Goeie en slegte vrugte
“Die HERE het my laat sien, en daar was twee mandjies met vye . . . In die een mandjie was baie goeie vye soos die voorvye; maar in die ander mandjie was baie slegte vye, te sleg om te eet.”—JEREMIA 24:1, 2.
1. Hoe het Jehovah medelyde vir sy volk, Israel, getoon, maar hoe het hulle gereageer?
DIT was die jaar 617 v.G.J. Dit was slegs tien jaar voor Jehovah se verdiende oordeel aan Jerusalem en sy mense voltrek is. Jeremia het reeds 30 jaar lank onvermoeid gepreek. Luister na Esra se aanskoulike beskrywing van die situasie, soos opgeteken in 2 Kronieke 36:15: “Die HERE, die God van hulle vaders, het vroeg en laat na hulle gestuur deur die diens van sy boodskappers; want Hy het medelyde met sy volk en met sy woning gehad.” En hoe is hy vir al hierdie moeite beloon? Esra deel ons met droefheid in vers 16 mee: “Maar hulle het die boodskappers van God uitgelag en sy woorde verag en met sy profete gespot, totdat die grimmigheid van die HERE teen sy volk opgekom het, totdat daar geen genesing meer was nie.”
2, 3. Beskryf die treffende visioen wat Jeremia van Jehovah af ontvang het.
2 Het dit beteken dat die volk Juda geheel en al uitgewis sou word? Om die antwoord hierop te kry, kan ons gerus ’n belangrike visioen bespreek wat Jeremia nou ontvang het en wat opgeteken is in hoofstuk 24 van die boek wat sy naam dra. God het in hierdie visioen twee mandjies vye gebruik om die situasie voor te stel wat onder sy verbondsvolk ontwikkel het. Hulle is deur twee heeltemal verskillende soorte vrugte verteenwoordig, naamlik goeie vrugte en slegte vrugte.
3 Jeremia hoofstuk 24, verse 1 en 2, beskryf wat God se profeet gesien het: “Die HERE het my laat sien, en daar was twee mandjies met vye, reggesit voor die tempel van die HERE—nadat Nebukadresar, die koning van Babel, Jegonja, die seun van Jojakim, die koning van Juda, en die vorste van Juda en die smede en die slotmakers uit Jerusalem in ballingskap weggevoer en hulle in Babel gebring het. In die een mandjie was baie goeie vye soos die voorvye; maar in die ander mandjie was baie slegte vye, te sleg om te eet.”
Die goeie vye in die visioen
4. Watter vertroostende boodskap het die visioen van die vye vir getroue Israeliete ingehou?
4 Nadat Hy Jeremia gevra het wat hy gesien het, het Jehovah verder in verse 5 tot 7 gesê: “Soos hierdie goeie vye, so sal Ek ten goede aansien die ballinge van Juda wat Ek uit hierdie plek na die land van die Chaldeërs weggestuur het; en Ek sal my oog op hulle slaan ten goede en hulle terugbring in hierdie land; en Ek sal hulle bou en nie afbreek nie, en hulle plant en nie uitruk nie. En Ek sal hulle ’n hart gee om My te ken, dat Ek [Jehovah] is; en hulle sal vir My ’n volk wees, en Ek sal vir hulle ’n God wees, want hulle sal na My terugkeer met hul hele hart.”
5, 6. (a) Hoe is party Israeliete ‘ten goede weggestuur’ na Chaldea? (b) Hoe het Jehovah ‘sy oog ten goede geslaan’ op getroue Israeliete in ballingskap?
5 Na aanleiding van wat Jehovah hier gesê het, blyk dit dus dat daar beter tye vir hulle voorgelê het, dat die volk Juda nie heeltemal uitgewis sou word nie. Maar wat is die betekenis van hierdie mandjie goeie vye?
6 Jegonja, of Jojagin, was slegs drie maande en tien dae koning oor Juda voordat hy Jerusalem sonder weerstand aan koning Nebukadnesar oorgegee het. Onder diegene wat saam met hom in ballingskap weggevoer is, was Daniël en sy drie Hebreeuse vriende, Hananja, Misael en Asarja, asook Esegiël. Hulle lewe is deur die koning van Babilon gespaar en daarom kan daar gesê word dat Jehovah al hierdie ballinge ten goede aangesien het toe hy hulle na die land van die Chaldeërs weggestuur het. Het julle opgemerk dat Jehovah ook beloof het om ‘sy oog ten goede op hulle te slaan’? Hoe is hierdie belofte vervul? In 537 v.G.J., 80 jaar later, het Jehovah koning Kores beweeg om ’n dekreet uit te vaardig wat ’n oorblyfsel van hulle nakomelinge toegelaat het om na die land Juda terug te keer. Hierdie getroue Jode het die stad Jerusalem herbou; hulle het ’n nuwe tempel vir die aanbidding van hulle God, Jehovah, gebou en hulle het heelhartig na hom toe teruggekeer. Dit alles het bewys dat hierdie ballinge en hulle afstammelinge vir Jehovah soos baie goeie voorvye was.
