Lê jou op voorlesing toe
“Terwyl ek kom, moet jy voortgaan om jou toe te lê op openbare voorlesing, op vermaning, op onderrigting.”—1 TIMOTEUS 4:13.
1. Hoe kan ons by Bybellees baat vind?
JEHOVAH GOD het die mens die wonderlike vermoë gegee om te leer lees en skryf. Hy het ook sy Woord, die Bybel, voorsien sodat ons goed onderrig kan word (Jesaja 30:20, 21, NW). Die bladsye van die Bybel stel ons as ’t ware in staat om met godvresende aartsvaders soos Abraham, Isak en Jakob te “wandel”. Ons kan godvrugtige vroue soos Sara, Rebekka en die lojale Moabitiese vrou Rut “sien”. Ja, en ons kan “hoor” hoe Jesus Christus sy Bergpredikasie lewer. Ons kan hierdie genot en goeie onderrigting uit die Heilige Skrif verkry as ons goeie lesers is.
2. Wat toon dat Jesus en sy apostels goed kon lees?
2 Die volmaakte man Jesus Christus het ongetwyfeld die vermoë gehad om uitstekend te lees, en hy het die Hebreeuse Geskrifte beslis baie goed geken. Toe Jesus deur die Duiwel versoek is, het hy dus herhaaldelik daarna verwys en gesê: “Daar staan geskrywe” (Matteus 4:4, 7, 10). By een geleentheid in die sinagoge in Nasaret het hy ’n deel van Jesaja se profesie in die openbaar gelees en dit op homself toegepas (Lukas 4:16-21). Wat van Jesus se apostels? In hulle geskrifte het hulle dikwels uit die Hebreeuse Geskrifte aangehaal. Hoewel die Joodse leiers Petrus en Johannes as ongeleerde en gewone mense beskou het omdat hulle nie aan die Hebreeuse skole van hoër onderwys onderrig is nie, toon hulle Goddelik geïnspireerde briewe duidelik dat hulle goed kon lees en skryf (Handelinge 4:13). Maar is die vermoë om te lees werklik belangrik?
“Gelukkig is hy wat hardop lees”
3. Waarom is dit só belangrik om die Skrif en Christelike publikasies te lees?
3 As ons juiste kennis van die Skrif inneem en dit toepas, kan dit tot die ewige lewe lei (Johannes 17:3). Jehovah se Getuies besef dus dat dit lewensbelangrik is om die Heilige Skrif te lees en te bestudeer, asook die Christelike publikasies wat God deur die “getroue en verstandige slaaf”-klas van gesalfde Christene voorsien (Matteus 24:45-47). Trouens, deur spesiaal saamgestelde Wagtoring-publikasies te gebruik, is duisende al geleer om te lees, en sodoende het hulle lewegewende kennis van God se Woord verkry.
4. (a) Waarom bring dit geluk mee as ons God se Woord lees, bestudeer en toepas? (b) Wat het Paulus vir Timoteus aangaande voorlesing gesê?
4 Dit bring geluk mee as ons God se Woord lees, bestudeer en toepas. Dit is die geval omdat ons God sodoende behaag en eer, sy seën ontvang en vreugde smaak. Jehovah wil hê dat sy knegte gelukkig moet wees. Daarom het hy die priesters beveel om sy Wet aan die mense van eertydse Israel voor te lees (Deuteronomium 31:9-12). Toe Esra die kopiïs en ander die Wet voorgelees het aan al die mense wat in Jerusalem byeen was, is die betekenis daarvan duidelik gemaak, en dit het tot “groot vreugde” gelei (Nehemia 8:7-9, 13). Die Christenapostel Paulus het later vir sy medewerker Timoteus gesê: “Terwyl ek kom, moet jy voortgaan om jou toe te lê op openbare voorlesing, op vermaning, op onderrigting.”—1 Timoteus 4:13.
