Wat vereis God van ons?
“Dít is wat die liefde vir God beteken, dat ons sy gebooie onderhou; en tog is sy gebooie nie swaar nie.”—1 JOHANNES 5:3.
1, 2. Waarom verbaas dit ons nie dat God vereistes het vir diegene wat hom op aanneemlike wyse wil aanbid nie?
“MY GODSDIENS is goed genoeg vir my!” Is dit nie wat mense dikwels sê nie? Maar die vraag moet in werklikheid wees: “Is my godsdiens vir God welgevallig?” Ja, God het vereistes vir diegene wat hom op aanneemlike wyse wil aanbid. Moet dit ons verbaas? Nie eintlik nie. Gestel jy besit ’n pragtige huis, een wat jy onlangs ten duurste opgeknap het. Sou jy sommer enigiemand toelaat om daar te woon? Natuurlik nie! Enige potensiële huurder sal aan jou vereistes moet voldoen.
2 Jehovah God het eweneens hierdie aardse tuiste aan die mensdom gegee. Onder sy Koninkryksheerskappy gaan die aarde binnekort “opgeknap” word—in ’n pragtige paradys omskep word. Jehovah gaan dit teweegbring. Hy het met groot persoonlike opoffering sy enigverwekte Seun gegee om dit moontlik te maak. God moet tog sekerlik vereistes hê vir diegene wat daar gaan woon!—Psalm 115:16; Matteus 6:9, 10; Johannes 3:16.
3. Hoe het Salomo opgesom wat God van ons verwag?
3 Hoe kan ons uitvind wat God se vereistes is? Jehovah het die wyse koning Salomo geïnspireer om op te som wat Hy van ons verwag. Nadat hy nagedink het oor alles wat hy nagestreef het—waaronder rykdom, bouprojekte, sy belangstelling in musiek, en romantiese liefde—het Salomo tot hierdie besef gekom: “Die slot van die saak, ná alles gehoor is, is: Vrees die ware God en onderhou sy gebooie. Want dit is die hele verpligting van die mens.”—Prediker 12:13, NW.
‘Sy gebooie is nie swaar nie’
4-6. (a) Waarna verwys die Griekse woord wat met “swaar” vertaal word? (b) Waarom kan ons sê dat God se gebooie nie swaar is nie?
4 “Onderhou sy gebooie.” Dit is basies wat God van ons verwag. Vra hy te veel? Glad nie. Die apostel Johannes sê vir ons iets baie gerusstellends oor God se gebooie, of vereistes. Hy het geskryf: “Dít is wat die liefde vir God beteken, dat ons sy gebooie onderhou; en tog is sy gebooie nie swaar nie.”—1 Johannes 5:3.
5 Die Griekse woord wat met “swaar” vertaal word, kan verwys na iets wat moeilik is om na te kom of moeilik is om te vervul. In Matteus 23:4 word dit gebruik om die “swaar vragte”, die mensgemaakte reëls en tradisies, te beskryf wat die skrifgeleerdes en Fariseërs die mense opgelê het. Begryp jy die sin van die slotsom waartoe die bejaarde apostel Johannes kom? God se gebooie is nie ’n swaar las nie, en dit is ook nie vir ons te moeilik om dit te onderhou nie. (Vergelyk Deuteronomium 30:11.) Inteendeel, as ons God liefhet, maak dit ons gelukkig om aan sy vereistes te voldoen. Dit gee ons ’n kosbare geleentheid om ons liefde vir Jehovah te bewys.
6 Ten einde ons liefde vir God te toon, moet ons presies weet wat hy van ons verwag. Laat ons nou vyf van God se vereistes bespreek. Terwyl ons dit doen, hou gerus in gedagte wat Johannes geskryf het: ‘God se gebooie is nie swaar nie.’
