Vrae van lesers
Wat het die apostel Paulus bedoel toe hy gesê het dat hy ‘die dinge vergeet wat agter is en hom uitstrek na die dinge wat voor is’? (Filippense 3:13). Kan ’n mens iets doelbewus vergeet?
Nee, in die meeste gevalle kan ons nie doelbewus iets uit ons geheue uitwis nie. Feit is dat ons baie van die dinge vergeet wat ons graag wil onthou en baie dinge onthou wat ons eerder sou wou vergeet. Wat het Paulus dan bedoel toe hy die woorde in Filippense 3:13 opgeteken het? Die konteks help ons om dit te verstaan.
In Filippense hoofstuk 3 beskryf Paulus sy ‘redes om vertroue in die vlees te stel’. Hy praat van sy indrukwekkende Joodse agtergrond en sy ywer vir die Wet—dinge wat in die nasie Israel vir hom baie voordele ingehou het (Filippense 3:4-6; Handelinge 22:3-5). Tog het hy hierdie voordele verwerp en dit as ’t ware as verlies beskou. Waarom? Omdat hy iets beters gevind het—“die oortreffende waarde van die kennis van Christus Jesus”.—Filippense 3:7, 8.
Paulus se hoofdoel was om “die vroeër opstanding uit die dode” te verkry—en nie ’n posisie in hierdie wêreld nie (Filippense 3:11, 12). Daarom skryf hy: “Ek vergeet die dinge wat agter is en strek my uit na die dinge wat voor is, en ek streef na die doel vir die prys van God se roeping na bo deur middel van Christus Jesus” (Filippense 3:13, 14). Toe Paulus gesê het dat hy ‘die dinge wat agter is, vergeet’, het hy nie bedoel dat hy “die dinge wat agter is” op die een of ander manier uit sy verstand uitgewis het nie. Hy het dit klaarblyklik nog onthou, aangesien hy in die vorige verse daarvan praat. Daarbenewens gebruik hy in die oorspronklike Grieks ’n vorm van die werkwoord wat op ’n voortgesette daad dui en nie op iets wat voltooi is nie. Hy sê “vergeet” en nie “het vergeet” nie.
Die Griekse woord wat met “vergeet” (e·pi·lan·thaʹno·mai) vertaal is, het fyn betekenisverskille, waarvan een “onbesorg oor” of “nalaat” is. Volgens die Exegetical Dictionary of the New Testament (geredigeer deur Horst Balz en Gerhard Schneider) is dit wat “vergeet” in Filippense 3:13 beteken. Paulus het nie voortdurend aan die dinge gedink waarvan hy afstand gedoen het nie. Hy het geleer om dit van min belang te beskou. Dit was “’n klomp vullis” in vergelyking met die hemelse hoop.—Filippense 3:8.
Hoe is Paulus se woorde vandag van toepassing? Wel, ’n Christen het dalk, soos Paulus, opofferinge gemaak om God te dien. Hy het moontlik ’n goeie loopbaan prysgegee om in die voltydse diens te wees. Of hy is dalk lid van ’n ryk gesin wat hom onterf het omdat hulle teen die waarheid is. Sulke opofferinge is prysenswaardig, maar dit is nie iets waaraan ’n mens gedurig dink nie. ’n Christen “vergeet die dinge wat agter is”, hou op om daaroor besorg te wees, vanweë die wonderlike toekoms wat op hom wag.—Lukas 9:62.
Die beginsel agter Paulus se woorde kan miskien op ’n ander manier toegepas word. Sê nou ’n Christen het sonde beoefen voor hy aangaande God geleer het? (Kolossense 3:5-7). Of gestel hy het, nadat hy ’n Christen geword het, ’n ernstige sonde gepleeg en is deur die gemeente gedissiplineer (2 Korintiërs 7:8-13; Jakobus 5:15-20). Wel, as hy werklik berouvol is en sy weë verander het, is hy “skoon gewas” (1 Korintiërs 6:9-11). Wat gebeur het, is verby. Hy sal dalk nooit letterlik vergeet wat hy gedoen het nie—trouens, hy sal verstandig wees as hy uit die ondervinding leer sodat hy die sonde nie weer pleeg nie. Maar hy “vergeet” in die sin dat hy homself nie voortdurend veroordeel nie. (Vergelyk Jesaja 65:17.) Aangesien hy op grond van Jesus se offerande vergewe is, probeer hy nie daaraan terugdink nie.
In Filippense 3:13, 14 beskryf Paulus homself as ’n hardloper in ’n wedloop wat hom ‘uitstrek’ om die doel te bereik. ’n Hardloper kyk vorentoe, nie agtertoe nie. ’n Christen moet insgelyks na die seëninge voor hom kyk, nie na die dinge wat agter is nie. Paulus sê ook: “As julle in enige opsig ’n ander geestesneiging het, sal God die bogenoemde gesindheid aan julle openbaar” (Filippense 3:15). Bid dus tot God om jou te help om hierdie beskouing aan te kweek. Vul jou verstand met God se gedagtes wat in die Bybel gevind word (Filippense 4:6-9). Peins oor Jehovah se liefde vir jou en die seëninge wat jy as gevolg daarvan geniet (1 Johannes 4:9, 10, 17-19). Dan sal Jehovah jou deur middel van heilige gees help om nie besorg te wees oor wat jy agtergelaat het nie. Jy sal eerder, soos Paulus, na ’n wonderlike toekoms uitsien.—Filippense 3:17.