Onthou jy?

Het jy dit geniet om die onlangse nommers van Die Wagtoring te lees? Wel, kyk of jy die volgende vrae kan beantwoord:

▫ Waarom het vroeë Christene nie Jesus se geboortedag gevier nie?

Volgens The World Book Encyclopedia ‘het die vroeë Christene nie [Jesus se] geboorte gevier nie omdat hulle die viering van enigiemand se geboorte as ’n heidense gebruik beskou het’.—12/15, bladsy 4.

▫ Moet gebede tot Jesus gerig word?

Nee, want gebede is ’n vorm van aanbidding wat uitsluitlik aan die almagtige God behoort. Deur al ons gebede tot Jehovah God te rig, toon ons dat ons ag slaan op Jesus se riglyne om te bid: “Ons Vader wat in die hemele is” (Matteus 6:9).—12/15, bladsy 25.

▫ Waarom is die ernstige sonde van koning Dawid anders geoordeel as die sondes van Ananias en Saffira? (2 Samuel 11:2-24; 12:1-14; Handelinge 5:1-11).

Koning Dawid se sonde was weens vleeslike swakheid. Toe hy met sy dade gekonfronteer is, het hy berou getoon, en Jehovah het hom vergewe—hoewel hy met die gevolge van sy sonde moes saamleef. Ananias en Saffira het gesondig deurdat hulle op skynheilige wyse leuens vertel en die Christengemeente probeer bedrieg het en dus ‘oneerlik teenoor die heilige gees en teenoor God opgetree het’ (Handelinge 5:3, 4). Dit was op stuk van sake ’n blyk van ’n goddelose hart, daarom is hulle swaarder geoordeel.—1/1, bladsye 27, 28.

▫ Wat kan ons help om Jehovah met ’n vreugdevolle hart te dien?

Ons moet ’n positiewe en waarderende beskouing van ons seëninge en godgegewe diensvoorregte aankweek, en ons moet nooit vergeet dat ons God behaag as ons sy Woord volg nie.—1/15, bladsye 16, 17.

▫ Watter twee dinge moet ons in gedagte hou as ons doeltreffende bemoediging wil gee?

Dink eerstens aan wat om te sê sodat die bemoediging spesifiek is. Soek tweedens na die geleentheid om iemand te nader wat lof verdien of wat bemoediging nodig het.—1/15, bladsy 23.

▫ Waarom het die “groot skare” “palmtakke in hulle hande”? (Openbaring 7:9).

Die feit dat daar met palmtakke gewaai word, toon dat die “groot skare” Jehovah se Koninkryk en sy gesalfde Koning, Jesus Christus, vreugdevol begroet. (Sien Levitikus 23:39, 40.)—2/1, bladsy 17.

▫ Watter waardevolle lesse vind ons in die boek Job?

Die boek Job toon vir ons hoe om probleme op te los. Dit voorsien treffende voorbeelde van hoe iemand wat beproewinge die hoof moet bied raad gegee moet word—en hoe om dit nie te doen nie. Daarbenewens kan Job se eie ondervinding ons help om op ’n gebalanseerde manier te reageer wanneer ons vind dat ongunstige omstandighede ons onderkry.—2/15, bladsy 27.

▫ Wat leer ons uit Jesus se wonderwerke?

Jesus se wonderwerke verheerlik God en stel ’n voorbeeld vir Christene om God te verheerlik (Romeine 15:6). Hulle moedig ons aan om goed te doen, vrygewigheid te betoon en medelye aan die dag te lê.—3/1, bladsy 8.

▫ Watter nut het dit as ouer manne voorbereide vrae met pastoegewydes hersien?

Dit bepaal of elke kandidaat basiese Bybelleerstellings ten volle verstaan en weet wat dit behels om ’n Getuie van Jehovah te wees.—3/1, bladsy 13.

▫ Hoe kan gebede uit die Bybel ons tot voordeel strek?

As ons skriftuurlike gebede van naderby beskou, kan ons dié identifiseer wat in situasies soortgelyk aan ons eie uitgespreek is. As ons sulke gebede vind, lees en bepeins, sal dit ons help om ons eie kommunikasie met Jehovah te verryk.—3/15, bladsye 3, 4.

▫ Wat is godvrugtige vrees?

Godvrugtige vrees is ontsag vir Jehovah, ’n diepe eerbied vir hom, wat gepaardgaan met ’n heilsame vrees om hom te mishaag (Psalm 89:7, NW).—3/15, bladsy 10.

▫ Wat is drie maniere waarop ons volgens die Bybel kosbaar in God se oë is?

Die Bybel leer dat ons elkeen in God se oë belangrik is (Lukas 12:6, 7); dit verduidelik wat Jehovah in ons waardeer (Maleagi 3:16) en dit vertel wat Jehovah gedoen het om sy liefde vir ons te bewys (Johannes 3:16).—4/1, bladsye 11, 12, 14.

▫ Waarom is Hebreërs 10:24, 25 nie net ’n bevel dat Christene moet vergader nie?

Hierdie woorde van Paulus stel ’n Goddelik geïnspireerde standaard vir alle Christelike vergaderinge—en in werklikheid vir enige geleentheid wanneer Christene met mekaar assosieer.—4/1, bladsy 16.