Neem kennis van God in
7. Waarvan hang ons redding af?
7 Die eerste vereiste is om kennis van God in te neem. Kyk na Jesus se woorde wat in Johannes hoofstuk 17 opgeteken staan. Die agtergrond is die laaste nag van Jesus se lewe as ’n mens. Jesus het ’n groot deel van die aand daaraan gewy om sy apostels vir sy vertrek voor te berei. Hy was besorg oor hulle toekoms, hulle ewige toekoms. Hy het sy oë na die hemel opgeslaan en vir hulle gebid. In vers 3 lees ons: “Dít beteken die ewige lewe, dat hulle kennis inneem van u, die enigste ware God, en van die een wat u uitgestuur het, Jesus Christus.” Ja, hulle redding het daarvan afgehang of hulle “kennis inneem” van God sowel as van Christus. Dit geld ook vir ons. Om redding te verkry, moet ons hierdie kennis inneem.
8. Wat beteken dit om ‘kennis in te neem’ van God?
8 Wat beteken dit om ‘kennis in te neem’ van God? Die Griekse woord wat hier vertaal word met “kennis inneem” beteken “om te leer ken, om in te sien” of “om ten volle te verstaan”. Let ook op dat die vertaling “kennis inneem” impliseer dat dit ’n voortdurende proses is. Om kennis van God in te neem, beteken dus om hom nie oppervlakkig nie, maar intiem te leer ken, om ’n insigryke vriendskap met hom op te bou. ’n Onafgebroke verhouding met God lei daartoe dat ons kennis van hom voortdurend toeneem. Hierdie proses kan vir ewig aanhou, want ons sal nooit alles omtrent Jehovah leer nie.—Romeine 11:33.
9. Wat kan ons omtrent Jehovah leer uit die boek van die skepping?
9 Hoe neem ons kennis van God in? Daar is twee boeke wat ons kan help. Die een is die boek van die skepping. Die dinge wat Jehovah geskep het—lewende sowel as lewelose dinge—gee ons insig in die soort persoon wat hy is (Romeine 1:20). Beskou ’n paar voorbeelde. Die gedruis van ’n majestueuse waterval, die dreuning van die golwe gedurende ’n storm, die sterrehemel op ’n helder nag—leer sulke dinge ons nie dat Jehovah ’n God ‘sterk in krag’ is nie? (Jesaja 40:26, NW). ’n Kindjie wat lag terwyl hy kyk hoe ’n hondjie sy stert jaag of ’n katjie met ’n bolletjie wol speel—gee dit nie te kenne dat Jehovah, “die gelukkige God”, ’n sin vir humor het nie? (1 Timoteus 1:11). ’n Smaaklike maaltyd, die aangename reuk van blomme in ’n grasveld, die helder kleure van ’n delikate vlinder, voëlgesang in die lente, die hartlike omhelsing van ’n geliefde—sien ons nie in hierdie dinge dat ons Skepper ’n God van liefde is wat wil hê dat ons die lewe moet geniet nie?—1 Johannes 4:8.
10, 11. (a) Watter dinge omtrent Jehovah en sy voornemens kan ons nie uit die boek van die skepping leer nie? (b) Die antwoorde op watter vrae word slegs in die Bybel gevind?
10 Ons kan egter nie alles omtrent Jehovah uit die boek van die skepping leer nie. Byvoorbeeld: Wat is God se naam? Waarom het hy die aarde geskep en die mens daarop geplaas? Waarom laat God goddeloosheid toe? Wat hou die toekoms vir ons in? Vir die antwoorde op hierdie vrae moet ons na die ander boek gaan wat kennis van God bekend maak—die Bybel. Daarin openbaar Jehovah dinge omtrent homself, met inbegrip van sy naam, sy persoonlikheid en sy voornemens—inligting wat ons uit geen ander bron kan verkry nie.—Exodus 34:6, 7; Psalm 83:18, NW; Amos 3:7.
11 In die Skrif verskaf Jehovah ook noodsaaklike kennis aangaande ander persone van wie ons moet weet. Byvoorbeeld, wie is Jesus Christus, en watter rol speel hy in die uitvoering van Jehovah se voornemens? (Handelinge 4:12). Wie is Satan die Duiwel? Op watter maniere mislei hy mense? Hoe kan ons voorkom dat hy ons mislei? (1 Petrus 5:8). Die lewensreddende antwoorde op hierdie vrae word slegs in die Bybel gevind.
