Is jy ’n gebalanseerde pionier?
DIE vader se oë straal terwyl hy met oop arms vir sy dogtertjie wag om haar eerste wankelrige treë te gee. Wanneer sy skielik omval, moedig hy haar aan om weer te probeer. Hy weet dat sy binnekort die balans en krag sal hê om te kan loop.
Op soortgelyke wyse het ’n nuwe pionierbedienaar dalk tyd en aanmoediging nodig voordat hy of sy die nodige balans verkry om as ’n voltydse Koninkryksverkondiger suksesvol te wees. Baie pioniers dien al dekades lank met vreugde. ’n Paar verloor hulle balans as gevolg van onverwagte veranderinge in hulle omstandighede. Party verloor selfs hulle vreugde. In een land verlaat 20 persent van die pioniers die pionierdiens binne die eerste twee jaar nadat hulle die voltydse diens betree het. Wat kan daartoe aanleiding gee dat ’n pionier hierdie uiters vreugdevolle diens prysgee? Kan enigiets gedoen word om hierdie terugslae te vermy?
Hoewel swak gesondheid, finansiële behoeftes en gesinsverantwoordelikhede daartoe kan lei dat party die voltydse diens verlaat, het ander versuim om goeie balans te handhaaf wat hulle verskeie Christelike verpligtinge betref, en dit het vir hulle ’n struikelblok geword. Balans impliseer “’n toestand waarin geen enkele deel, element, faktor of invloed ’n ander oorskadu nie of nie in die juiste verhouding tot die ander is nie”.
Jesus Christus het vir sy dissipels gewys hoe die predikings- en dissipelmaakwerk gedoen moes word. Hy het ook in sy eie bediening getoon hoe balans gehandhaaf moet word. Jesus het getoon dat die Joodse godsdiensleiers nie gebalanseerd was nie deur vir hulle te sê: “Julle gee die tiende van die kruisement en die dille en die komyn, maar julle het die gewigtiger sake van die Wet verontagsaam, naamlik geregtigheid en barmhartigheid en getrouheid. Dit was verpligtend om hierdie dinge te doen, maar sonder om die ander te verontagsaam.”—Matteus 23:23.
Hierdie beginsel is vandag net so geldig, veral vir die pionierbediening. Aangespoor deur entoesiasme en goeie bedoelings het party die pionierdiens betree sonder om deeglik daarvoor voor te berei of alles wat daarby betrokke is in aanmerking te neem (Lukas 14:27, 28). Ander het so betrokke geraak by die veldbediening dat hulle ander belangrike aspekte van die Christelike geloof nagelaat het. Hoe kan hulle balans verkry en handhaaf?
Bly geestelik sterk!
Jesus het nooit sy geestelikheid verwaarloos nie. Hoewel die skares wat na hom kom luister het en gekom het om genees te word baie van sy tyd in beslag geneem het, het hy tyd vir peinsende gebed ingeruim (Markus 1:35; Lukas 6:12). Om vandag ’n gebalanseerde pionier te wees, vereis ook dat ’n mens goed gebruik maak van alle voorsienings om geestelik sterk te bly. Paulus het geredeneer: “Leer jy, die een wat iemand anders leer, dan nie jouself nie?” (Romeine 2:21). Dit sal beslis ’n fout wees om al jou tyd aan die predikingswerk te bestee terwyl jy nalaat om tyd vir behoorlike persoonlike studie en gereelde gebed in te ruim.
Koemiko is al twee dekades ’n pionier. Hoewel sy drie kinders en ’n ongelowige man het, het sy uit ondervinding geleer dat die beste tyd vir haar om die Bybel te lees en te studeer saans is, net voor sy bed toe gaan. Terwyl sy studeer, let sy veral op punte wat sy in die veldbediening kan gebruik sodat sy haar daaglikse bediening vars en interessant kan hou. Ander suksesvolle pioniers staan voor die res van die gesin op om in die stil oggendure geestelik verkwik te word. Jy sit dalk ander gepaste tye opsy om vir vergaderinge voor te berei en die jongste Christelike publikasies te lees. As jy graag jou vreugde in die bediening wil behou, kan jy nie persoonlike studie inderhaas doen of afskeep nie.
Handhaaf balans wat gesinsverantwoordelikhede betref
Ouers wat pioniers is, moet ook in gedagte hou dat ’n groot deel van “die wil van Jehovah” vir hulle met die fisiese, emosionele en geestelike versorging van hulle eie gesin verband hou (Efesiërs 5:17; 6:1-4; 1 Timoteus 5:8). Soms kan selfs ’n gelowige maat en gesinslede vrees dat hulle nie bemoediging en ondersteuning van die vrou en moeder sal ontvang wanneer sy eers as ’n pionier begin dien nie. Sulke gevoelens kan daartoe lei dat hulle nie so entoesiasties is oor die feit dat sy ’n pionier wil wees nie. Maar met goeie beplanning en oorleg kan balans gehandhaaf word.
