Wanneer hulle dit lees en hoe hulle daarby baat vind

Soggens vroeg:

’n Egpaar, wat albei sekulêre werk doen, het besluit om elke oggend net tien minute vroeër op te staan en daardie tyd te gebruik om die Bybel saam te lees voordat hulle inderhaas die huis verlaat. Wat hulle lees, voorsien ’n grondslag vir opbouende gesprekke nadat hulle die huis verlaat het.

’n Ouer man in Nigerië gebruik die program wat vir die Teokratiese Bedieningskool uiteengesit word as die grondslag vir sy gesin se Bybellees. Elke dag ná hulle bespreking van die dagteks, gewoonlik in die oggend, lees hulle ’n deel daarvan. Die kinders word om die beurt gevra om ’n stuk van die toegewese deel te lees. Dan word hulle genooi om vrae te vra oor die verse wat gelees is.

’n Huisvrou in Japan lees die Bybel al sedert 1985 elke jaar deur. Haar program is om elke dag van 5:00 vm. af 20 tot 30 minute te lees. Oor die voordele sê sy: “My geloof is versterk. Dit help my om van my siekte te vergeet en my aandag op die Paradyshoop te vestig.”

’n Suster wat al 30 jaar lank ’n pionier is maar wie se man nie ’n Getuie is nie, staan elke oggend vyfuur op om die Bybel te lees. Haar program vereis dat sy ongeveer vier bladsye in die Hebreeuse Geskrifte, ’n hoofstuk in die Christelike Griekse Geskrifte en ’n vers in Spreuke lees. Sy lees die Bybel al sedert 1959 elke jaar deur. Sy sê: “My Bybellees laat my voel dat Jehovah my liefhet . . . Ek ontvang aanmoediging, vertroosting en teregwysing.” Sy voeg by: “Wanneer ek die Bybel lees, is dit asof Jehovah my elke dag nuwe lewenskrag gee.”

’n Suster wat die waarheid geleer het in ’n land waar die bedrywigheid van Jehovah se Getuies verbied is, het ook ’n man wat haar geloof teëstaan. Sy kan haar Bybellees van Maandag tot Vrydag tussen 6:00 en 7:00 vm. doen. Dit gee haar innerlike krag. Oor die uitwerking wat haar Bybellees op haar het, sê sy: “Ons leer om Jehovah en Jesus lief te hê en om ondanks probleme en struikelblokke gelukkig te wees, omdat ons weet dat Jehovah se beloftes nie faal nie.”

’n Suster wat die Pionierdiensskool bygewoon het, was vasbeslote om die raad wat daar gegee is, toe te pas en van Bybellees ’n daaglikse gewoonte te maak. Eers kon sy dit tussen 5:00 en 6:00 vm. doen. Toe ’n werksverandering daarop inbreuk gemaak het, het sy dit verskuif na tussen 9:00 en 10:00 nm. Toe ander moeilike situasies ontstaan het, sê sy, “het ek my rooster bly verander na gelang van omstandighede”.

Later in die dag:

Twee vleeslike susters wat lede van die Brasiliaanse Bethelgesin is, het die gewoonte om die Bybel elke dag ná middagete sowat 20 minute lank saam te lees. Hulle het die hele Bybel al sowat 25 keer gelees; tog skryf hulle: “Ons vind altyd iets nuuts, en daarom word Bybellees nooit eentonig nie.”

’n Ongetroude suster in Japan het besef dat, hoewel sy as ’n Getuie grootgemaak is, sy die Skrif nie goed ken nie; toe sy ’n pionier geword het, het sy haar voorgeneem om die Bybel gereeld te lees. Nou doen sy haar Bybellees vir die Teokratiese Bedieningskool tydens haar rit hospitaal toe vir behandeling een dag per week. Later, wanneer sy weer tuis is, doen sy navorsing daaroor. Teen die einde van die week doen sy verdere Bybellees en kies sy die boeke volgens die volgorde waarin hulle geskryf is.

’n Dertienjarige seun wat die hele Bybel al drie keer gelees het, lees nou elke dag ’n hoofstuk wanneer hy van die skool af kom. Dít, sê hy, het hom gehelp “om meer liefde vir Jehovah te voel”.

’n Getuie wat ’n vol program as ’n werkende man, ’n ouer man, ’n eggenoot en ’n vader het, luister na bandopnames van die Bybel terwyl hy met die trein werk toe ry. By die huis lees hy daardie materiaal dan self.

Bo en behalwe haar persoonlike Bybellees luister ’n pionier in Frankryk na die bandopnames van die Bybel wanneer sy maaltye voorberei, wanneer sy bestuur, wanneer sy moeilike tye deurmaak of net vir die lekkerte.

’n Pionier in Japan, wat 21 jaar oud is, onthou dat sy moeder daarop aangedring het dat hy elke dag iets geesteliks inneem, en hy lees al sedert hy drie is daagliks die Bybel, al is dit nie altyd op dieselfde tyd nie. Nadat hy die deel gelees het wat hy vir die dag gekies het, maak hy ’n punt daarvan om die sleutelverse weer te lees, en dan neem hy ’n paar minute om dít wat hy gelees het in sy gedagtes te hersien.

’n Ander Getuie, ’n pionier, het die Bybel gedurende die afgelope 12 jaar sowat tien keer deurgelees. Haar man is ’n ongelowige, en daarom sorg sy dat sy haar Bybellees in die middag doen.

Saans:

’n Ouer man en gewone pionier in Japan lees sy Bybel al die afgelope agt jaar elke aand voor hy gaan slaap. Hy sê: “Ek hou veral baie van tekste wat toon hoe Jehovah dink, hoe hy oor sake voel en hoe hy situasies hanteer. Deur oor hierdie tekste te peins, kon ek Jehovah se gedagtes my eie maak en kon ek my Christenbroers en -susters en my gesinslede help.”

’n Ouer man in Frankryk lees al sedert 1979 elke aand ’n uur lank die Bybel. Hy het dikwels vyf of ses vertalings voor hom om met mekaar te vergelyk. Hy sê dat sy sorgvuldige Bybellees hom help verstaan “hoe om Bybelkennis in alledaagse situasies toe te pas”. Dit help hom ook om op ’n bekwamer wyse uit die Skrif raad te gee.

Die afgelope 28 jaar al maak ’n broer in Nigerië ’n gewoonte daarvan om die Bybelteks wat in Ondersoek die Skrif elke dag voorsien word in die aand te lees vir bespreking die volgende oggend. Daarmee saam lees hy ook die hele hoofstuk in die Bybel waaruit die teks geneem word. Sedert hy getroud is, hou hy hiermee aan en lees en bespreek hy en sy vrou die inligting.

’n Tiener wie se ouers nie Getuies is nie, het ’n gewoonte daarvan gemaak om elke aand vyf tot tien minute te lees voor sy gaan slaap. Hierdie minute is vir haar kosbaar en sy bid voor en ná haar Bybellees. Haar doel is om te weet wat die boodskap is wat Jehovah elke Bybelskrywer beweeg het om neer te skryf.

’n Getroude broer in Betheldiens sê dat hy die afgelope agt jaar die Bybel een keer per jaar deurlees. Hy lees 20 tot 30 minute lank voordat hy gaan slaap. Selfs as hy baie moeg is, vind hy dat hy nie kan slaap as hy in die bed klim sonder dat hy sy leeswerk gedoen het nie. Hy moet opstaan en in daardie geestelike behoefte voorsien.