Hoe om vreugde uit die dissipelmaakwerk te put
EEN van die grootste vreugdes wat ’n mens kan ervaar, is om ’n medewerker van God te wees. God se werk behels vandag onder meer dat regverdiggesindes in die Christengemeente versamel word en dat hulle opgelei word vir lewe as Christene nou en ook vir oorlewing tot in ’n nuwe wêreld.—Miga 4:1-4; Matteus 28:19, 20; 2 Petrus 3: 13.
Vir Jehovah se Getuies in Latyns-Amerika het dit groot vreugde verskaf om te sien hoe ’n miljoen mense sedert 1980 dissipels van Jesus Christus geword het. In hierdie vrugbare veld, waar baie die Bybel respekteer en glo, kon party voltydse bedienaars tientalle mense help om hulle lewe aan Jehovah toe te wy. Aangesien hulle soveel ondervinding het, kan hulle ons miskien iets vertel van die vreugde om dissipels te maak. Van hulle wenke kan jou dalk help om vreugde uit die dissipelmaakwerk te put waar jy woon.
Hoe om potensiële “skape” uit te ken
“In watter stad of dorpie julle ook al ingaan, ondersoek wie daarin verdienstelik is”, het Jesus gesê toe hy sy apostels uitgestuur het om die predikingswerk te doen (Matteus 10:11). Hoe kan jy wanneer jy mense besoek dié uitken wat geestelik gehelp kan word? Edward, wat al meer as 50 jaar ’n voltydse bedienaar is, sê: “Hulle openbaar dit deur hulle opregte vrae en hulle tevredenheid wanneer hulle die antwoorde uit die Skrif ontvang.” Carol voeg by: “As iemand my in sy vertroue neem en van ’n persoonlike probleem of bekommernis vertel, is dit in werklikheid ’n hulpkreet. Ek probeer nuttige inligting in die Wagtoringgenootskap se publikasies vind. Sulke persoonlike belangstelling lei dikwels tot ’n Bybelstudie.” Maar opregtes word nie altyd maklik uitgeken nie. Luis vertel: “Party wat skynbaar baie belanggestel het, het op die ou end glad nie belanggestel nie, maar ander wat aanvanklik gelyk het asof hulle teen ons gekant is, het verander toe hulle hoor wat die Bybel werklik sê.” Aangesien baie Latyns-Amerikaners die Bybel respekteer, sê hy verder: “Ek ken diegene uit wat geestelik gehelp kan word wanneer hulle geredelik aanvaar wat die Bybel sê ná ek dit vir hulle gewys het.” Om sulke ‘verdienstelikes’ te help om geestelik vordering te maak, het ware vreugde en bevrediging tot gevolg. Hoe kan jy dit doen?
Begin Bybelstudies
Die beste manier waarop ons mense kan help om Bybelwaarheid te verstaan, is gewoonlik om die Bybelstudiehulpe te gebruik wat “die getroue en verstandige slaaf” voorsien het (Matteus 24:45). Hoe kan jy waardering opbou vir die waarde van sulke Bybelstudiehulpe? Edward sê: “Aangesien mense se omstandighede, persoonlikhede en sienswyses soveel van mekaar verskil, probeer ek aanpasbaar wees wanneer ek studies begin.” Jy kan nie dieselfde metode met almal gebruik nie.
Met party sal verskeie informele besprekings van die Skrif dalk nodig wees voordat jy ’n Bybelstudiehulp kan begin gebruik. ’n Sendelingegpaar sê nietemin: “Ons bied gewoonlik ’n studie op die eerste besoek aan.” ’n Getuie wat 55 mense gehelp het om hulle toe te wy, sê eweneens: “Ek begin hoofsaaklik Bybelstudies deur direk met die boek Jy kan vir ewig in die Paradys op aarde lewe te begin.” Hoewel party niks wil bestudeer nie, is ander gretig om enigiets te bestudeer wat hulle glo hulle in die lewe sal help. Die aanbod van gratis Bybelklasse by hulle huis klink dikwels vir diegene aantreklik. Party sendelinge verduidelik wat hierdie aanbod behels en sê dan: “Ek wil graag vir jou wys hoe ons dit doen. As jy daarvan hou, kan jy daarmee voortgaan. As jy nie daarvan hou nie, is dit jou keuse.” Wanneer dit so gestel word, voel mense nie bang om dit te aanvaar nie.
