Vrae van lesers
Galasiërs 6:8 sê: “Hy wat met die oog op sy vlees saai, sal verderwing uit sy vlees maai, maar hy wat met die oog op die gees saai, sal ewige lewe uit die gees maai.” Na watter “gees” word hier verwys, en hoe kan ons dus lewe maai?
Die Hebreeuse en Griekse terme wat met “gees” vertaal word, het ’n verskeidenheid van betekenisse soos: (1) God se werkende krag, (2) die lewenskrag in mense of diere, (3) ’n mens se verstandelike dryfkrag en (4) ’n geespersoon of engel. Die eerste hiervan—God se werkende krag—is die betekenis wat ons in Galasiërs 6:8 vind.
Kyk vir agtergrond na Galasiërs 3:2 waar ons die eerste gebruik van “gees” in die boek Galasiërs kry. Paulus het Christene gevra: “Het julle die gees ontvang weens werke van die wet of omdat julle deur geloof gehoor het?” Toe het hy in Galasiërs 3:5 getoon dat daardie “gees” met kragtige werke verband hou. Die “gees” waarna hy verwys het, was dus heilige gees, God se onsigbare werkende krag.
Paulus het later in Galasiërs 5:16 gees met vlees gekontrasteer. Ons lees: “Ek sê: Hou aan om deur gees te wandel, en julle sal hoegenaamd geen vleeslike begeerte uitvoer nie.” Met “vleeslike begeerte” het hy die vlees van sondige mense bedoel. Hy het dus in Galasiërs 5:19-23 “die werke van die vlees” teenoor “die vrugte van die gees” gestel.
Die persoon wat volgens Galasiërs 6:8 “met die oog op sy vlees saai”, moet gevolglik iemand wees wat homself deur sondige menslike begeertes laat lei en toegee aan “die werke van die vlees”. Hy kan die verderflike gevolge van sulke gedrag ervaar, en as hy nie verander nie, sal hy beslis nie die lewe in of onder God se Koninkryk verkry nie.—1 Korintiërs 6:9, 10.
As toegewyde Christene moet dit ons begeerte wees om ‘met die oog op God se gees te saai’. Dit behels ’n lewenswyse wat die heilige gees toelaat om vryelik in ons lewens te werk en ons te help om die vrugte daarvan te openbaar. Ons moet dit in gedagte hou wanneer ons besluit wat om te lees of na watter televisieprogramme om te kyk. Ons saai met die oog op die gees wanneer ons aandag skenk by gemeentelike vergaderinge en die raad van geesaangestelde ouer manne probeer toepas.—Handelinge 20:28.
Dit is interessant dat Galasiërs 6:8 eindig met die versekering dat ons kan verwag om ‘ewige lewe uit die gees te maai’ as ons in ooreenstemming met heilige gees saai. Ja, op grond van Christus se losprys sal God eindelose lewe deur die werking van die heilige gees moontlik maak.—Matteus 19:29; 25:46; Johannes 3:14-16; Romeine 2:6, 7; Efesiërs 1:7.