Die waarheid omtrent engele

Om iemand te leer ken, behels gewoonlik dat jy iets omtrent daardie persoon se familie te wete kom. Dit geld ook wanneer ons Jehovah God leer ken. Daar is meer by betrokke as om bloot uit te vind wat sy naam is. Ons moet ook iets omtrent sy “familie” in die hemel te wete kom. (Vergelyk Efesiërs 3:14, 15.) Die Bybel noem die engele God se “seuns” (Job 1:6). As ons hulle belangrike rol in die Bybel in ag neem, behoort ons meer omtrent hulle te wil weet sodat ons hulle plek in God se voorneme kan verstaan.

’N NUWE subkultuur is aan die ontwikkel. Daar is nie net meer mense wat sê dat hulle in engele glo nie; ’n toenemende aantal beweer dat hulle op die een of ander manier deur hulle beïnvloed is. Toe 500 Amerikaners gevra is: “Het jy al ooit persoonlik ’n engel se teenwoordigheid in jou lewe ervaar?”, het byna ’n derde ja geantwoord. Die aantal jongmense wat bely dat hulle in engele glo, is ook verbasend—volgens een meningsopname in die Verenigde State is dit ’n volle 76 persent! Mense stel klaarblyklik in engele belang. Maar hoe vergelyk die huidige denke wat engele betref met Bybelwaarhede?

Satan se rol word verbloem

Wanneer ons van engele praat, moet ons nie die bestaan van goddelose engele ignoreer nie, hemelse skepsele wat volgens die Bybel teen God in opstand gekom het. Die vernaamste onder hulle is Satan. ’n Gewilde boek met die titel Ask Your Angels gee te kenne dat Satan bloot “’n aspek van God” is wat mense help om hulle “geestelike spiere” deur voortdurende versoekings te versterk. Ondanks Satan se “liefdevolle bedoelings”, sê die skrywers, is hy deur die eeue heen verkeerdelik met boosheid vereenselwig. Hulle voeg by dat Satan en Jesus, “hoewel hulle mekaar nie presies aanvul nie, ten minste aan dieselfde kant is, noodsaaklike dele van dieselfde geheel”. Dit is verbasende bewerings, maar wat sê die Bybel?

Die Bybel toon duidelik dat Satan nie “’n aspek van God” is nie, maar ’n vyand van God (Lukas 10:18, 19; Romeine 16:20). Hy betwis Jehovah se soewereiniteit, en sy bedoelings ten opsigte van mense is beslis nie “liefdevol” nie. Hy koel sy woede op hartelose wyse op God se aardse knegte. Hy beskuldig hulle dag en nag voor God! (Openbaring 12:10, 12, 15-17).a Satan is daarop uit om hulle te verlei al kos dit wat. Sy genadelose vervolging van die regverdige man Job het sy gevoellose gesindheid teenoor menselyding geopenbaar.—Job 1:13-19; 2:7, 8.

Satan en Jesus is alles behalwe “aan dieselfde kant”; hulle is in lynregte teenstelling met mekaar. Dit was tog ongetwyfeld Satan wat Herodes laat besluit het om ’n massakindermoord te gebied—dit alles in ’n poging om die jong kind Jesus te probeer doodmaak! (Matteus 2:16-18). En Satan se meedoënlose aanvalle het reg tot Jesus se dood voortgeduur (Lukas 4:1-13; Johannes 13:27). Jesus en Satan is dus nie “noodsaaklike dele van dieselfde geheel” nie, maar verskil geheel en al van mekaar. Bybelprofesieë toon dat hulle vyandskap onvermydelik is (Genesis 3:15). Dit is gepas dat dit die verrese Jesus is wat Satan op God se bestemde tyd sal vernietig.—Openbaring 1:18; 20:1, 10.

Gebede tot wie?