’n Ander Getuie, wat al baie behoeftiges en mense met min skoolopleiding gehelp het, sê: “Ek het gevind dat die traktate besonder nuttig is om Bybelstudies mee te begin.” Ongeag watter publikasie hulle gebruik, die voltydse onderrigters probeer die Bybel beklemtoon. Carola sê: “Tydens die eerste studie gebruik ek net die prente en omtrent vyf tekste, sodat die hoofgedagtes duidelik na vore kom en die Bybel nie moeilik lyk nie.”
Hou die belangstelling lewendig
Omdat mense daarvan hou om te voel dat hulle vordering maak, stel Jennifer voor: “Maak die studie lewendig. Hou die studie teen ’n bestendige pas.” As die studie gereeld gehou word sonder dat weke oorgeslaan word, help dit ook om hulle te laat voel dat hulle iets bereik. ’n Spesiale pionier wat op die platteland grootgeword het, verduidelik die belangrikheid daarvan om verduidelikings eenvoudig te hou en op die hoofgedagtes te konsentreer, sodat selfs diegene met min skoolopleiding vordering kan maak. Hy sê: “In ons dorpie moes ons water op die grond sprinkel nadat ons saadjies gesaai het. As ons die lande oorstroom het, het die grond ’n harde kors gevorm waardeur die kiemplantjies nie kon dring nie, en dit het doodgegaan. As jy nuwe belangstellendes eweneens met baie gedagtes oorstroom, kan dit te moeilik lyk en hulle laat ophou studeer.” Selfs mense met ’n weetgierige gees moet leer om op een onderwerp op ’n slag te konsentreer as hulle vordering wil maak in hulle begrip. Jesus het vir sy apostels gesê: “Ek het nog baie dinge om vir julle te sê, maar julle kan dit nie nou dra nie.”—Johannes 16:12.
Nog ’n manier om die belangstelling lewendig te hou, is om diegene wat jy besoek aan te moedig om oor God se Woord te bly dink nadat jy weg is. Yolanda stel voor: “Laat hulle met ’n onbeantwoorde vraag. Gee vir hulle ’n bietjie huiswerk om te doen, soos om ’n gedeelte uit die Bybel te lees of ’n onderwerp te ondersoek wat vir hulle van belang is.”
Ontwikkel ’n liefde vir Jehovah
Jou vreugde sal toeneem wanneer jy jou studente help om “daders van die woord en nie net hoorders” te word nie (Jakobus 1:22). Hoe kan jy dit doen? Ware Christene word deur liefde vir Jehovah beweeg. Pedro, wat van Mexiko kom, verduidelik: “Mense kan nie iemand liefhê wat hulle nie ken nie, daarom leer ek hulle van die eerste studie af God se naam uit die Bybel en is ek op die uitkyk vir geleenthede om Jehovah se eienskappe te beklemtoon.” Jy kan in gesprekke met hulle waardering vir Jehovah opbou deur te vertel hoe jy oor hom voel. Elizabeth sê: “Ek probeer altyd Jehovah se goedheid meld. As ek tydens my studies ’n pragtige blom, ’n mooi voëltjie of ’n spelerige katjie sien, noem ek altyd dat dit Jehovah se handewerk is.” “Praat van God se beloofde nuwe wêreld as die werklikheid wat jy weet dit is”, stel Jennifer voor. “Vra hulle wat hulle graag in die nuwe wêreld wil doen.”