5. Hoe word geluk met lees verbind in Openbaring 1:3?
5 Openbaring 1:3 toon duidelik dat ons geluk daarvan afhang of ons God se Woord lees en toepas. Dit sê vir ons: “Gelukkig is hy wat hardop lees en dié wat die woorde van hierdie profesie hoor en wat die dinge onderhou wat daarin geskrywe staan; want die vasgestelde tyd is naby.” Ja, ons moet die profetiese woorde van God in Openbaring en in die hele Skrif hardop lees en dit hoor. Die persoon wat werklik gelukkig is, skep “behae . . . in die wet van Jehovah, en in sy wet lees hy dag en nag met ’n gedempte stem”. Die gevolg? “Alles wat hy doen, voer hy voorspoedig uit” (Psalm 1:1-3, vgl. NW). Dit is dus om goeie redes dat Jehovah se organisasie elkeen van ons aanspoor om sy Woord op ons eie, as gesinne en saam met vriende te lees en te bestudeer.
Konsentreer en peins
6. Wat is Josua beveel om te lees, en hoe was dit voordelig?
6 Hoe kan jy die grootste voordeel daaruit trek wanneer jy God se Woord en Christelike publikasies lees? Jy sal dit waarskynlik voordelig vind om te doen wat Josua, ’n godvresende leier van eertydse Israel, gedoen het. Hy is beveel: “Hierdie wetboek moenie uit jou mond wyk nie, en jy moet dag en nag met ’n gedempte stem daarin lees, sodat jy nougeset mag handel volgens alles wat daarin geskrywe staan; want dan sal jy jou weg suksesvol maak en dan sal jy wys optree” (Josua 1:8, NW). ‘Om met ’n gedempte stem te lees’, beteken dat jy die woorde saggies vir jouself sê. Dit is ’n geheuehulp, want die materiaal word in die verstand ingeprent. Josua moes “dag en nag”, oftewel gereeld, in God se Wet lees. Sodoende sou hy suksesvol wees en wys optree wanneer hy sy godgegewe verantwoordelikhede nakom. As jy God se Woord ook gereeld lees, kan dit jou op ’n soortgelyke wyse help.
7. Waarom moet ons nie toelaat dat spoed ’n faktor is wanneer ons God se Woord lees nie?
7 Moenie toelaat dat spoed ’n faktor is wanneer jy God se Woord lees nie. As jy jou voorgeneem het om tyd opsy te sit om die Bybel of ’n Christelike publikasie te lees, kan jy gerus jou tyd neem. Dit is veral belangrik wanneer jy studeer met die doel om betekenisvolle gedagtes te onthou. En wanneer jy lees, moet jy konsentreer. Ontleed die Bybelskrywer se woorde. Vra jou af: ‘Wat bedoel hy? Wat moet ek met hierdie inligting doen?’
8. Hoe vind ’n mens daarby baat as jy peins wanneer jy die Skrif lees?
8 Neem tyd om te peins terwyl jy die Heilige Skrif lees. Dit sal jou help om Bybelverslae te onthou en skriftuurlike beginsels toe te pas. As jy oor God se Woord peins en die gedagtes sodoende in jou verstand inprent, sal dit jou ook in staat stel om met oortuiging te praat en aan mense wat opregte vrae vra goeie antwoorde te gee pleks van iets te sê waaroor jy dalk later spyt sal wees. ’n Goddelik geïnspireerde spreuk sê: “Die hart van die regverdige dink ná om te antwoord.”—Spreuke 15:28.
Assosieer nuwe gedagtes met oues
9, 10. Hoe kan jou Bybellees betekenisvoller word as jy nuwe skriftuurlike gedagtes assosieer met dié wat jy reeds ken?
9 Die meeste Christene moet erken dat hulle voorheen nie veel kennis van God, sy Woord en sy voornemens gehad het nie. Maar vandag kan hierdie Christenbedienaars by die skepping en die mens se sondeval begin en die doel van Christus se offerande verduidelik, van die vernietiging van hierdie goddelose stelsel van dinge vertel en toon hoe gehoorsame mense ewige lewe op ’n paradysaarde gaan geniet. Dit is grotendeels moontlik omdat hierdie knegte van Jehovah “die kennis van God” ingeneem het deur die Bybel en Christelike publikasies te bestudeer (Spreuke 2:1-5). Hulle het die nuwe gedagtes wat hulle geleer het geleidelik geassosieer met die oues wat hulle reeds verstaan het.