7. Wanneer en hoe het Jehovah sy oog “ten goede” op die hedendaagse Jeremia-klas geslaan?
7 Soos jy seker kan onthou, het ons in die vorige artikel, wat oor Jeremia se profetiese woorde gehandel het, geleer dat hulle ook vir ons 20ste eeu betekenis inhou. En dit geld ook vir hoofstuk 24. Gedurende die donker jare van die Eerste Wêreldoorlog het baie van Jehovah se toegewyde knegte in die een of ander opsig onder die invloed van Babilon die Grote gekom. Maar Jehovah se waaksame oog ‘was ten goede op hulle geslaan’. Gevolglik het Jehovah deur die Grotere Kores, Christus Jesus, die mag van Babilon die Grote oor hulle verbreek en hulle geleidelik in ’n geestelike paradys ingebring. Hierdie geestelike Israeliete het Jehovah se liefde beantwoord en heelhartig na hom toe teruggekeer. Toe, in 1931, het hulle met vreugde die naam Jehovah se Getuies aangeneem. Nou kon daar waarlik gesê word dat hulle in Jehovah se oë soos ’n mandjie baie goeie vye was.
8. In watter opsig het Jehovah se Getuies die vyesoetheid van die Koninkryksboodskap wêreldwyd verkondig?
8 En Jehovah se Getuies het nie die doel gemis van God se onverdiende goedhartigheid teenoor hulle toe hy hulle uit Babilon die Grote bevry het nie. Hulle het nie die vyesoetheid van die Koninkryksboodskap van goeie nuus vir hulleself gehou nie, maar hulle het dit wêreldwyd verkondig in gehoorsaamheid aan Jesus se woorde in Mattheüs 24:14: “Hierdie evangelie van die koninkryk sal verkondig word in die hele wêreld tot ’n getuies vir al die nasies.” En met watter resultaat? Meer as 4 700 000 skaapgeaardes wat nie geestelike Israeliete is nie, het uit Babilon die Grote gevlug!
Die slegte vye in die visioen
9. Wie word deur die slegte vye van Jeremia se visioen voorgestel, en wat sou met hulle gebeur?
9 Maar wat van die mandjie slegte vye in Jeremia se visioen? Jeremia vestig nou sy aandag op Jehovah se woorde in Jeremia hoofstuk 24, verse 8 tot 10: “Soos die slegte vye wat te sleg is om te eet—waarlik, so sê die HERE—só sal Ek Sedekia, die koning van Juda, maak en sy vorste en die oorblyfsel van Jerusalem wat in hierdie land oorgebly het en die wat in Egipteland woon; en Ek sal hulle ’n skrikbeeld maak, ’n onheil vir al die koninkryke van die aarde, ’n smaad en ’n spreekwoord, ’n spot en ’n vervloeking in al die plekke waarheen Ek hulle verdrywe; en Ek sal onder hulle stuur die swaard, die hongersnood en die pes, totdat hulle omgekom het uit die land wat Ek aan hulle en hulle vaders gegee het.”
10. Waarom het Jehovah Sedekia as ’n ‘slegte vy’ beskou?
10 Sedekia was toe werklik ’n ‘slegte vy’ in Jehovah se oë. Hy het nie net teen koning Nebukadnesar gerebelleer deur die eed van getrouheid te verbreek wat hy in Jehovah se naam aan hierdie koning afgelê het nie, maar hy het ook Jehovah se barmhartigheid, wat deur middel van Jeremia aan hom bewys is, geheel en al verwerp. Trouens, hy het selfs nie eens geskroom om Jeremia in die gevangenis te laat opsluit nie! Geen wonder dat Esra die koning se gesindheid in 2 Kronieke 36:12 soos volg opsom nie: “Hy het aangehou om te doen wat sleg was in die oë van Jehovah sy God. Hy het hom nie verootmoedig nie” (NW). In Jehovah se oë was Sedekia en die mense wat in Jerusalem agtergebly het soos ’n mandjie slegte, vrot vye!
Vrot figuurlike vye in ons dag
11, 12. Wie word vandag as slegte vye uitgeken, en wat sal met hulle gebeur?
11 Kyk nou na die hedendaagse wêreld. Dink jy ons kan ’n figuurlike mandjie slegte vye vind? Kom ons neem die feite in oënskou deur ons dag met dié van Jeremia te vergelyk. In hierdie 20ste eeu het Jehovah die Jeremia-klas, die gesalfde oorblyfsel, gebruik om die nasies onophoudelik aangaande sy naderende toorn tydens die groot verdrukking te waarsku. Hy het die nasies gemaan om aan hom die heerlikheid te gee wat sy naam toekom, om hom in gees en waarheid te aanbid en om sy heersende Seun, Christus Jesus, as die aarde se regmatige Heerser te erken. Wat was die reaksie? Presies dieselfde as in Jeremia se dag. Die nasies gaan voort om te doen wat sleg is in Jehovah se oë.
