebrek aan geloof en moed het daardie geslag Israeliete nooit die land van belofte bereik nie. Maar Josua en Kaleb het saam met ’n nuwe geslag die land binnegegaan.
14, 15. (a) Wat het Josua en die Israeliete ondervind toe Josua die woorde in Josua 1:7, 8 toegepas het? (b) Watter les ten opsigte van moed leer ons by Josua en Kaleb?
14 God het vir Josua gesê: “Wees net baie sterk en vol moed, om nougeset te handel volgens die hele wet wat Moses, my kneg, jou beveel het; wyk daarvan nie regs of links af nie, sodat jy met goeie gevolg kan handel, oral waar jy mag gaan. Hierdie wetboek mag nie uit jou mond wyk nie; maar bepeins dit dag en nag, sodat jy nougeset kan handel volgens alles wat daarin geskrywe staan; want dan sal jy in jou weë voorspoedig wees, en dan sal jy met goeie gevolg handel.”—Josua 1:7, 8.
15 Aangesien Josua daardie woorde toegepas het, is Jerigo en ander stede deur die Israeliete ingeneem. God het selfs die son laat stilstaan sodat dit bly skyn het totdat die Israeliete die oorwinning by Gibeon behaal het (Josua 10:6-14). Toe hulle bedreig is deur vyandelike magte wat teen hulle saamgespan het en wat ‘talryk was soos die sand wat aan die seestrand is’, het Josua moedig opgetree, en God het Israel weer die oorwinning gegee (Josua 11:1-9). Al is ons onvolmaakte mense kan ons, soos Josua en Kaleb, Jehovah getrou volg en kan God ons die krag gee om moedig in sy weë te wandel.
Moed om op God te vertrou
16. Hoe het Debora, Barak en Jael moed aan die dag gelê?
16 Moedige vertroue in God word beloon, soos getoon word deur gebeure in die dae toe die rigters in Israel reggespreek het (Rut 1:1, NW). Rigter Barak en die profetes Debora het byvoorbeeld moedig op God vertrou. Die Kanaänitiese koning Jabin het Israel reeds 20 jaar verdruk toe Jehovah Barak deur middel van Debora aangespoor het om 10 000 man op die berg Tabor te versamel. Jabin se leërowerste, Sisera, het hom na die spruit Kison gehaas, vol vertroue dat sy leër met die 900 strydwaens wat ystersense aan hulle wiele gehad het Israel se manne maklik op hierdie gelyk grond sou verslaan. Toe die Israeliete in die vallei inbeweeg het, het God ten behoewe van hulle opgetree, en ’n oorstroming het die slagveld in ’n moeras omgeskep sodat Sisera se strydwaens nie kon beweeg nie. Barak se manskappe het die oorhand gekry en “die hele leër van Sisera het deur die skerpte van die swaard geval”. Sisera het na die tent van Jael gevlug, maar terwyl hy geslaap het, het sy die moed gehad om ’n tentpen deur sy slape te dryf en hom só om die lewe te bring. Soos Debora aan Barak voorspel het, is “die eer” vir hierdie oorwinning aan ’n vrou gegee. Omdat Debora, Barak en Jael moedig op God vertrou het, het Israel “veertig jaar lank vrede” gehad.—Rigters 4:1-22; 5:31, NAV.
17. Watter voorbeeld van moedige vertroue op Jehovah het rigter Gideon gestel?
17 Rigter Gideon het moedig op Jehovah God vertrou toe Israel deur die Midianiete en ander binnegeval is. Hoewel die invallers ’n oormag van ongeveer 135 000 gehad het, kon Israel se 32 000 soldate dalk steeds ’n godgegewe oorwinning aan hulle eie dapperheid toegeskryf het. Op Jehovah se bevel het Gideon derhalwe sy magte tot drie groepe van 100 man verminder (Rigters 7:1-7, 16; 8:10). Toe die 300 die Midianitiese kamp in die nag omsingel het, het elkeen ’n ramshoring en ’n kruik met ’n fakkel binne-in gehad. Op ’n gegewe teken het hulle op die ramshorings geblaas, die kruike stukkend geslaan, die fakkels omhoog gehou en uitgeroep: “Die swaard van [Jehovah] en van Gideon!” (Rigters 7:20). Die verskrikte Midianiete het gevlug en is verslaan. Sulke gebeure behoort ons te oortuig dat moedige vertroue op God vandag ook beloon word.