12. Hoe sal jy verduidelik waarom dit nie ’n las is om kennis van God en sy voornemens in te neem nie?
12 Is dit ’n las om sulke kennis van God en sy voornemens in te neem? Geensins! Kan jy nog onthou hoe jy gevoel het toe jy geleer het dat God se naam Jehovah is, dat sy Koninkryk die Paradys op hierdie aarde gaan herstel, dat hy sy geliefde Seun as ’n losprys vir ons sondes gegee het, sowel as ander kosbare waarhede? Was dit nie soos om ’n sluier van onkunde te verwyder en dinge vir die eerste keer duidelik te sien nie? Om kennis van God in te neem, is nie ’n las nie. Dit is ’n plesier!—Psalm 1:1-3; 119:97.
Voldoen aan God se standaarde
13, 14. (a) Watter veranderinge moet ons in ons lewe aanbring namate ons kennis van God inneem? (b) Van watter onrein dade vereis God dat ons ons onthou?
13 Namate ons kennis van God inneem, besef ons dat ons veranderinge in ons lewe moet aanbring. Dit bring ons by die tweede vereiste. Ons moet aan God se standaarde vir regte gedrag voldoen en sy waarheid aanneem. Wat is waarheid? Maak dit werklik vir God saak wat ons glo en wat ons doen? Baie mense dink vandag blykbaar nie so nie. ’n Verslag wat in 1995 deur die Anglikaanse Kerk gepubliseer is, het te kenne gegee dat dit nie as ’n sonde beskou moet word wanneer mense saamlewe sonder om getroud te wees nie. “Die uitdrukking ‘lewe in sonde’ laat ’n stigma ontstaan en help nie”, het ’n kerkbiskop gesê.
14 Beteken dit dan dat dit nie meer ’n sonde is om “in sonde te lewe” nie? Jehovah laat ons baie duidelik verstaan hoe hy oor sulke gedrag voel. Sy Woord, die Bybel, sê: “Laat die huwelik onder almal eerbaar wees en die huweliksbed sonder verontreiniging, want God sal hoereerders en egbrekers oordeel” (Hebreërs 13:4). Voorhuwelikse geslagsomgang is miskien volgens liberale geestelikes en kerkgangers nie ’n sonde nie, maar dit is ’n ernstige sonde in God se oë! En dieselfde geld vir egbreuk, bloedskande en homoseksualiteit (Levitikus 18:6; 1 Korintiërs 6:9, 10). God vereis dat ons ons onthou van sulke dade, wat hy as onrein beskou.
15. Hoe raak God se vereistes die manier waarop ons ander behandel sowel as dit wat ons glo?
15 Dit is egter nie genoeg om ons te onthou van dade wat God as sonde beskou nie. God se vereistes raak ook die manier waarop ons ander behandel. In die gesin verwag hy dat die man en die vrou mekaar moet liefhê en respekteer. God vereis dat ouers na die materiële, geestelike en emosionele behoeftes van hulle kinders omsien. Hy sê vir kinders om gehoorsaam aan hulle ouers te wees (Spreuke 22:6; Kolossense 3:18-21). En wat van ons opvattings? Jehovah God wil hê dat ons opvattings en gebruike moet vermy wat van valse aanbidding afkomstig is of wat in stryd is met die suiwer waarheid wat in die Bybel geleer word.—Deuteronomium 18:9-13; 2 Korintiërs 6:14-17.
16. Verduidelik waarom dit nie ’n las is om aan God se standaarde vir regte gedrag te voldoen en sy waarheid aan te neem nie.