Party voorstanders van die engelebeweging beveel bepeinsing en ander tegnieke aan om met engele te kommunikeer. “’n Opregte versoek om met enige lid van die hemelse familie in aanraking te kom, sal nie geïgnoreer word nie”, sê een boek. “Vra en jy sal verhoor word.” Migael, Gabriël, Uriël en Rafael is van die engele wat deur die boek vir raadpleging aanbeveel word.b

Jesus het egter sy volgelinge geleer om tot God te bid, nie tot engele nie (Matteus 6:9, 10). Paulus het eweneens geskryf: “Laat julle versoeke in alles deur gebed en smeking tesame met danksegging by God bekend word” (Filippense 4:6). Christene nader dus niemand behalwe Jehovah in gebed nie, en hulle doen dit in die naam van Jesus Christus.c—Johannes 14:6, 13, 14.

Engele sonder kerkverband?

Volgens Eileen Elias Freeman, die leier van die AngelWatch-netwerk, “oorkom engele die grense van elke godsdiens, elke filosofie en elke geloofsbelydenis. Trouens, engele behoort aan geen godsdiens soos ons dit ken nie.”

Die Bybel toon egter duidelik dat getroue engele wel aan ’n godsdiens behoort; hulle aanbid die ware God, Jehovah, wat geen mededinging van ander gode duld nie (Deuteronomium 5:6, 7; Openbaring 7:11). So ’n engel het dus vir die apostel Johannes gesê dat hy “’n medeslaaf” is van diegene wat God se bevele gehoorsaam (Openbaring 19:10). Ons lees nêrens in die Bybel dat getroue engele enige ander vorm van aanbidding voorstaan nie. Hulle gee Jehovah uitsluitlike toegewydheid.—Exodus 20:4, 5, vgl. NW.

“Die vader van die leuen”

Baie sogenaamde ontmoetings met engele behels kommunikasie met die dooies. “Ek het die gevoel gehad dat my oom daarin geslaag het om met my in aanraking te kom en my te laat weet dat hy uiteindelik gelukkig is”, sê ’n vrou met die naam Elise nadat sy wat volgens haar ’n teken was, ontvang het. Terri onthou eweneens ’n goeie vriend wat gesterf het. “’n Week ná die begrafnis”, sê sy, “het hy na my toe gekom in wat ek gedink het ’n droom is. Hy het vir my gesê dat ek nie oor sy heengaan moes treur nie omdat hy gelukkig was en vrede geniet het.”

Maar die Bybel sê dat die dooies ‘glad niks weet nie’ (Prediker 9:5). Dit sê ook dat wanneer iemand sterf ‘dit in daardie dag met sy planne gedaan is’. (Psalm 146:4, ons kursiveer.) Satan is egter “die vader van die leuen” (Johannes 8:44). Hy is die een by wie die leuen ontstaan het dat die mensesiel ná die dood voortleef. (Vergelyk Esegiël 18:4.) Vandag glo baie mense dit, wat Satan help om sy doel te bereik, want dit misken die behoefte aan geloof in die opstanding—’n fundamentele leer van die Christelike geloof (Johannes 5:28, 29). Om dus inligting by die dooies te soek of om skynbaar boodskappe van hulle te ontvang, is net nog ’n aspek van die engelebeweging wat nie deur God goedgekeur word nie.

Toegang tot engele of tot demone?

Baie aspekte van die huidige engelebeweging het met die okkulte te doen. Beskou Marcia se ondervinding. “Vanaf September tot Desember 1986”, sê sy, “het ek boodskappe begin ontvang van ‘buite die derde dimensie’. Ek het verskynings gesien en ongelooflike drome van ’n ‘vorige lewe’ gehad. Ek het met vriende wat dood was in aanraking gekom en het baie ander psigiese ondervindinge gehad waarin ek dinge geweet het omtrent mense wat ek maar pas ontmoet het. Ek is ook later geseën met die gawe om outomaties te skryf en het boodskappe van onstoflike persone oorgedra. Sommige, wat ek nooit tydens hulle aardse lewe ontmoet het nie, het deur my boodskappe aan ander oorgedra.”

