Jy kan blywende vriendskappe geniet
DAAR is struikelblokke wat in die pad van vriendskappe staan. Trouens, die Bybel het voorspel dat daar in hierdie “laaste dae” ’n gebrek aan liefde, natuurlike geneentheid en lojaliteit sou wees (2 Timoteus 3:1-5; Matteus 24:12). Hierdie toestande het tot ’n ongekende plaag van eensaamheid gelei. Een persoon het gesê: “Dit is soos Noag se ark in ons buurt. As jy nie ’n egpaar is nie, kan jy nie aan boord gaan nie.” Die eensame individu kan nie alleen al die skuld hiervoor kry nie. In party dele van die wêreld sluit uitdagings met betrekking tot blywende vriendskappe onder meer dinge in soos mense wat meer dikwels verhuis, gesinne wat verbrokkel, onpersoonlike en gevaarlike stede en ’n merkbare afname in vrye tyd.
’n Hedendaagse stedeling kan in ’n week met meer mense in aanraking kom as wat ’n 18de-eeuse dorpenaar in ’n jaar of selfs ’n leeftyd gesien het! Tog is verhoudings tussen mense vandag dikwels oppervlakkig. Baie is behep daarmee om voortdurend sosiaal te verkeer en genot na te jaag. Maar ons moet erken dat ydele plesier saam met slegte vriende soos die gebruik van doringtakke as brandhout is. Prediker 7:5, 6 sê: “Dit is beter om te luister na die bestraffing van ’n wyse as dat ’n mens luister na die lied van die dwase. Want soos die geknetter van doringtakke onder ’n pot, so is die gelag van ’n dwaas. Dit is dan ook tevergeefs.” Doringtakke maak ’n kort rukkie ’n helder en knetterende vuur, maar dit gee nie genoeg hitte af om ons warm te hou nie. Luidrugtige, plesierige metgeselle kan ons gedagtes eweneens ’n kort rukkie aflei, maar hulle sal nie alle eensaamheid wegneem en ons behoefte aan ware vriende bevredig nie.
Daar is ’n verskil tussen alleenheid en eensaamheid. Dit is nodig om soms alleen te wees, want dit verkwik ons sodat ons gevolglik meer sal hê om as vriend aan ander te gee. Baie wend hulle onmiddellik tot die een of ander vorm van elektroniese vermaak wanneer hulle eensaam voel. Een studie het bevind dat een van die algemeenste reaksies op eensaamheid televisiekykery is. Tog het die navorsers tot die slotsom gekom dat langdurige televisiekykery een van die slegste dinge is wat ons kan doen as ons eensaam is. Dit bevorder passiwiteit, verveeldheid en fantasie, en word ’n slegte plaasvervanger vir aangesig-tot-aangesig-interaksie met ander mense.
Dit kan eintlik baie waardevol wees om alleen te wees as ons die tyd wat ons alleen is konstruktief gebruik. Ons kan lees, briewe skryf, dinge maak en rus. Konstruktiewe gebruik van ons tyd alleen sluit gebed tot God, ’n studie van die Bybel en die bepeinsing daarvan in (Psalm 63:7). Dit is maniere om nader aan Jehovah God te kom, die een wat ons grootste Vriend kan wees.
Bybelse voorbeelde van vriendskappe
Hoewel dit goed is om vriendelik met baie mense te wees, herinner die Bybel ons daaraan dat ‘daar ’n vriend is wat sterker aanhang as ’n broer’ (Spreuke 18:24). Ons almal het ’n paar intieme vriende nodig wat werklik vir ons omgee en wie se vriendskappe ons vreugde, krag en vrede verskaf. Hoewel sulke ware vriendskappe dalk vandag iets ongewoons is, is ’n paar eertydse voorbeelde spesiaal in die Bybel opgeteken. Daar was byvoorbeeld die uitstaande vriendskap tussen Dawid en Jonatan. Wat kan ons daaruit leer? Waarom het hulle vriendskap gehou?
Om maar een ding te noem, Dawid en Jonatan het belangrike strewes gemeen gehad. Hulle was bowenal albei hartgrondig toegewy aan Jehovah God. Toe Jonatan Dawid se geloof in God en sy dade ter verdediging van Jehovah se volk gesien het, “het die siel van Jonatan verkleef geraak aan die siel van Dawid, en Jonatan het hom liefgekry soos sy eie siel” (1 Samuel 18:1). ’n Gemeenskaplike liefde vir God help dus om ’n hegte band tussen vriende te vorm.
Jonatan en Dawid was sterk individue wat volgens Goddelike beginsels geleef het. Hulle kon mekaar derhalwe respekteer (1 Samuel 19:1-7; 20:9-14; 24:7). Ons is inderdaad geseënd as ons godvrugtige vriende het wat deur skriftuurlike beginsels gelei word.
