Vrae van lesers

Was Maria wat die moeder van Jesus geword het reeds swanger toe sy haar bloedverwant Elisabet gaan besoek het?

Ja, klaarblyklik was sy.

In Lukas hoofstuk 1 lees ons eers van die swangerskap van Elisabet, die vrou van die priester Sagaria, wat aan Johannes (die Doper) geboorte gegee het. Toe Elisabet ‘in haar sesde maand was, het die engel Gabriël’ Maria besoek om vir haar te sê dat sy swanger sou raak en aan die “Seun van die Allerhoogste” geboorte sou gee (Lukas 1:26, 30-33). Maar wanneer het Maria swanger geraak?

Lukas se verslag sê voorts dat Maria vervolgens na Juda toe gereis het om haar swanger bloedverwant Elisabet te gaan besoek. Toe die twee vroue mekaar sien, het die kindjie in Elisabet se moederskoot (Johannes) gespring. Elisabet het van ‘die vrug van Maria se moederskoot’ gepraat en Maria “die moeder van my Here” genoem (Lukas 1:39-44). Die logiese gevolgtrekking is derhalwe dat Maria reeds bevrug was, dat sy swanger was toe sy by Elisabet gaan kuier het.

Lukas 1:56 sê: “Toe het Maria omtrent drie maande by haar gebly en na haar eie huis teruggekeer.” Hierdie vers gee nie ’n noukeurige berekening tot op die presiese kalenderdag nie. Dit sê “omtrent drie maande”, wat beteken dat Elisabet in haar negende maand van swangerskap was.

Nadat sy Elisabet gedurende die laaste deel van haar swangerskap gehelp het, het Maria na haar huis in Nasaret vertrek. Maria het miskien besef dat Elisabet moontlik ná die geboorte (van Johannes) baie besoekers sou kry en dat party selfs van haar bloedverwante sou wees. Dit kon ’n ongetroude jong vrou wat self swanger was in die verleentheid bring. Hoe ver gevorderd was Maria se swangerskap toe sy na Nasaret vertrek het? Aangesien sy “omtrent drie maande” by Elisabet was, was Maria waarskynlik laat in die derde of vroeg in die vierde maand van haar swangerskap toe sy na Nasaret teruggekeer het.