16 Is dit vir ons ’n las om aan God se standaarde van regte gedrag te voldoen en sy waarheid aan te neem? Nie wanneer ons aan die voordele dink nie—huwelike waarin die man en vrou mekaar liefhet en vertrou, en nie huwelike wat weens ontrouheid verbrokkel nie; huise waar kinders voel dat hulle ouers hulle liefhet en wil hê, en nie gesinne waarin kinders voel dat hulle ouers hulle nie liefhet nie, hulle verwaarloos en nie wil hê nie; ’n skoon gewete en goeie gesondheid, en nie ’n skuldgevoel en ’n liggaam wat deur vigs of ’n ander seksueel oordraagbare siekte geteister word nie. Jehovah se vereistes ontneem ons beslis nie enigiets wat ons nodig het om die lewe te geniet nie!—Deuteronomium 10:12, 13.
Toon respek vir lewe en bloed
17. Hoe beskou Jehovah lewe en bloed?
17 Namate jy jou lewe in ooreenstemming met God se standaarde bring, besef jy hoe kosbaar die lewe werklik is. Laat ons nou ’n derde vereiste van God bespreek. Ons moet respek vir lewe en bloed toon. Lewe is vir Jehovah heilig. Dit behoort te wees, want hy is die Bron van die lewe (Psalm 36:9, NW). Ja, selfs die lewe van ’n ongebore kind binne sy moeder is vir Jehovah kosbaar! (Exodus 21:22, 23, vgl. NW). Bloed verteenwoordig lewe. Gevolglik is bloed ook heilig in God se oë (Levitikus 17:14). Dit behoort ons dus glad nie te verbaas dat God van ons verwag om sy beskouing van lewe en bloed te hê nie.
18. Wat vereis Jehovah se beskouing van lewe en bloed van ons?
18 Wat vereis respek vir lewe en bloed van ons? As Christene stel ons ons lewe nie onnodig in gevaar net ter wille van opwinding nie. Ons is veiligheidsbewus en daarom maak ons seker dat ons motors en huise veilig is (Deuteronomium 22:8). Ons gebruik nie tabak, kou nie betelneut of gebruik nie vir die plesier dwelms wat verslawend is of die verstand benewel nie (2 Korintiërs 7:1). Omdat ons na God luister wanneer hy sê ‘onthou julle van bloed’, laat ons nie toe dat bloed in ons liggaam oorgetap word nie (Handelinge 15:28, 29). Hoewel ons die lewe liefhet, sal ons nie ons teenswoordige lewe probeer red deur God se wet te oortree en sodoende ons vooruitsig op ewige lewe op die spel plaas nie!—Matteus 16:25.
19. Verduidelik hoe ons daarby baat vind as ons respek vir lewe en bloed toon.
19 Is dit vir ons ’n las om lewe en bloed as heilig te beskou? Hoegenaamd nie! Dink hieraan. Is dit ’n las om vry te wees van longkanker wat deur tabakrokery veroorsaak word? Is dit ’n las om verstandelike en fisiese verslawing aan skadelike dwelms vry te spring? Is dit ’n las om nie vigs, hepatitis of ’n ander siekte deur ’n bloedoortapping op te doen nie? Dit is duidelik dat dit in ons belang is om skadelike gewoontes en gebruike te vermy.—Jesaja 48:17.
20. Hoe het een gesin daarby baat gevind om God se beskouing van lewe te hê?
20 Beskou hierdie ondervinding. ’n Paar jaar gelede het ’n Getuievrou wat ongeveer drie en ’n half maande swanger was een aand begin bloei, en sy is inderhaas hospitaal toe geneem. Nadat ’n dokter haar ondersoek het, het sy gehoor hoe hy vir ’n verpleegster sê dat hulle die swangerskap sal moet beëindig. Aangesien sy geweet het hoe Jehovah die lewe van ’n ongebore kind beskou, het sy volstrek geweier dat hulle ’n aborsie uitvoer, en sy het vir die dokter gesê: “As my baba nog lewe, los hom daar!” Sy het nou en dan weer gebloei, maar etlike maande later het sy vroeg geboorte gegee aan ’n gesonde babaseuntjie wat nou 17 jaar oud is. Sy het verduidelik: “Ons het ons seun alles vertel, en hy het gesê hy is bly dat hy nie weggegooi is nie. Hy besef dat dit net is omdat ons Jehovah dien dat hy vandag lewe.” Dit was gewis nie vir hierdie gesin ’n las om God se beskouing van lewe te hê nie!