Die gebruik van waarsêery as ’n middel om met engele te “kommunikeer”, is niks ongewoons nie. Een bron moedig sy lesers openlik aan om gebruik te maak van magiese klippe, tarokkaarte, I Tsjing-munte, handlesery en sterrewiggelary. “Laat jou innerlike jou na die regte orakel lei”, skryf die skrywers, “en vertrou dat ’n engel jou daar sal ontmoet.”

Maar volgens die Bybel is wat ook al ‘jou daar ontmoet’ beslis nie een van God se engele nie. Waarom? Omdat waarsêery iets in openlike verset teen God is, en ware aanbidders—in die hemel en op die aarde—het niks daarmee te doen nie. In Israel was waarsêery immers ’n halsmisdaad! “Elkeen wat hierdie dinge doen, is vir die HERE ’n gruwel”, het die Wet gesê.—Deuteronomium 13:1-5; 18:10-12.

“’n Engel van lig”

Dit behoort ons nie te verbaas dat die Duiwel waarsêery voordelig, selfs van engele-oorsprong, kan laat lyk nie. Die Bybel sê dat Satan “self [aanhou] om hom in ’n engel van lig te verander” (2 Korintiërs 11:14). Hy kan selfs voortekens versin en hulle dan waar laat word en toeskouers wysmaak dat die voorbode van God af kom. (Vergelyk Matteus 7:21-23; 2 Tessalonisense 2:9-12.) Maar al Satan se werke—ongeag hoe deugsaam of hoe verdag hulle dalk lyk—bereik een van twee oogmerke: om mense teen Jehovah te laat draai of bloot hulle verstande te verblind sodat ‘die verligting van die heerlike goeie nuus oor die Christus nie sou deurskyn nie’ (2 Korintiërs 4:3, 4). Hierdie laasgenoemde metode van misleiding is dikwels die doeltreffendste.

Beskou die Bybelverslag van ’n diensmeisie in die eerste eeu. Haar voorspellings het haar here groot wins verskaf. Baie dae lank het sy die dissipels gevolg en gesê: “Hierdie mense is slawe van die Allerhoogste God, wat aan julle die weg van redding verkondig.” Haar woorde was waar. Maar die verslag toon vir ons dat sy besete was, nie van ’n engel nie, maar van “’n waarsêende demoon”. Uiteindelik het Paulus “omgedraai en vir die gees gesê: ‘Ek beveel jou in die naam van Jesus Christus om uit haar uit te kom.’ En hy het daardie selfde uur nog uitgekom.”—Handelinge 16:16-18.

Waarom het Paulus hierdie gees uitgedryf? Dit het per slot van rekening die here van die demoonbesete meisie groot inkomste verskaf. Met bonatuurlike mag het die diensmeisie moontlik vir plaasboere gesê wanneer om te plant, vir jong vroue wanneer om te trou en vir myngrawers waar om na goud te soek. Hierdie gees het die meisie selfs beweeg om ’n paar woorde van waarheid te spreek en die dissipels in die openbaar te prys!

Dit was nietemin “’n waarsêende demoon”. As sodanig het hy geen reg gehad om dinge oor Jehovah en sy voorsiening vir redding te verkondig nie. Sy vleiende opmerkings, wat miskien geuiter is om die diensmeisie se voorspellings geloofwaardig te laat lyk, het toeskouers se aandag van Christus se ware volgelinge afgetrek. Paulus het tereg die Korintiërs gewaarsku: “Julle kan nie deel hê aan ‘die tafel van Jehovah’ en die tafel van demone nie” (1 Korintiërs 10:21). Dit is geen wonder dat eerste-eeuse Christene al hulle boeke oor waarsêery vernietig het nie.—Handelinge 19:19.

’n ‘Engel wat in die middel van die hemel vlieg’

Soos ons gesien het, toon die Bybel dat baie aspekte van die huidige engelebeweging in noue verband staan met God se Teenstander, Satan die Duiwel. Beteken dit dat heilige engele nie by menseaangeleenthede betrokke is nie? Inteendeel, hulle verrig tans ’n kragtige werk op die aarde. Wat is dit? Vir die antwoord moet ons na die Bybelboek Openbaring gaan. Daar word meer van die engele in hierdie boek gepraat as in enige ander boek van die Bybel.