10 Dit is voordelig en lonend om nuwe skriftuurlike gedagtes te assosieer met oues wat jy reeds ken (Jesaja 48:17, NW). Wanneer Bybelwette, -beginsels of selfs ietwat abstrakte begrippe voorkom, moet jy dit assosieer met dit wat jy reeds weet. Kyk hoe die inligting verband hou met wat jy geleer het aangaande “die patroon van gesonde woorde” (2 Timoteus 1:13). Soek inligting wat jou sal help om jou verhouding met God te versterk, jou Christelike persoonlikheid te verbeter of jou sal help om Bybelwaarhede aan ander te verkondig.
11. Wat kan jy doen wanneer jy iets oor gedrag in die Bybel lees? Lig dit toe.
11 Wanneer jy iets in die Bybel oor gedrag lees, moet jy probeer vasstel watter beginsel daarby betrokke is. Peins daaroor, en besluit wat jy onder soortgelyke omstandighede sal doen. Jakob se seun Josef het beginselvas geweier om hom saam met Potifar se vrou aan geslagsonsedelikheid skuldig te maak en het gevra: “Hoe kan ek dan hierdie groot kwaad doen en sondig teen God?” (Genesis 39:7-9). In hierdie roerende verslag vind ’n mens ’n grondbeginsel—geslagsonsedelikheid is ’n sonde teen God. Jy kan hierdie beginsel in jou gedagte met ander stellings in God se Woord assosieer, en dit sal goed wees as jy dit kan onthou wanneer jy voor die versoeking kom om jou aan so ’n oortreding skuldig te maak.—1 Korintiërs 6:9-11.
Visualiseer skriftuurlike gebeurtenisse
12. Waarom moet jy die Bybelverslae visualiseer terwyl jy dit lees?
12 Om gedagtes in jou verstand in te prent terwyl jy lees, moet jy die gebeure visualiseer. Sien voor jou geestesoog die omgewing, die huise, die mense. Hoor hulle stemme. Ruik die brood wat in ’n oond bak. Leef jou in die tonele in. Dan sal jou lees ’n aangrypende ondervinding wees, want jy sien moontlik ’n antieke stad, bestyg ’n hoë berg, verwonder jou oor die wonders van die skepping of assosieer met manne en vroue van groot geloof.
13. Hoe sal jy beskryf wat in Rigters 7:19-22 opgeteken is?
13 Gestel jy lees Rigters 7:19-22. Visualiseer wat daar plaasvind. Rigter Gideon en driehonderd dapper Israelitiese manne het by die buitenste lyn van die Midianitiese laer stelling geneem. Dit is omtrent tienuur die aand, die begin van die “middelste nagwaak”. Die Midianitiese wagte is so pas uitgesit, en die kamp van Israel se slapende vyande is in duisternis gehul. Kyk! Gideon en sy manne is met ramshorings toegerus. Hulle hou groot waterkruike oor fakkels wat in hulle linkerhand is. Skielik blaas die drie groepe van honderd elk op die ramshorings, breek die kruike, hou die fakkels omhoog en skreeu: “Die swaard van die HERE en van Gideon!” Jy kyk na die laer. Die Midianiete begin vlug en skreeu! Terwyl die driehonderd aanhou om op hulle ramshorings te blaas, rig God die swaarde van die Midianiete teen mekaar. Midian is op die vlug gejaag, en Jehovah het aan Israel die oorwinning gegee.
