Koninkryksverkondigers berig
God is geen aannemer van die persoon nie
DIE apostel Petrus het meer as 1 900 jaar gelede vir die leëroffisier Cornelius getuig en gesê: “Ek sien waarlik dat God geen aannemer van die persoon is nie, maar dat in elke nasie die een wat Hom vrees en geregtigheid doen, Hom welgevallig is” (Handelinge 10:34, 35). Cornelius het ’n vrees vir God sowel as ’n liefde vir geregtigheid aan die dag gelê. Hy het Petrus se getuienis aangeneem en ’n Christen geword.
Dieselfde beginsel geld vandag—God is geen aannemer van die persoon nie. Ons kan dit sien uit ’n ondervinding van Duitsland af. Die verslag lui:
“In ons gemeente se gebied is daar ’n groot Russiese militêre kamp. In 1989, kort nadat die Berlynse Muur geval het, het die ouere manne gevra of enige van die verkondigers Russies kan praat. ’n Paar van ons kan Russies praat en ons het in hierdie gebied gaan werk, iets wat groot vreugde meegebring het. Hier is een van die talle ondervindinge.
“Ek het saam met ’n ongedoopte verkondiger (wat sedertdien gedoop is) gewerk toe ons met ’n offisier gepraat het. Die offisier het geluister na wat ons gesê het en ons toe genooi om sy soldate toe te spreek. Hy het gesê dat hulle ook van God en die Bybel te wete moet kom, en ons het dus reëlings getref om terug te gaan.
“Ons het ’n suster wat Russies vlot kan praat, gevra om saam te gaan as ’n tolk. Ons het in die ontspanningslokaal van die barakke lektuur op ’n tafel uitgestal en 68 soldate toegespreek en hulle vrae beantwoord. Daarna het hulle gretig 35 boeke en byna 100 tydskrifte geneem. Toe ons die ontspanningslokaal verlaat het, het ons groepies gesien wat die lektuur bespreek.
“Ons het reëlings getref om op 4 Julie 1992 terug te gaan. Ons het om 10:50 vm. daar aangekom en die wag by die hek van die barakke het vir ons gesê dat die soldate ons verwag. ’n Majoor het ons in die ontspanningslokaal ingeneem, en ons het uitgevind dat ’n vrou, wat voorheen lektuur by ons geneem het vir die biblioteek, plakkate in die barakke opgeplak het om almal in kennis te stel dat ons kom. Drie broers het kort toesprake oor ons wêreldwye werk gehou en getoon waarom ons vertroue in die Bybel kan hê. Daarna het ons die gehoor genooi om vrae te vra en vir hulle antwoorde uit die Bybel gegee. Van die vrae was: Wat is Jehovah se Getuies se standpunt ten opsigte van militêre diens, en is enige van hulle soldate? Dit het die ongedoopte verkondiger wat my vroeër vergesel het ’n geleentheid gebied om sy 25 jaar lange loopbaan in die Oos-Duitse leër te beskryf, waarvan hy die laaste jare ’n kaptein in die lugmag was. Hy het vertel hoe hy God en die Bybel leer ken het en nou een van Jehovah se Getuies wou word. Die soldate was beïndruk deur wat hulle gehoor het. Binne sewe minute was al die lektuur wat ons saamgeneem het in die hande van die soldate, en daar was baie wat Bybels wou hê. Ons kon sewe Russiese Bybels by ’n boekwinkel koop en hulle was bly om dit te ontvang. Dit was ’n ware vreugde om Bybelinligting aan hierdie geestelik honger mense te verskaf en ons hoop dat hulle daarop sal reageer.”
Waarlik, God is geen aannemer van die persoon nie. Deur middel van sy Woord spreek hy tot opregtes van hart, ongeag wie en waar hulle mag wees. Hy nooi hulle om hom en sy Seun, Jesus Christus, te leer ken, en daar is baie uit alle lewensterreine wat dit doen.—Johannes 17:3.