In Openbaring 14:6, 7 lees ons die apostel Johannes se verslag van ’n profetiese visioen wat hy gehad het: “Ek het ’n ander engel in die middel van die hemel sien vlieg, en hy het ewige goeie nuus gehad om as blye tyding bekend te maak aan dié wat op die aarde woon, en aan elke nasie en stam en taal en volk, en hy het met ’n harde stem gesê: ‘Vrees God en gee hom heerlikheid, want die uur van die oordeel deur hom het aangebreek, en aanbid dus die Een wat die hemel en die aarde en see en waterfonteine gemaak het.’”

Hierdie teks vestig die aandag op die vernaamste werk wat die engele vandag doen. Hulle is betrokke by ’n dringende toewysing—om die goeie nuus van God se Koninkryk te verkondig. Dit was met betrekking tot hierdie werk dat Jesus sy volgelinge belowe het: “Ek is met julle al die dae tot aan die voleinding van die stelsel van dinge” (Matteus 28:18-20). In watter sin is Jesus met sy volgelinge? Een manier is om hulle van engelebystand te voorsien sodat hierdie enorme werk uitgevoer kan word.

Jehovah se Getuies bestee jaarliks meer as ’n miljard uur aan die verkondiging van die goeie nuus van God se Koninkryk. Terwyl hulle hierdie werk doen, sien hulle bewyse dat engele hulle lei. In hulle bediening van deur tot deur het hulle al dikwels met persone in aanraking gekom wat ’n oomblik tevore gebid het dat iemand hulle moet help om God se voornemens te verstaan. Leiding deur engele tesame met die Getuies se eie inisiatief het daartoe gelei dat honderdduisende mense jaarliks kennis van Jehovah inneem!

Luister jy na die engel wat in die middel van die hemel vlieg? Wanneer Jehovah se Getuies jou besoek, kan jy gerus hierdie boodskap van die engel breedvoeriger met hulle bespreek.

[Voetnote]

[Venster op bladsy 8]

WIE IS DIE ENGELE?

IN TEENSTELLING met wat baie glo, is engele nie die heengegane siele van mense wat gesterf het nie. Die Bybel sê uitdruklik dat die dooies ‘glad niks weet nie’ (Prediker 9:5). Waar kom die engele dan vandaan? Die Bybel toon dat hulle individueel deur God geskep is voor die grondlegging van die aarde (Job 38:4-7). God se hemelse gesin kan uit honderdmiljoene, miskien miljarde of meer, bestaan! Party engele het by Satan aangesluit in sy opstand.—Daniël 7:10; Openbaring 5:11; 12:7-9.

Aangesien Jehovah ’n God van orde is, is dit geen wonder dat sy groot engelegesin georganiseerd is nie.—1 Korintiërs 14:33.

• Die vernaamste engel, wat krag sowel as gesag betref, is die aartsengel, Jesus Christus, wat ook Migael genoem word (1 Tessalonisense 4:16; Judas 9). Onder sy gesag is serafs, gerubs en engele.

• Serafs dien om God se troon. Hulle toewysing behels klaarblyklik om God se heiligheid te verkondig en sy volk rein te hou.—Jesaja 6:1-3, 6, 7.

• Gerubs word ook in Jehovah se teenwoordigheid gesien. As draers of geleide van God se troon verdedig hulle Jehovah se majesteit.—Psalm 80:2; 99:1; Esegiël 10:1, 2.

• Engele (wat “boodskappers” beteken) is agente en verteenwoordigers van Jehovah. Hulle volbring die Goddelike wil, hetsy dit die verlossing van God se volk of die vernietiging van die goddelose behels.—Genesis 19:1-26.

[Prente op bladsy 7]

Luister jy na die engel wat in die middel van die hemel vlieg?