Leer kosbare lesse
14. Hoe kan Rigters hoofstuk 9 gebruik word om ’n kind te leer hoe belangrik nederigheid is?
14 Ons kan baie lesse leer deur God se Woord te lees. Byvoorbeeld, jy wil dalk jou kinders laat besef hoe belangrik dit is om nederig te wees. Wel, dit behoort maklik te wees om te visualiseer en te begryp wat in die profesie van Gideon se seun Jotam gesê is. Begin deur Rigters 9:8 te lees: “Eendag”, het Jotam gesê, “het die bome gegaan om ’n koning oor hulle te salf.” Die olyfboom, die vyeboom en die wingerdstok wou nie oor ander regeer nie. Maar die onbeduidende steekdoring het met graagte ’n regeerder geword. Nadat jy die verslag hardop vir jou kinders gelees het, kan jy verduidelik dat die kosbare plante waardige persone voorgestel het wat nie koning oor hulle mede-Israeliete wou wees nie. Die steekdoring, wat net vir brandhout goed was, het die koningskap voorgestel van trotse Abimeleg, ’n moordenaar wat oor ander wou heers, maar wat aan sy einde gekom het ter vervulling van Jotam se profesie (Rigters, hoofstuk 9). Watter kind wil grootword en soos ’n steekdoring wees?
15. Hoe word die belangrikheid van lojaliteit in die boek Rut beklemtoon?
15 Die Bybelboek Rut toon duidelik hoe belangrik lojaliteit is. Gestel lede van jou gesin lees daardie verslag om die beurt hardop en probeer inneem wat dit sê. Jy sien die Moabitiese vrou Rut op reis na Betlehem saam met haar weduweeskoonmoeder, Naomi, en jy hoor Rut sê: “U volk is my volk, en u God is my God” (Rut 1:16). ’n Mens sien hoe die hardwerkende Rut are optel agter die snyers op Boas se land. Jy hoor hoe hy haar prys en sê: “Die hele stadspoort van my volk weet dat jy ’n deugsame vrou is” (Rut 3:11). Nie lank daarna nie trou Boas met Rut. In ooreenstemming met die swaershuweliksreëling gee sy deur middel van Boas geboorte aan ’n seun “vir Naomi”. Rut word ’n stammoeder van Dawid en uiteindelik van Jesus Christus. Sy het dus ’n ‘volkome loon’ ontvang. Wat meer is, diegene wat die skriftuurlike verslag lees, leer ’n waardevolle les: Wees lojaal aan Jehovah, en jy sal ryklik geseën word.—Rut 2:12; 4:17-22; Spreuke 10:22; Matteus 1:1, 5, 6.
16. Watter toets het die drie Hebreërs deurstaan, en hoe kan hierdie verslag ons help?
16 Die verslag van die Hebreërs Sadrag, Mesag en Abednego kan ons help om onder beproewinge getrou aan God te wees. Visualiseer die gebeure terwyl Daniël hoofstuk 3 hardop gelees word. ’n Groot goue beeld toring uit bo die dal Dura, waar Babiloniese amptenare byeengekom het. Sodra hulle die geluid van die musiekinstrumente hoor, val hulle neer en aanbid die beeld wat koning Nebukadnesar opgerig het. Dit wil sê almal behalwe Sadrag, Mesag en Abednego. Eerbiedig, dog ferm, sê hulle vir die koning dat hulle sy gode nie sal dien en die goue beeld nie sal aanbid nie. Hierdie jong Hebreërs word in ’n gloeiende vuuroond gegooi. Maar wat gebeur? Toe die koning in die oond kyk, sien hy vier manne, die een ‘lyk soos ’n godeseun’ (Daniël 3:25). Die drie Hebreërs word uit die oond gehaal, en Nebukadnesar loof hulle God. Dit was lonend om die verslag te visualiseer. En wat ’n les is dit tog wat getrouheid aan Jehovah onder beproewing betref!
