Vrae van lesers

“Die Wagtoring” van 15 Augustus 1996 het gesê: “‘Vlees’ Wat Hulle Aan Jehovah Se Kant Geskaar Het, [sal] In Die finale Fase Van Die Verdrukking Gered Word.” Gee Dit Te Kenne Dat Baie Nuwelinge Hulle Ná Die Eerste Fase Van Die Groot Verdrukking Aan God Se Kant Sal Skaar?

Dit is nie wat bedoel is nie.

Jesus se woorde in Matteus 24:22 sal hoofsaaklik in die toekoms in vervulling gaan wanneer mense deur die eerste deel van die komende groot verdrukking, die aanval op godsdiens, gered word. Die artikel het gesê: “Onthou dat ‘vlees’, van die gesalfde oorblyfsel sowel as van die ‘groot skare’, reeds gered sal wees wanneer Babilon die Grote vinnig en finaal in die eerste deel van die verdrukking aan haar einde kom.”

Sulke getroues sal nie in gevaar verkeer wanneer Jesus en sy hemelse leërs in die finale deel van die groot verdrukking optree nie. Maar wie sal dan daardie fase van die verdrukking oorleef? Openbaring 7:9, 14 toon dat ’n groot skare wat ’n aardse hoop het dit sal oorleef. Wat van geesgesalfde Christene? Die “Vrae van lesers” in Die Wagtoring van 15 Augustus 1990 het bespreek waarom ons nie dogmaties kan wees oor wanneer die gesalfde oorblyfsel na die hemel geneem sal word nie. Die onlangse artikel (15 Augustus 1996) het dus nie ’n definitiewe antwoord gegee nie en het die algemene stelling gemaak: “Net so sal ‘vlees’ wat hulle aan Jehovah se kant geskaar het in die finale fase van die verdrukking gered word.”

Wat die vraag betref of enige nuwelinge die waarheid sal kan leer en hulle aan God se kant sal kan skaar nadat die groot verdrukking begin het, kan ons let op Jesus se woorde wat in Matteus 24:29-31 opgeteken is. Ná die begin van die verdrukking sal die teken van die Seun van die mens verskyn. Jesus het gesê dat al die stamme van die aarde hulleself sal slaan en sal weeklaag. Hy het niks gesê van mense wat skielik agterkom wat aangaan, berou toon, hulle aan God se kant skaar en ware dissipels word nie.

Net so verskyn die Seun van die mens, in die gelykenis van die skape en die bokke, en as regter skei hy mense op grond van wat hulle in die verlede gedoen of nie gedoen het nie. Jesus het niks gesê van mense wat lank reeds bokagtige eienskappe geopenbaar het en dan skielik omdraai en soos skape word nie. Hy kom om te oordeel op grond van wat mense reeds getoon het hulle is.—Matteus 25:31-46.

Maar daar is weer eens geen rede om dogmaties hieroor te wees nie. God se volk, die gesalfdes sowel as die groot skare, weet wat hulle nou moet doen—die predikings- en dissipelmaakwerk (Matteus 28:19, 20; Markus 13:10). Dit is nóú die tyd om die vermaning ter harte te neem: “As sy medewerkers versoek ons julle ook dringend om nie die onverdiende goedhartigheid van God aan te neem en die doel daarvan te mis nie. Want hy sê: ‘In ’n aanneemlike tyd het ek jou verhoor, en in ’n dag van redding het ek jou gehelp.’ Kyk! Nou is die besonder aanneemlike tyd. Kyk! Nou is die dag van redding.”—2 Korintiërs 6:1, 2.