Baie pioniers probeer al hulle predikingswerk doen wanneer ander lede van die gesin nie by die huis is nie. Koemiko, wat vroeër gemeld is, is saam met haar gesin wanneer hulle ontbyt eet, sien haar man en kinders soggens af en is weer tuis voordat hulle huis toe kom. Sy gebruik Maandae om verskeie maaltye vooraf gaar te maak sodat sy ontspanne kan wees en maaltye saam met haar gesin kan eet in plaas van in die kombuis te werskaf. Dit help ook om meer as een taak tegelykertyd te doen, soos om ander huiswerk te doen terwyl jy maaltye voorberei. Sodoende vind Koemiko selfs tyd om haar kinders se vriende oor te nooi en spesiale geregte vir hulle voor te berei.
Namate kinders hulle tienerjare ingaan, het hulle dikwels meer aandag van hulle ouers nodig om die nuwe emosies, begeertes, twyfelgedagtes en vrese wat hulle oorweldig te verwerk. Dit vereis dat ’n ouer wat ’n pionier is wakker moet wees en sy rooster sal moet aanpas. Kyk na Hisako, ’n pionier met drie kinders. Wat het sy gedoen toe haar oudste dogter haar vreugde en entoesiasme vir Christelike vergaderinge en velddiens begin verloor het as gevolg van die invloed van wêreldse skoolvriende? Wat haar dogter werklik nodig gehad het, was om die waarheid haar eie te maak en heeltemal daarvan oortuig te word dat afgeskeidenheid van die wêreld die beste weg is.—Jakobus 4:4.
Hisako sê: “Ek het besluit om weer elke dag die basiese leerstellings in die Paradys op aarde-boek met haar te studeer. Eers kon ons net ’n paar minute studeer, aangesien my dogter dikwels van hewige maag- en hoofpyne gekla het wanneer dit tyd was vir die studie. Maar ek het die studie gereeld gehou. Ná ’n paar maande het haar gesindheid baie verbeter, en dit het in ’n kort tydjie tot haar toewyding en doop gelei.” Nou geniet Hisako die voltydse bediening saam met haar dogter.
Vaders wat pioniers is, moet ook versigtig wees dat hulle nie so daarby betrokke raak om na belangstellendes in die veld en na hulle gemeentelike verpligtinge om te sien dat hulle nalaat om hulle groeiende kinders die nodige emosionele ondersteuning en leiding te gee wat hulle verdien nie. Dit is nie iets wat ’n man op sy vrou moet afskuif nie. ’n Besige Christen- ouer man wat al lank ’n pionier is en ook ’n klein sakeonderneming bedryf, maak tyd om afsonderlik met elkeen van sy vier kinders te studeer (Efesiërs 6:4). Daarbenewens berei hy met sy gesin vir die weeklikse vergaderinge voor. Gebalanseerde pioniers verwaarloos nie hulle gesin materieel of geestelik nie.
Ekonomiese balans
’n Behoorlike beskouing van daaglikse behoeftes is nog ’n gebied waarin pioniers goeie balans moet probeer handhaaf. Hier kan ons weer eens baie uit Jesus se goeie voorbeeld en raad leer. Hy het gewaarsku dat ons nie te besorg oor materiële belange moet wees nie. Hy het sy dissipels eerder aangemoedig om die Koninkryk eerste te stel en het belowe dat God vir hulle sou sorg soos hy vir die res van sy skepping sorg (Matteus 6:25-34). Deur hierdie goeie raad te volg, is baie pioniers in staat om jare lank in die voltydse diens te bly, en Jehovah het hulle pogings geseën om ‘brood vir elke dag’ te kry.—Matteus 6:11.
Die apostel Paulus het mede-Christene gemaan om ‘hulle redelikheid aan alle mense bekend te laat word’ (Filippense 4:5). Redelikheid sal ongetwyfeld vereis dat ons op gepaste wyse na ons gesondheid omsien. Gebalanseerde pioniers probeer hard om redelikheid in hulle lewenswyse en in hulle gesindheid teenoor materiële dinge te openbaar, met die wete dat ander hulle gedrag waarneem.—Vergelyk 1 Korintiërs 4:9.
Jongmense wat die pionierdiens betree, moenie misbruik maak van hulle ouers se vrygewigheid nie. As hulle in hulle ouers se huis woon, is dit ’n blyk van goeie balans en waardering om met die huiswerk te help en om ’n deeltydse werk te hê wat hulle in staat sal stel om tot die huishoudelike koste by te dra.—2 Tessalonisense 3:10.
Gebalanseerde pioniers ’n ware seën
Jy is dalk ’n pionier wat hard werk om behoorlike balans te behou. Hou moed. Net soos ’n klein kindjie tyd nodig het om te leer om hom te balanseer en te loop, sê baie ervare pioniers dat dit hulle tyd geneem het om ’n balans te verkry sodat hulle al hulle verpligtinge kon nakom.
Om persoonlike studie te doen, na gesinslede om te sien en in hulle eie materiële behoeftes te voorsien, is van die gebiede waarin pioniers ’n balans probeer handhaaf. Verslae toon dat baie pioniers hulle verantwoordelikhede op ’n voortreflike wyse nakom. Hulle is waarlik ’n seën vir die gemeenskap, en hulle strek Jehovah en sy organisasie tot eer.