Vind daarby baat om die Bybel as ’n gesin te lees
17. Noem kortliks van die heilsame dinge wat jou gesin kan leer deur die Bybel saam te lees.
17 Jou gesin kan baie voordele geniet as julle gereeld tyd opsy sit om die Bybel saam te lees. As jy by Genesis begin lees, kan jy die skepping visualiseer en die mens se oorspronklike Paradystuiste sien. Jy kan die ondervindinge van die getroue aartsvaders en hulle gesinne meemaak en die Israeliete volg terwyl hulle droogvoets deur die Rooi See trek. Jy kan sien hoe die herderseun Dawid die Filistynse reus Goliat verslaan. Jou gesin kan sien hoe Jehovah se tempel in Jerusalem gebou word, hoe dit deur Babiloniese hordes vernietig word en kyk hoe dit onder leiding van goewerneur Serubbabel herbou word. Saam met nederige herders naby Betlehem kan jy die engele se aankondiging van Jesus se geboorte hoor. Jy kan besonderhede aangaande sy doop en sy bediening kry, sien hoe hy sy menslike lewe as ’n losprys opoffer en in die vreugde van sy opstanding deel. Vervolgens kan jy saam met die apostel Paulus reis en sien hoe gemeentes gestig word namate die Christelike geloof versprei. Daarna kan jou gesin, in die boek Openbaring, die apostel Johannes se luisterryke visioen van die toekoms geniet, onder andere Christus se Duisendjarige Heerskappy.
18, 19. Watter wenke word gegee in verband met gesinsbybellees?
18 As julle die Bybel as ’n gesin hardop lees, moet julle dit duidelik en met entoesiasme lees. Wanneer julle gedeeltes in die Skrif lees, kan een gesinslid—moontlik die vader—die woorde van die algemene verslag lees. Ander kan die rolle van Bybelkarakters vertolk en hulle deel met gepaste gevoel lees.
19 Namate julle die Bybel as ’n gesin lees, sal julle leesvermoë heel moontlik verbeter. Julle kennis van God sal waarskynlik toeneem, en dit behoort julle nader aan hom te bring. Asaf het gesing: “Wat my betref, dit is vir my goed om nader aan God te kom. In die Soewereine Heer Jehovah het ek my toevlug gestel, om al u werke bekend te maak” (Psalm 73:28, NW). Dit sal julle gesin help om soos Moses te wees, wat “standvastig gebly [het] asof hy die Onsigbare sien”, dit wil sê Jehovah God.—Hebreërs 11:27.
Lees en die Christelike bediening
20, 21. Hoe hou ons predikingsopdrag verband met die vermoë om te lees?
20 Ons begeerte om “die Onsigbare” te aanbid, moet ons beweeg om goeie lesers te probeer wees. Die vermoë om goed te lees, help ons om uit God se Woord te getuig. Dit help ons beslis om met die Koninkrykspredikingswerk voort te gaan wat Jesus aan sy volgelinge opgedra het toe hy gesê het: “Gaan . . . en maak dissipels van mense van al die nasies, en doop hulle in die naam van die Vader en van die Seun en van die heilige gees, en leer hulle om alles te onderhou wat ek julle beveel het” (Matteus 28:19, 20; Handelinge 1:8). Die getuieniswerk is die belangrikste werk van Jehovah se volk, en ons leesvermoë help ons om dit uit te voer.
21 Dit verg inspanning om ’n goeie leser en ’n bekwame onderrigter van God se Woord te wees (Efesiërs 6:17). ‘Doen dus jou uiterste bes om jou goedgekeur voor God te stel deur die woord van die waarheid reg te hanteer’ (2 Timoteus 2:15). Brei jou kennis van die Skrif uit en vergroot jou vermoë as ’n Getuie van Jehovah deur jouself op voorlesing toe te lê.
Wat is jou antwoorde?
◻ Hoe hou geluk verband met die lees van God se Woord?
◻ Waarom moet ’n mens peins oor wat jy in die Bybel lees?
◻ Waarom moet ’n mens assosiasie en visualisering gebruik wanneer jy die Skrif lees?
◻ Wat is party van die lesse wat ons uit Bybellees kan leer?
◻ Waarom moet julle die Bybel hardop lees as ’n gesin, en hoe hou lees met die Christelike bediening verband?
[Prente op bladsy 13]
Wanneer julle die Bybel as ’n gesin lees, moet julle die verslae visualiseer en oor die betekenis daarvan peins