Dien saam met Jehovah se georganiseerde volk
21, 22. (a) Saam met wie verwag Jehovah dat ons hom moet dien? (b) Hoe kan God se georganiseerde volk geïdentifiseer word?
21 Ons is nie die enigstes wat die nodige veranderinge moet aanbring om ons lewe in ooreenstemming met God se standaarde te bring nie. Jehovah het ’n volk op hierdie aarde, en hy verwag van ons om hom saam met hulle te dien. Dit bring ons by die vierde vereiste. Ons moet Jehovah saam met sy geesgerigte organisasie dien.
22 Maar hoe kan God se georganiseerde volk geïdentifiseer word? Volgens die standaarde wat in die Skrif uiteengesit word, het hulle ware liefde onder mekaar, hulle het diep respek vir die Bybel, hulle eer God se naam, hulle verkondig sy Koninkryk en hulle is geen deel van hierdie goddelose wêreld nie (Matteus 6:9; 24:14; Johannes 13:34, 35; 17:16, 17). Daar is slegs een godsdiensorganisasie op hierdie aarde wat al hierdie kenmerke van die ware Christelike geloof het—Jehovah se Getuies!
23, 24. Hoe kan ons dit toelig dat dit nie ’n las is om Jehovah saam met sy georganiseerde volk te dien nie?
23 Is dit ’n las om Jehovah saam met sy georganiseerde volk te dien? Beslis nie! Inteendeel, dit is ’n kosbare voorreg om die liefde en ondersteuning van ’n wêreldwye gesin van Christenbroers en -susters te hê (1 Petrus 2:17). Stel jou voor jy is ’n skipbreukeling wat in die water spartel om bo te bly. Wanneer jy voel dat jy dit nie meer kan uithou nie, steek iemand in ’n reddingsboot sy hand na jou toe uit. Ja, daar is ander oorlewendes! In die reddingsboot maak jy en die ander beurte om na die strand te roei, en julle tel ander oorlewendes langs die pad op.
24 Is ons nie in ’n soortgelyke situasie nie? Ons is uit die gevaarlike “water” van hierdie goddelose wêreld in die “reddingsboot” van Jehovah se aardse organisasie ingetrek. Daarin dien ons sy aan sy terwyl ons die “strande” van ’n regverdige nuwe wêreld nader. As die druk van die lewe ons langs die pad laat moeg raak, is ons tog so dankbaar vir die bystand en bemoediging van ware Christenmetgeselle!—Spreuke 17:17.
25. (a) Watter verpligting het ons teenoor diegene wat nog in die “water” van hierdie goddelose wêreld is? (b) Watter vereiste van God sal in die volgende artikel bespreek word?
25 Wat van ander mense—opregtes van hart wat nog in die “water” is? Ons het ’n verpligting om hulle te help om in Jehovah se organisasie te kom, nie waar nie? (1 Timoteus 2:3, 4). Hulle het hulp nodig om te leer wat God vereis. Dit bring ons by die vyfde vereiste van God. Ons moet lojale verkondigers van God se Koninkryk wees. Die volgende artikel sal bespreek wat dit alles behels.
Onthou jy?
◻ Waarom is God se gebooie nie swaar nie?
◻ Hoe neem ons kennis van God in?
◻ Waarom is dit nie ’n las om aan God se standaarde vir regte gedrag te voldoen en om sy waarheid aan te neem nie?
◻ Wat vereis God se beskouing van lewe en bloed van ons?
◻ Saam met wie verwag God dat ons hom moet dien, en hoe kan hulle geïdentifiseer word?
[Prente op bladsy 18]
Ons leer omtrent Jehovah uit die boek van die skepping en uit die Bybel
[Erkennings]
Krokodil: Met vergunning van Australian International Public Relations; beer: Safari-Zoo of Ramat-Gan, Tel Aviv