Wanneer iemand met waardering peins oor die dinge wat hy aangaande Jehovah leer, sink dit in sy hart in en beweeg dit hom tot optrede. Maar hy kan nie peins tensy hy onthou nie. ’n Kort hersiening van drie of vier hoofgedagtes ná elke studie is ’n geheuehulp. Baie Bybelonderrigters laat nuwelinge sleuteltekste saam met ’n aantekening agter in hulle Bybel neerskryf. ’n Sendeling van Engeland noem nog ’n voordeel van hersienings: “Ek vra hulle hoe hulle by die inligting baat gevind het. Dit laat hulle met waardering oor Jehovah se weë en wette peins.”
’n Getroue Getuie wat aan Gilead se derde klas gegradueer het, sê: “Ons moet entoesiasties wees. Ons studente moet besef dat ons glo wat ons hulle leer.” Die geloof wat jou ’n gelukkige “dader van die werk” gemaak het, kan aansteeklik wees as jy daaraan uiting gee.—Jakobus 1:25.
“Ek vind dat mense nader aan God voel as ek hulle help om te sien hoe hulle gebede verhoor word”, sê ’n Getuie wat al baie mense gehelp het om Jehovah te aanbid. “Ek gee vir hulle voorbeelde van dinge wat ek self ervaar het, soos hierdie ondervinding: Toe ek en my maat in ’n nuwe toewysing as pioniers aangekom het, het ons net ’n bietjie groente en ’n pakkie margarien gehad en niks geld nie. Ons het die kos met aandete klaargemaak en gesê: ‘Nou het ons niks vir môre nie.’ Ons het daaroor gebid en toe bed toe gegaan. Vroeg die volgende oggend het ’n plaaslike Getuie ons besoek en haar voorgestel en gesê: ‘Ek het gebid dat Jehovah pioniers stuur. Nou kan ek die grootste deel van die dag saam met julle werk, maar aangesien ek ’n hele end hiervandaan woon, sal ek middagete saam met julle moet eet, en daarom het ek hierdie kos vir ons almal saamgebring.’ Dit was ’n groot klomp beesvleis en groente. Ek sê altyd vir my studente dat Jehovah ons nooit verlaat as ons eers sy Koninkryk soek nie.”—Matteus 6:33.
Bied praktiese hulp aan
Daar is meer by die maak van dissipels van Christus betrokke as om ’n Bybelstudie te hou. ’n Sendeling wat baie jare lank as ’n reisende opsiener gedien het, sê: “Gee hulle tyd. Moenie onmiddellik ná die studie weggaan nie. As dit gepas is, bly en gesels ’n rukkie.” Elizabeth sê: “Ek toon belangstelling in hulle omdat lewe daarby betrokke is. Ek bekommer my dikwels oor hulle asof hulle my kinders is.” Ander Getuies het hierdie wenke gegee: “Besoek hulle wanneer hulle siek is.” “Wanneer jy in die omgewing is, byvoorbeeld wanneer jy velddiens doen, kan jy by hulle inloer om ander Getuies aan hulle voor te stel.” Eva sê: “Luister aandagtig sodat jy die persoon se agtergrond en lewensomstandighede kan verstaan. Dit beïnvloed hoe mense op die waarheid reageer en kan hulle vordering belemmer. Wees hulle vriend, sodat hulle die vrymoedigheid sal hê om met jou oor hulle probleme te praat.” Carol voeg by: “Opregte belangstelling in die persoon is belangrik aangesien die veranderinge wat die waarheid in sy lewe gaan meebring soms die verlies van familie en vriende sal beteken. Dit is gewoonlik goed as die student weet waar ons woon en die vrymoedigheid het om te eniger tyd na ons toe te kom.” Help hom om die gemeente as sy nuwe familie te beskou.—Matteus 10:35; Markus 10:29, 30.