Moed om Jehovah te eer en ware aanbidding te bevorder
18. Wat het Dawid op ’n moedige wyse gedoen toe hy Goliat verslaan het?
18 Party Bybelse voorbeelde gee ons die moed om Jehovah te eer en ware aanbidding te bevorder. Jong Dawid, wat op ’n dapper wyse sy vader se skape gered het, het moed aan die dag gelê toe hy voor die Filistynse reus Goliat te staan gekom het. “Jy kom na my met ’n swaard en met ’n spies en met ’n lans”, het Dawid gesê, “maar ek kom na jou in die Naam van [Jehovah] van die leërskare, die God van die slagordes van Israel, wat jy uitgedaag het. Vandag sal [Jehovah] jou in my hand oorlewer, dat ek jou kan verslaan en jou hoof van jou wegneem, . . . sodat die hele aarde kan weet dat Israel ’n God het. Dan sal hierdie hele menigte moet erken dat [Jehovah] nie deur swaard en deur spies verlos nie; want die stryd behoort aan [Jehovah]” (1 Samuel 17:32-37, 45-47). Met Goddelike hulp het Dawid Jehovah moedig geëer, Goliat verslaan en sodoende ’n belangrike rol daarin gespeel om ’n Filistynse bedreiging vir ware aanbidding uit die weg te ruim.
19. Vir watter projek het Salomo moed nodig gehad, en hoe kan sy benadering in ons dag gevolg word?
19 Net voordat koning Dawid se seun Salomo God se tempel begin bou het, het sy bejaarde vader hom aangespoor: “Wees sterk en vol moed, en voer dit uit; vrees nie en wees nie verskrik nie, want die HERE God, my God, sal met jou wees; Hy sal jou nie begewe en jou nie verlaat nie, totdat jy al die dienswerk aan die huis van die HERE voltooi het” (1 Kronieke 28:20). Salomo met moedig opgetree en die tempel met welslae voltooi. Wanneer ’n teokratiese bouprogram vandag ’n uitdaging bied, moet ons Dawid se woorde onthou: “Wees sterk en vol moed, en voer dit uit.” Wat ’n uitstekende manier om Jehovah te eer en ware aanbidding te bevorder!
20. In watter opsig het koning Asa moed geskep?
20 Vanweë koning Asa se begeerte om God te eer en ware aanbidding te bevorder, het hy van die afgode en manlike tempelprostitute in Juda ontslae geraak. Hy het ook sy afvallige grootmoeder uit haar hoë posisie verwyder en haar “afskuwelike afgod” verbrand (1 Konings 15:11-13, NW). Ja, Asa het “moed geskep en die verfoeisels verwyder uit die hele land Juda en Benjamin en uit die stede wat hy op die gebergte van Efraim ingeneem het; en die altaar van die HERE wat voor die voorportaal van die HERE was, het hy herstel” (2 Kronieke 15:8). Lê jy ook moed aan die dag deur afvalligheid te verwerp en ware aanbidding te bevorder? Gebruik jy jou materiële middele om Koninkryksbelange te bevorder? En streef jy daarna om Jehovah te eer deur gereeld die goeie nuus as een van sy Getuies te verkondig?
21. (a) Hoe kan verslae van voor-Christelike handhawers van onkreukbaarheid ons help? (b) Wat sal in die volgende artikel bespreek word?
21 Hoe dankbaar is ons tog dat God skriftuurlike verslae oor moedige voor-Christelike handhawers van onkreukbaarheid behoue laat bly het! Hulle uitstekende voorbeeld kan ons help om heilige diens aan Jehovah met moed, godvrugtige vrees en ontsag te verrig (Hebreërs 12:28, NW). Maar die Christelike Griekse Geskrifte bevat ook voorbeelde van godvrugtige moed in aksie. Hoe kan party van hierdie verslae ons help om moedig in Jehovah se weë te wandel?
Hoe sou jy antwoord?
◻ Wat is moed?
◻ Hoe het Henog en Noag moed aan die dag gelê?
◻ In watter opsigte het Abraham, Sara en Isak moedig opgetree?
◻ Watter moedige voorbeeld het Moses, Josua en Kaleb gestel?
◻ Hoe het ander getoon dat hulle die moed gehad het om op God te vertrou?
[Prent op bladsy 15]
Gideon en sy groepie manskappe het moedig op Jehovah vertrou