12 Wie is die aanstigters van hierdie rebelse gesindheid? Wie hou aan om hierdie boodskappers van God wat soos Jeremia is uit te lag deur hulle bevoegdheid om as God se bedienaars op te tree te bevraagteken? Wie hou aan om die Woord van God te verag? Wie sit vandag agter die meeste van die vervolging van Jehovah se Getuies? Die antwoord staan soos ’n paal bo water—dit is die Christendom, veral die geestelikes! En kyk net na al die Christendom se verdorwe, slegte vrugte wat in die vorige artikel bespreek is. O, ja, daar is beslis vandag ’n simboliese mandjie slegte vye op die aarde. Trouens, Jehovah sê dat hulle ‘te sleg is om te eet’. Jehovah se woorde deur Jeremia weerklink tot hier in ons dag: ‘Hulle sal omkom!’ Jehovah se grimmigheid teenoor die Christendom sal geen genesing vind nie.
’n Waarskuwende les vir ons
13. Hoe moet ons, met die oog op Paulus se woorde in 1 Korinthiërs 10:11, die visioen van die twee mandjies vye verstaan?
13 Wanneer ons die implikasies van Jeremia se geïnspireerde waarskuwingsboodskap ondersoek, weerklink die apostel Paulus se woorde in 1 Korinthiërs 10:11 in ons ore: “Maar al hierdie dinge het hulle oorgekom as voorbeelde en is opgeskrywe as ’n waarskuwing aan ons op wie die eindes van die eeue [“stelsels van dinge”, NW] gekom het.” Het ons die waarskuwing wat hierdie visioen van die twee mandjies vye vir ons inhou persoonlik ter harte geneem? Wat ons hier bespreek het, is ’n belangrike deel van die dinge wat Israel oorgekom het en wat vir ons as ’n waarskuwende voorbeeld dien.
14. Hoe het Israel op Jehovah se tere sorg gereageer?
14 Laat ons ten slotte dink aan Jehovah se woorde aan koning Dawid in verband met Israel, soos opgeteken in 2 Samuel 7:10: “Ek sal vir my volk Israel ’n plek bestel en hom plant.” Jehovah het sy volk, Israel, in elke opsig teer versorg. Die Israeliete het alle rede gehad om goeie vrugte in hulle lewe voort te bring. Hulle moes net na Jehovah se Goddelike onderrigting luister en sy gebooie onderhou. Maar slegs enkeles onder hulle het dit gedoen. Die meerderheid was so hardkoppig en opstandig dat hulle slegte, verdorwe vrugte voortgebring het.
15. Hoe het die hedendaagse geestelike Israel en hulle skaapgeaarde metgeselle op Jehovah se barmhartigheid gereageer?
15 Maar wat dan van ons dag? Jehovah het baie barmhartigheid aan sy oorblyfsel van geestelike Israel en hulle skaapgeaarde metgeselle bewys. Sedert hulle geestelike bevryding in 1919 is sy oog voortdurend op hulle. Soos hy deur Jesaja voorspel het, ontvang hulle daagliks Goddelike onderrigting van die grootste Onderrigter in die heelal, Jehovah God (Jesaja 54:13, NW). Hierdie Goddelike onderrigting, wat onder die toesig van sy geliefde Seun, Jesus Christus, geskied, het tot oorvloedige vrede onder hulle gelei en het hulle geleidelik in ’n hegter verhouding met Jehovah gebring. Wat ’n wonderlike geestelike atmosfeer skep dit tog vir ons almal om Jehovah te kan leer ken, na hom te luister en aan te hou om goeie vrugte in ons lewe voort te bring—vrugte wat tot eer van Jehovah strek! Dit beteken inderdaad ons lewe!
16. Hoe kan ons elkeen die visioen van die twee mandjies vye persoonlik toepas?
16 Maar ondanks al God se onverdiende goedhartigheid is daar nog sommige wat rebels word en hulle hart verhard, soos baie in eertydse Juda gedoen het, en wat slegte, verdorwe vrugte in hulle lewe voortbring. Hoe tragies is dit tog! Laat nie een van ons ooit die waarskuwende les vergeet wat deur hierdie twee mandjies vye met hulle vrugte—goeie en slegte vrugte—so duidelik onder ons aandag gebring is nie. Laat ons, terwyl Jehovah se verdiende oordeel teen die afvallige Christendom vinnig nader kom, die apostel Paulus se vermaning ter harte neem: ‘Wandel op ’n wyse wat Jehovah waardig is om hom ten volle te behaag onderwyl julle voortgaan om vrug te dra in elke goeie werk.’—Kolossense 1:10, NW.
Ter hersiening “Goeie en slegte vrugte” en paragrawe 1-4 van “Jehovah se geskil met die nasies”
◻ Wat stel die mandjie goeie vye voor?
◻ Hoe het dit duidelik geword wie deur die mandjie slegte vye in die visioen voorgestel word?
◻ Watter waarskuwende les bevat Jeremia se boodskap vir ons?
◻ Wat was belangrik omtrent die jaar 607 v.G.J.? en 1914 G.J.?
[Prent op bladsy 15]
Soos goeie vye het God se volk soet Koninkryksvrugte voortgebring
[Prent op bladsy 15]
Die Christendom is soos ’n mandjie slegte vye