“Wees gereed om praktiese hulp aan te bied. Sit saam met hulle by die vergaderinge, en help hulle met hulle kinders”, sê Yolanda. Die dissipelmaakwerk behels ook dat ons nuwelinge wys hoe om hulle kinders op te lei, sindeliker te wees, kommentare vir die vergaderinge voor te berei en toesprake in die Teokratiese Bedieningskool te hou. ’n Ander suster voeg by: “Dit is belangrik om nuwelinge vir die bediening op te lei. Wanneer hierdie aspek van hulle opleiding oor die hoof gesien word, bly party skrikkerig vir die predikingswerk, verloor hulle hulle vreugde in hulle diens aan Jehovah en volhard hulle nie.” Lei hulle dus sorgvuldig op sodat hulle van huis tot huis kan werk, herbesoeke kan doen en Bybelstudies kan begin. Jy sal groot vreugde hê wanneer jy sien hoe jou student met jou hulp en leiding vordering maak.
Versterk hulle om te volhard
“Daar is ’n neiging om die studie af te skeep ná die student gedoop is”, waarsku ’n ervare dissipelmaker. Die onderrigter sowel as die student moet onthou dat ’n pasgedoopte Christen lank nie geestelik volwasse is nie. Hy moet nog baie in sy geloof, in sy waardering vir God se wet en in sy liefde vir Jehovah groei. Dit is noodsaaklik om hom aan te moedig om goeie persoonlike studiegewoontes aan te kweek sodat hy sal aanhou om vooruitgang te maak.—1 Timoteus 4:15.
Die nuweling het dalk hulp nodig om vordering te maak en ’n gasvrye lid van die gemeenskap van broers te word. Namate hy die broers beter leer ken, moet hy dalk gehelp word om hulle onvolmaakthede te verwerk (Matteus 18:15-35). Hy het dalk hulp nodig om ’n bekwame onderrigter te word, wat sy eie navorsing kan doen. ’n Sendeling vertel: “Een student wou ná haar doop haar vermoë as ’n onderrigter verbeter en het dus vir my gesê: ‘Ek moet volgende week ’n nuwe studie hou, maar ek moet my geheue verfris oor die eerste klompie hoofstukke wat ek studeer het. Kan jy asseblief hierdie hoofstukke weer een-een met my deurgaan, sodat ek op die verduidelikings van die tekste en illustrasies kan let en dan kan ek dit gebruik wanneer ek na my studie gaan?’ Sy het ’n uitstekende onderrigter geword, en vier van haar studente is by een byeenkoms gedoop.”
Waarom die dissipelmaakwerk die inspanning werd is
“Wanneer ons dissipels maak, beteken dit meer lowers van Jehovah. Dit beteken lewe vir dié wat die waarheid aanneem”, sê Pamela. “Ek hou baie daarvan om ander die waarheid te leer—dis so wonderlik! ’n Mens sien hoe die studente geleidelik vordering maak, hulle lewe verander en struikelblokke te bowe kom wat onoorkombaar sou lyk as dit nie vir Jehovah se gees was nie. Baie van dié wat geleer het om Jehovah lief te hê, het baie dierbare vriende van my geword.”
“Wanneer ek dink aan diegene wat ek gehelp het om dissipels te word,” vertel een sendeling van Duitsland, “sien ek party baie skugter mense wat soveel vooruitgang as bedienaars van God gemaak het dat ek dit skaars kan glo. Ek sien mense wat, duidelik met Jehovah se hulp, groot struikelblokke te bowe kom. Ek sien gesinne wat eens gebroke was, maar wat nou verenig is—gelukkige kinders met verantwoordelike ouers. Ek sien mense wat sinvolle lewens geniet terwyl hulle Jehovah loof. Dít is die vreugde van die dissipelmaakwerk.”
Ja, om ’n medewerker van Jehovah God in die dissipelmaakwerk te wees, is ’n bron van weergalose vreugde. Die ondervindinge van die sendelinge en pioniers het dit bewys. Jy kan dieselfde vreugde en bevrediging vind as jy die wenke toepas en heelhartig daaraan werk. Met Jehovah se seën sal jou vreugde volkome wees.—Spreuke 10:22; 1 Korintiërs 15:58.