Ander faktore het tot Dawid en Jonatan se vriendskap bygedra. Hulle verhouding was eerlik en openhartig, en die een het die ander in sy vertroue geneem. Jonatan het op lojale wyse Dawid se belange bo sy eie gestel. Hy was nie jaloers omdat Dawid die koningskap beloof is nie; Jonatan het hom eerder emosioneel en geestelik ondersteun. En Dawid het sy hulp aanvaar (1 Samuel 23:16-18). Dawid en Jonatan het op skriftuurlik gepaste maniere hulle gevoelens vir mekaar bekend gemaak. Hulle godvrugtige vriendskap was op opregte waardering en toegeneentheid gebou (1 Samuel 20:41; 2 Samuel 1:26). Dit was onverbreeklik omdat albei manne aan God getrou gebly het. As ons hierdie beginsels toepas, kan dit ons help om vriendskappe op te bou en te hou.
Hoe om vriendskappe aan te kweek
Is jy op soek na ware vriende? Jy hoef dalk nie ver te gaan soek nie. Party van die mense met wie jy gereeld in aanraking kom, kan jou vriende wees, en hulle het dalk jou vriendskap nodig. Veral met betrekking tot mede-Christene is dit verstandig om die apostel Paulus se raad toe te pas om ‘verruim te word’ (2 Korintiërs 6:11-13). Maar moenie ongelukkig word as elke poging om ’n vriend te maak nie op ’n hegte vriendskapsband uitloop nie. Dit neem gewoonlik tyd om ’n vriendskap te ontwikkel, en nie alle verhoudings sal ewe diep wees nie (Prediker 11:1, 2, 6). As ons ware vriendskappe wil geniet, moet ons natuurlik onselfsugtig wees, en ons moet Jesus se raad volg: “Alles wat julle dus wil hê dat die mense aan julle moet doen, moet julle ook net so aan hulle doen.”—Matteus 7:12.
Wie het jou vriendskap nodig? Behalwe diegene van jou eie ouderdom, wat van jonger of ouer mense? Die vriendskappe van Dawid en Jonatan, Rut en Naomi asook dié van Paulus en Timoteus was tussen mense met ’n redelike groot ouderdomsverskil (Rut 1:16, 17; 1 Korintiërs 4:17). Kan jy jou vriendskappe uitbrei om weduwees en ander ongetroudes in te sluit? Dink ook aan diegene wat nuwelinge in jou buurt is. Hulle het dalk bande met die meeste of al hulle vriende verbreek deur te verhuis of deur hulle lewenswyse te verander. Moenie vir ander wag om jou op te soek nie. As jy ’n Christen is, kan jy blywende vriendskappe aanknoop deur Paulus se raad toe te pas: “In broederliefde moet julle tere geneentheid vir mekaar hê. Neem die leiding in eerbetoning aan mekaar.”—Romeine 12:10.
Ons kan vriendskappe beskou as ’n manier waarop ons kan gee. Jesus het gesê dat mense vir ons sal gee as ons altyddeur gee. Hy het ook getoon dat dit groter geluk verskaf om te gee as om te ontvang (Lukas 6:38; Handelinge 20:35). Het jy al mense van verskillende agtergronde ontmoet? Die internasionale byeenkomste van Jehovah se Getuies het bewys dat mense van verskillende kulture ware en blywende vriendskappe kan aanknoop wanneer hulle die aanbidding van God gemeen het.
Hoe om vriendskapsbande te versterk
Ongelukkig maak mense wat skynbaar vriende is mekaar soms seer. Skadelike skinderpraatjies, vertroue wat geskend is, ’n gebrek aan waardering—dit is van die dinge wat baie pynlik is wanneer dit van iemand kom wat jy as ’n ware vriend beskou het. Wat kan ’n mens in sulke situasies doen?
Stel ’n goeie voorbeeld. Doen alles in jou vermoë om ander onnodige hartseer te spaar. Op party plekke is dit algemeen vir vriende om met ander se swakhede te spot. Maar ongevoelige behandeling of bedrieëry sal vriende nie nader aan mekaar bring nie, al sê hulle dat hulle ‘somaar speel’.—Spreuke 26:18, 19.
Span jou in om vriendskappe te behou. Misverstande ontstaan soms wanneer vriende te veel van mekaar verwag. ’n Vriend wat siek is of wat deur ’n ernstige probleem oorweldig word, sal heel moontlik nie so hartlik soos gewoonlik wees nie. Probeer om onder sulke omstandighede begrip te toon en ondersteuning te verleen.
Los probleme vinnig en vriendelik op. Doen dit privaat indien moontlik (Matteus 5:23, 24; 18:15). Maak seker dat jou vriend weet dat jy ’n goeie verhouding wil handhaaf. Opregte vriende vergewe mekaar (Kolossense 3:13). Sal jy daardie soort vriend wees—’n vriend wat sterker aanhang as ’n broer?
Om oor vriendskappe te lees en te dink, is net ’n begin. Laat ons gepaste stappe doen as ons eensaam is, en ons sal nie lank eensaam wees nie. As ons ons inspan, kan ons ware vriende maak. Met party sal ons ’n spesiale band vorm. Maar niemand kan God, die grootste Vriend, se plek inneem nie. Net Jehovah kan ons ten volle ken, verstaan en ondersteun (Psalm 139:1-4, 23, 24). Daarbenewens bied sy woord ’n wonderlike hoop vir die toekoms—’n nuwe wêreld waarin dit moontlik sal wees om vir ewig ware vriende te hê.—2 Petrus 3:13.
[Prente op bladsy 5]
Dawid en Jonatan het ware vriendskap geniet, en ons kan ook